18 hrs at Malana

Nipui vanglai a ni a, Dilli tlang lamah chuan khaw lum avangin kan chiau kan chiau a. July ni 1 a lo her chuan Delhi Mizo Thalai Inkhawm ten an buatsaih Malana a Medical Camp nei turin kan inbuatsaih ta a.

July ni 1 tlai dar 6 ah Bus nghahna hmunah thlen kim nise tiin kan rel a, keini pawh chumi nang hman tur ngei chuan kan chhuak a. Kan va thlen chuan dar 6 chu a lo la ri lo deuh a, kan thlen hnuah pawh midang an rawn thleng nak nak a. Bus nghahna atanga chhuak nghal mai tura kan inrin laiin, bus chuanna tak tak tur chu hmun dang deuhah a ni a. Heng motor hian min thiar leh te te a, minute 10 vel tlan a ni.


Kan thlen kim hnu reilote ah bus pawh chu a rawn thleng ve nghal a, Delhi kan chhuahsan meuh chuan dar 8 a lo ri dawn hnai reng tawh a, chawl khawmuang lovin kan chhuak nghal a ni.


Kalkawngah hian zunram thiarin vawi hnih khat bak kan ding lo a, kalkawng thui viau mahse khawlum nin leh kan thlenna tur ram hmuh chakna a khat kan nih avangin kan hlim tlang hle. Zan dar 10 velah kalkawngah dinner eiin kan tlan lehnghal map map mai a ni.

Zing khua a lo var meuh chuan a vawt var tawh mai a, tukverh darthlalang pawh pawh thlak chi a ni tawh lo, kan inchhem khawng thei mai tawh dawn te in a hriat. Chung zing boruak thianghlim vawt var mai te chuan Zoram lam min ngaihtir hle mai. Khua a thiangin, thlasik boruak a pawl lek lek a, thingpui sa ver vawr han dawm te hlei hlei chu a hahdamthlak hle mai.

Zing thingpui in zawhah chawl khawmuang lovin kan tlan leh char char a, chawhma dar 11 velah Manali kan thleng chho a. Hetah hian Manali a fahrah enkawlna neitunu Pi Mawitei'n an sikul bus in min rawn lam tir a, tichuan an hmunpui lam panin an bus te chuan minute 15 vel kan tlan leh a. Hetah hian chhun chaw eina leh intihfaina hun te kan neih bakah, orientation hun te pawh kan hmang bawk a ni.

Chawhnu a rawn her chuan kan tum ram Malana lam pan turin Sumo 5 an lo ding thap tawh a. Dar 2:30 velah Malana lam panin sumo chuan kan inzui chho dam dam a, group 5 ah inthenin group tin te hi a huho zelin kan kal a ni.


Darkar 4 vel tehmeuh mai sumo chuan kan chuang leh a, kalkawng a chhe hle a. Motor chuan a chang leh min thlei a, a chang leh min thap hi a ni deuh ber mai. Tlang panga kan tlan te chuan a khu nasa mai si a, kalkawng a te bawk si a, tlak palh hlau a lo tawngtai ta mawlh mawlh te pawh kan awm nawk mai.


Motor in a kal theih chin bakah chuan darkar 1 leh a chanve vel tlang lawn tur a awm leh a, hei hi kan rin aiin a lo thui tawh lo a. A hmaa kal te chuan darkar 3 vel lai hun an hmang thin a, tun tumah erawh motor kawng a lo kal thui tawh avangin chutiang em em chu a ni lo. Mahse hahthlak tak a ni.


Kalkawngah kan chawl chho deuh reng a, thim thet thet dar 7 pelh hretah Malana khua chu kan lut ta a ni. Malana khaw chanchin hi sawi ve dawn ila, sawi tur ka hre hauh lo. Mahse, he khua hi serh leh sang an ngah em em a, anmahni hrim hrim hi sik emaw deh hlek pawh thiang lo an ni a, tin, thlalak phalloh leh hnim chi hrang hrang te khawih thian loh an ngah hle a. Khawih chuan pawisa chawi theihna vek an ni.


A hmun a sang bawk a, a vawt var mai. Kan hriatthiam theih dan tur chuan Mizorama kan tlang neih san ber Phawngpui aiin Km 1 velin helai hmun hi a sang a ni. Kan awmna tlangah tak chuan vur a tla lo a, kan piah tlang te erawh vur in a khuh mawi hle.


Kan thlen hian hotuten riahna tur tent leh eitur thlengin an lo buatsaih a. Kan inrem fel hnu chuan inkhawmna hun tawi te hmangin dar 9:30 velah dinner kan ei a. Ei kham hnuah mei te chhemin inkawmhona leh zaihona hun te hman a ni a. Dar 1 vel thleng zai ho a ni a, a tuk maia Medical Camp nei tur kan nih avangin mut zai kan rel ta a. Khua a vawt bawk a, mut tui a awl kher mai.


A tuk zing dar 7 ah kan tho leh var a, devotion hun te hmangin breakfast te kan ei a. Dar 9:30 ah Medical Camp chu kan tan ta a ni. Heta kal zawng zawng hi mi 40 kan ni a, doctor 4 leh nurse ten min tawiawm a, damlo inentir an thahnem hle a, an vaiin mi 180 vel an ni.


Doctor te leh nurse te pui turin kan kal ve a ni ber, a thenin hming an lo ziah sak a, a thenin doctor te chawh sa damdawi an lo pe a, kan buai nuai nuai a ni ber e. A then tihtur nei lo hovin tawngtaina hun an lo hmang bawk.

Damlo te en zawh chuan chawhnu dar 1 a pel tawh a, kan inremfel leh sawk sawk a, dar 2 velah lunch kan ei leh a, lawmthu sawina hun te hmangin dar 3 ah he hmun hi kan chhuahsan leh ta a ni.

Malana khua a mipui te hi an dangdai hle a, an hmel ah chuan middle east lampang ni awm tak tak ni in ka hmu a. An ngo a, an sen deuh suah hlawm mai. He khua hi Ganja hmunpui a ni a, an sum lakluhna hnar ber pawh a ni a, khawvelah an ganja hi a tha ber pawl a ni. Kawngsir leh khawi hmunah pawh hmuh tur a tam hle.


An hmeichhia ten hna an thawk nasa a, a tlang kan lawn chhoh lai pawhin an hmeichhia te thing phur kan tawk hnem khawp mai. A khawchhungah lah hmeichhia pitar te te te pawhin char char aia lian mah mah thing te an phur nawk nawk mai. An thlalak a rem loh avangin ka la ta lo.

An mipa te erawh biak tlak hmel pu an awm lo, ganja kha an meizial zuk hmiah hmiah a, an meng sen ram hlawm mai. Khawi khawi emaw ah an lo thukhawm leh laih zel. An khua hi a tawp angreng a, hei vang hian an hrisel loh phah hle bawk.

Pic - An Assembly House kan ti ve dawn nge, an rorelna In anih hi.

He khua ah hian missionary te pawh kum 10 chuang an lo awm tawh a, mahse christian pakhat pawh an la awm lo! An sakhaw biak hi Hindu niin sawi a ni a, mahse a inang lo deuh ten ka hmu ve mai mai. Anmahniin engkim an nei hrang a, tawng chenin, mahse hindi chu an hrethiam ve tlangpui.

Pic - An lung tam tak hi hetiang hian a tle vek mai.

Khawih thianglo pawh medical camp neih meuh chuan kan khawih ta nawk nawk hlawm mai a. Anmahni hlei hleiin min bawr nasa. Naupang te pawh sikul an kal ve a, sikul form te pawh an nei ve thlap a ni.


An In sak dan te hi a mak khawp mai, thli a na ngai lo ni tur a ni. A ban te hi lung ah an nghat tawp a, a bang te chu char tin an kham phei a, a chungah lung chhawng hnih vel an rem leh a, chumi chungah char tin an dah leh a, chutiang chuan an sa tlangpui.


Kan haw thla leh lampang chu kal lam ai chuan kan chhangchhe tawh lo deuhin ka hria. Kal dan kan thiam tawh hlawm emaw ni. Kal chhung pawh a reilo deuh. Tichuan, sumo bawkin kan let leh a, Manali ah kal tawh lovin bus in min lo nghak a, kan tlang lehnghal a. A tuk chawhma dar 10 vel ah kan thleng a, boruak a inang lo bawk a, a chauh thlak kher mai.


I chau em? tiin kan inzawt nak nak a, tumahin chau e ti duh bik hek suh. Mahse, zep theih a ni lo, hmel ah kan chau a ni tih a lang chiang hlawm hle. In lam pan nghalin ka mu nghal char char a, ka thawh leh meuh chuan a lo tlai tawh hle a, computer te on in he i thu chhiar lai hi ka ziak ta a.

Thlalak dang HETAH hian a awm nual bawk.

Ka thianpa nen kan insual a

Thangkhat lian zet chu a ni ve ta. Chhanglaikua pakhat hlawha nilenga thirchhia zawng peih, nu leh pate thu aia boss te thu awih hunlai a ni a. Kawngah savun kawnghren a samurai lem mau a siam leh hmanrua chi hrang hrang kan pai tawh chuan hlauh kan nei tawh lo a ni tih kan hmelah a lan chian em em hunlai kha a ni.

He ka thianpa hi kan tetlai atanga in kawm tawh kan ni a, kal pawh la kal theih hma atanga papawr inchuha nu leh pa ten min invah chak siak tir thin. Kan inrual bawk si a, kan inkawm nasa bawk a, mi te pawhin unau emaw min ti chawk. Insual buai ta ngai miah lo bawk chu, mi sual rawn leh tihbuai ah erawh kan in tawiawm tha thei hle.

Inrinni vawikhat chu kan thiante ho nena kawtzawla kan infiam laih laih laiin kan u te ho an rawn kal a. "Insual rawh u, in in tiat ropui sia, a chak zawk zawk chu ka kid number one a ni ang" tiin kan boss chuan a rawn sawi a. Kid number one nih kha chu nuam thei tehmai ania, kei kha ka ni deuh char char a. Kid dangte aiin engkimah kan lal zawk a, tawlailir khalh tur awm se, midangin minute 5 an khalh theih laiin kei chuan minute 10 ka khalh thei thin.

Chutia kid number one tur zawk insual a thlan an tum lai chuan keini pahnih chu chirhdiak ah milem siama kan thut mai mai lai a ni a. Kan mak ti leh, insual ngai lo bawk nen, kan inmelh ringawt a, kan lai dun hle. "In insual ngam nange? In va dawih ve" tih ringawt chu a rawn ri a, a chang leh "In insual loh chuan kan pawl atangin in bang ang" tih vel te chu a ri nawk bawk a. Ni e, kan pawl leh pawl lehlam kha kan awm a, kan indo nitin ziah reng bawk a. Pawl lehlam mi leh sa kan hmuh chuan han 'shock' deuh zauh loh chuan kan inchhuah ngai bawk hek lo.

Chutia pawl atanga ban meuh an sawi rik takah chuan kan ding dun ta a. In khawih hmasa zawk nih kan hreh ve ve hle a, kan inmelh reng ringawt. Kan indinchilh rei ta a ni ang, midang pawh chuan min en thap mai a. Kan u te ho zinga pakhat chu a rawn kal a, ka kut rawn la in, ka thianpa chu a han deh tir zauh a. Kan tan chu a ni ta der mai. Ani chuan a kut in na lo te in mi rawn dek ve leh zauh a, tichuan kei pawh chuan a aia na leh hretin ka han dek leh zauh a. A na chho tial tial.

A tawp a tawpah chuan kan inkuah ta. Kan insual chu a ni ta der mai a, thiandun inhaw chuang si lo a, insual chu a lo ho ngei mai. In hnek nat kan hlau ve ve a, na vak si lo in, kan in bawhbet let kual ta vel mai mai a. Insual e tilo chuan kan in nuih leh sak sak thin a, mahse a bet zawk nih chu kan duhlo ve ve. "A hnarah khan thingpui sen luanchhuah tir ta che", "A biangah khan 'lawk' rawh", "A ban kha khirh bet tlat rawh" ti te chuan min lo fuihpawrh nasa ngang mai.

Kan han ti tak na thin a, inhnehtawk phian bawk si a, a tu amah mah chu che tha zawk kan awm thei lo. Chutia, engvakmah ti si lo a, insual ta reng chu en pawh min en tha peih ta lo a. Min kalbo san ta hlawm a. Keini lah chu ti ve tawh laklawh si a, chawlh mai lah chu kan duh tawh bik lo. Kan inkuah reng a, kan inbawhpelh leh phat phat thin.

Nakin deuhah chuan chhun thingpui in hun a rawn ni a. Chhungten min rawn au ta vak vak a, chutia min rawn auh chuan. "Hawh, thingpui in chawl phawt ila, kan insual tha leh dawn nia" tiin ka han hrilh a. Ani chuan engtin mah chhang chuang lem lo in mi rawn kuah beh na chu a phelh ve mai bawk a. Kan bal dun hle. Thingpui in tura kan haw chu chhungten min lo hau nasa kher mai, "In van tal bal em em ve, thingpui in zawh veleh ka bual ang che" tih thu chuan min deng zui nghal a. Mahse thingpui in zawh veleh insual chhunzawm leh tur anih avangin engtinmah chhang lovin thingpui chu kan in ve nghal a.

Thingpui in zawh chuan a rang rangin, chhungten min koh hman hma in kan tlanchhuak leh a. Kan insual leh tan ta. Tunah chuan kan insualna pawh kan sawn deuh dawn a ni. Inbual tur tho tho tiin, a chirh diak tha laiah chuan kan insual ta a. A nuam ngang mai. Mi te pawhin min rawn kal pel zauh zauh a, mahse tumahin thelh enah pawh min en lo, kan diak tha piat piat tawh lutuk.

Kan boss ten kan pawl buk te a kungfu min zirtir te kha ka hrechhuak a. Mahse, kungfu min zirtir ho kha han hman tangkai ngaihna vak a awm lem lo. Nakinah chuan kan insual rei leh ta deuh a, kan chau leh tawh ngang mai. "Hahchawl lawk ang" tiin kan han thochhuak leh rih a. Inhnek na ngamlo ve ve chu, chauh bak loh chu han na em em kan nei lo. Kan insualna bul lawkah hian kawng thlang lampang panthlakna sitep tui zet mai, a sira tuiluankawr inphah thla zai zai hi a awm a, chulai hmun chu kan tih hlawm khawp mai. Kan veng naupang hi lum lo an awm pawh ka hre lo e a.

Minute 5 vel kan chawlh hnu chuan kan tan leh ta. Kan let kual deuh phat phat thin a, chutia kan leh kan leh takah chuan sitep thui lampang chu kan hnaih hret hret zel hi a lo ni a. Thil dang ngaihtuah vak tawh lo, a bet zawk nih hreh ve ve si chuan kan tawlhna lampang chu kan lo hre tawh lo re re a. Ni a sa bawk si a, a bet zawk nih chu a hrehawm reng a ni. Ni kan en siah mai a, men pawh a men theih loh.

Nakin deuhah chuan eng kan ti nge pawh kan hre ta lo, kan lum ta bawp bawp mai. Kan tih em em thin, a zawna kal pawha a hlat deuh thei ang bera kan kal pelh hram hram thin sitepah chuan kan lum a ni tih kan hriatchhuah meuh chuan a sir kawrah kan lum lut tawh. He sitep ah hian cycle in vawi khat ka tlan liam tawh a, ka nau ka la phur zui. A hnuah ka nau phei chu a lum nawn nual nghe nghe a, ka sitep hlauh ber a ni ang chu. Chutia tuiluankawra kan lum lut chu rem em em mai hian kan inhnawh ta chat mai.

Inhmatawn ve ve in kawrah chuan kan inzep tat a, a tu amah mah kan chesawn thei lo. Chhuah tumin theihtawpin kan han bei nawn ngial thin, kan tanna kha a rem em a, tih theih kan nei lo. Ka hnungzanga lung pawngin min kam tlat chuan tan a ti harsa hle bawk a, a hmaa lo insual zawi tawh nen, a tan theih loh ngei mai. Ka thianpa tanchhan chuan theih hrama chhuah dan ka han ngaihtuah a, a ke te chu tanchhanah hmangin ka han tlawh vak vak thin a, a theih loh. Ani pawhin a han bei ngial a, kan beidawng dun hle.

A tawp a tawpah chuan tih theih dang kan nei tawh lo, tah mai loh chu. Kan tap dun ta vak vak a, minute 5 vel lai chu kan tap hman ang tihin, a piah lawka meitei puanthui ho chu an rawn tlan a, engtin tin emaw min rawn chhanchhuak ta a. Kan inah ve ve min pawm haw zui, kan tan chuan samari mi tha an va ni tak em!!!

Chau bawk si, thi dawn tawh hiala kan inngaih hnu a min rawn chhanchhuak ta si te, kan tap nasa bawk si te chu chhungte chuan min lo lainatin min lo duat hliah hliah ang tih nak alaiin, a tirah thil chinchang min zawt a, a hnu ah erawh min tih dan a duhawm loh hle. Ni e, kan bal bawk si, rimchhe tawh bawk si kha, na tawka innawh a, inbual bak hmabak kan nei ta lo. Chuta karah kawra kan tan nachhan pawh nu leh paten an duhloh ber insual vang a la ni zui. Hmabak chu a thim tiah tiah e. Khami ni a, ka nu in min nawh kha a na ka la tih pawl chu a ni ta ve ang.

Kan thianpa pakhatin mihring luruh kan chhar (a hnuah doctor zirlai ta a ni tih kan hriatchhuah leh), a luruh chhunga a kut zenluta a ken kual vel, a nu in a lo hmu. A ten lutuk nileng deuh thaw a a kut a nawh a, mittui tla lek leka kan lo nuihsawh vel lai ka ngaihtuah lehin tuna ka dinhmun nen hian inang riau in ka hria a. Ka thianpa tap nasa lutuk te kha ka hrethiam ta kuar kuar mai.

Ni e, khami tuma kan insual kha chu theihnghilh a har ve ta viau ang. Ka thianpa lah chu kan inkawm loh na a rei ta hle mai, kum sawm dawn lai chu kan inkawm ta lo. Tuina leh thian kawm duhzawng a inang ta lo nge ni ang, inhmuh changa inbiak zauh zauh bak kan inkawm ngai ta meuh lo. Tin, he thu hi thu tak tak zinga dawt tlem belh a ni. "Thih sak pawh ka ngam" lehkhabu ka chhiar atanga naupan lai (ti ve khanglang ila) chanchin ka ngaihtuah chhuah atanga ka rawn phawrhchhuah a ni e.

Luangliam

Hla tak atanga ka rimawi hriat chu ngaihthlak chian tumin ka pan phei deuh hret hret a. Chumi zan chu zan dang ang lo tak maiin thli te chu a thaw heuh heuh a, boruak pawh a nuam angreng hle. Rimawi hriat avanga chutia mi pakhat tawlh hrut hrut chu mimawl emaw tih mai a awl ngei ang.

Mahse, chu rimawi chu rimawi dangdai tak mai, high school atang tawha ka hla duh em em mai Dream Theater hla “Through her eyes” kha a ni tlat. A hla chu a lo tawp dawn tawh a, ka thlen phei meuh chuan a tawp titih der mai. Hrilh hai tak maia ka awm reng lai chuan, thutna remchang deuh mai hi a lo awm hlauh a, tuma hrilh ngai lovin ka taksa chau tak mai chu ka han thu hahchawl a. Chutah le, rimawi dangdai tak mai kha a rawn ri leh tlat mai. Chuta thu pah chuan lungdam em em mai hian ka ngaithla ta a, suangtuahna khawvelah bawk chuan ka tlulut leh ta.

He hla hi ka thianpa pakhat MS-a’n pawl sawm kan zir laiin ngaithla ve rawh min ti a, chumi tlai sikul ban chuan ka ngaithla ta alawm mawle. Ruah a sur deuh ser ser a, sikul uniform ka thlak zawh veleh atang ka ngaithla char char a, a zawh veleh ka play nawn leh a, ka ngaithla nawn ta tluk tluk mai a. A thu chu keini ang saptawng thiam lo tan chuan hriat kim sen a ni lova, internet lamah a hla thu lak tur chu zawn ka tum a. Mahse, khaw chhiat deuh avangin server a down a, internet a khawih theih si loh. Chutichuan, ka thiam dan dan leh ka hriat dan dan chuan a hla thu chu ka ziak chhuak vel ta mai mai a. Chutih lai chuan ka play nawn reng bawk a. A hla thu nena inmil tur hian suangtuahna mitthlaah chuan lem ka chantir zel a. Tukverh kan dak chhuak a, ruah sur ban khaw thiang kuk mai ka hmuh chuan ka lung hi a leng vawng vawng mai a. Chutia suangtuahna khawvela ka chen lai chuan chaw ei a lo hun leh ta der mai a.

Chaw ei kham atang chuan a ngai te bawkin computer hmaah chuan ka thu leh ta a. Khua chu a thim tawh. Thla pawh a rawn eng nalh khawp mai. Zanin chu lehkha pawh ka zir lo mai ang. Ka hla thu ziah chhuah chu ka en nawn a, ka ngaithla a, ka suangtuah a, engdang mah ka ngaihtuah hman lo. A remchan veleh a a hla thu diktak lak chu ka nghahhlelh ber pakhat a ni a, tin, chumai bakah thianpa MS-a hnena ka ngaihthlak dan chanchin chu hrilh ka nghakhlel tawh hle. Hetia hla pakhat chauh ngaithla a, zan khaw tairek thleng thlenga ka men hi chhiar tham fe a ni tawh.

Eagles ho concert na video “Hell freezes over” phei kha chu pawl riat ka zirlai atang tawh khan zan tin deuh thaw hi ka en tluk tluk mai thin a, ka ngaithla zing deuh bawk aniang, ka nau te tereuhte te pawhin dik leh dik loin an lo zawm ve theifur mai. He video phei hi chu ka roh a, tun thlengin ka la dahtha khiau.

Guitar nena verandah a thut chhuah ka ching bawk a. Ka hla sak thinte lah, hla hlu leh hlui deuh hlir an ni thin a. Guitar nena pawna ka chhuah tawh chuan, “A lung a leng leh tawh a ni maw” tih zawng chu ka tawngkam dawn thin a ni. Zan khat chu kan kawmthlangpa lungleng hian phenglawng hian hla chi hrang hrang a tum alawm mawle. Dar 9 vel atang a tum tan a, a ri lah mutna atanga ngaihthlak nuam tawk chauh a ni a, mutthilhsan phal mai chi a ni lo, a ri hlerh hlerh a, pawna va chhuah ve mai tak kha ka nap a. Kut thing meuha zuk chibai kha ka chak khawp mai.

Hmanah class room chhunga class kan lak laiin ruah a sur deuh cherh cherh mai a. Sikul thlang deuh atang chuan kan hriat ruai ruai phak tawk lek hian The Last Resort kha an rawn play pek alawm mawle. Class lak pawh a ngaihtuah theih loh, tukverh lam chu ka en a, chhum zing deuh chuai kara, tlang hring deuh thup ka hmuh te zawng chu ka lung ti leng em em tu chu an ni.

Thian ngaina mi tak mai ka ni a. Mi tupawh hi thiana siam vek hi ka duhdan a ni a, mahse thianpa ka ngai thei lutuk erawh hi chu hrehawm ka ti thin. Thiante nena hlim tak maia awm ho tluk hi chu a awm lo, mahse hmasawnna a awm si lo. Engpawhnise, khawvela kan awm chhung zawng hi chuan LUNGLEN hi a awm ve reng dawn….We’ll meet again tih Ross Parker and Hughie Charles te phuah hian in thlah leh poh mai ang aw….

We’ll meet again, don’t know where, don’t know when
But I’m sure we’ll meet again some sunny day
Keep smiling through, just the way you used to do
Till the blue skies chase the dark clouds far away

Now, won’t you please say “Hello” to the folks that I know
Tell ‘em it won’t be long
’cause they’d be happy to know that when you saw me go
I was singing this song

We’ll meet again, don’t know where, don’t know when
But I’m sure we’ll meet again some sunny day

Yes, we’ll meet again. Darlin’, I don’t know where and I don’t know when. But
I KNOW we’ll meet again one of these good ole sunshiny days. Ya know, darlin’, all ya gotta
do is just keep on smilin’ through you know just like you ALWAYS do, until the blue skies
chase the dark clouds far, far, far away. I wantcha to do me a favor, please say “Hello” to all
the folks that I know. Well, just tell ‘em it won’t be long. They’d be happy to know that when
you saw me go, I was standin’ right here, singin’ this song.

We’ll meet again, don’t know where, don’t know when
But I know we’ll meet again some sunny day

(May 18, 2007 a ka ziah tawh a ni a, ka rawn thurchhuak mai mai. Thu hlui rawn khawrh thar zeuh zeuh ka rawn ching mai thei a ni.)

Nun khawhar

Ruah chu a sur ve deuh seng seng a, hetiang khaw luma ruah a rawn sur tawh hi chuan a hlimawmin, van boruak en chhoh pahin ruah si kan in nan tir sep sep thin. Zan dang ang bawkin khami zan kha balcony ah ka va dakchhuak leh a, ka ding reng a. Khawvelah hian ka pa ber a ni ti thin tan pawh hetiang ang ni khuaah hi chuan lunglen loh a har thin khawp mai. Sana ka'n en chuan a lo tlai deuh tawh avangin mut zai ka rel ta a, ruah lah chu a sur duh zek.

Kawl rawn phe zawr zawr chuan ka khum bul tukverh chu a rawn chhun eng zawk zawk a. Ka mut lah chu a chhuak thei der lo, ruah in mi rawn theh ka hlauh avangin tukverh chu ka khar a ni. Mahse, chutia ka mut theih bawk si loh chuan, tukverh lehlam chu ka han hawng a, zan danga ka tih ngailoh tak maiin phone ah chuan hla ka ngaithla ta riai riai a.

Ngaihtuahna ding tak nena Bob Dylan hla "Trying to get to heaven" ka ngaihthlak lai chuan, tukverh biangah chuan parva a rawn fu a. Chutia khaw lum takin hun rei tak min hrem tawh hnu a, van malsawmna dawnga ruah tui dai tha tak mai a rawn sur chu nuam a ti in, a lo chen ve ni ngei tur a ni, a zawrin a zawr hnep mai. Kawl rawn phe zawk zawkah chuan a rawn lang chiang leh zauh zauh thin.

Chiang deuh zawka en tumin ka han thu chhuak a, a piah lawkah chuan a thiante chu an nupa te te in an lo mu hlawm a ni tih ka va hmuh chuan chu sava chu ka khawngaih leh zual ta viau mai . Chutiang taka riang chu, tih theih nei ila, hlim takin a duh tak nen chu ruah sur te pawh chu an do za tur hi a ni a. Mahse tih theih ka nei si lo. Chutiang awmpui tur a neih loh avang chuan amah ang thova khawhar ve tukverh bulah a rawn fu ni te hian ka hriat tak chu.

Tih theih ka'n nei chuang bawk si lo tiin ka mu lut leh a. Khawhar hi enge a nih chiah pawh hre lo mah ila, ka khua hi ka ti harin, ka lung te hi ka ti leng ve leh vak ringawt zel. Hetiang lama ka ralkhat ngaihsan, Fam James Lian Mawia ka hrechhuak zawk a. A chanchin chi hrang hrang ka lo hriat ve te atanga ka mi ngaihsan a ni.

A la tha viau emaw tih laiin chanchinbu lamah a boral a ni tih ka hmuh chuan ka lo ui ve em em ringawt mai a ni. A lehkhabu lehlin leh a lehkhabu ziah ka la chhiar lem lo, mahse a article pakhat a thianpa Fam JF Laldailova tana a ziah, "My Last Tribute to JF Laldailova" tih kha ka chhiar tawh a, ka chhiar ngun thin hle. A ziahna chanchinbu copy te kha ka dah tha reng thin a, engtin tin nge a bo tak pawh ka hre tawh lo.

A saptawng thiam zia leh thu leh hla lama a ril zia te hi mi ka atangin ka hre nasa tawh a, a takah pawh vawi 2 vel chu ka hmu ve tawh. Ka tet deuh lai a ni a, mahse ka pa in min chibai tir tawh tlat a ni. Pa te lam deuh, ngo lampang, kal khun kheu kheu chi kha a ni reuh a. Tunah chuan ani pawh khawhar tawh lovin a chawl tawh ang chu.

Ni e, vawiin June ni 3 a lo thlen hian ka khua a har a ni. Nizan lamah te pawh nikum lama ka awmdan zawng zawng thil te ka ngaihtuah nen hian ka mak tih a la reh lo a, awih har ka la ti cheu. Ka pa boral champha vawi khat na a lo ni ve ta reng a ni tih te chu rin thiam har ka ti a, hun te hi a va lo kal chak tak em.

Khami zana ka bula awm ka thianpa kha Mizoram lamah a haw lai a ni a, nizan khan min rawn be hlauh mai a. "Thianpa, hei zanin chu ka lung a leng khawp mai. Nikum tun ang hunah khan kan pahnih a kan awm lai khan kha thil kha a rawn thleng a" tiin ka han hrilh a, ani pawh chuan "E khai, a ni tak maw? Hun hi a va lo kal chak ve," a tih hnu chuan min biak chhunzawm a chak vak tawh lo nge, kan in mangtha zui chu a ni mai.

Ni e, ka thiante pawh ka zah thin khawp mai. Nikum krismas Ni a, hlim taka awm ka tum vei nen. Ka rilru ah trek in a rawn deng ang zawk hian, "Pa nei lo te pa a piang ta, hlim takin Krismas hmang ang che" tih thu ka dawn atang chuan ka awm mai mai thei tawh lo. Ka tap nileng a ni deuh tawp mai, Krismas khawhar tak chu a ni ngei mai. Ka thiante min rawn biak tum pawh, mumal pawhin ka lo be thei lo.

Hun in min hnem tih te chu tih mai mai a ni, a rei tulh tulh a, kan lung a leng tial tial emaw tih mai tur a ni. Theihnghilh a har a, rilru ah a riak reng a, min chhuahsan ni reng a neih theih pawh ka ring lo e. Ka nunkhua hi a nghawng tak meuh meuh a, ka thiante nuih ruala nuih a har ka ti tawh a, ka thusawi duhzawng te pawh ka bula awm te tan chuan thil ninawm a tling leh thuai thin. Inthup ka tumin, thil engmah ngaihtuah loh ka tum thin vei nen, a theih loh a ni. Ti te chuan, thiante ka hloh tial tial mai dawn asin le!

Pa, I miss you........

I’m pregnant!!

Life’s been great. Bright and sunny weather, birds chirping and flying freely across the sky. Had my daily routine of exercises and I’m through my semester exams. Health is up to the mark and I’m getting my rapidshare premium account for the 2nd time, for free of course. His Holiness Dalai Lama is following me on twitter and watches every updates by Miley Cyrus. What a wonderful world it is, until last night I realized, I’m pregnant!!


Miracle it may seem. But it happened. All the pregnancy test results that I saw are by no means a lie. Scanning of endocrine balance, hormone levels, amniotic concentration, carbohydrate level, ketone (ketosis/lipolysis), ovulation status, bovine encephalitis, distemper and progesterone infusion results are all positive. Now I am really worried.

Questions keep popping. Who’s the father? How did “it” happen? When was it conceived? Will I be a virgin mother? OMG… I am so doomed right now. Who will be my baby’s father? Am confused, I never had a chance with any man, or involve in any acts that involves private organs. It may be a miracle or an accident. But I can’t recall on any incidents that could be the existence of my baby.

Most awkward of all, I’m a man. Men can get pregnant? (google…google…) Of course, some men do get babies in their tummy. Like Thomas Beatie and others. Have you ever heard of the famous Buck Angel? But they are all transgender (which means they change their sex). Could I be a woman trapped in a man’s body? I don’t think so. Help me pleaseeee……..

FYI : The above passage is written somewhere back in February 2006.

Its 8 months exactly after I got gravid. I am doing fine, I eat lotsa healthy fruits and foods and the baby is doing great. I quit smoking, which I thought could be the worst thing that a mom would ever do to "his" baby. The ultrasound checking results seems normal and the result include (just read the cert.) – Boy! Hah!


To keep a long story short - I deliver it on 25th December, 2006, i.e. on Christmas day. Now I really need to know who my hubby is. So, I ask lots of people and do researches on the net, on whether finding a baby’s father is possible. After a long search, a group of people in Vietnam calling themselves “The Spivs” told me that they could find the baby’s father at the cost of 1 million dollar. And they did…. Guess who?


F8CK that!! And the next moment I thought, Mr. Terminator is the only man in this world other than Chuck Norris who could get a man pregnant.

And here’s the birth certificate. My son's name is Gavin Jordan Schwarzenegger!! :D


Bah!!!!! My post is absolutely gay!! Hahaha…. It all comes from the devil’s workshop, which is an idle mind. Sunny Sunday afternoon, and this is what you get. Point your browser to www.thepregnancytester.com and test yourself. You can be pregnant…. Hah, fun!!