Monday, February 18, 2008

Khami Ni Kha

Kan sikul kal naa kan zirtirtu pakhat, kan Physics latu Miss Mildred-i chuan pasal a nei dawn a. Ani chuan mawihnaiah tiin min sawm der ve a. Keini, tawngkam tha apiang um zel mai chu kan phur hlawm nasa kher mai. Class chhungah te chuan kal dan tur te chu an rel nak nak zel a. Kei erawh chu kal pawh ka tum lem lo, amaherawchu thiante ho an kal dawn vek bakah min sawm ve leh talh avang chuan kan kal ve ta chu a nia. A smart thei ang bera inchei tur an ti a, mahse, keini inti hliau hliau peih lem lo tan chuan a ho ngei mai. Kan smart peih chuang lem hlei law.

Awle, a hun a lo thleng ta, (ti leh thuai mai teh ang). Zing atang chuan ka'n insiam ve a. Smart deuha kal tur an tih avangin nectie te chu kan pai ve a. (Ka awrh lo ania, ka pai a ni mai zawk.) A hmuna ka awrh peih takin tih chauh a ni. Inngahkhawmna tur kan siam Cave kawt lamah chuan ka kal nghal a, kalkawngah Remruata ka tawk a, kan kal dun ta a. Remruata chu a smart bik kher mai, necktie te nen, a rawn in ha zaih mai a ni. Tichuan Cave kawt chu kan thleng a, tumah an lo la awm lova. Rei ang reng fe kan nghah hnu pawha an rawn la thlen mai loh avang chuan Cave chhungah kan vak kual dun ta vel mai mai a. Chumi hnu chuan an lo thlen tawh takin tiin kan va chhuak leh a. A ngai te bawkin tumah an lo la awm lo. Kan titi dun vel mai maia, chutihlai tak chuan rin loh tak maiin Rinzama a rawn thleng ve hlawl mai a. Ani chu rin loh tak maiin suit te nen a rawn induang zaih mai a. (Sikul leh hmun dangah chuan baggy tawk tawka inha hnuk thin kha a nia.) Nuih pawh a za lek lek alawm mawle. Tichuan, kan pathum chuan midang kan nghak a. An rawn thlen theih mai loh avangin Temple kawt lamah kan chhuk ta a. Kalkawngah chuan TK-a, Remsanga leh Biakzuala te kan tawk a. Remsanga chiah smart deuhin a rawn inchei a, TK-a leh BZ-a te chu inchei smart peih ngang lo an lo ni e. (hemi tum hi chuan). Tichuan, paruk kan ni ta a. Kan vai chuan Temple kawt lampang chu kan pan ta a. Tumah an lo la awm lo. Telephone mai ang u, kan ti a. TK-a leh kei chu PCO lam pan chuan kan kal nghal a, Amelia-i te kan phone a. Anni chuan kan rawn kal nghal, kei leh Hmangaihi leh Babie-i kan awm a ti a. Tichuan a hnu rei vak lovah an rawn thleng ta reng a. Anni rawn thlen hma hian K-i a rawn thleng hman tawh bawk a. Midang dang kan nghak khawmuang ta vel a ni. Chutia Amelia-i te ho pawh an rawn thlen hnu chuan kal dan tur chu kan sawi ho ta a. Mipa ho chu bus-in kan kal a, hmeichhe ho chu an no deuh avangin bus-ah an chuang ve lova.

Kan kalna tur hi a hla tham angreng viau a. Chawlhmun ah daih a ni. Tichuan, bus chuan kan chuang ta a, Vaivakawn thleng kan kal phawt a, tichuan, vaivakawn atang chuan C-i te in Kanan Veng-ah kan la leng leh te te a. Ruai kan theh hman chuan a tawk, tiin kan kal a nih chu!! Inkhawm pui lam chu khawi lam hi a ni ringawt. Tichuan C-i te in kan va thlen chuan a lo awm a, an thenawm lawka inneih naah lo kal a tum a, mahse kan va len avang chuan a kal leh ta lo. Fel ve tak a ni. Miss-te inneihnaa kal ve turin kan sawm char char a, mahse, kan sawm chhuak zo thlawis lo. C-i hi a fel reuh khawp, thingpui te min lum vel. Tichuan, a hnu rei fe hnuah kan chhuak leh ta a, thui fe min la rawn thlah zui. Kan chhuak chho leh ta a. Vaivakawn-ah chuan kan awm reng a. Bus-a rawn kal thei si lo. Taxi ho chuan min lo be ve sek bawk a, kal mai chu kan tum ta a. Taxi chuan. Bus rawn thleng thei bawk si lo. Mahse, pawisa kan khawtom leh ta. Kan nei lo hlawm ve ropui sia. Kan vai chuan paruk kan ni a, taxi pakhatah kan han inhnawh ta a nih kha. A tawt tha talh talh khawp mai. Tichuan, cheng sawmruk-in a daih chin chin kan chuang a. A bak chu ke in kan kal chhunzawm leh ta a. Ke a kalna tur chu a la thui zek mai lehnghal a. Hla em em pasarih vel kalpelh a ngai a nih chu! Kawng te lah chu metal loh te a ni a, pheikhawk leh kekawr tlang a bal duh ngei mai. Tichuan, muang chang chuan kan inchhuih thla ve beuh beuh ta a. Kalkawng kha a va lo nuam em. Kan kal reilo ngei mai. Kan thleng tep tawh a, kalkawngah chuan Biak In lam atanga mopa te in lam pan chuan motor a rawn tlan ta zut zut mai a. Keini thianzaho chiah chu ke chuan kan kal a, min rawn tlan lehpel zut zut a. Nakin hnu deuhvah chuan bus hian min rawn tlan lehpel dawn a, ngaiteh, he bus chhungah hian kan team hlir an lo chuang. Zaia te, El-a te, Fini te leh midang tam tak an rawn chuang khat vek. Bus kawngkhar an rawn hawng a, chuang ve turin min sawm a. Mahse, kan hnial fithla thak. Bus-a chuan ai chuan ke-in kal kan thlang zawk. Nuam kan ti laklawh tawh tlats. Kan va thleng ta a. (Shortcut leh zung zung tawh ang.) Kan titi ho vel a, chaw te kan ei ta a. Chaw ei tura kan intlar chu kan class teacher Miss Siami'n min lo hmu, kan thianho chu. Thla lakpui min lo chak ve em em a, a chhan chu, kan inchei smart hlawm em vang aniang. Smart ngai lem hlei lo kha. Tichuan chaw chu kan ei ta a, kan ei hnem leh hlawm ngei mai. Kan team chu a khawmin chaw kan ei a. Chaw ei kham chuan Miss te nupa pawh thla kan han lakpui ve kha. Hetah hian St. Paul's hmingin kan kal a, zirtirtute nen thla kan lakpui ho ta a ni. Kan ei zawh chuan hmawmsawm lam turin dawr lam kan pan a. Dawr kawtah chuan zawngte an lo khawi a, TK-a'n a chhaih tak tak a, zawngte pawh a ngawi dak mai. An in 'combi' tha khawp mai, thisen zawmpui nge nge.

Thil pakhat, kan chaw ei hma hian kan ril a lo tam hman tawh em em a. 'Thingpui' in tur kan zawng a, kei leh Rinzama leh TK-a te'n kan zawng hla peih zawk a, Remsanga, Remruata leh Bz-a te chu an lo kal hla peih ve lo a. In pakhatah kan lut a, naupang tereuhte te chiah an awm a. An hnenah chuan 'thingpui' an neih leh neih loh kan zawt a. Nei lo tiin min chhang a. In a vang ropui si, anmahni chiah chu In awmchhun a ni. Tichuan, kan let leh ta a nih kha. Riltam tawkin.

Chaw kan ei kham hnu khan, hawna tur kha bus an lo dah sa a. Kan thu thap a. Keimahni team ho (St. Paul's) bak kan awm lova. A nuam khawp mai. Haw kawngah Boney M an play a, a bengchheng a ni. Hmeichhe ho lah chu a zai ring thei ber ber an ni a. Ngaiteh, TK-a nen thlawhna atanga sipai inbiak dan te kan zir vel. Kei a seat hma deuhah ka thu a, TK-a a hnung chiahah. Tichuan, tukverah kan dak chhuak a, bus tlan chak lai te chuan kan inbe vel vak vak a, thaw a chham duh ngei mai. Bus conductor lah kha a la hot em em mai lehnghal a. Tape te kha ring tawk tawkin a play a. Nuam ve ham ham khawp mai. Thla te kan la a. Tichuan, kalkawngah a then then an chhuk zel a. K-i leh Remruata kha a chhuk hma zual an ni. Tichuan, midang ho zawng chu kan la chuang tlang a. Chanmari-ah kan chhuk vek a. El-a te inah thingpui in ho leh lawk ang u, an ti a. Tichuan, Ramhlun South lampang pan chuan kan kal ta a. El-a te inah kan hahchawl ta a. El-a'n an chhungkaw thlalak te min entir a, a u Veuwy album phei kha chu en kan inchuh luai luai ringawt. Kan * hlawm lutuks a. TK-a phei kha chuan pakhat a trick tlatin ka hria, ka hriat sual loh chuan. Hetihlai hi Vai puja lai a ni a, El-a te kawmthlang atangin lammual lam kan en a. A puak pup pup reng mai a. Kal ve kan chak ta tlat a. Keini thianho chu kan kal leh ta a nih kha. Thian dangte kalsanin, a bik takin Fini, Hmangaihi, Amelia-i leh MS-i te kha an khawngaihthlak khawp mai. Ka ngaihtuah let leh hian, engtin nge an haw tak, thlahtu an nei awm si lo. Zaia leh El-a lah kha chu an awm hmeks ringawt dawn si a. Kan thianho hi chu hriatthiam kan ngai a ni.

Tichuan, lammual lam pan chuan kan kalchhuak leh ta a. Bus-ah kan chuang phei a. A hmun kan va thlen chuan mi an lo tam khawp mai a. Hawi ila, lu hlir lu hlir ani ringawt a. Vai hmel lah hlir zuk ni a, a then thenah mizo hmel hmuh tur a awm ve. Tichuan, an programme te chu kan thlir ve ta a. Lam hmuhnawm tak tak te kan en a. Chutah le, rin loh tak maiin St. Paul's sikul naupang te, an item show turin i ko chhuak ang u, ti a an han puang mai chu. Kan lawm lutuk kan au vak vak ringawt. Tute nge ni ang aw, kan ti a. An hmel chiang deuha en kan lo tum a. OP-a, Lalnunhlima leh Agnes-i te chu kan hriat theih awmchhun an ni. OP-a chu kan thianho zinga mi a nih ang ngeiin, kan ko vak vak a, kan bye bye vel a. Ani pawh chuan a hre ve ni ngei tur a ni, stage atang chuan a rawn bye bye ve lauh lauh a. Lalnunhlima pawh bang bik chuang lo, an rawn vai dun lauh lauh a. An lam ta anih kha. Kan khek nasa hlawm kher mai, midang pawhin lam thiam an ti aniang. An kuk ruih ruih a. OP-a chu kan ko vak vak reng a, midang OP-a hre ngai meuh lo, kan bul vela vai awmkhawm te pawh chuan 'OP, OP' an ti ve sup sup mai. Nuihzatthlak ve tak chu a ni. An lam zawh hnu pawh chuan kan la thu reng a. Sipai hovin halpuah leh halmawi an hal vel chu kan la chang a. Item hrang hrang an entir zel a, OP-a leh Lalnunhlima te kha mipui zingah lo kalin keimahni chu min rawn zawngchhuak a. Kan han inhmu chu kan lawm hlawm kher mai, rinloh lam daih a ni bawk a. Tichuan participants ho awmna lamah min hruai an tum a. Kan kal ve mai bawk a. Mahse, gate vengtu sipai chuan luh a phal lo. A phal lo tih kan hre si lo. Rinzama chu chak deuhin a lo zu kal hmasa a, sipai chuan a lo rek chat a. A rawn nawr kir leh nghal a. Tichuan, luh chu kan dil ta a. A phal lo nasa kher mai. OP-a leh Lalnunhlima te chuan participants kan nia, St. Pauls atanga lo kal kan nia, an tih pawhin a phal duh der lo. Kan thin a rim ve hman tep a ni. (Ve khanglang chuanin). Beidawn tawh lamah mi pakhat hi a lo kal a, ani chuan enge thil awmzia a rawn ti a. Kan hrilhfiah ta a. Ani chuan sipai chu vai tawngin a bia a. Tichuan, luh chu a phal ta chauh a ni. Kan sikul naupang ho awmna lam chu kan pan ta a. Rinloh tak maiin kan class teacher Miss Siami te ho an lo awm. Kan zak deuh bawk si, haw har min ti tawh awm mange te kan ti a. Mahse, min lo chiau au tha viau a. Zah pawh a ziaawm deuh. OP-a te ho chuan ei tur rawn ei ve ru, min ti a. Mahse, keini engmah telna pawh nei lo chu kan ei duh lova. Kan inthlahrung ve deuh a. MZ-a te ho pawh an lo awm a, in ei loh chuan kan ei bik lovang an ti a, OP-a te, Lalnunhlima te chuan an ei ve duh der lo mai a. Kan ei ve duh loh avang chuan. (MZ-a hi 2005 Tumkau Day khan ka hmu a, bike a lo khalh vel a, intithei lutuks) A hnu chuan hawn kan rilruk deuh a, mahse, min la ui der ve a. La awm ve hrih turin min ngen a. Miss Siami te chuan, Participants ho tan bus an reserve a, chutah chuan in haw vek dawn nia, te min ti a. Tichuan, kan awm ve leh hrih ta a. Sipai thil hal vel chu kan thlir ta reng a, a nalh hlawm ngang mai. Chumi hnu chuan haw chu kan tum ta tak tak a, sipai ho bus-a haw pawh chu kan inthlahrung a. A chhan chu participants pawh kan ni ve si lo, entu mai mai kan ni si a. Mahse, kan haw loh chuan midang ho pawh chuan kan haw peih bik lo, in rualin kan lo haw dawn an ti vek si a. Tichuan, kan rual chuan kan sikul naupang ho zawng zawng chu an haw ve ringawt a, a inthlahrun awm duh ngei mai. Tichuan kan haw ta a. Rinzama a peng hmasa ber a, chutah kei, ka peng ve leh a. Kan in mangtha liam liam a. In han thlen meuh chuan rawl a na duh ngei mai. In silfai zawhah, ka mu hmeks ringawt, ka ke a kham lutuks a. Chumi hnu lawk darkar khat velah min rawn kova, Joseph, i thianpa nu-in a be duh che an rawn ti a. Ka inngaihtuah a, tu nu nge ni ang, tunge la haw lo an awm emaw ni chu aw, ka ti a. Phone chu kan la a, mahse a aw-ah chuan hai rual a ni lo, Miss Siami ngei mai a lo ni. Thianpa nu te biak tumin class teacher kan be theks mai a lo ni. Ani chuan i hawna a rei tawh leh tawh loh thu te min zawt a, midang an haw nghal leh haw nghal loh thu te. TK-a phone number te chu min rawn zawt a, kan inbiak zawh hnu chuan ka mu leh nghal hmeks ringawt. Kan class teacher nge nge min ngaihtuah thin ngei mai. A fel ka ti lo thei lo a ni.

A tuk chuan dar 8 dawnah ka thova, ka thawh hnu lawk minit 10 velah phone a rawn ri a. Ka la nghal a, Zaia a lo ni a, a thawh chiah thu leh nizan lamah Miss Siami'n a rawn phone che em? te min ti a. Kei chuan min phone thu te ka hrilh a, ani chuan nizan khan Miss Siami'n min rawn phone a, nangmah a zawh ang tho che kha min zawt a, midang phone number eng eng nge i hriat min ti a. Joseph-a phone number chiah ka hria, ka ti a. A rawn phone ve che ka ring a, a rawn ti a. Kan han nui dun char char a. Ka rawl thu te ka hrilh a. TK-a pawhin miss-in a phone thu min hrilh a. Rinzama pawhin min rawn phone a, mahse ka lo awm lova. Ka haw hnuah min lo hrilh a, ka ngaih a tha thei ngang lova, zan dar 10 velah miss chu keiman ka va phone a, a ti.

Khami Ni Kha kan ti reng tawh mai dawn chu a nia. A va lo nuihzatthlak mai mai tak. Revision test kan neih laia kei leh OP-a, Rinzama leh TK-a te thil tawn kha chu sawi lo mai ang.

No comments: