Monday, February 18, 2008

Medal ka dawng ve a...

Infiamna hi ka eizawnna tur chu ni se, hman hmanah ka hausa tawh ang. Mi tam takin sports leh competition hrang hrangah medal an awrh ri haw ruih ruih a. A thenin trophy an chawi haw lawih bawk a, a then lahin certificate mawi tak tak nen an in lam an pan thin bawk. A thenin an zirna a an tih that vang te, an hnathawh that vang te in medal mawi tak tak an awrh haw thin a. Infiamna lam pawh ni rawh sek sek, zirna lam pawh ni rawh sek sek, medal hi pakhat chu ka dawng ve tawh asin.!! :D

A rei tawh, hmanlai a ni. Middle sikul kan kal laiin, medal chu ka dawng ve ngei alawm. Mahse ka medal dawn chhan hi a chhuanawm fahran loh a nia. Mi fate chuan zuan san vang te, tlan chak vang te, vawm thui vang te in medal hi an dawng a, kei erawh chuan 'chhip phek' vang liau liau in ka'n dawn chu!!! Tet lai chuan 'tukhum phek' 'tukhum airfield' tia min chhaih hi chu ngai ah ka neih mai thin a, hemi tum erawh hi chuan min chhaih ngai lohna tak 'chhip phek' vangin medal ka dawng tlat. Tukhum phekin mi chhaih min hlawh tir a, chhip phekin medal min awrh tir a ang hle mai.

Ngai teh, sport chu kan nei ve ngei a. Sport naah hian ka tel ngai lo. Hemi tum pawh hian ka tel chuang lo. Chumi tum chuan item pakhat lehkhabu chhipa tla lova dah a, tlan chak ber thlanna a awm ta tlat mai. A saptawng taka "Book Balancing" an tih ngei mai chu a hun a lo thleng ta. House(group) hrang hrangah kan inthen a, kan hotute chuan a tel tur an rawn zawng. Lu chhip an rawn dap phei den den a, duhthusam an hmu lo tih hriat takin an rawn dap phei zel. Ka lu chhip an rawn khawih chuan, zawi sap hian, "Hei hi a thra ang" an tih ri chu ka hre ta tlat mai.

Chutah an han inrawn a, ka hlauh ang ngeiin "I kawrlum phelh la, va lut rawh" min ti ta. Keia lah, sport tih hming a rik tawh hrim hrim hi chuan, mipui zinga lo thut ngawi ker hi ka thlang nghal vat thin. A au pawlah pawh khan ka tel ngai lo, thu awih fahranin ka en liam mai mai zel kha a ni a, hemi tum chuan kan sikul playground chu ka rap ve dawn ta chu a ni.

Kan sikul playground hi nitin chuan ka rap ziah, ka tawlh thlu zing bawk a, ka tlangnel hle. Hemi ni ber kher hi chuan ka rah hreh ber a la ni awm e. Ka che muang an ti deuh nge, ka kawrlum chu min rawn hlih sak tawp tawp a, ka thutna ah chuan an theh thla a, min nawr lut ta. ka hreh tih an hriat vang a ni chek ang chu, chhip phek vang pawh ni miah lo in, ka thianpa chu an rawn tir lut ve. Hemi tum hian house tin atangin mi pahnih zel tel tur a lo ni awm e.

House dang atanga tel tur chu an lo intlar thrap tawh a. Kan tlan tanna tur chu, maida hian an rin var phei put a, kan tlan tawp na tur pawh an rin phei put bawk a. Chumi tum chuan kan playground te chu zau ta riau hian ka hria a, min entute chu tam ta riau hian ka hre bawk a. Tichuan, intlansiak tanna turah chuan ka thiana nen chuan kan va intlar ve ta ngei a. Kan luchunga dah tur lehkhabu chu min han sem diat diat a. Lehkhabu zang te hi a la ni zui a, a tla awl dawn hle tih pawh a hriat. Kan tlan tawpna tur chu ka va en phei, a endik tu tur in tlar thrap ka va hmuh te chuan, ka lungphu chu a ti rang tial tial a. Mipui lam atangin thawm a rawn ri deuh hak hak tawh bawk a. Kan han in rem fel a, tlan tur chuan kan inpeih ta.

Lu chungah chuan a rem thei ang berin lehkhabu chu kan han dah ta a, hamrik a a rik ruala tlan chhuak nghal thei tur chuan kan inring far hlawm a. Nghawng a sei duhin, hawi ngil a awl duh khawp mai. Tichuan, kan chhak atang chuan "firrrriiiiittttt" a rawn ti ta a, kan han tlanchhuak ta a. A then chu an tlan tan tirh atang khan an ti tla nghal a, keia hawk dak lah chuan lu her miah lovin, ka mit sirin ka la melh hram hram.

Ka tlan muang deuh a niang chu, mipui an au nasa bawk si. Ka zam nasa bawk si, ka hmaah chuan an lo tlan sup sup mai a. Vai naupang lah chu an tlan chak phian. Tih ve tak rau rau chuan tiin, tlai khaw hnu ah rilru ka siam a, rilru ding tak leh hawi ding tak chuan ka kal ve ta sawk sawk a. Lehkhabu a tla ri leh phauh thin a, ka thiana lah kha hmuh tur lo awm tawh lo. A lo thlauh daih tawh chu niin.

Rin tawp chu kan hnaih tawh khawp mai, ka hmaah chuan vai naupang pahnih leh mizo naupang 2 vel hi an la awm a. An kal dan kha en chuan rang deuh hian an pen zat zat a, an lu an dah ngil ut a, a thenin ban an phar chhuak deuh harh a. Kei chu ka kal dan kha ka hre lo, ka inhmu thei lo a. Chak thei ang ber chuan ka kal ve a, ka lu a hair oil ka thih mawm hlak chuan ka lehkhabu chu a ti nghet lo hle a, a pit hret hret thin. Ka hmel awmdan kha chu midang khan ziak ve dawn se, an ziak ngaihnawm thiam viau mahna. An ziah miau loh avangin sawi ve kher lo ang.

Kan tlan ta zel a, kan tlan pawh a ni lo, kan pen zet zet a ni mai. Ka hmaah chuan vai naupang 2 chu an la awm fan a. Um phak ka tum tehreng nen ka umpha ta lo ve ve. Kut beng dur dur thawm ka hria a, a hnu deuh chuan keimah chu min rawn kawk a, endiktuten, 'hepa hi' an tih deuh sup sup thawm chu ka hria a. Ngai teh, pathumna chu ka lo ni ve anih chu. A va han lawmawm em. Tichuan, lawmman dawng tur list ah chuan ka hming chu an ziak lut ve ta.

Lawmman sem ni a lo thleng ta. Hemi ni hian item tina lawmman dawng tur kha, a hmasa lamah thuthleng pakhatah an lo thu zel a. Tlar khatah item khata awm kha an thru khawm zel a. Ka thutna tur ka zawn duk duk lai chuan, vaipa pahnih te bawk khan min lo hui a. A va hlimawm hranpa loh tak e aw! Tichuan an pahnih bulah chuan ka thu ve ta kuk a. Khami ni a khuallian kha ka hre ta lo, minister nge a nih a, eng mi nge a nih ka hre ta tlat lo.

Lawmman sem hun chu a ni ta a, item hrang hrang ami te kha, pakhatna, pahnihna leh pathumna kha a indawtin an lam chhuak a. Khuallian chuan medal leh certificate chu a pe zel a. Keimahni a thlen dawn chuan ka lo phur tawh nasa. Vaipa te pahnih kha a ko chhuak a, an han la a. Ka hming a rawn lam ve chiah chu, ka tlan chho rang ltk. Mahse, stage lawnna step ah ka in pal khalh thut a, ka pai phei khet khet a. An nui dur dur a, khuallian hmaah chuan ka va kun nghal. Tichuan thra tak chuan, bronze medal, a duma dum em em mai, a awrhna hrui sen no ngei mai chu ka nghawng dum ve takah chuan a rawn bat ta a. Ka hawi chhuak a, certificate pawh chu min pe a, kan in chibai a, stage hnung atangin rang em em in ka tlan chhuak leh a. Step pawh chu kal thra lo chuan ka zuang thla vei truk a, ka medal chu a lir ta ral ral mai. A awrhna hrui chu ka zuan thlakna lamah chuan a lo chat reng chu niin.

Mi hmuh hma in rang lutuk in ka chhar leh vat a, ka ipte ah ka khung nghal hmak. A awrhna hrui pawh chu ka pawt thla a, ka ipteah chuan ka thun leh nghal daih. Sikul ban hun a lo thleng a, medal dawng ho khan an awrh sup sup a, awrh ve kha kan chak khawp mai a, dum viau mahse, a lawmawm ve hrim hrim a. Mahse, a awrhna hrui a chhiat miau avangin ka bag ipte pengah chuan ka khung daih a. In thlen hlan a nghahhlelh awm duh ngei mai.

In ka'n thleng chu ka hmuh hmasak apiang chu ka hrilh nghal zel a. Ka lawm ve tak tak ania aw. Min lawmpui a hnekin, a va dum ve emaw, sawi nei miah lova, an nui char char zel kha chu, ngaihthat thlak loh duh ve tak a ni. Ka medal dawn kha a rawng te a lo tla thei a, mahse ka hlut tho tho. Tun thlengin kha ka medal kha ka dawn hmasak ber leh hnuhnung ber a la ni rih a. Dawng leh tur ni ila, kum sawm chuang a liam tawh a, ka dawng ve nual tawh ang. Mahse dawng lo tur ka ni ang e, pakhat pawh ka la dawng leh lo.

- Oct 8, 2007 2:40 AM

3 comments:

Anonymous said...

Your blog keeps getting better and better! Your older articles are not as good as newer ones you have a lot more creativity and originality now keep it up!

Anonymous said...

Amiable post and this enter helped me alot in my college assignement. Thank you on your information.

Anonymous said...

Easily I to but I contemplate the brief should acquire more info then it has.