He thil hi a tobul kan chhui dawn lo a, mahse enge a tangkaina lo thlir dawn teh ang. Graphic designing tih hian thlalak khawih danglam chauh lo pawh a tam hle a ni tih kan hriat a tha awm e.
Administration – I nitin nunphung tibuai lo tura thil chi hrang hrang I hmuh thin, entirnan – road sign te, thil I leia a manual te, khatiang zawng zawng kha a huam vek a. A chang chuan thuziak kher ngai lovin, milem awmze nei tak takin entir a ni thin.
Advertising – Company hrang hrang leh dawr hrang hrang te hian an thilsiam te leh thil zawrh te fak nan hian an hmang tangkai hle a. Chu mai bakah anmahni company logo te design nan an hmang nasa a. Tunlai khawvel thang zelah phei chuan branding an intihhmuh a, chu atan hlei hlei chuan a tangkai a ni. Adidas thawmhnaw chu en mai pawhin I hre thei thin anih kha, chu chu anmahni in design bik (brand/trademark) an neih vang a ni.
Education – I zirlaibu geography, science leh mathematics bu a diagram I hmuh thin te kha he graphic design vang hi a ni. Tin, lehkhabu chhiar nuam tak leh en nuam taka a layout khawih te pawh kha a tel vek bawk a ni. Heng anih avang hian zirlaite tan hriatthiam a awlsam bik a, chhiar te pawh a hahdam bik thin a ni.
Entertainment – He huang hi chu graphic designing kan hmelhriatna ber a ni ang. Khawi emaw hmun hrang hranga thil cheimawi (decoration) I hmuh te, TV a thil hmuhnawm tak tak I en thin te leh lehkhabu kawm vela design nalh tak tak I hmuh thlengin a tel vek a ni. Film I en a, a tira a changtute hming inziak te, a tawpah, a filma inhnamhnawih zawng zawng te hming rawn inziak te, khatiang zawng zawng pawh kha a tel vek bawk a ni.
Journalism – News reporting hrang hrang leh journal ziah hrang hrang te kha milem hmangin emaw a creative thei ang bera tihlan a ni thin. Heng hi information design tia sawi a ni bawk. Chanchinbu te, magazine te, blog (internet a thu ziahna) te, tv leh documentary hrang hrangah te hian graphic designing chu an hmang nasa em em a ni. Khawvel thang zelah flash (software) hmanga milem awmze nei tak tak website lama tarchhuah an ching tawh hle bawk.
Web – Website design tu te leh graphic designer te hi kal kawp lo thei an ni lo. An pahnih tangkawp hian website chu en nuam leh tlawh nuam takin an siam thin a ni. Website I tlawha banner nalh tak te, logo nalh tak tak te, I mit la thei tur ang chi thil chi hrang hrang I hmuh thin te kha graphic designer kutchhuak vek a ni. Company tam tak phei chuan a pahniha (web + graphic design) ti kawp thei hi an duh bik a, heng avang hian a pahniha thiam kawp chu a tha hlei hlei a ni.
Graphic designer tha tak ni turin ngaihruatthiamna i neih that hle a ngai a. Thil reng reng, chik taka I en thin a ngai ang. Entirnan – Hun (time) I ngaihtuah khan, he hun hi engtin nge a creative thei ang berin ka tihlan theih ang tih kha I ngaihtuahnaah a awm nghal tur a ni. Sana lem I rilru ah a lo lang thei, sana lem mawl tawp chu mi mitah a hmuhnawm hran loh maithei, chuvangin kha sana lem pawh kha mi mit la thei turin engtin nge I tih ang? Khatiang thleng khan ngaihtuah zel a tha.
Graphic designing ah hian computer chauh a ni lo tih kan hriat a tha. Pencil leh marker te pawh a tel a, chart paper a milem hrang hrang I bel khawm (collage) te pawh kha graphic designing vek a ni. Tunlai khawvel thang zelah chuan computer hi a awlsam berin hman a nuam a, a kutchhuak a nalh zawk bawk a, chuvangin kan hmang nasa ta ber a ni.
Milem pakhata rawng chi hrang hrang hman nasat lutuk te, hawrawp chi hrang hrang hman nasat lutuk te hian I design kha a ti hnawk thei a, a theih hram chuan pumpelh a tha. Color theory hi kan ngaihpawimawh a tha hle bawk. Color theory chu rawng chi hrang in chawhpawlh dan te, I thil design a zira rawng hman tur thlan thiam te a keng tel a. Rawng inchawih lo lutuk te a awm thin a, han en mai pawha mit tivai rum rum thin ang chi te thliar hran thiam a pawimawh hle.
Rawng hi chi hnih a awm a, RGB leh CMYK. Computer a thil I design reng reng kha chu RGB (Red, Green, Blue) inchawhpawlh atanga rawn chhuak zel a ni a, I print chhuah erawh chuan CMYK (Cyan, Magenta, Yellow, Krypton (black)) inchawhpawlh a ni thung. Heng RGB mode hi chu eng (light) hmanga rawng inpechhuak anih avangin CMYK (dye leh paint hmanga siam chawp) nen chuan a inang thei lo a ni. RGB hi chu computer rawng a ni a additive color tia sawi a ni bawk, CMYK hi chu mihringin kan siam chawp thil a ni, subtractive color tia sawi a ni thin. Thlalak emaw, I thil design reng reng I print dawn chuan CMYK mode a I dah phawt a tha ber ang, RGB pawhin dah mah la, CMYK color hmangin a rawn print dawn tho tho a ni.
Graphic designer tha tak tak mizo zingah pawh an tam hle mai. Thiam pawh an thiam hlawm hle, khawvel mitah pawh zahpuiawm loh tak tak an ni. Heng kara mahni thiamthil te a chhe zawnga hmanga, mi thlalak diklo pui puia lo siam sak ching kan awm hi a pawi thin hle a ni. Hetiang hi chu tih loh hram a tha. Miin milem nalh tak tak an en a, “A va han nalh mai mai e,” an tih liam mai mai lai khan nang chuan, engtin nge he milem hi an siam? Enge a ti lang nalh tu, a eng hi nge mit la lai ber, engtin nge ka tih ve theih ang? ti zawnga i thlir a ngai ang.
Bitmap leh vector graphic I hriat hran a ngai bawk ang. Bitmap chu I han zoom in (tih len) khan chiang deuha I en chuan cube hrang hrang pixel hmanga siam a ni tih I hmu thei ang. Vector erawh eng ang pawhin zoom in la, a ngai reng a ni. Sawi tur tam hle mahse, sawi vek sen a ni lo ang. Mahni a inzir peih a ngai a, thil tereuhte te khawih peih a ngai bawk.
Graphic designing zir tum te chuan India rama a zirna tha ber pawl 3 hi han dah lang ila. Arena Multimedia (www.arena-multimedia.com), MAAC (www.maacindia.com) leh Gecko Animation (www.geckoindia.com). A zir man hi a inang lo hlawm a, Rs. 30,000 vel a ni tlangpui a, graphic designing zir man hi. Chu chu short term course an ti bawk, full term course ah chuan graphic designing mai bakah animation thlengin an zir chho vek a, chu chu a zir hun chhung pawh a rei deuh thin a, a zir man pawh a to Rs. 1 lakh chuang a ni tlangpui. Heng hi a vaia pek nghal lohin installment a pek theihin an siam thin. A hrechiang duh chuan an website hi tlawh ngei a tha.
(Hei hi ABACUS magazine-a ka ziah ania, a mag a chhuak tawh tho sia, heta lo dah hi pawi em lo ang chu ka tia. Nikum lampanga ka ziah tawh a ni, for the sake of an update)
14 comments:
Niceeeee. Ka department lam a in connect ve bawka, nakinah chiang deuhvin rawn chhiar that leh ngei tur a nih hi.
Alem tel dawn maw tia!!ka hriat hnu vek i ziak a.lolz
tak tak in,khoiah nge i zir a Arena ah mi? I bawn tawh awm ka ti rilru riau.
@ illusionaire - han chhiar chian vak tur chu awm chuang lo.
@ thinchhia - ka zir tawh lo zawk. gecko ah ka zir ve nel nual thin.
gud post, Graphic designing hi engmah knowledge mumal ka nei lova, mi hnathawh sa chu hmuhnawm ka ti khawp mai. tlema Mizo centric deuh hian enge maw duanchhuah theih a ni angem aw..?
@ hruaia - ni e, tunlaiah thiam tak tak an tam tawh a, a tlangpuia an duhthusam chu mizo centric deuh thil siam a ni. Mahse a hautak angreng si a, an la ti puitling hlawm lo a ni. Mahni ringawtin han buaipui dawn se, a buaipui hahna kan hriatthiam pui loh avang hian anmahni tan chuan tlawmngaihna tak meuh meuh lo chuan tihngaihna a awm lo ang.
Boss kei chu ka click a, a dum khup ringot :( a sir vel a mi chiah hi a lang thei a. Kinah ka rawn chhiar tha ang.
@DDB - Line a muang deuh aniang, a page a la in load kimlo mai mai anih kha.
Graphic Designing lam-ah hi A,Aw,B pawh ka hre lo. Thil maiw tak tak an duang chhuak thiam hi chu an fak awm ngawt ani. Tin, hetia, Mizo tawng ngei a chhiar tur a i rawn izak hi tha hle mai.
@ sekibuhchhuak - ni e tiro, hetiang hi mizo tawngin chhiar tur a tam lo a, chuvangin mithiam tak tak te hian ziak se ka ti ngawt mai. Tunlai thalai tuipui chi tur a ni.
Chhiar a manhla hle mai. Uluk zawka chhiar turin ka copy a, ka print chhuak dawn a nia, i phal em?? Hetiang lam hi, a hreho khan han ziak zel teh u. Blogger-ho hi kan tuina a inang vek lo ang bawkin, kan thiam zawng pawh a inang lova, a thiam hi chuan ziak zel teh u. Mahse, hetiang ziah dawna buaithlak thin chu - Mizo tawnga kan neih loh thumal a tam lutuk thin hi a ni.. i ti ve em??
E phal tehreng mai. Nia, computer thil lampang reng reng hi chu mizo tawng hian a daih lo a ni ber e.
nang te reuh hi chu rin ai hian i puitling in i fel reuh thrin ngawt mai ( hmaichhanah hian han in fak ta chawt mai ila). Pu Black-a nen hian kan lo adopt daih mai dawn che mawni chu aw!!
ka thil hriat loh lam tak i rawn ziak a, bengvar thlak khawp mai.
-i pi
Thank you a pi black.
Unlike traditional jobs, you don’t always need a technical degree. You require the right skills and experience. So upscale and upgrade with our skill based courses from Maharishi University Online and Princeton Hive and stand a chance to avail initial discount offer!
Post a Comment