Friday, January 23, 2009

This is Africa!

Documentary lampang hi ka inti ngaisang ve em em a, hei zet zawng en a harsa ngei mai. "Africa Ama" tih a ni a, chu chu "This is Africa" tihna mai a ni. He movie hi Africa ram hrang hrang 20 vela an hnam zia / kalphung an tarlanna a ni a, kum 1971 a an release tawh kha a ni. A thenah phei chuan documentary pawh ti lovin "Shockumentary" ti te in an vuah sak.

Ka tet deuh laiin chiang lo ruaiin vawi khat chu ka en tawh a, tun hnuah ka zawng nawn leh a, en nawn leh ka duh avangin. Khang hun lai kha chuan thil kan la hriatthiam vak loh avangin kan hmuhnawm en liam mai mai a, internet thiltihtheihna hmangin hmun hrang hrangah kan zawng kual thin a. Ka hmu thei der lo mai a, ka hmuh theihlohna chhan pawh a movie hming "Africa Ama" tih hi ka hrechhuak thei tlat lo mai pek a.

African Emu tih deuh emaw ni in ka hria a, chiang lo takin kan google vel thin. African emu tih chu movie a lo vang kher mai bawk si. A tawp a tawpah engti tiin emaw nikum kumtir lam khan Africa Ama a ni tih ka hre thei ta a, tichuan, internet lamah download turin kan zawng tak tak a, a vang kher mai. Forum leh Warez site hrang hrangah te ka request thin a, a tawpah hmanni deuh khan pakhat chu ka thianpa ka download tir a. Ka en ve leh thei ta a ni.

Mahse tuna ka kawl lai hi Italian in an narrate tlat mai a, hmana ka en kha chu English kha a ni si. Chuvangin tunah rih chuan a awmzia tak tak ka la hre leh theilo bawk, a milem atang leh a hmaa ka lo en tawh na nen ka rin en vel ta mai mai a. English Subtitle ka zawng leh chiam a, ka hmu thei si lo, a hmu in awm phei chuan min lo share thei ula ka lawm khawp ang. :-)

He documentary ah hian African hnam mawl (ti mai ang), Kristianna a luh hmaa an nun dan a ni deuh tlangpui a, puithuna chi hrang hrang lah an ngah ngang mai. A then laiah chuan kan pi leh pute nun dan thin nen a inang riau hian ka hre tlat pek a. Hmanlai African te nunphunga mipat hmeichhiatna chungchanga an ngaihdan leh an inhman dan te tarlan a ni nasa hle a, an damlo insawngbawl dan leh changkanna in an khawvel a nghawng chhoh dan te tarlan a ni.

Hnam thenkhat chuan an mitthi te hi bawng vunin an tuam tha a. An thih atanga thla bial zan hmasa berah an ruang an phum tawh chu phawrh chhuak leh in, a lu an tan sak a. Tichuan, a lu chu bel chhunga khungin thing lerah an tar a, tichuan an lam hual thin. Heti hian a thlarau chu hmun nuam taka chawl turah an ngai ni ngei tur a ni.

Pasaltha a thih chuan, an phum dawnin a kutah thal leh a ngul leh buhfai an hum tir thin a, hei hi a kalkawngah a riltam loh nan leh pasaltha a nihna anga ramsa a in an tihbuai pawha a inven nan an tih a ni. A thlan hi a mak hle mai a, a luhna chu mihring leng tak tak te hi a nia, a chhungah erawh zau nuam takin ruang kha an zalh thei thung a ni.

An mipa tleirawl te an lo tlangval chhoh dawna an sawngbawl dan mawlh mai hi a rapthlak khawp mai. Serh tan kan tih ang chi kha an ti thin a, hetia serh an tan sak hian ram vahnaah pawh kal thei tawh, mi puitling angin an chhiar tawh a ni. Tin, an din tlar tir a, an lam tir a, hruihrualin an vaw nghek nghek a, hei hi tuarchhel zirtirna a ni bawk. Hmeichhia an sawngbawl dan phei chu a rapthlak lehzual a, sawi lo zawk mai teh ang.

Buh leh bala an tlakchhiat tum te chuan an pathian chu a lungawilo niin an ngai a. An puithiam in an pathian lem (doll) a siam a, chu chu nu nau pawm laiin a fa a enkawl ang chiahin a enkawl thin. Hnute te a pe a, tin chaw te a barh bawk. A hmai thlengin a phih fai sak ziah a, hetia duat taka a enkawl hian an pathian chu a lawm hle turah an ngai.

Hnam thenkhatah chuan hmeichhe naupang hi kum thum a nih hian, pasal a neih hma thlenga a thianghlimna a vawn theih nan an thui pin sak thin bawk. Hei hi a pasal neih ni ah a thui na hi a pasalin a phelh sak tur a ni.

Tattoo an uar hle a, an hmai leh awm vel te an in ziak rang nasa thei hle. An inziak rang tih hian, tuna kan tattoo hmuh ang chi hi a ni lo a, blade in an inzei a, chu chu a rawn ser pawng ta vak thin a, a then phei chu an hmel a hmuh tlak mang loh. Chutiang hmei ser nasa deuh te chu an 'luck' zawk tlat lehnghal pek a.

Midum hlir zingah khan mi ngo te an lo piang ve leh nawlh thin bawk a, a mak hle. (Hman deuha keini ramah pawh tuikuk nu pakhatin fa 3 sap ang chiah, sam buang thak mai, ngo em em mai, a neih te pawh kha min ti hrechhuak )


Ramsa ek hi an lakhawm a, chu chu mei ah an rawh a, an rawh hmin hnuah a meivap nen chuan bel chhungah an khung leh a. Chu chu tui nen an chawk kawi leh a, a tui zawng an sawr chhuak leh a, a tak la bang zawng chu naupang tan chaw tha tak a ni tawh mai a ni.

Tlema naupang lian tawh deuh te chuan ramah sazu an veh a, an man te chu that in, mei ah an rawh hmin te te a, an ei nghal hmak hmak zel mai a. A tui an ti em em bawk a ni.

E khai, tawng hriat loh chuan han share pui vak tur che u pawh ka hre lo. Ka post tur hrelovin, hei ka rawn thai hnawk mai mai a ni e. He documentary hi en ve rawh u pawh ka ti lo a, a tlangpui chuan en lo ula ka duh zawk. Inti mipa tak emaw video rapthlak deuh deuh en thang deuh tan lo chuan ka recommend lem lo. Milem pawh screenshot ka la teuh a, post aiin post loh a tha zawkin ka hria a, pakhat khi chu ka rawn dah ta mai mai a ni.

A english ka neih hunah uluk deuhin ka en tha leh tho ang. Video rapthlak deuh te hi ngai ah neih ka tum a, ka en vak vak thin. :-)

"if unless you are a fan, don't watch it"

* Like 'Mondo Magic' this was a bit too gross and won't become too many folks' favorite.

* This is like 'Africa Addio' except without a lot of the colonial violence. Most of this violence is either self-inflicted or natural.

* Is it watchable? Only if you're a fan of this genre. If you're not...stay FAR away.

* The home style surgery scenes will make anyone squirm.

* And running the risk of sounding insensitive...some of those natives were UGLY.

* The Castiglionis were just following the Mondo footsteps laid for them by Jac and Pros.

Again, only if you're a fan.

[Instead, watch The Boy In The Striped Pyjamas. Based on the novel by John Boyne.... :-)]

3 comments:

illusionaire said...

Hmmm... en ve ngei ngei tur a nih khi. African lam documentary te hi a hmuhnawm hlawm phian. Tribal lampang mai lo ransa lam ringawt te pawh hi ka en reng thei. Very interesting study they all make.

Khing tiang "mi ngo" albino ho chu India ramah pawh hian an tam hi. An khawngaihthlak zawk, deficiency engemawni neuh neuh an nei teuh a... :(

toy soldier said...

Nia, documentary lam hi chu hmuhnawm ve duh lom..
Chuan, i blog hi chhiar a nuam ta lo riau, mit a ti kham e mo ni..a eng ber nge phei chu ka chiang lo a..

Joseph L said...

@ illusionaire : i inla man bawk a, en ve ngei teh.

@ TS : mit chu a tikham ang, a dum zel zul ltk a. Mahse ka template ka thlak zing dawn ltk a... ka peih lo alawm. :D hehe... nge a ngaihnawm lo ve hrim hrim te pawh a niang. !! i lo lut ve hrim2 a, i ti lawmawm.