Thawhtan zing a ni a, a hma zan khan meng rei em em lo mah ila, chumi tuk kher chuan thawh kha a peihawm loh leh tlat pek a. Vawiin chu sikul kal tur a ni tih kha rilru ah a awm kur a, tichuan, peih leh peih lo chuan dar 6:30 vel chuan muang changin kan tho a, thingpui in ngai ta vak lo chu, engdang mah ti hmasa lo chuan ka han in phih fai vel a. Thil tul pawimawh hmasa tih zawh meuh chuan dar 7 a lo hnaih thuak tawh thin a, zing kara lehkha zir kha chu khawi lam hi a ni ringawt.
Dar 7 a rik meuh chuan sikul uniform, uluk tak maia 'mother' in a lo nawh mar sa thlap chu ka han inbel tan ta a. Ka tih thin dan pangngai angin, insiam paha hla ngaihthlak tur chu kan remkhawm pah a, tichuan ring em ema zai pui chung chuan ka insiam a, insiam ran chu har tak hi a ni ringawt. Mipa ni ve ta na na na chu insiam rei em em thu awm suh, darthlalang a inen kawi vel kha awm lem lo a, dar 7:30 chuan ka insiam zo ve leh mai a.
Ka chaw ei tur pawh, a lo in khawrh fel leh vek tawh, 'mother' nge nge hi a che rang thin teh e. Tichuan, chaw chu ka'n fight leh te te a, dar 7:45 velah chuan chhuak turin ka in peih fel tawh a. Theihnghilh ka nei lo tih ka finfiah vek hnu chuan ka chhuak a, a ngai te bawkin Chda leh Maia te chuan kan in bul kawngpui ah chuan min lo nghak leh a. Kan han inhmuh veleh chuan, "I va tlai ve" hi kan han ti rual ti tih deuh vek a. A tu ber nge tlai pawh a hriat theih loh. Maia hi Durtlang lampang anih avang hian hma deuhin a rawn chhuk vang vang a, tichuan Chda sawm pahin an inah bike a dah thin a. Chda nen an pahnihin kan inah min rawn sawm chho leh thin a ni.
Treasury square a mi dangdai tak tak kan hmuh thin te kha, a va lo nuihzatthlak thin tak em. Tichuan, bus chu kan han nghak a, hmanhmawh taka chhuak si e ti lo chuan, bus stand ah hian kan ding char char zel a. Dar 8 pelh deuh hret 8:05 emaw 8:10 velah emaw hian kan han chuang ve chhaps zel a. E taka, TT Khuma leh Greatman-a te hi bus stand atang hian kan rual hian an kal ve deuh ziah bawkin ka hria. Tichuan, bus fare te kan han pe a, bus chu kan ta emaw tih mai tur hian kan han titi ring thei thin khawp a. A hma zana kan thil tih emaw, a hma weekend vela kan thil tawn leh eng eng emaw kan han sawi leh thin a. Hriat loh karin Khatla bus stand kan thleng leh ta der mai. Khatla ah pawh chuan a ngai te te in OPa, RSa, CBa leh Johnny a te chu tho phang hmel tih hriat tak hian an lo thu thap a. OPa chuan tu emaw ber ta Maths homework a tih loh chu bus stand ah chuan a lo copy zat zat zel a. Kan bus chuanna a rawn chuan ve chang chu a awm a, mahse an rawn chuang ngai meuh lo. Kan hnu fe ah an rawn chuang thin a, an rawn tlai ve ziah lehnghal.
Class chu lum ti em em hian kan han thleng a, class chhungah John-a leh PV-a hi an lo thleng tawh ve deuh ziah a, anih loh pawhin PV-a tal hi chu a lo thleng tawh thin. Kan tlai fe tawh emaw tih pawh hian a kal hmasa ber pawl chu kan la ni tho zel. Kan thlen hnu rei vak lo ah Eric-a leh Ruati kha an rawn thleng leh a, chuan chumi hnu ah bell rik rual deuh thaw hian U Puia leh Bethel-i kha an rawn thleng ve leh thin a. Sir Bojen-a'n hming a han lam a, a ngai te bawkin OPa te group chu an tlai leh a, prayer neih lai emaw vel hian an rawn thleng a, chu chu an tuk tin tihdan a ni.
Free period kha kan thlahlel thei em em a, Sir Ibo-a class a nih phei chuan kan free lutuk hi a ni tawp mai. Amah kha kan ngam bawk a, zirtirtu awm lo ang chiah hi a ni ringawt zel a nih kha. Sir Ibo-a tluka zirtirtu friendly kha an awm leh angem le aw? hi ka ti vawng vawng zel. English class ah peih lo zeta commerce class a kan phei thap thap thin lai te, VE class Bro. Principal in a lak avanga present loh hreha kan kal tawk tawk thin te. Subject hrang hrang kan han nei zel a, lunch break kha kan nghak thleng ngai lo. Short break ah chuan tiffin chu kan han phawrh sap sap a, John-a fian 'ropui' tak mai te kha, a lo nuihzatthlak thin teh e. A bag atang khan a rawn phawrh chhuak zal zal zel a. Tiffin ei ho leh pawh a chakawm e.
OPa nena magic kan han show thin mai te kha, a lo nuihzatthlak. Kan risk kual vel mai mai a, tu tu emaw kha chuan mak ti em em khan an lo en thin anih kha. Tlai bana, Sammys vai ho kan han show khum leh thin te pawh kha. Mak hi an han ti mai mai thin khawp anih kha. CB-a leh sikul kal loh kha alawm le, mak hi ka ti thin. Vawiin ah ruah a tlak deuh sep sep chuan a tukah CB-a hmel hmuh tur a awm ngai lo. :D First term ah vawi 22 a kal lo a, a la complain zui, ti em em ka kal lo lo hi an ti ngei a. Aw, a hunlai kha chuan a lo nuihzatthlak. OPa'n Sir Bojen-a hnenah, "He should take TC" a lo tih chhen thin te kha. Eric-a leh hmeichhe ho inhau thin te kha, Miss Teresa leh Miss Rita i class a text book kan inchhiar chhawk thin te, class chhunga kan inkhelh thin te, computer lab a kan thut rei theih zia te kha.
Aw, kan tih tauh tum mawlh mai kha. Principal hova meeting kan neih tum te kha, meeting kan neih laklawh laia tlai tawka Eric a nui heu chunga, a rawn lut ve chhap chhap te. OPa ding ngam chiah si lova, kil khat atanga "Yes, thats true" a lo tih bul bul lai te, Johnny-a a tawng fiahlo fiahlo a thu a sawi ve nuap nuap te. A tuka lung kan thiar tauh tauh te kha, a lo ngaihawm mai mai mange.
E, kan kual thui mah mah tawh e. Tichuan, sikul ban dar a rawn ri a, prayer ni awm tak, mahni duh duh dana kan sawi nuaih nuaih thin mai te kha, kan sawi zawh rual rualin rang em em in kan han tlan chhuak a. Kalkawngah a remchang chang kan chhaih thla char char a, Kulikawn thleng chu kan kal thla ho a. John leh Upuia kha chuan Bethel-i kha an lo nghak thin a, a dang zawng kha chu a ngai te bawkin kan saloon "Sammys" ah bawk chuan kan in kap lut leh ta a. Kan han bengchheng thei mai mai khawp a, a dawr neitute pawhin, nangni hi chu in bengchheng a, mahse in awm loh chuan a khawharthlak an tih thin te kha. A lo ni awm tak e a, ka ti thin. Sammys hi chu class 10 kan nih lai atang tawha kan in kah luh ve deuh ziahna kha ania, kan ti lar ve chiang alawm. A hnu lamah phei kha chuan keimahni thianho chauh nilo pawh kha an rawn lut ve zut zut zel a. A lar zual zingah, Hmachhuana, Bena, Jerry, Zama tih angreng te, leh tunge an hming pawh ka hriat loh an awm nual. Tichuan, Sammys ah chuan sikul naupang dang zawng zawng haw rem thleng thak kan han thu thap a, kan titi luai luai a. Thu reng ta na na na chu duh loh thleng thlenga thil ei a awl duh khawp mai, a tawpah kan pe leh tawk zel a, pawisa a uihawm duh thin. Kan luh rual rual hian kan thil duh hi kan sawi nuaih nuaih a, an hre seng si lo, kan duh ang a nih loh deuh kha chuan kan han sawisel ve khanglang lehnghal a.
A khat tawkin tu emaw berin sikul naupang dang haw rem tawh leh tawh loh hi a zuk enthla leh thin a. A zualpui haw rem hnu, mi tlemte chauh an awm chuan kan thil ei man te kan pe a, kan han chhuak thla a. Bus ah chuan chuang mai tange ti lo chuan, Bus stand bul garage (mami varte te garage) kawtah chuan kan han thru khawmuang leh te te a. Bus kawngkhar pahnih nei kan han chang a, chutah pawh a hnung bera thutna a awm chauhin kan chuang thin. Kan chuan meuh chuan ni hian tlak hi a lo tum tawh thin a, kan haw tlai ve thei khawp chuan ka hria. Kan han chuang thap a, a sir bera thut kha kan duhlo vek a, a lai lampang kha kan inchuh leh luih luih zel a. A sir bera thu hi chu an zak ngawih ngawih zel, a chhan ber pawh, Thakthing Bus stand ah GCS skul naupang hi an lo la ding teuh zel a. Kan hmel tilang si lo hian kan han bye bye tak tak mai zel anih kha. A sir bera thu tan chuan in hliah ngaihna awm si lo, an zak chem chem zel hi a ni ringawt. Chu mai pawh a la ni lo, kal kawnga mi lo kal remchang hi chu kan bye bye kawng tluan parh zel. Vawikhat pawh kan inthurual a, a hma chuan tumahin bye bye loh tur kan tia, bus tlan dawn veleh kan en thap anga, kan bye bye rual ang kan tia. Chutah bus chu an tlan dawn chiah a, GCS ho chu kan en thap a, kan bye bye ta chiam mai a. Bus lah chu tlan tih a awm leh der si lo, a zahthlak duh chem chem hle.
E khai, ka duhtawk rih phawt mai teh ang. Nakinah phur deuh hunah kan ziak leh ang. Hei, inkawm ngeih hlawm tak si chu kan han awm darh ta nuaih mai a, in ngaih a na duh khawp mai. Sir Nishi-a sawi dan takah, "The earth is round, we will meet again, sure... "
July 22, 2007
No comments:
Post a Comment