Lehkha chhiar

Mafaa Hauhnar "Chawlhna Tuikam" atanga JF Laldailova "Robin Hood", Prof. Laltluangliana Khiangte "Thlaler Nula" atanga Lalchhanhima "Dairial Chang Lo Se", Lianhluna Renthlei "Adventures of Dindin" atanga Col. Lalrawnliana "Zoramin Zalenna A Sual", Lalsangzuali Sailo "Khuangthli" atanga Tluangte Hnamte "Scandals of the Stars", Zikpuii pa "CC Coy. No. 27" atanga B. Lalthangliana "Pi Pu Chhuahtlang" thlengin ka hmuh theih ang ang lehkha hi chhiar zel ka tum thin a. Lehkhabu emaw chanchinbu emaw tlem tal chhiar lova, zan ka mut theihlohna hi a rei tawh mai. Mut hmaa tlem tal ka chhiar loh chuan ka ngaih a ngam thei tlat lova, engemaw kim lo riau a hriatna ka nei thin. Thil thar chhiar tur vak a awm loh leh a ngai leh ngai pawh kan bih nawn tluk tluk mai zel a. Bible erawh ka la chhiar tam vak lo thung. :D

He khawvelah hian lehkhabu engzat tak awm ang maw? Kum tinin lehkhabu thar a chhuak zel a, a la rawn chhuak zel bawk ang. Chutih lai chuan, he kan Zoram zim te ah pawh hian a chhiara chhiar tham tehmeuh mai kum tinin lehkhabu thar a chhuak zut zut reng a. Chanchinbu thar leh eng pawl pawl emaw lehkhabu lah a chhuak reng bawk. Mizote thu leh hla a kan tuizia a tilang chiang hle a ni.

Mi tin hian mahni tui zawng kan nei theuh a. Lehkhabu chhiar tui mi rau rau ah pawh chhiar duh zawng 'subject' bik hi a awm leh thluah a. Kei ka chhiar duhzawng chu mi ropui/mi lar chanchin te, mi dangdai emaw danglam bik emaw chanchin te, mihring thil tawn tak tak te leh thawnthu lawilo mai mai bakah, fiamthu te hi an ni a. Dik taka sawi chuan, Love Story leh Pathian thu lam hi ka chhiar tui thei manglo ni berin ka hria.

Chanchinbu lamah mi chi hrang hrangin article an ziak chuai chuai thin a. Chanchinbu pakhatah hian article 5 awm ta sela, article 4 hi chu ka chhiar ziah ang a ni a. Chung mi chi hrang hrang ziak zingah chuan ka hmaih phal hauh loh lehkha ziak thinte chu PL Liandinga, KL Liana, Vanneihtluanga, Darrokima, Mus-a, Ramhluna Hnamte, Zirsangkima te leh mi chi hrang hrang, an hming ka hriatchhuah theih miah loh an awm bawk a ni. Heti anih lai hian, mi thenkhat article chhiar peih miah loh ka nei thin bawk a. An hming chu tarlang kher lo ila. An mahni mihring ngaihsan loh vang ni lovin...chhiar peih loh ve hrim hrim te hi a awm a...

ziak peih tawh hrih lo...:D