No. 4 khuarkhurum ah maw!!

Ni khat chu tih tur hranpa em em ka neih loh avangin ka kid Damdama tlawh turin ka chhuak a. Rin loh deuh maiin kalkawngah chuan High Sikul kan kalpui thin pahnih Rini leh Matete-i te chu ka tawk hlawl mai. Anmahni pawh chuan mak ti takin min en a, an hmelte chu tap zo hlim ang mai hian a hlim lo hle a. Kei chuan rang fahran hian, "In dam maw? A va mak ve! Khawnge in awm tak?" tiin ka han chibai nghal bawrh bawrh a. Rini chuan, "Dam alawm, i dam zawk a? Hetah Aizawlah kan awm reng tawh alawm." tiin min chhang a. "Khawnge in kal a? In va hlim loh dun hmel ve?" tiin ka han zawt a. Chutah dan rual lohvin an pahniha mit atang chuan mittui a rawn luang chhuak zawih zawih a. Chu zawhna ka zawt kher kher chu ka inchhir angreng hle mai. Inti pachang hram hramin Matete-i chuan, "Zuala vuina inkhawm-ah kan va tel ve zawk alawm" tiin min chhang a. "Tunge Zuala chu?" tiin ka'n zawt ve leh nghal a, Matete-i bawk chuan, "I hre tawk lo maw? Kha, High Sikul kan kal laia kan thian kawm ve thin, lehkhathiam thei deuh kha mawle" tiin min chhang a. Chutia a sawi takah chuan ka hrechhuak chiah a, "Aw, a va bengvar loh thlak thin ve mawle. Engtikah nge a thih a? Eng natna nge?" tiin ka'n zawt leh a. Rini chuan, "A, engdang vang ni love, damdawi hmansual avangin nizan khan a boral ta anih kha" a rawn ti chuai raih a. Mak ka ti lutuk chu ka thin phu pawh a phu zawt zawt mai. Thil tam tak sawi zawm tur a awm ngei ang tih hriaiin an pahnih chuan kan piah lawka chawlh buk-ah chuan ka hruai phei a.

"Zuala te chu naupang fel tak kha a ni thin a, lehkha te kha a thiam theiin nu leh pate thu kha a awih thin hle emaw ka tia?" tiin ka han zawt a. Matete-i chuan,"Nia, naupang fel tak, lehkhathiam thei leh nu leh pate thu awih tak chu a ni na meuh mai." a han ti a, a han chawl deuh vang vang a. A hnuk a ulh tih pawh ka hai lo. Mittui hru fap fap pah chuan a rawn chhunzawm leh, "A chanchin hrechiang lo chuan ama sual vang renga damdawi hmangsual angah an lo ngai thin a. Amah ka hriatchian em avang hian heng dawt thu leng mai mai hi chu ka palzam mai mai thin. Te-a, nang pawhin i la hria anga, pawl 10 kan exam pawh khan Mizoram pumah 4-na a nih kha. Lehkha zir kha nuam a tiin, pawl 12 ah phei chuan Mizoram pumah 1-na nih tumin a bei a. Zir pawh a zir nasa a, a hriselna pawhin a tlakchhiat phah lek lek thin. Tum na na na chuan kawng a awm angin Mizoram pumah 1-na chu a rawn ni ta ngei a. A pass kan lawm zan chuan a thiante hmun hrang hrang ami leh chhung leh khatte nen chaw hlui kan kil ho a."

"Zuala chuan ama sikret a zuk zawh tawh avangin a thiante meizial chu a zuk sak ve a. A thiante chuan an meizial ah chuan Heroin No. 4 chu an lo zial tel a" a tih rual chiah chuan, kei chuan "Chutiang thiante a kawm thin a ni maw?" tiin ka lo zawt zauh a. "A thian kawm ngai em em pawh an ni lo, a hmelhriat te an nia, a remchang em a, a zuk sak ve ta mai mai a ni" a ti a. A chhunzawm zel a, "Zuala chuan chu meizial-ah chuan engemaw a tel a ni tih a hriat chuan a paih nghal hmak a. Mahse, a vanduai vang nge, kha fawh hnih fawh thum lek a fawh khan a thisen zung zam a fan chhuak nghal a. A taksa chuan a ngai ta ngawih ngawih mai a ni. Zial zuk chakna-in a taksa chu a khat a, zial pangngai a zuk chuan awmzia a awm ngai lova, No. 4 tel lohna chuan a taksa chu a chhawk thei lo. A chang chuan a tur ang mai te hian a awm thin a, No. 4 a zuk chauh loh chuan a pangngai thei thin lo. Aww....Zuala a va pawi tak emmm!!" tih pah chuan a han tap leh hlawp hlawp a. A bulah chuan lainat takin a thiannu Rini chuan a lo kuah a, ani pawh dan rual lohin a mit atangin mittui a rawn luang ve leh zawih zawih a. A mipa ber pawh ka tap lo chauh a ni ber a, chu hmeichhe khawngaihthlak tak pahnih chuan ka lung an tichhe ve hle a ni.

Rei fe hnuah chuan Matete-i chuan a rawn sawi chhunzawm leh a, "Hun te a lo ral zel a, a zuk chauh chu duhtawk lovin a ei chi te chu a han ei chho a. A rilru tak tak chuan a thiltih chu nghei a duh, amaherawhchu a taksa chuan a mamawh tlat tawh a, a tih leh mai loh chuan a pangngai thei thin lo. A in chi te a ti zel a. A tawpah phei chuan a chiu in a inchiu ta a ni." tih pah chuan a sawi chhunzawm thei ta lova. Kei chuan, "Engtin nge a boral dan tak chu?" tiin chang deuhin ka zawt nghal a. Matete-i'n min chhang dawn lo tih a hriat hnu chuan Rini chuan, "Nia, khatia inchiu te a chin chhoh takah chuan damdawi leina tur pawisa te a lo mamawh a. A pa te'n an pe phal tawh bawk si lo, thil rukah a tuan a, a thil ruk te chu a hralh thin a. A tawpah phei chuan a pa chuan a hnawtchhuak tawp mai a ni. A thih dawn zan pawh hian a hmutute chuan dam tha taka an hmuh thu an sawi a, mahse zan dar 9 vela an veng tlangval leng haw chuan kawngsira Zuala ruang, a bana inchiuna 'syringe' la bur va-a lo let reng hi an hmu ta a ni." tiin a han sawi a, a lung pawh a chhe hle mai.

Titi danga kal tumin ka ngaihtuah rauh rauh a. Zuala thian kawm thinte ka ngaihtuah a, chutah Mawia ka hrechhuak zawk, Mawia chu Rini chhas thin kha ni a. "Mawia kha enge a chanchin ni ta?" tiin ka han zawt a. Rini chuan, "Ani pawh a awm tawh lo" tiin min chhang a. "A va mak hlawm ve! Chuti chu..." tia ka sawi lai chuan Rini chuan, "Ni e, Te-a, nuthlawi alawm ka nih tawh ni." "Han sawi ta zel ila, i hriat ang khan Mawia nen khan kan inkawp rei ve hle a. Pawl 9 kan nih lai atanga inkawp tawh kha kan ni a. Pawl 12 kan pass chhuah hnu khan Mawia kha sipai-ah a tang a. A tawi zawngin sawi mai ila, sipai a zawm hnu khan a rawn haw leh a. Tichuan, kan innei chu a ni ta nghal mai a ni. Kan inneih hnu lawk khan ral ramah an kal leh nghal a. A hna ah a inpe in, hotute duhsak pawh a hlawh hle a. An kalkawngah chuan kham chhengchhe tak tak te, luipui khauh tak tak te leh ramsa hlauhawm pui pui awmna hmunah te an kal zel a, chungah pawh chuan hmahruaitu a ni zel a. Hel pawl an va beihnaah chuan in ring leh in ringlo inbei an nih avangin rei lote hnuah hel pawl camp chu an laksak mai a."

A sawi chhunzawm zel a, "Mahse, hel pawl chuan tlawm mai an tum lo. An tlanchhiat hnu chuan tha thar thawhin, thih pawh pawi ti lovin an camp hloh tawh chu lak let leh ngei tumin an rawn bei. Silai mu te chu favai thap ang maia tamin a leng chuai chuai a. A tawpah chuan Mawia te pawl chu an hnungtawlh zel a. Hel pawl chu an tam zawk avangin sipai ho chu an tlanchhe ta sup sup mai a. Mawia chuan a thiante chhan nan a nih phawt chuan thih pawh pawiti lovin amah chauh chuan ral chu a bei ngat ngat a. A tawpah chuan an kaphlum ve ta nge nge a ni." a ti a. "Mawia chu a huaisen em avangin India President in huaisen lawmman pawh a pe hial asin, ama zarah kei pawh hei chaw nghei lovin ka awm phah anih hi," a ti sap sap a. An bula ka awm rei chuan ka lung a chhiat ve mai dawn avangin in hmuh khat hle mahse, tin chu ka rawt ta a. Tichuan, awmna te kan inhrilh hnu chuan kan tin ta a ni.

Ka haw hnu chuan ka ngaihtuah neuh neuh a, ka thiante pahnih, high sikul ka kalpui thin, arte thiha thi leh ram tana thi te chu. Zuala chu naupang fel tak niin, a kalkawngah khuarkhurum hlauhawm leh nunrawng ber mai No. 4 khuakhurum ngei ah chuan a tla ta. He khuarkhurum a tla te hi a thuk em avangin chhanchhuah theih rual an ni lo. He tlangval pawh hi chu khuarkhurum-ah chuan tla ve in, a nunna a chan phah ta a ni. Zuala thianpa Mawia erawh ama tan chauh ni lo, ram tan a nunna hlu tak chu a hlan a, President meuhin chawimawina pawh a hlan asin. Zuala chu tu khaw hriat lohin a thi ve mai mai a, Mawia erawh engtik lai mahin miten an theihnghilh thei dawn lo a ni.