Monday, February 18, 2008

The Lunatics

Music ri bengchheng thut avang chuan ka harh hlawl a. TV off lovin thuthlengah ka lo mutthilhsan a lo ni. TV lam chu peih leh peih lovin ka han en tawk tawk a, Music on Demand channel ah chuan zaithiam deuh mai hi a lo zai a. A zai chu a thiam em avangin ka thu chhuak hlawl. Ka mit chu ka han nuai nawk nawk a, sana ka en, dar 12:30 a lo ri tawh. Chu hmeichhe zaithiam chu a hming hriat tumin a video chu ka en reng a. A zai zawh dawnah chuan SP-i tih hi a lo inziak a. Thuthleng atang chuan ka tho chhuak a, ei tur a awm mial takin tiin choka lamah ka phei a, fridge chu ka han hawng a. Engmah ei tur lo awm lo, tui chu ka han in tawk. Chhang dahna bawm ka en leh a, 'Good day' biscuit a lo awm teuh a, puar nawlhin ka ei te te a. Tichuan, TV hmaah chuan tih tak zetin ka va thu leh. Hmeichhe pakhat dang hi a lo zai leh a, ani phei chu a bulah lam thiam te an lo lam vel a. Nalh ka ti ngei mai, a hming pawh Mimi-i a ni lehnghal. Ka kid Damdama chhas hming ang! Ka chhinchhiah nghal thlaps. A zai zawh hnu chuan midang zaithiam lo zet mai a lo zai. Ka han hmet sawn, Gospel Demand lam pangah Magdalene an lo zai. An va thiam em. Chumi zan chuan TV ka en tlaivar ti tih a, zing dar 3 ah ka mu leh hram.

Zing tho hma thang tih takah, a tukah pawh chuan hma tawkin dar 8:30 ah ka tho leh a. Ka chhungte chuan eirawng pawh an lo bawl zo vek tawh. Kei inla tho hma tawkin ka 'smiling face' chu ka hmuh reng a. Ka nu chuan, "Te-a lah hi, tho har thei ropui si. Delh hlum sa ei i tum em ni? 'Tiang te chuan, nupui pawh nei la, i nupui pawh i chawm zo chuang lovang. Hma deuh deuhah hian tho la, tlangval dang te ang hian exer te la in insawizawi ve ta che," min ti a. Kei chuan, "Ho e mai, hma deuha thawh a insawizawi ai chuan, tlai tawkah zawi sa a thawh mai tur," ka han ti zauh a, Robin Hood ka che leh tlat. Sawi dik ka inti ve hle mai. Chhan tlakah pawh a ngai lo aniang chu, a ngawi hmaks ringawt. Nizana ka hla ngaihthlak kha ka rilru-ah a cham reng a, zai thiamlo tih takah ka faifuk takngial pawh a laih tlat avangin ka rilru chuan ka sa hlarh hlarh a. Chaw pawh a hnu reilo teah kan ei nghal.

Chaw ei kham hnu chuan ka nu leh ka nau chu bazar turin an chhuak a. Ka pa chu office an chawlh avangin a thiante nen huanah an feh dawn a, zing tawkah a chhuak tawh. Ka hna chu 'in nghah' a ni leh tawp mai. Ka rilru chuan nizana ka hla ngaihthlak ho kha ka sa hlarh hlarh reng a. E taka, hmana ka pa tingtang min tuk sak kha ka hrechhuak thut a. Inchung lamah chhoin tingtang chu ka zawng a. Rei ngial ka zawn hnuah ka khum hnuaiah chuan a lo awm ngat a. Ka han phawrh chhuak chu, a par chuaih hi a ni ringawt. A lo hmuar nasa mai. In hnuai lamah ka keng thla a, ka han hrufai vel a, chukchu tui te chu ka chhu keh nghauh nghauh a. A tingtang hrui lah chu pahnih chauh hi a lo awm tawh a. Ka thenfai zawh hnu chuan verandah lamah stool nen ka inkeng chhuak a. Ni pawh a sa val val hle a, ral leh lama Reiek tlang te chu ka thlir a. Ka lung hi a leng ve vawng vawng mai a, ka inngaihtuah lungleng zel a. Ka tah te chu a chhuak ti tih vel a. Chutah ka pa tukchawp tingtang ngei mai chu ka han perh a, "Puuunngggg...." a han ti a, ka mittui chu a tla ve zawih zawih a. "Ka perhkhuang zaitin thiam" tih hla chu ka sa a. Tui em em a ka zai lai chuan kawngkhar hi a rawn kik karh karh a. "Lo lut rawh" tih pahin ka va en a, Damdama lek lo niin. Tun tum chu amah chauhin a lo kal lova, thian dang mipa pakhat leh hmeichhe pakhat a rawn hruai lut.

Ngun deuhin Damdama thian rawn hruaite chu ka en a, ka hriat ngai mi an ni hauh lo mai. A mipa zawk chuan a sam chu a ti phir nasa mai a, a mawm lah a mawm hlarh hlarh. Tel tinah a lu a chiah a ni maw, tiin ka ngaihtuah a. A kekawr lah chu a han ha fual mai mai khawp a, a kawng chungah a vawih sa sa thei ngei ang. A hmeichhia zawk chuan boot sen sang deuh mai hi a bun a, pawnfen chhing ve deuh mai hi a feng bawk a. T-shirt dum a rawn ha a, a kawr hma a a lactogen bur zawn-ah chuan 'I wish this were brains' tih hi a inziak kalh a. Ka nui chhuak thut a, Damdama chuan, "Engatinge, tlangval phanchang ve meuh, chhun pachanga lung leng tak maia i zai ul ul le.." a han ti a, ka zai chu kalkawng atangin an lo hria ni ngei tur a ni, ka zak rilru hle a. Thuthlenga thut pah chuan a thiante chu min inhmelhriattir a, "Hei hi Johnny-a, Khatla ami anih hi" a tih pah chuan kan han inchibai nghal a. "Chuan, ka thiannu hi Wendy-i, Khatla ami tho a nia" a tih pah chuan, ka han chibai ve leh nghal a. Chibai pah chuan "In va fel ve a, kan inah te in lo leng a" ka han ti a. Chutah Wendy-i chuan, "Nia, hei Damdama hian i chanchin a sawi thin a, kan hmu chak lutuk che a, kan lo in hruai tir tawp anih hi," a ti a, Johnny-a chuan "Hei, Te-a, kan rawn leng ve tawp mai anih hi. Damdama te ho nen hian middle school ah kan kal ho thin a. Tun thleng hian kan la inkawm chho ve zel a, i chanchin hi min hrilh thin a. Music lama i tui thu te min hrilh thin a" a han ti a, "A ti ve mai mai anih chu," tih pahin Damdama chu rum deuhin ka han melh a. Damdama chuan, "Te-a, ka thiante hian band din ve ila an ti a, nang rem hre deuhah an rawn be ve tawp mai che anih hi," a ti a. Kei chuan, "Mahse, tu nge guitar perh anga, tunge drums vua ang a, tunge zai ang? Kei chu ka zai dawn miah lo ania" ka han ti a, Johnny-a chuan,"Nangma'n guitar chu perh la, Damdama hian drums vua sela, keima'n bass ka perh anga, chuan Wendy-i hi a zai anga. Ani hi in la hre lo mai thei a, kan vengah te phei chuan a zai ziah, pui pun naah te phei chuan an hmaih ngai tawh lo. A zai ve ziah," a ti a.

Ka lunglen kal tluan lai ani bawk a, band din pawh chu ka pawi ti lo, ka phur khawp mai. "Ni e tiraw, band kan insiam chuan music video te kan siam ve anga, TV ah te kan thun ve anga kan lar viau ang." ka han ti a. Wendy-i chuan, "The Lunatics tiin kan band hming chu phuah ila, line-up pawh kan ziak chhuak ange" tih pahin pen leh note bu a phawrh nghal a. Kan phur tlang hlawm hle a, mahse thil buaithlak a awm ta tlat mai. Kan han inchhut inchhut chuan engmah thiam bulfuk kan lo nei ta lo. Tonic Solfa takngial pawh tumahin kan thiam si lo, kei a guitar perhtupa ber tur lahin D key ka hmet thiam tawk a, key dang chu ka hmet nung zo tha thum thin lo. Ka instrument neih ve chhun, ka inzirna ber lah ka pa min tukchawp sak, a ban kawi ngul mai kha a ni a. Damdama lah ka hriatchian em em, lactogen bur leh thleng vel vua a, zai ring ve vak vak kha a ni mai a. Midang pahnih hi chu ka hrechiang vak lo. Ka rinthu mai mai chuan, Wendy-i pawh hi a thiante'n i zai thiam alawm, tih pahin an fuihpawrh zel a. Ani lahin a tak tak emaw tiin a zai a zai ve ringawt anih te ka ring rum rum a. Johnny-a lah chu a hmel en reng rengin a beidawnthlak ngawih ngawih hian ka hria. Ka lungngai hmel a hmu nge, Johnny a chuan, "Music hi chu ka ngaina a, Bone Thugs N Harmony hi ka ngaithla nasa a. Harmony ho hi an thiam mah mah zawkin ka hria a," a ti vel a. Wendy-i chuan, "Kei pawh Mariah Carey leh Celine Dion ka ngaithla thin alawm," a rawn ti ve a. Ka bei a ti dawng zual sauh. Ka phur vak tawh lo. Mariah Carey leh Celine Dion a ngaihthlak thin avang chuan zai thiam turah a indah emaw chu aw, ka ti a, amahah chuan beiseina ka nei sang lo hle. Sound track hlir hmang thang anih chuan Live music ah a zai lai ngei ngei ang tih chu ka ring tlat bawk.

Wendy-i'n a ziah zawh chuan haw an tum ta a. Damdama chuan, "I ziak zo tawh ami?" a ti a, "Aw ziak zo tawh, kan haw mai dawn em ni? Zai zirna lamah admission tih kan tum deuh a, kan hmanhmawh tlat," a ti a. Johnny-a chuan,"Nia ti rawh, i kal mai ang. Te-a, kan kal mai dawn. Kan sawmna che i lo pawm a, kan lawm tak zet zet a ni," a ti a. "Nia, kan lawm lutuk," tih pah chuan mi rawn nuih seih a. A hmel te lah chu a tha phian lehnghal. Damdama chuan, "Nia, hawh u, i kal ang u. Kei pawh Full House en ka duh" a ti a. "A la hma alawm le, in ninawm ve hranpa reng reng a, la awm ve hrih ula," ka ti fiamthu a. An thutna atang chuan an ding suau a, kan inthlah liam ta a.

An chhuah hnu chuan thuthleng sei ah chuan ka tlu zal a, ka ngaihtuah chhunzawm zel a. Zai zir chawp dawn bawk, buaithlak dawn ngei mai. Zir hma hauha, a zai ngam tawh chuan a va huai ve aw tiin ka ngaihtuah mai mai a. Band lo indin pawh ni ila, hla pakhat kan sa ve dek dek anga, kan in la ve em em ringawt mai ang tih te ka hlau hle a. City Bus a chuan zak tawk lek hian kan lar ve ting tang anga, mi hian min hria emaw tiin lansarh tum deuh deuh hian kan vei hawh hawh vel anga tihte ka ngaihtuah mai mai a. Bakah, music kan thiam lo chu a buaithlak, zir a ngai a ni. Zirlai ti buai si lova zir a ngai dawn a ni, nu leh pa te phalna thlapin zir ila. Ni khatah darkar hnih khat bak an zir ngai chuang lova, music lama mizote kan hmasawn ve theih zelna tur ni a ka hriat avangin zir ve ngei chu ka tum a. Kan zaithiam tam tak te pawh hian music an thiam lova, hei hi kan hmasawn theih lohna pakhat a niin ka hre ve a, solfa te hi thiam ve ila a tha zawk ngei ang. Bakah, guitar emaw drums emaw kan han khawih thiam ve dek dek a, band din te hi kan tum leh ringawt thin. Kei pawh ka inthiam lo deuh, tonic solfa takngial pawh thiamlo chuan a ngaihthlak lampang hi ti sela, a tawk viau a ni, ti tein ka ngaihtuah ta mai mai a.

Chutah, ka nu te bazar an lo haw. Bag lian tawk tawkah chawhmeh an rawn khai haw teuh a. Ka nu chuan, "Awi, ka chau lutuk. Te-a, chawhmeh hi lo phawrh vel teh" a rawn ti a. Ka peih lo lutuk chu ka hmel ka siamchhe zuai a, chhiat tawh sa mah nak alai chuan. "Thil te te ka lo hawn che ania" a tih rual chuan ka in perh tho nghal a, "Eng maw?" ka va ti nghal. Chutah, zurui ektum tia vel, lehkhaa tuam thil hi min pe a. Ka hawng nghal a, second-hand kekawrte sen a lo ni a. Ka lawm lutuk chuan ka lu-ah ka khum nghal a, rilru-a zai rut rut chungin chawhmeh chu ka rem tha sawk sawk a.

No comments: