Monday, February 18, 2008

Kan chaw ei khawm ni tak te kha aw.....

2004 kum chawhnu lam te a lo ni ta bawk a. Krismas chawlh pawh kan nei tep tawh a, class thiante hovin chaw i ei khawm ang u, an ti a. Tichuan, 17.12.2004-ah Hmangaih-i te In, Khatla-ah chaw ei khawm tur tih chu an rel thlu ta nghal a, cheng sawmthum thawh tur an ti ta khan ka hria. Hemi ni hi kum 2004 chhunga kan sikul kal hnuhnun ber tuk chiah a ni. Ni 16 tlai hian thian za hovin hla kan record a, kan haw tlai zek. A chhan chu a tuk lawk-ah release nghal kan tum vang a ni. Hemi ni hian Op-a mit a na a, Remsanga khuh puah theih lai a ni a, TK-a erawh ka buai em mai tiin a lo kal ve lo. Kan record na hmun hi Arun-a bedroom-ah a ni e, tichuan hla 7 kan record zo nghal a. A bawn tiah tiah ngei mai, kan microphone te kha khawih chet vak vak chuan a thlawn nghal zel thei vel. Tin, hnaih deuha zai loh chuan a man phak lova, a buaithlak duh nak nak khawp mai. Heta artist awm zawng hi Michael, OP-a, Remsanga, Jerry-a, Arun-a, Rinzama leh Kei te kan ni.

A tuk chuan, zing kar atangin computer chhia siam tir turin ka buai a. A chhan chu ka CD-Writer kha a tha lova, kan hla record ho kha CD-a write chhuah ka duh avang chuan siam tirin ka buai char char a, ka inpu kual vak vak mai a ni. Kelvi Infosys-ah ka kal a, anni chuan tlai lam dar 2 velah i rawn lam leh dawn nia min ti a, a lu hai thlak duh ngei mai, tunah write chhuah ka duh nghal bawk si a. Tichuan, Arun-a te inah kal phawt ila, a writer a tha maithei a, ka ti a. Ka kal nghal ta char char a, ka thlen chuan ka hah hle a ni. (Bike nei ta lo hi chu a buaithlak thin a ni). Arun-a chu amah chauhin a lo awm a. A writer that leh that loh ka zawt a, ani chuan a that thu min hrilh a, ka lawm khawp mai. Mahse CD ruak ka nei lo, Arun-a'n a nei bik si lo. Hetilai hnaiah hian an zuar em ka ti a, ani chuan zuar lo a ti bawk si. Tichuan ka let leh nghal vang vang a, Solomon's Cave-ah CD ruak pahnih ka lei nghal a. Ka let leh char char a, ka thlen leh meuh chuan chau tawh tak ka ni. Tichuan write tur chuan bedroom lam chu kan pan nghal a. (Bedroom-a luh zel a ngaih nachhan chu Arun-a hian a computer hi a bedroom lama a dah daih vang a ni. -xox) A cd-writer speed lah chu a la muang em em mai a, a chak ber pawh 8x chauh a lo ni zui. Kan write chhuak nghal char char a, minit 40 vel cd pahnih write nan hian kan hmang. Chumi hnu chuan internet-ah chatting kan bei leh zauh a. Mipakhat kan bawl tiah tiah a, a intipa thei ngei mai. Hun chu a lokal chak duh phian, dar 12 chu a lo ri der a. Haw ka tum nghal a, Arun a chuan In i thlen hunah Yahoo-ah kan inbe dawn nia, a ti a. Kei chuan, computer siamtir ngaihtuah lek lovin kan yes veleh nghal ringawt a. A phur zawk zawkah ka la tang zui. Mawl theih ngei mai. Arun-a chu chaw ei khawmnaa kal ve turin ka sawm nghal a, mahse ani chuan dar 2 velah party an neih tur thu min hrilh a. Ka lo kal hman lo ang a ti a. Ka chhuak nghal vang vang a, in ka thlen chuan i thianten an rawn phone nasa tawh lutuk che, tiin ka chhungten min lo hrilh a. Chumi hnu lawk chuan phone chu a rawn ri leh nghal zung zung a, lo kal tawh rawh te an rawn ti. Ka inbual phawt ang te ka ti a, ka inbual zawh hnu chuan ka insiam nghal a. Tichuan ka chhuak ta nghal a, Kei leh Michael-a leh Rinzama te chu Treasury-ah innghahkhawm tur kan ti a, ka thleng hmasa ber a. Dawrah hmawmsawm kan lei zuai a, chutih lai chuan Michael-a a rawn thleng ve leh a. A hnu rei em em lovah Lalrinzama a rawn thleng ve leh nghal. Tichuan kan pathum chuan bus-ah kan chuang ho ta a. Kei chuan cheng nga chu bus fare atan ka hum a, kan pathum chuan cheng thum a ni mai a. Lalrinzama chuan cheng hnih thir a hum tih ka hmu reng a. Mahse, an pek hma a pek khalh a tum ve ran a. Conductor chu a lo thleng a, kei chuan kan pathum hian Khatla thleng ka ti a, cheng hnih min rawn kir a. Tichuan, Khatla-ah chuan kan chhuk a, kan chaw ei khawmna lam pang chu kan pan ta a. Kal kawngah TK-a kan tawk a, kan pali chuan kan kal ho ta a. (In ka thlen hnu-ah ka ipte-ah cheng hnih thir pahnih a lo awm a, pakhat chu bus fare bang, pakhat chu ka hre hauh lo. Mahse, ka ngaihtuahchhuak a, Rinzama khan ka ipte-ah a cheng hnih thir kha a lo dah lo niin, thianpa Amaz nge nge a tlawmngai thin e) Kalkawngah te chuan kan titi ho phei tham tham a, a hmun kan va thlen chuan hmeichhe ho chiah an lo la awm a. Anni chuan inhnuai lamah lo zu chhuk ru, min ti a, chahbi min pe nghal a. An inhnuai chu a ruak a, tape te an lo dah sa vek a, a hma ni a kan zai te chu kan han play vel a, bon tak a ni. Rei fe hnuah Zualte-a a rawn thleng ve a, ani chu inchung lamah a awm daih a. Keini pali chiah chu kan awm reng a, a khawhar thlak khawp mai. Tichuan, OP-a te sawm ang kan ti a, sawm tur chuan kan chhuak a. OP-a te In kan kan thlen chuan rinloh tak maiin Remsanga leh Jerry-a te pawh an lo awm a, kan chho ho leh nghal a. Kalkawngah chuan Fela leh Hruaia ten min rawn zawm ve leh nghal a, rin aiin kan thahnem phian. Kan va thlen leh chuan kan in card den vel a, thiam leh thiam lovin.

Sawi tur a tam em mai. Chaw ei atangin tan leh mai ang. Chaw kan han ei chu kan bon hlawm ngei mai. Mahni pawha chaw no khat kham lo thap kalkhawm kan ni bawk a. Hruaia chaw ei tak tak phei kha chu a hnung lam atang chuan boxing a zir emaw tih mai tur a ni. Chaw ei kham chuan lam tur an ti a, kei pian a hnu lama vawikhat pawh la lam lo ta chu, ka lam ta chuang lem hlei lova. Pawnah kan thu ho mai mai a. (Shortcut zung zung tawh ang) Haw a lo hun ta. (ti tawp mai ang) Kan haw phei chu bonzer(bon+danger=bonzer) tak a ni mai. Kalkawnga dawr pakhat chhunga TV-an dahah chuan Petra concert kha an pe, TK-a chuan a rawn ti a. An let leh sup sup a, dawr kawtah chuan an ding khawm thap a. Kei leh OP-a kan phei ve peih lova, kan in la masterji lutuks a. Fela leh Hruaia'n C-i an thlah a, keini thianzaho chu Zephyr en turin Vanapa Hall lam kan pan phei a. Kawtah chuan mi an lo tam ngei mai, kan va tam belhchhah ve leh nghal a. Kan nghak ngial a, ticket a awm tawh si lo, luh theih dan a awm ngang lo. Kan beidawng ta a, restaurant-ah chawl mai ang u kan ti a. Kan ril a lo tam leh hman tawh hlawm bawk a. Hetihlai hian Michael-a a bo daih a. Kan zawng kan zawng a, kan hmu zo lo. A hnua min hrilh leh dan chuan a cousin pass lawmnaah taxi la in a lo kal daih a, min hrilh chuan kal kan phal loh a lo hlau a lo ni a. Chaw erawh a ei leh nghek thu min hrilh. Treasury Square-a restaurant pakhatah kan lut a, a neitu te chuan ei tur an neih tawh loh thu min lo hrilh a. Kan chhuak leh a Chickenland-ah kan kal leh a, kan lut a, kan thu thap. A hnu rei lo teah ei tur an neih tawh loh thu min rawn hrilh leh a, zah zelah tui te kan in a, kan chhuak leh a. Venghlui-a Big Bang-ah kan kal leh a lo thim thup a, kan lut zak deuh tawh si. Eitur an neih leh loh takin kan ti a. Kan haw chho leh a Basilica Restaurant lamah kan phei leh. Anni chuan fast food lampang chu Cave chhungah a awm thu min lo hrilh a. Kan chho leh dum dum a. Basilica lam chu kan pan ding nghal chawt a, mahse mi an lo khat vek a. Inthurual ta thap thap chu engmah pawh inhrilh lawk lovin kan kal pel ta vek a. Kan kal pelh hnu chuan nghah pahin tiin Cave vela thawmhnaw te kan en. Kan kal vel naah chuan Zorinpuii te bazar lai kan hmu a, TK-a leh Rinzama te chu an let leh a, an va en nawn leh ngat nia. Tk-a hian Zorinpuii hi a deuh hlek a ni awm e. (A hnu a ka hriat leh dan chuan). Basilica lam chu kan pan leh a, a lo khat thup si. Kan ril tam tawh bawk si, kan chhuak leh a. Zodin-ah chuan thingpui dawr ch k em em lovah kan chawl a, mahse ei tur an lo nei hlauh. Keini thianzaho tan chuan thingpui dawr changkang ber te zinga mi a ni e. Kan puar hnu chuan coffee in pahin Zodin velah chuan kan awm khawmuang a. Zan dar 8 a ni a, haw darh zai kan rel ta a. Lalrinzama va thlah phawt ang u, kan ti a. Dawrpui lamah chuan kan in zui phei leh dam dam a, Rinzama kan thlahfel hnu chuan kan let leh ta a. Kan haw kawngah chuan TK-a chuan a bag chu Remsanga hnenah ah chhawk turin a ti a. Remsanga chuan a ah chhawk a, enge a chhungah awm? a ti a. TK a chuan engmah a awm lo a ti thla sam et a. Mahse, engemaw chu a awm a ni. Kan han hawng a, bawkbawn kuttum tia vel hi pakhat a lo awm a, chu zawng chu a lo ni. Enga tan nge bawkbawn hi i ah, kan han ti a, ani chuan ka hre bik lo, ka ah awm pawh ka hre lo a ti. Hemi zan hian bike nei pakhat chuan TK-a bawkbawn chu a nei ngei ang le. Kei ka haw veleh a, a hnu chu ka hre zui ta em em lo. Remsanga'n min hrilh leh danin TK-a chu a inla bawn hle ni tur a ni, a kal champ vel hle a ni awm e. (Ka awm loh veleh hian). Hemi zan hian mut pawh a tui duh khawp mai a. Hemi zan hi 2004 chhunga kan inhmuhkhawm hnuhnun ber a lo ni ta a ni.

PS: Chaw kan eikhawm ni hian Remruata chu gas burin a ke-a a tlak avangin a lo kal ve thei lova. A pawi ngei mai.

2005 kumah chuan Pathian kaihhruaina azarah sikul kan han kai kim thap a. Sawi tur kan ngah hlawm ngei mai. Sikul kan luh hma deuh lawk hian ka lu ka met kawlh vek a, a chhan chu ka sam a to chak em vang a ni. Sikul ka thleng a, class room kan luh chuan ka thutna lam kan pan a. TK-a chu a lu a lo kawlh tul mai a, kan han innuih sawh phawt a. A hnu lawk chuan Keshav-a pawh a rawn lang a, mak tak maiin ani pawh chu a lu a lo met kawlh tul mai a. Tichuan kan tlar chu kan lu a kawlh ta vek a nih chu. Mak ve tak a ni, kan inhrilh lawk miah si lo. Hetihlai hian Zaia te ho, Rinzama te ho erawh an bei buk hlawm hle mai.

No comments: