Monday, February 18, 2008

Kan Hai Sikul Kal Ve Lai Chuan.....

Ti ve tawp mai teh ang (Ve khanglang chuanin). Enge theihnghilh a har alawm mawle. Tiraw... Mahse, engtin nge kan tan ang. A va vang ve, ngaihtuah char char phots. Aw tihian ti mai ang, admission ka hmuh atangin. Aih a ni leh lo ka duh leh lo. Chutilo zawng chuan ti daih ang. Thianpa MS-a nena kan inhriat tan dan hian bul i tan phots teh ang hmiang

St. Pauls HSS-a admission kan tihfel hnu chuan sikul chu ka han pan ve phot a. Hai sikul kal tanna tur ani bawk a, ka rilru a hlim hle mai. Mahni awmna section tur kha pawnah an lo tarchhuak a. Ka va en ve dawn a, mahse tuan rang lem lo tan chuan hmuh mai a harsa hle. Tichuan, tan dawn tawhah thianpa BZ-a (Ani hi chu tette, Mary Mount-a kan luh laia inhre tawh kan ni a) chuan Joseph, nang chu section B-ah i awm dawn a rawn ti a. Kei chuan a awmna tur ka lo zawt nghal a, Section A-ah ka awm dawn tiin min lo chhang a. Tichuan, kan inthen chu a ni mai a, sikul dar a ri a, class room zawng chuan ka kual ka kual a. Thian vai Krishna-a te, Ritesh-a te ho (anni pawh hi tette, KG-I atanga ka thiante an ni.) tlema zirtirtu be ngam deuh te chu ka hruai a. Class VIII section B awmna ka zawh tir a. Tichuan ka hriat veleh class lamah chuan ka kal nghal a. Class chhung ka va luh chuan hmelhriat ka hmuh mai loh avangin thutna awl ka melh a. Tlar thlang lam ber, a hnuhnung ber dawttu-ah chuan mi pakhat chauh a thu a. Chu pa bulah chuan ka thu ve ringawt a. Sawi tur a vang kher mai. Ka thutna hma lam chu vai ho an lo thu a, min lo hmelhriat sa tawh bawk a, min lo be luai luai a. A ninawm duh khawp mai. Ka hawi kual vel a, Mary Mount atanga ka luhpui dang ka melh a. Jerry-a ka hmu, mahse, ani chu midang ho nen an thukhawm daih. Pawi lo, keimahin ka thu mai ang. Ka bula thu pa chu a tawng duhlo ropui mai a, a kiu chu dawhkanah nghatin a kut chuan a bek a dawm a. Zawi te te a zai chungin tukverh lampang chu min hawisan daih. Hemi nileng hian he pa nen hian kan inbe lo a ni. Hla ziak tuin Sikul ka luh tirhin mikhual ang ka lo ni a tih kha ka inhmeh bel vel ta mai mai a.

A tuk chuan sikul chu kan kal leh ngei a, hemi tum hi chuan kan inbe ve ta (A vawikhat nan). Kan inbiak dan chiah chu ka hre tawh lo a, ani pawh chuan hmelhriat a neih bik loh thu leh, St. Lawrence atanga a luhpui te chu section dangah an awm vek thu min hrilh a. Ka thianpa chu sam kir chiat mai, a hmel en reng renga 'politician' hluah hluah hi a ni a. Tichuan kan inkawm chho zel chu a ni ve ta chu ania. A ho thei ngei mai. Ka theihnghilh theih loh chu hming lam apianga 'Present Sir' a tih theihngilh ziah kha mawle. Khami avang ringawta Sir Biaktea nena an inhrem zin zia kha!!. MS-a roll no kha 214 niin ka hre ta. Roll Call neih hmasak ber chuan hmingin an lam a, kan zirtirtunu (The Rock-i) khan Joseph a han tih chiah khan ka ding a. Mahse, 'Present Miss' ti kha chu midang pakhat aw hian min rawn tawmpui ve a. An nui dur dur a, ka hnung lam ka hawi phei a, hmel lama puak ti bik vak lo, sual hmel deuh mai a ni a. A hnu-ah chuan kan inkawm ngeih phian, Joseph-a ve tho a lo ni a, mahse ka hmeltha zawk. A nuihzatthlak theih zia kha!!! MS-a hi sawi zel ila, mi fel tak, rilru zau tak mai a ni a. Ka thian kawm ngeih berte zinga mi a ni. E, ka hrechhuak thut a birthday kan lawm zana kan thlalak dan zozai te kha!! Mi hrangin hmu ve se chuan, min hmu ho viau ang. Zodinthara, EL-a, Zaia, Kei te leh amah te kha. Pa te chhun tih takah a rilru hi a politician tlat a, a fing ropui si. Lehkha lah chu a thiam thei ang zek lehnghal a.

Cl-VIII first term kan exam zawh chuan mi pakhat hi a rawn lut thar a. Amah hi cher ti a han sawi tur chu a ni lo, a thau ti ila, a duh dawn bawk si lo. A mum ti mai ang. Ani pawh hi a lut rei lo nain, a luh chhung zawng kha chuan kan inkawm ve ber thin. E, a hming ka la sawi lo Lalrozama (Pu C Dina fapa a lo ni reng a) a nih kha. Chaw ei chu duh ve tak a ni, tiffin te hi chaw mal khat te pawh bang lo hian zuk ei zo vek thin a. Rammuanpuia, TR-a, ka hming pui pahnih Joseph VLRA leh Joseph LHTA, Rozama, VLHmangaihsanga te ho ka kawm lai te kha theihnghilh a har dawn mange. Khang hun laia Guns &Roses kan ngaihthlak peih zia kha. Patience phei kha chu kan sa ho thin a nih kha (Backstage-ah). Vawikhat chu NgTV music video thar en tur ringawtin an Inah kan va leng anih kha. Banah te hian haw tlai bik an awm chuan kan innghak ngei ngei a. Dar 4:30 tihvela kan haw chauh te hian Bus-ah pawh chuang lovin ke ngatin kan haw thin. In han thlen hi chuan a thim titih der tawh. Ke a kan kal chhan ber pawh ti ti ho hi nuam kan ti a, bus-a chuan kan ti ti ho rei theih loh vang a ni ber. Sawi ve reng rengah Thianpa Rozama nena telefawn-a inbiak te hian a reilo berah minute 15 tal hi chu kan inbe thin. Sawi tur a hre thei bawk a.

Thutna hi kan thlak kual kan thlak kual thin a, vawikhat chu mi pakhat cher ve deuh mai nen kan thu dun a. Ani hi mipakhat dang hlauhawm hmel em em nen an rawn lut tlai deuh a. (Sikul luh tan atanga ni 2-ah an rawn lut). Ka thutpuipa chu fel hmel deuh mai ania, kan inhriatchian hnu chuan guitar bak a sawi pui hleih theih der loh mai. Ka subject a ni lo ve ropui si a, ka hriat ang ang hi kan sawi pui ve naw naw thin a, sawi tur a vang duh teh asin. A box-ah hian Steve Vai tih hi a ziak kulh a, a ngaisang veng veng asin. Hepa hi tu dang ni lovin Lalruatfela lek a lo nia lawm mawle. Vawikhat pawh Sir Fabien-a'n SS min zawt vek a, a thiam lo lo kan ding a. Thiam lo zingah kan tel ve leh pek a. Mahni bul ami te theuh nen min inben tir zel a. Mi te chu na lo te te in an inbeng a, an thu ve zel mai bawk a. Ruatfela chuan na deuhin in beng ang aw a rawn ti su su a. Kei chuan a tifiam mai mai emaw ka ti a. Kan hun a lo thlen chuan Ruatfela chuan min beng hmasa dawn a, ka biang ka dawh a. Ani chuan theihpatawpin min beng mai a, a ri chawk mai a. An nui nghal dur dur a. A zahthlak duh khawp mai, tichuan kan beng ve pawp a, Sir pawh a nui ve tawp mai. Class X kan nih khan Ruatfela, Zohminga, Dika, Ramdina leh C-a te khan band 'Spice Boys' kha an indin a. An hla sak pakhat ka la hriat reng chu Spice Girls ho hla lar '2 become 1' tih kha a ni a, Ramdina aw a tha luah luah bawk a. A zai tial ngai lo reng reng a, hemi tum pawh hian a zai tial lo chiang khawp mai. Tlar tir lama hlauhawm hmel em em ka tih kha Ramdina hi a nia, ani hi tlem in sawi leh lawk teh ang.

Body builder ngang a ni a, a kut te hi a lian ropui si. A sawi dan phei chuan zing kar pum hi chu exer lak nan a hmang thin a, keini ho chuan Brock Lesnar ti te in kan ko fiam thin. Exer a la nasa lutuk hi a streng lo phah zawk thin. Tuk tin sikul a rawn thlen hian ka kawng a ti na a, emaw ka hnungzang ka ti na emaw hi a rawn ti ziah lehnghal a. Kan sikul-ah khan Body Builder of the Year 2004 atan thlan a ni nghe nghe, kan lawmpui e. Sap tawng a thiam si, thil thiamloh neih te hian ka rawn ber a ni thin.

Cl-IX han nih kha chuan a nuam tawh hle mai, inthlahrun na te a reh deuh a. Bakah a nawm lehzualna chu kan section-ah khan, tu huat thu suh ah vai an awm miah lo a ni. Kan inthurual em em a, Miss Mariamma-i sermon kan ngaihthlak thap thap zel lai te kha. Cl-IX kan nih laia ka thiante, Lehkha thiam thei Peka, Mi fel Zualtea, Mi hriat lar em em Telawka, Che rang lem lo Dinga, Valbawiha (Ambrose), PC Puia (RK-a) leh Aite fun sual David-a te ho nena kan inkawm thin lai te kha. Ka chunga an that zia te kha theihnghilh rual a ni lo. Buizova tia hriat lar zawk Lalchhanhima pawh kha kan section-ah hian a awm ve, a zaithiam zia chu inhriat vek kha. Sawi tawh lo mai ang.

CL-IX E ho kha kan class IX bikin ka hria. Vawikhat kan English class kan lak laiin chhimtir a rawn tlan lut a. Miss Mary(Skylinks chanchinthar puang thin kha) a rak ring ber a. Chutah kan class ho zawng zawng chu an rak ta vak vak mai a, an rak bengchheng bawk sia, beng a ngawng mai dawn emaw tih tur khawp a ni. Thuthleng-ah an ding kang sup sup a, an au dual dual a, chhimtir lah chu a mangang ve leh letling a, a chik vak vak a. Chu tak chu hmeichhe ho chuan an hlau lehzual a, an rak ve leh vak vak zel a. Kei pawh chuan enge a nih ka hre mai si lo, rul nge a nih a, enge a nih ka hre si lo. Ka ke chu ka khai kang ve ringawt a, rak em chu ka rak ve lem lo. MK-a te tlar phei chu an hlau lehzual in ka hria, mipa pathum an nia, an pathumin thuthleng chungah an ding thap mai. Kan class thenawm a zirtirtu awm te chu an lo tlan khawm tual tual a, enge thil awmzia tiin an rawn ngaihven a ni. Chhimtir chu eng tin tin emaw ni an that thei ta hram a. Chutah kan Bro. Principal PK James kha a lo chho a, chhimtir chu a mei-ah khaiin hmeichhe ho bulah chuan a hlauhawm loh zia hrilh tumin a keng kual vel a, anni lah chuan an la hlau tho si. A au ring zual, Lucy-i phei kha chu Bro khan a khawih luih tir kher lehnghal a, a tui lo teh a sin aw. A hlauhawm loh zia chu a sawi a sawi ringawt a, chutah Ambrose-a hnenah paih turin a ti ta a ni. Hemi ni a kan English class hi a nuam angreng hle a, hriatreng tlak a ni. Amos-a lah khan Bruce Lee : The Dragon Story te kha a en bik a, mak thei ngei a ni.

Thawkkhat lai Class-IX kan nih tantirh lai vela keini aia junior zawk Class-VIII ho kan rim thin lai te kha. Ngaihawm vung vung hle mai a, Lalnunhlima te, Zaia te, Chhanhima te ho Class-VIII section tinah sas an lo nei hman vek a. Tun tum chu ka sas kan rim hun, tiin an insawi chhawk thei reng a. A huho kan ni bawk a, nuam kha kan ti ve thei em em a, break neih tawh phawt chuan ‘sure’ loh paw’n ‘ngei ngei’ a ni ringawt mai.

Hetia kan kal nek nek lai hian Cl-IX promotional exam pawh kan zo ve leh mai a. Pathian khawngaihna azarah vanneihthlak takin kan pass chho ve leh ta a. Tichuan Cl-X chu kan ni ve leh ta der mai a. Luh tantirh ni ber chuan mahni hming leh kan section awmna tur chu kan han en ve a. Midang chuan an awmna tur an hre mai a, kei chu ka hming an lo ziah sual avangin ka hming ka zawng hmu zo ta lo. Lalnunmawia tih tur aiah Lalmuanpuia an lo ti a, ka in zawng hmu zo lo chu a ni der a, ka mangang hman hle a. Remruata leh Zualte-a te chu ka sawm a, min va sawipui teh u, ka ti a. Anni pawh chuan an lo hnial lova. Tichuan, kan va sawi ta a, Staff duty te chuan hepa aiah hian lo han awm phawt mai rawh min ti ta a. Tichuan, class-a luh kan tum lai tak chuan Lalnunhlima a lo kal a, ani pawh chu a hming awm loh avanga buai tho a lo ni. Min la awmpui ve hrih ru, a tih talh avang chuan kan awmpui leh ta a. Tan dar pawh a ri tawh a, rei fe kan han buaipui hnu chuan kan insawi fel thei ta a. Class lampang pan chuan kan kal ta.. X C awmna kan hre mai si lo. Zirtirtu kan hmuh ang ang te chu kan han zawt a, an hre mai bik si lo. Tichuan, Miss Siami kan hmu hlauh a, kan zawt ta a. Ani chu kan class teacher tur a lo ni reng a, hming a lam zo chiah a, attendance bu a submit dawn chiah a lo ni a, tichuan kan hming te chu kan han dah ve nghal a, class-ah chuan kan lut ta a. Kan han lut chu, a tlar lai tak hmasa ber chiah chu a lo la awl a, tah chuan kan pathum chuan kan thu ve ringawt ta a ni. Kan han hawikual a, IX-E atanga awm chho chu kan tlem ang reng hle a, keini pathum bakah Zaia, Dinpuia tih vel bak chu kan awm lo. Chumi hnu lawk chuan Miss pawh a rawn lut a, ka hming an ziah sual te chu ka complain ta nghal a, a ziak tha zung zung a, kan section awmna hmasa te min zawt a. IX E atanga awm chho vek tlar khata kan thut chu a remti ta lo a, tichuan Remruata chu a lachhuak a, hmun dangah a thuttir a, tichuan Remruata aiah, Rinzama ngei mai hi a rawn thuttir ta a ni.

Rinzama hian ka tawng lo haw lo se. Kan bula a thut tantirh lai hi chuan a harh lutuk ringawt. A che reng a, kan in wrestling reng ringawt mai a ni. Ninawm lamah a kal duh tlat. Tichuan eng tin tin emaw, term khat chu kan hmang zo ta der mai a. Mak deuh mai chu, session laihawl vel atang chuan Rinzama chu a ngawichawi ta mai mai khawp a, a nun a thlak danglam thut a ni ber mai. A nun a zawi ta em em ringawt mai a ni. Kei, Zaia leh Remruata hi kan thu ho rei ber in ka hria, kan tlar chu kan ngawichawi hlawm sia, example atan min hmang thin. Midangte entawn turin. TK-a leh Rinzama leh Keshav a an thu ho a, TK-a leh Rinzama hi chu naupang harh ngang an nia, hrem pawh an tawk zing dun hle a ni. Miss Siami chuan tihdan thar a ruahman ta a, a ngawichawi deuh pakhat lakchhuah a, TK-a bulah thuttir a, Rinzama chu a ngawichawi dang bulah thuttir a tum ta a ni. Tichuan, kei chu TK-a bulah ka thu thla ta a, Rinzama chu ka thutna thinah chuan a han thu ta a. Heta tang chiah hian a ni, Rinzama hi a ngawihchawih tak ni. Tk-a erawh, min hruai harh zo vek hi a ringawt. Kan zai dun nasa thei khawp mai a, kan zaithiam loh nen nen khan kan bul hnaia thu te khan an lo tuar thei ngawt mai. A bik takin kan hmaa thu te Christina-i leh Nancy-i te kha. TK-a nen hian fiamthu hi kan thawh reng a, thutak pawh a thutak theih loh, lehkhazir lamah pawh kan tlakchhiat phah hle a ni. Kan tlar-mate Keshav a lah kan hruai harh ve vek bawk a. Kan tlar chuan kan in ‘combi’ tha ta em em a ni. Nitin hian sazu ek hi cheng hnih/khat man emaw hi kan pai ziah a, tichuan kan dahkhawm a, nileng a eiruk atana kan tih a ni. Sazu ek hi kan hmuam reng ringawt a ni mai.

Kan sikul-ah hian Sachin, Tiranga tih angreng ho hi khap tlat a ni a. A ei ei chu hremna an siam thin anih mai bakah cheng khat an nu leh pate an chawitir thin a ni. Vawikhat pawh sikul kalkawngah Sachin hi ka lei pek alawm mawle, sikul ka thlen chuan ka lo la eizo lova. Fang hnih khat emaw lek chu ka hnunga thu Dinpuia chu ka pe ve a, chumi lai tak chu kan Brother chuan a lo hmu fuh ta hlauh mai. Dinpuia chu a ko chhuak a, enge i thil dil kha a ti ta a. Ani chu naupang fel tih takah thu dik tak a sawi ta a. Sachin min dil thu leh a ei thu te chu a hrilh nghal vek a, Brother chuan tunge i dil tia a zawh chuan, a sawi duh lova. Brother nen pawh hian an in kungfu hman thelh a ni awm e. Chumi hnu chuan min rawn kochhuak ve leh a, min zawt vel ta a. Kei chuan ka lei ngei thu leh ka pek ve thu te ka sawi a, ka neih tawhloh thu te chu ka hrilh nghal vek a. Chutah I bula thu khan a ei ve em? min ti a, kei chuan, “Ka hre lo,” ka ti a. TK-a pawh chu an kochhuak ve leh ta nghal a, TK-a hian Sachin a ei lo hrim hrim a, Brother hian a ei emaw a ti tang tang a, anni pahnih pawh hi an in kungfu hman tep a ni. Tichuan kei leh Dinpuia chu hrem tur chu kan ni ta a ni, sikul dan kalha kan chet avang chuan. Min hremna chu hemi tlai leh a tuk tlaiah Rora thiar tiah tiah tur a ni ringawt mai a ni. Tin, kan handbook-ah tihian a inziak bawk, a ngai ngaiin : “30.9 - Parent to come and give a fine of Rs. 1/- for bringing and eating SACHIN in the class. He will carry RORA after school,” tih chu a inziak kalh a, tah hian kan class teacher mai bakah principal thlengin hming an sign a ni.

Chumi tlai chuan Rora chu kan han thiar tak tak mai a le. Ke a kham duh ngei mai, kan sikul thlang kawngpui atanga sikul playground thleng thiar chhoh char char tur a ni a. Step hlir, step hlir a ni bawk sia, hahthlak ve tak chu a ni. Dinpuia nen chuan tlem te te in kan thiar a, vawi 10 vel kan thiar hnu chuan khua te a lo tlai ta bawk nen, Brother hnenah haw kan dil a, a lo phal ve mai bawka. A tukah chuan kan nu te ve ve chu cheng khat chawi tur ringawtin sikul-ah kan han hruai ta a, Principal office-ah min hruai lutin min zilh ta hlak a ni. Hemi tlai pawh hian a ngai te bawkin rora chu kan han thiar leh a, hemi tum hi chuan thiar pui kan nei nual, class hrang hrang atanga mizo tawnga tawng an man te chuan an lo thiar ve chu niin, kan thiar ta luai luai mai a ni.

Class ah hian ball kan pet thin a, kan ball pet thin lah hi ball pangngai ni lo, hei plastic ball, chang deuh, tennis ball tia lek hi a ni a. Kan pet a, kan hlim ve thei em em thin. Engemaw hun awl deuh hlek kan neih chuan kan pet ve deuh zel tih theih a ni. Nuam ve thei ham ham khawp mai. Vawikhat WE kan neih tuma Sir Chauhan a kan chhai tak tak kha, kan inum kual zuar zuar ringawt. Sir hian tiang nen min um a, hnathawh tur min pe a, kan thawh zawh hian a phalna pawh la lovin class-ah kan lo hahchawl thin a, kan zai vak vak a, helaia kan hla sak uar tak chu ‘4 Days Late’ ngei mai kha a ni. Class-ah chuan sir a rawn tlan, kan biru vel, vuak tumin min um, kan tlan chhe luai luai. Nuam ve thei khawp mai.

Tlai sikul bana kan haw dan hi dangdai ve thei tak chu a ni. Ban veleh hian muang changin kan chhuak ho a, Kulikawn bus stang chhak lawkah hian thingpui dawr a awm thin a. Chu chu Sammy’s a ni a, tah chuan kan chawl thla thin a. Kan in ei puar zawh hnuah, chuan ke hlirin han haw phei a, kawng chung lampang-ah. Tichuan, Thakthing bazar-ah kan chhuak phei thin a ni. TK-a hi Thakthing Tlang-a awm annih avangin kan kal ho thui lutuk ngai lova. Tichuan, bus a kal chuang lo chuan, Sikulpuikawn thleng hi ke hlirin kan kal chho leh tak tak zel a. Sikulpuikawnah hian Biakzuala leh Aklesh-a ten min pen san leh a. Kan tui viau chuan ke in kan kal zel thin a. Mahse, a tlangpuiin Sikulpuikawn atang hi chuan Bus-ah kan chuang thin a, Khatla-ah Remsanga leh OP-a te an chhuk leh a, tichuan, Tennis Court-ah Michael-a leh Arun-a te an chhuk leh a, Zodin Bus Stand-ah kei leh Remruata te kan chhuk leh a, a piah ber Bazarah Rinzama a chhuk ve thin bawk a ni. Kan indawt put a nih chu, kan bus chhuk dan te pawh chu.

Vawikhat chu zing sikul kal lamin kei leh Michael a kan kal rual a, hei hi exam ti ila, test kan neih lai a ni lehnghal a. Michael-a chuan halpuah a lo ken thu min hrilh a. Tichuan, khawi laiah emaw chuan hal kan remruat ta a. Sikul Office leh Computer Lab inkarah chuan step hi a awm a, tah chuan hal kan tum ta a. Halpuah pathum vel chu kan suihzawm a, kan hal ta a, kan tlanchhe nghal a, class chhungah kan awm hnu chuan a puak ta dur mai a, sikul zawng zawng hriat tham khawpa ring a ni. Tichuan, kan phei ve leh nghal a, Sikul Corridor vel chu zen rim hlir hian a khat a, a khu rum rum mai, ring deuh deuh hian, “Tunge halpuah hal a?” te kan ti vel vak vak a. Kan in en a, kan nui leh tet tet zel ringawt. Min manchhuah te kha kan hlau hnuhnawh leh rum rum a ni. Halpuah hal kha nuam kan ti ve hrim hrim a, tlai sikul ban te hian sikul naupang tam laiin sikul bulah kan hal a, kan tlanchhe thla char char a, thui fe kan kal hnu-a puak dur leh mi au tuar tuar thawm hi kan hriat theih chhun a ni thin. Kan va lo sual thiam thin tak.

Ho deuh deuha kan awm vang ni maw? Lehkha lamah hian thiam thei zek zek hi kan vang hle mai a. Kan rank hi a inang tlang deh put hlawm a. Nu leh pa koh tur an tih apiang hian kan thianho hi kan bang ngai lo. Kan koh ve ziah nachhan pawh lehkhathiam theih vang ni lo, thiam theih loh vang zawk hi a ni ziah lehnghal. Tlai khat chu sikul banah hian OP-a te inah kan leng khawm a, kan haw har angreng khawp mai a. A thim titih der tawh mai a, kan haw kawngah chuan drug addict pakhat hian kan thianho chu damdawi min lo zawrh ta alawm mawle. Keini chuan ring deuh deuhin, “Duh lo” kan ti a, a tawp berah TK-a chuan, “I duh leh i pu pe rawh,” a ti vak mai a. A thin chu a rim ve viau in ka ring, kan tam hrim hrim a, a thinrim ngam lo a ni.

Engtin tin emaw board chu kan han exam ve a. TK-a hi a zir nasa berin ka hria, a chhan chu hostel naupang kha a ni tlat a. Saint Hoikhe hostel-ah exam dawnah a awm a, an zir nasa thei khawp mai. Keini ho pawh kan rilru a hah ve ta, kan thiam si lo, kan zir peih bawk si lo. Chutiang hlir chuan kan exam chhuak ve ta a. Kan rilru a hah tlang hlawm ngei mai, kan chhang chhe hlawm si. Pass pawh kan inring pha hlawm lo a ni. Maths kan tih tlai phei chuan Rinzama chu biak pawhin min chhang peih tawk a ni, chhang chhia a inti ngang a ni. Exam chawlh chhung hian kan inhmu khawm deuh reng a, kan inngai hlawm bawk a ni. Thil eng eng emaw hi kan tikhawm deuh reng mai a ni. Result pawh a chhuak dawn tawh a, kan rilru hah lah chu a zual telh telh bawk a, kei phei chu question paper hi ka bih nawn ka bih nawn a, ka chhan dan atangin engzat tak hmu thei ang maw hi ka inti ka inti thin. Result chhuah ni chuan chawhma-ah Biakzuala leh Remsanga ten min rawn sawm a, OP-a kan sawm ve ngial pawhin a lo kal duhlo a. Lungleng-ah kan zin dawn te a ti kual vel thul. Ka kal ngam lo, nangni chu in pass dawn sia, kei chu ka fail dawn a, te a ti vel a. Chutiang khawpa chhang chhia chu kan ni, keini ho chu. Engpawhnise, hmuh tur tho tho tiin OP-a tel lo chuan kan kal chho ho ta a. Kalkawngah te chuan mi result en zo haw lam te chu kan lo en zel a, a then an hlim a, a then an lunghnur a. Chutiang vel anih avang chuan kan thin pawh a phu nasa hle a ni. Kan en chak bawk si, kan hlau deuh bawk si, chutiang kar velah chuan kan awm ta a ni. A tawp a tawpah chuan mi haw lampang result bu keng chu en kan dil ve nghal a, kan han en chu. Rin loh deuh maiin kan pass ta vek mai, kan han lawma kan han lawm dan chu, kan in chibai vel, kan pathum chuan. Tichuan, MBSE chu thleng ve reng reng ang, tiin confi tawk chuan kan kal ta a ni. Kalkawngah chuan miten, enge i result tia min lo zawh pawhin, kan la en lo, kan zu en ve ange, kan ti zel a. Result pawh chu en chuang lovin result bu chu kan lei ve ringawt a. Kan haw chho leh ta nghal a. Biakzuala te inah kal phei kan tum ta a, Khatla-ah chuan Zohminga nu in min lo au ding a. Kan result te min zawt a, Zohminga result ka lo en ve lawk, a tia. Kan en tir a, ani pawh a pass a, nuam ve tak chu a ni. Chumi hnu chuan mi dang dangin result bu chu en min rawn dil ta a, phalloh ngawt chi a ni lo, kan en tir ta zel a. An en zo a, midangin ka lo en ve lawk an rawn ti reng a, kan kal sawn thei ta hauh lo mai. Chutia rei ngial an han en hnu pawh chuan en zawh tihreng a awm thei ta si lo, Zohminga nu chuan min lo khawngaih, kal tir tawh rawh u, te a rawn ti. Enga tan mah an ti si lo, kan la ding ta reng. Darkar 1 chhung vel kan din chu chuan a ni tawh em em lo tiin an en lai chu kan chhuh lui ta a.

No comments: