Sunday, May 20, 2012

Guwahati Zin

Guwahati hi ka zin hmasak ber tum chuan kum 1998 khan damlohna avangin kan kal kha a ni a. Chumi hnuah ka hmu leh ta lo vang vang a, kum 10 dawn hnuah hmun danga lehkha zir avangin kan kal tlang leh zeuh zeuh a. A bak chu tunhnaiah hian eng engemaw tul avangin ka kal leh ta zauh zauh a. Amaherawhchu, thil dang han tihna hman neia zin kan nih ngai loh avangin '98 kuma ka kal bak kha chu, zin ang pawhin ka inngai lem lo. Kar hmasa khan zan thum riakin kan zuk zin a, chu erawh chuan kan tih tur pawimawh kan tum aia kan zawh hma avangin kan kal theih ang ang kan kal kual a.

Damlohna thil leh hmanhmawhthlak deuhah hian House ah hian kan thleng mai zel a. A bakah erawh chuan House opposite chiah ah khuan Hotel Priyodarshani a awm a, chutah chuan kan thleng ta thin a. He hotel hi a man a to em em lo a, a nuam tawk vel chiah ka ti mai a. Mizo chaw ei chak deuhin House a hnai a, AC room te a awm ve avangin khaw lum lai phei chuan a nuam ve pangngai khawp mai.

Kan thlenna room, he room ah chiah hian vawi 2 ka thlenna a ni.

Tun tum chu thiannu Mimi-i'n (Mimi Hrahsel) ka en loh a hlauh em avangin thlen tlai hian The Avengers en turin kan phei nghal a, mahse ticket an lo lak zawh vek tawh avangin a tuk tlai atan ticket kan la ta ringawt a. A inchhir awmloh hle mai, a hmuhnawm.

Kan thlenna hotel hnung chiahah hian hotel changkang tak mai Grand Starline hotel a awm a, hetah hi chuan kan hmuh phak maiah pawh swimming pool leh gym thlengin an nei changtlung hle. Zanah tihtur neih loh lai chuan an swimming pool a va chen ve phar phar te hi a chakawm rum rum mai. Tin, kan thlenna hotel atang hian an wifi hi a man pha chiah bawk a, a ziaawm viau.

Grand Starline hotel swimming pool, beer an inchhawp a, tui an cheng thin
Kan room hi a hminga AC a nih bak hi thil dang em em hi a awm lo a, TV a awm leh a, fridge a awm loh avangin tui lei khawl sa pawh hi a vawt rei tak tak thei lo a. Heti hian AC hian ka chhem tir thin a, a vawt tha duh phian mai.
Ka water cooler idea chu

Brahmaputra lampang te pawh va tlawh ila tiin chhun ni sen sa hnuai ah kan in kap chhuak leh a, Brahmaputra pawh a hma kha chuan ka tlawh ve ngei tawh a, khami tum khan mi an tam em avangin tun tum kan kal hi mi an tlem ka ti hle.

Brahmaputra lui kam
House kawt auto rickshaw stand a ding thin vai putar pakhat, meng bial kul mai cher lampang, a hming Shankar-a hian min vil chawt a, khawiah pawh kalpui ila, in nghah tir pawh ni ila waiting charge min laksak ngai lo a. A rate lah chu midang rate aiin min tih tlawm sak zel lehnghal a, a fel ka ti reuh lutuk a, a mobile number ka dil a, mobile a lo neih loh avangin min pek tur a nei ta lo a. Min mamawh chuan hetah kan stand ah hian lo kal tawp la, ka awm ziah alawm a ti a.

 Tun tum ka zin chu tour guide pahnih ka nei hi a ni deuh ber a, pakhat Mimi-i : Ani hian kalna tur chi leh eitur tuina tur chi te min lo hriat sak a, min kawhhmuh zung zung a. Pakhat leh Shankar-a hian chumi hmun kan kalna turah min hruai a, kalkawngah leh a hmun thlen thlengin min guide leh thung thin.


Shankar nen lawng chhungah
 
Brahmaputra ka kal hmasak zawk kha chuan hetiang lawng hi ka khalh asin le tiin tunah chuan ka thlir dauh dauh ringawt.

An hmuhnawm hi ka tia, thla an inlak deuh reng mai bawk a.

Sangha mantute tan hian man chakawm deuh deuh tur ka hmu nulh nulh a, an rawn lang leh zawk thin. Eng ngha nge phei chu ka hre lem hlei lo a, len hmel tak tak hi an hnungzang hi ka hmu zuk a, thla ka la hman thin lo a.

Ni a sat ang hu in, tui hi ka zuk khawih a, a dai nuam phian mai.
Brahmaputra a boat ride kan neih chhunga kan guide Shankar hian thil kha a hriat dan dan khan min hrilh ve a. Bridge en tura kal kan nih avangin bridge lehlam hian khawi veng nge a pawh? tiin ka zawt a. Ani lah chuan ITI tiin min hrilh mai a. Ka en vang vang a, a lum hmel bawk a, an ITI veng ve anih dawn hi tiin ka zawt belh tawh lem lo a. A hnuah ka guide pakhat zawk Mimi-i hian IIT zawk a nih thu min hrilh a, ka hmu pui leh sawt. Bridge lam hi thlalak an phal loh avangin kan la ta lo. 

He bridge hi kal chhuah kan tum tawh nghe nghe a, hmanah. A chanve kan thlen in kan peih tawh lo a, kan let leh. Ngaihtuahna hman loh thlak hian. Hahaha.

Brahmaputra lama thlan duhtawk kan tih tlak hnuah Zoo lamah phei leh teh ang tiin Zoo lamah thil dangdai deuh te a lo awm belh takin tiin kan insawh phei leh ta boh boh a. Sakhi, Sazuk, Zawng tih vel chu en pawh kan en peih tawh lo, tlema kan ngaihsan zawng deuh en turin kan kal zel a. Ka tum dan chuan Sai chunga chuan leh ngei ka duh deuh a, sai ka melh ru deuh a ni. 

Sai hmuh tur reng reng an awm lo a, tin, kan kal hun hi an chaw pek hun a lo ni hlawm a, ransa dang hrim hrim pawh hmuh tur an tam em em lo. Chaw eiin an chhun chawlh hun an hmang ve mek a lo ni a. Sai te hi khawnge an awm tiin mi 5 vel lai chu ka zawt awm e, a tam zawkin sawtah sawn kal rawh, sawtah, khutah tiin min kawhhmuh mai zel a. A tawpa mi pakhat ka zawh in an awm tawh lo a ti a, ka awih ve ta hmiah, a chauhthlak tawh bawk si a.

A lo in show off ve hle a ni.
Ka naupanlaia zoo kan tlawh tum hi ka mitthla in ka suangtuah zut zut a. Khami tum kha chuan ka thil hmuh reng reng kha hmuhnawm hi a tling vek tawh a, ka haw leh hnu a sikul-a ka thiante hnena ka sawi nasat zia te kha. Khatiang deuha la phurawm leh hmuhnawm tura ka ngaih laiin tun tum erawh hi chu thla pawh kan la tha peih meuh lo chu a ni.

Chung lama an lan tet ang ngawt hi chu an ni lo deuh
Zoo atanga kan haw leh chiah hi hotel ah kan intifai sawk sawk a, movie en turin kan chhuak lehnghal a. Kan en zawh meuh chuan zan dar 8:30 a lo rik tawh avangin hotel lamah kan lut leh nghal a. Hlawk thlak in chauh thlak kan ti ngei mai. A tuk lamah Aqualand kal kan tum avangin engtia kal tur nge ni ang tiin tour guide chu ka han zawt leh a. Ani chuan internet lamah te a luh man zat te leh timings te min lo en sak a, tin Aqualand nilovin Accoland a nih thu te min rawn hrilh a. Hman atanga Aqualand anga ka lo hriat ve char char kha Accoland a lo ni ta zawk a, ani (Mimi) pawh chuan a hriat vawikhatna anih thu a sawi nghe nghe.

A tukah chuan chawhma lamah thil pawimawh eng eng emaw kan ti leh te te a. Chawhnu lam hretah Accoland pan chuan kan phei leh ta nghal a. Airport lamah a lo ni a, amaherawhchu, Airport thlen hma kawng chanve vela junction awmah khan left kan la a, a vaiin Accoland thlen nan hian Auto rickshaw in darkar 1 vel hun kan hmang a ni.

Luh veleh hian a hmun hmel chu hmuh a nuam nghal hle
Fun N Food Village (http://www.funnfood.com/) kal tawh tan chuan Accoland hi chu a naute ni awm vel a ni. Chu chu ka sawi thiam dan. Mahse, a nawm loh phah na a awm chuang lo e. 

Tui chen kan chak tawh hle

Hei hi ka hmuh tum aiin a bon lova ka ti chak vak lo a, mahse rin aiin a lo nuam leh phian si.

An slide na pakhat tawite ah hian an slide nasa khawp mai a, mahse an tawlh chak lo thei khawp mai a. Ti ve reng reng teh ang tiin ka'n han tawlh ve a, kan tawlh puat ta mai a. Rin aiin kan thleng hma. Vai ho kan han en a, an tawlh tang deuh chaih chaih zel a, a muang riau zel mai a. Kan han tawlh leh a, kan thleng thla leh puat a, duh aia thuk thuk tui ah kan in khawh lut ta thin a. Engatinge mawni le tia kan inzawh kan inzawh chuan kan tawlh ve dawn veleh a duty khan a tui luang kha a lo herh tam thin kha a lo nia. 
Saw laia slide ah sawn vawi engemawzat ka slide nghe nghe
Vaiho tui cheng hi chu Tour Guide Mimi-i'n an sexy loh zia a hma zana internet atanga a lo en atanga min hrilh avangin ka beisei a sang lo hle a. Amaherawhchu, ka beisei aia tam an lo awm thung a. Costume Rental hi a awm tho a, amaherawhchu hei hi 'ngei ngei' a hak tur tih chu notice awm tho mahse, an zawm lo hle a, han ha thap sela, a chhia a chhia in hmuh kan nuam tlang deuh tur. Lol.

Wave pool an neih leh neih loh ah ka rilru a buai hle a, mahse vanneihthlak takin an lo nei ve hlauh mai a. Nuam hle a ni.
Hmeichhe ho hi a bik takin an thawmhnaw hak lai nen an cheng tlangpui

Thawmhnaw ngaina tak hnam chu kan lo ni e

A hmun erawh an enkawl uluk in an strict peih phian a, a tha ka ti hle.

Ka lang ve leh ta. :-)

Accoland ah hian pool hi hmun 3 ah a awm in ka hria a, ka hmu chinah. A bak hi chu rides tlem azawng a awm bawk. Rides lampang hi Adventure Island lama min sawp hrep hnu atang kha chuan ka sim khawp mai a, ka en hrek hrek peih chauh a ni. 

Ka chek in a mil tawh thlawt lo, hetiang hi
 Kal ve chhuna engemaw tal tih ve loh chu tiin pipu vir thei ah hian chuang thawveng ve mai mai ang tiin kan han chuang ve leh ngawt mai a. Ka pipu vir thei hriat nen khan a lo in then chak hleih nasa mai a, ka lu a ti hai in a ti na bur mai a. Hei hian mood zawng zawng a ti off ta vek mai.

Duh aiin a then duh

Hne hnawka  kan awm hnu chuan Shankar-a egg roll tur kan leisak a, kan chhuak ta a. Haw kawngah phei chuan ka muthlu nasa hle a ni. Tun tum chu a hahthlak rualin a hahdam thlak angreng khawp mai a. Thla hmasa lamah khan hmeichhe 3 ngawt nen kan zu kal chu e, hun awl neih tawh phawt kha chu bazarpui kha an ngai a, a buaithlak teh asin. Kan bazar reng mai a, a mipa awmchhun ta chu, bungraw kengkhawm tu leh a bargain tu ah ka tang a, haw dawn tuk thlengin kan la bazar a, a then te phei chu Aizawlah ka leipui ta a, lei kim hman hek lo i. Lol.

Tichuan, Accoland atanga kan haw hnu chuan Fancy bazar lamah kan phei a, toys kan lei a, kan haw leh a. A tukah chuan Shankar-a khan airport ah chuan ka drop ang che u a ti ve tlat si a. Mahse phone a nei bawk si lo nen, kan in nang fuh thei lo a kan haw san ta mai a ni.

7 comments:

The Chhamanator said...

I van changkang em em!!

Anonymous said...

Ngaihnawmin hmuhnawm khawp mai. Ka nui leh hawk hawk dawn emaw ka tia, mit a tlai zek a. Nawm hmel hlawm khawp mai. Mimi chu van fel reuh e. :-)

Lal Jo-a said...

@Chhama - Khua a lum sia, ka hmu peih thlawt ta lo mai che a nih kha. I changkang lo bawk sia.

@TS-a - Tun tum chu incident nuihzatthlak ka neih hi a thring lehzual em a, nidangah ka la sawichhuak zawk ange. Mimi hi maw, nupui tlak, i duh em? ka lo biak ang che.

Michael Fanai said...

Ngaihnawm thei eee Sir

Mimihrahsel said...

lawng ah khian kan chuang tha duh meuh lo a tunlai chu, a hma lawk in IIT student a tla hlum a. ka hrilh duh lo mai mai che nih kha :D

thanks for the mention. lo zin leh raaah.. KFC min treat la, chhama tel lovin. mehehe

Aduhi Chawngthu said...

Tinge Chhama hi a tel ve loh le ka lo ti rilru a, in lo thlim a ni maw. A brokenhearted awm eee.

Guwahati zin lohna a rei ta hle mai, a changkang tawh lutuk an ti. Water park vel hi naupang hruai nan a itawm hi le. Sahuan hi hmaaaaaaaaaanah ka kal tawh a la ngai reng em le? In zin chu thlawhna in in kal a ni maw? Sumo/bus ngeia kal tur alawm, Vairengte ah vawksa rep in ei ngei anga heheh :)

Lal Jo-a said...

@Michael - Sir, i lut lo emaw tih pawh hian i lo lut leh thin a, i ti lawmawm thin eee...

@Mimi - Khai aa... Va den leh si vee, vai ho khan "Thu lut rawh" min ti ngun ka ti reng a ni. lol.

Zin leh dawn khawp mai, nangmah hmu tur hrim hrim pawhin. lolzz... Treat dawn chiangkuang, a dang te i duh em? Pawisa chhar tur ka lo zawng char char ang aw.. Chhama hi chu a changkang lo lutuk a, ka hmu peih lo.

@Aduhi - Chhama chu ka sawi peih tawh lo.

A changkang ve ta khawp mai ti turin ka chhinchhiah ngai lem lo a. Sahuan chu a la ngai reng, ramsa an tlem tawh hle thung. Sumo chu ee, Silchar kal nan ka hmang ngun lutuk a, ka hne deuh bawk sia. Vairengte ah chuan Seipuii dawr ah khian a tui ber mai. :-)