Piancham lawm dan dangdai

January 29 zing dar 7:00 a ni a, damdawiinah chuan nu pakhat hi na tuarin a rum a rum a. He a na tawrh hi mipa chuan an tuar ve ngai lo, a bulah chuan a pasal chuan lainat takin a vil reng a. A rilru chuan a nupui na tuar chu tawrh chhawk theih ni se tiin a ngaihtuah rauh rauh ngei ang le. Tun atanga reilo te ah an fa hmasa ber, an rila rah ngei an hmuh theih dawn avanga an lawmna mittui leh na tuar mittui chu an luang za reng a. A na a rawn chhuah tak tak phei chuan awm ngaihna a hre meuh lo, a kawng te chu a bung dawn emaw tiin a then leh tlawk tlawk thin. Darkar khat zel a liam leh hnu chuan khawvela an lawmna ti belhchhah turin an fa hmasaber chu an nei ta. An va lawm kher em!! Mite angin a pian hlima tuamna tur puan tha te nei zo ve lo mahse, an inhlawhna atanga an lei ve theih tawk puan hlap chhe chi chuan an fapa duhtak mai chu an tuam ve a. Duhtaka anmahni siamtu Pathian pawh a lawm ve ngei ang le. Anmahni lawmpuitu chu lawmthu an hrilh nghal mawlh mawlh a. Hemi te nupa hi tu dang ni lovin, ka hmangaih em em ka 'NU leh PA' te an ni asin.

Kumtina khami 'Ni' alo thlen kha chuan, sap hovin 'birthday' an tih, keini'n piancham kan tih chu kan lawm ve zat zat a. Ka tet deuh lai chuan ka piancham a lo thlen apiang hian ka nu leh pa te hnenah motor lem emaw silai lem emaw te ka lei tir thin a. Piancham kawr mawi te nen, kan vei hah hah zel a, thiante leh chhungkhat laina te kha chaw ei turin kan sawm a. A nuam ka tih ber thin pawh piancham lawm tura lo kal te chuan thilpek tha tak tak min rawn ken sak thin kha a ni, ka va lawm thin tak em! Ka nu leh pa te lah chuan min lawmpui thiam em em a, ka thil duhzawng apiang chu min tihsak loh hi hrehawm an ti thin. Ka lo len deuh hnu chuan, ka thil beisei pawh a sang tial tial a. Pawisa nei lem lo mahila, ka thil ngen tawh chu min leisak loh hi an hreh em em a, anmahni ei leh in ai pawh ka tan chuan an hmang hreh lo.

Chutia kum 10 chuang teh meuh ka piancham kan lawm hnu chuan, zan khat chu ka la hre reng. Naupang te kum 10 mi lek ka la ni anih chu. Zan dar 7 vel a ni a, naupang chhia kan la nih avangin khumah chuan mu turin kan inthawlh than tawh a. Ka nu duhtak chuan ka ngaihthlak nin theih loh thawnthu chi hrang hrang chu min hrilh mawlh mawlh a, kei pawh mut chhuak chuan min rawn zem tawh a. Ka mutthilh lohna chiahin min dal tawh a ni ber mai. Chutah, ka thawm hriat chuan min ti harh chiang ngei mai. Ka rap bawk a, ka hlau bawk a, ka tap teuh ngei mai. Ka nu thawnthu sawi lah chu a tho thut a, tukverh lamah chuan a dakchhuak nghal.

Reilo te hnuah ka bulah chuan a lo thu leh. "A nu, enge a? Nu Pari chu ngatinge a tah vak vak a. Puitling a ni ve sia, ngatinge a rak vak vak a?" tiin hrethiam lo takin ka lo zawt a. Ka nu chuan, "Mate, Nu Pari chuan nau a vei a, a pum a na anih chu." a ti a. Kei chuan, "A va na awm ve, ngatinge a tah vak vak a?" ka ti nghal a, "Mate, i la hrethiam phak si lova. Kei pawh nangmah ka neih dawn che chuan na ka ti lutuk a. Ka tap ve vak vak alawm. A na em asin, mate. A tehkhinna tur pawh a awmlo," tiin keimah min neih dawna a na tawrh dan zawng zawng chu min hrilh char char a. Ka nu chu pawn lam atangin an rawn ko vak vak a, reilote a chhuah hnu chuan a lo lut leh a, "Mate, nangmaha mut i hlau em? I nu Pari te inah ka va kal ve ange, damdawiinah ka kalpui a ngai ve mai thei a, ka kalpui loh chuan rang deuhin ka lo phei leh nghal ang." a ti a. Nu Pari te nen chuan in si cheta awm kan nih avangin ka hlau lem lova, "Hlau lo" ka ti ringawt a, tichuan a chhuak nghal a.

Naupangte e ti lo chuan ka muhil thei thak lova, ka thawm hriat chuan mi tiharh reng mai. A khat tawkin Nu Pari chu a tap leh vawng vawng thin a, a chang leh a rum leh ngul ngul thin a. Na a ti lutuk chu awm ngaihna a hrelo. A hnu reilo teah chuan damdawiin lamah an hruai chhuak ta a, thawm pawh a reh zui ve ta a. Chung lam hian lung finna min rawn pe emaw ni, naupang kum 10 mi lek khan ka ngaihtuah neuh neuh a, Nu Pari'n nau a neih dawna a na tawrh dan te chu, rapthlak ka ti hle mai. Chutah, ka nu ngei chu ka ngaihtuah leh a, keimah min neih dawna na a tawrh dan zawng zawng min hrilh te kha ka hrechhuak kuar kuar a. Tuna chinah chuan piancham lawm dan thar ka hre ta.

Kan piancham lo thlen te chu kan tan chuan lawmna ni ni mahse, kan nu te tan chuan an na tawrhna ni, keimahni avanga an tawrhna ni a lo thleng tihna a ni. Chuvangin, ka pianchawm lawm leh hunah chuan ka nu leh pate hnenah motor lem emaw silai lem emaw lei ka dil tawh dawn lova, ka nu leh pate hnenah lawmthu ka hrilh tawh zawk thin dawn a ni. Keimah min hmangaih avanga an tawrhna zawng zawng te avang khan lawmthu ka hrilh mawlh mawlh tawh ang.

Tun hnu thleng hian ka piancham lo thlen apiangin ka nu leh pate tan thilpek engemaw tal ka pe ve ziah thin asin. Chu chu, ka piancham lawm dan a lo ni ta. Piancham lawm dan dangdai tak a ni na in, ka tan chuan ka nu leh pate hnena ka thiltih theih tlemte te zinga mi a nih avangin, lawm takin ka awm mai thin. Tunah chuan nu leh pate tana phurrit ringawt nih tum lovin anmahni tana malsawmna nih zel chu ka tum tlat tawh a ni.