Guitar ka lei dawn a...

Guitar thiam ka ni lova, a siamtu lah ka ni hek lo. Guitar guru ka ni lova, guitar rutu lah ka ni chuang lo. Tunah hian ka rawn ziak ve mai mai dawn a, zawngtah ziat thiamlo pawhin a ei te chu an thiam em em a, a ei theilo thenkhatin an ziat thiam em em bawk a, chutiang deuh chu a ni a. Amaherawhchu, kei erawh chuan ka perh thiam pawh a ni lova, a chungchang pawh ka zu hre kilh kelh pawh a ni lova, amaherawhchu, ka thil hriat ve (mi sawi atangin) leh ka chak zawng kan sawi chhuak ve ang e. Guitar lei tum te i nih chuan i chhiar ve ngei dawn nia. Guitar lei tumlo tan pawh midang hrilh chhawn atan tal i lo chhiar dawn nia. I hriat sa vek pawh ka rawn ziak mai thei a, engpawh nise, inhriatthiam zel kan ti a niang chu... :D

Guitar i lei dawnin, a hmel mawi ringawt melh loh a tha. A hmel nalh ringawt hi guitar tha an ni ngai lo.

Guitar chu i han kuah anga, a ban (fret board) leh a hrui (string) te chu inhnaih takin an awm tur a ni. A zau lai ber (a fret hnuhnung lam) cm 1/2 vel ni sela a tha ang.

Guitar ban chhungah chuan thir a in phum ngei ngei tur a ni a, hei hian a kawi tur a ven bakah, a tliak tur a veng thin bawk. I guitar lei tum chu a ban a kawi nge kawi lo uluk takin en bawk ang che, tin, a ban hlai hi perh a nuam a, kut nghah a rem bik.

A hrui han herh tight la, mar pangin han herh teh le. A ban a rawn kul em, en rawh. A kul loh chuan a thra. Chuan, fret 7 vel atang khan a hrui zawng zawng kha i kutzungchalin han hmet teh le. Awlsam taka i hmeh nun theih chuan a fret kha sawn chho zel la, awlsam taka a fret 14 na vel thleng i hmeh nun theih chuan a thra a ni mai.

Guitar chu na takin han perh la, a ri ngaithla vang vang teh. A chher a awm em. Han herh dul leh la, han perh leh vak la, a chher a awm nge awm lo ngaithla bawk rawh. A chher a awm chuan a hrui vang pawh a ni thei a, a hrui tharin thlak la, a la awm cheu chuan a guitar kha thlak mai rawh.

A saddle (a guitar hrui va in thlun na, a herh na lam lo zawk ami kha) adjust theih chi hi lei a tha. Tunlai foreign guitar thenkhatah hian a awm lo thin a, nakinah guitar hlui hunah a a buaithlak. A adjust theih loh chuan, a hrui a lo kau deuh emaw khan a tih hniam theih loh a.

Guitar zang deuh ai chuan guitar rit deuh nelh nawlh hi a ri a nalh duh zawk.

A ban i han hum khan, ban pan deuh leh chhah deuh a awm thin a. Pan deuh hi a perh a nuam tlangpui bawk a, kut a kham har bawk.

Guitar eng company siam pawh nise, foreign guitar thra pui pui pawh nise, tualchher pawh ni rawh sek sek, a perh a nawm phawt a, a ri a that chuan duhthusam a ni. Tin, guitar i lei dawn chuan nangma'n i perh thiam lo a nih chuan a perh thiam hruai hi a tha a. I duh i thlan uluk avanga a dawr neitute'n an nin deuh hlek che pawhin ngawi mai mai la, thil tha i neihna tur a nih avangin. Mizo dawrkai te hi an changkang tawh viau a, thenkhat dawr hrehawm deuh hi an la awm zeuh zeuh thin. A chunga kan han sawi tak te khi hollow guitar lei dawna hriat ve mai mai atan a tih a ni a, electric guitar ho hi chu a man a sang a, a tha tlangpui bawk. Guitar nalh bawk, tha bawk han zut vang vang mai chu nula mal zut ai pawha nuam ti zawk an tam a nia. Lolz...