Aw Krismas

Aw...Krismas. I va han krismas tak em!!! A ni, krismas hi kum tin loh theih lohin a lo thleng thin. Keini pawh krismas kan hman tam na na na chuan kan kum te pawh a lo tam chho ve zel a. Krismas vawi 60 hmang tawh te phei chu upa tawh tak an ni. :D

Kan naupan lai chuan (ti ve khanglang zel ang) Krismas a lo thlen dawn hi chuan kan urlawk nasa ve thei em em a. Chumi khami chu A nu min lei rawh kan ti a, min lei lem chuang lova. Krismas kawr thar kan han neih a, pheikhawk eng thei kan neih chuan kan inthlak phal meuh lo. Kan pheikhawk te hi mut paha en theih tur kher hian kan han rem a, khawvelah hian ka pheikhawk aia mawi leh tha a awm chuang lo. Naupang tih takah, kan harhin kan intibal ve thei em em a. Thlasik a lo nih a, khua a lo ro chuan, kan chat khir rem rum a, sam lah a ro. zing thawh hlimah, a vawh thin em avangin hmai kan han phih peih lo ngei a, kan han nuai nawk nawk a, kam sira chilthli luanna kai luaiin thingpui sen leh kurtai chu kan han hmeh a. Tudang kan ngai lo.

Dawhthlak mawlh mai kha a ni, nghahhlehawm thin chu. Zanah hian kan nu te hnenah hian kawngkhar kalh lo turin kan han ti a, kan kalh chuan Krismas putar a lo lut thei dawn lo tlat. Kan dawhthlak te chu thil ho te te ni thin mahse, dawhthlak a nihna chuan a ti hlu a, kan tan chuan a va hlimawm thin in, Krismas putar kha a lo va fel tak em!!

Vawikhat chu urlawk zanah hian kan veng naupang ho hi carol ang u kan ti a. Kan inzui ve duah duah a, kan thahnem angreng hle. Tlan vir hi kan siam a, tlan pahin in hrang hrangah kan lut a, vawt pawh kan hre meuh lo. Mi chhungkua an fel a, pawisa te min lo pe ve zel a, cheng sawm min pek phei chuan kan lawm ltk. Vaipa inah carol kan tum a, a lo phal lova, kan thinrim a, kan han bengchheng tak tak mai te kha. A va lo sual thlak tak em. Mi dawrah te kan zai zel a, sweet packet te min pe a. Kan lawm em em a ni. Khami tum khan keyboard tereuhte hi kan keng a, U Jojo-a hian a play a, "Khawvel lawm nan a lo kal a" tih hla ngei mai kha kan sa nawn tluk tluk mai a, a khawn tur remchang, barrel emaw plastic bur emaw a awm chuan khuangah kan hmang nghal a. Nuam kan ti tlang ngei mai. Khami tum khan kan hlawh chhuah kha kan insem a, sweet packet khat min pe ve a. A pawisa kha chu kan U ten an chang ta in ka hria.

Kumhlui thlah zan mawlh a kan halpuah hal thin pawh kha. Tet deuh lai kha chuan halpuah hi ka hal ngam lova, ka pa hian nawalh min lei a, nawlalh hi ka nawt alh ka nawt alh ringawt thin. A hnuah hma ka sawn deuh a, a fuse hi ka hal ngam ve a. A fuse ka pawt phawi a, a fuse ringawt hi ka hal zit thin. A hnuah chuan ka hal ngam chho zel a, a ken puah te kha kan expert khawp asin mawle.

Mi halpuah hal khum te kha nuam kan ti tlat mai pek a. Mi hlau taka an tlanchhe vel te kha ka nuih hi an tiza a, tithaih phet kha ka tum thin. Mi pal (mau pum hi pal atan an hmang a) kan bomb keh sak phek phek thin te kha, a va lo sual thlak tak. Vawikhat chu 1994 emaw 1995 emaw kumhlui thlah vela kan halpuah hal lai hi LPS ho hian thla an rawn la a, nuam kan ti hle a ni. Rul hal, hal vir, hal zit, hal phuh, rocket, parachute, hal puah, kep silai etc. kha kan krismas tinuamtu a ni e.

Tunlai ang hian gift exchange tih ang reng hi kan hre lar lem lova. Krismas card inthawn kha kan uar ve ber a ni ang e. Chu pawh kan thawn chhuak hnem ngai lo. In chhung chei te kha a ti krismas riau a, balloon hi kan lawm thei hle. Boney M hi kan krismas hla ngaihthlak nasat ber a ni a, a lam dan dik lem lo pawh hian kan sak pui zut zut thei thin. Krismas cake kan ngai lo, Krismas tuka vawksa kan hmeh chuan kan lawm em em mai a nih kha.

Krismas a lo thlen dawn leh INDO hi a lo lang tlat thin. Mipa naupang tak chu pawl leh pawl kan insiam a, silai lemin kan indo nasa thei hle. Kan pawlte tan chuan kan tang theiin, mi pawlte tan chuan kan sual thiam thei hle. Mi fate silai neih to pui pui te nei ve phak thin lo mah ila, kan silai lem neih ve te kha kan dim in, kan tichhe khat thei hle. A chhan chu, mi fate kha chu an tihchhiat pawhin an nu leh paten an leisak leh mai zel a, keini chu a tlawm chi pakhat min lei a, chu chu kan tan chuan a awmchhun a ni mai. Mahse, rilru na kan pu ngai lo, kan awt ngai hek lova, kan hlim tawk ve em em a ni.

Ka nu hian kan hmuh ve chak ringin, Krismas ni leh kumthar ni velah Raj Bhavan leh Children's Park (Tuna City park ni ta) te hi min tlawhpui ve thin a. Kan tan chuan thil thar zel a ni a, a hmuhnawmin a dangdai thei hle. Tin, ka nau chiah nen hian a inang hian krismas kawr hi min leisak thin a, kekawr te pawh hi a inang kan ha thin. Kha kha a tur ve reng emaw te kan ti thin a, krismas thawmhnaw hi a inang deuh zel kan nei thin. Tun hnuah erawh kan ti ngai ta lo.

Ka sawi duh tak pakhat chu hetianga nuam sa taka Krismas min hmantir thei thintu kan tana thawkrim em em Kan Nu leh Pate hi an ni. An va fakawmin an va hlu em, kan tan engkim chan pawh huamin, kan hlim leh lawm loh hlauin, pukchawp pawhin kan thil duhzawng chu min leisak an tum ve hram hram thin. Khatia kawr thar leh thil thar kenga kan hak lai khan kan nu leh pate chuan thil thar pakhat pawh an lo nei lo thin kha a lo nia, min hmangaihna hi a va ropui em!! He hunpui lo thlen apiang hian kan nu leh pate hi i chawimawi ila, nuam tak leh hlim taka an hman theih nan an rilru te tih hahdam sakin, an lawmna siam hram hram tum thin ang u.

December 14, 2006