Wednesday, April 16, 2008

Chhechhawnga - I

Tun tum chu ziah tur vak pawh ka hre lo, che tha vak ta ngai lo chuan chet chhiatna tlem azawng han ziak ve ila. :D Mi tihloh dan pawh a ni hlei nem.

## Bial te te hian thalaite hi Saturday zan emaw tih velah hian kan inkhawm thin a. Inkhawmna hmun hi In hrang hrangah tih thin anih avangin kawng chhinchhiah vak thin lo tan chuan bo ziah theih a ni. Vawikhat chu kan bial inkhawm dawn hian inkhawmna tur kha sms in min lo thawn a, tichuan ka thianpa (Maia) nen inkhawm tur chuan kan chhuak ve ta a. Dar 7 a inkhawm tan tur anih avangin an in zawn chawp ngai bawk si tiin kan veng bul chiah ni mahse dar 6 ah chuan kan chhuak tawh a.

Chutia kan chhuak chu, kan hmuh apiang tu pawh kha address chu kan zawt zel a. Min kawhhmuhna lamah chuan kan kal kan kal a. A hma lawka ruah a sur avangin khawlai lah chu duhthusamin a diak a. Chuan, a tawpah kan inkhawmna tur bul chu kan thleng ta. A khawi ber hi nge ni ta ang kan tia, kan kawi kan kawi a. Kan kawi chhung hian dar 7:10 a lo ri der tawh. A tawpah, mizo hi kan hmu hlauh a, kan zawt ta a. Inkhawmna tur kawtah chuan kan lo ding reng chu niin.

Inchhung chu kan lut a, an lo thu khat deuh thup a. U shape hian an thu a, tumahin hetilaiah hian lo thu ve rawh tih an tum bawk si lo, kan hawi ruk ruk a. Thutna awl a awm mai si lo, tichuan a hma lamah chuan mipui lam hawi zawng hian thutna 5 vel hi a awl duai a. Chu lam chu kan pan ta ringawt a. A laia chair inhungah chuan Bible leh eng eng emaw hi a awm nual a. Tichuan, chung chair ah chuan hahdam fahranin kan va thu ta duai a. Mi lah chu an reh thup sia, min en thup bawk si, kan ngaih kha a thalo ta lutuk. Ka thianpa khan, "Face to face a thut te chu a, a va zahthlak duh ve" a rawn tia. Tichuan le, ka ngaihtuah chhuak ta. Chairman thutna turah kan lo thu chu niin. Eng sawi set set lovin ka phone ka phawrhchhuak a, thil pawimawh ti ang deuhin hmet neuh neuh chungin ka chhuak daih a. Ka thiana pawh ka hrilh lem lo, ka zak lutuk a. A hnu lawkah a rawn chhuak ve leh. "Ka zak lutuk ka zak lutuk" a rawn ti chhuak. "A va tihchi loh e" te kan ti nung nung a. A hnuah midang an rawn chhuak a, lut leh tura min ngen nasat em avangin kan lut hram. Zialo tak tak a ni.

## St. Pauls-ah vawikhat chu Assembly naah kan zai dawn a. Kei leh Rsa hian guitar kan perh a, Maia hian keyboard a chang anga, chuan kan thiannu hi a zai dawn a ni. Kan zir ve tlauh tlauh. A hun a lo thleng ta, tichuan, stage ah chuan kan lut ve tham tham. Ngaiteh, ka guitar perh tur kha backstage ah an lo perh uang vak vak a, a string an lo ti chat chu niin. String kimlo chuan perh ngaihna awm ta si lo, kan in ready ve vek tawh si. Guitar dang hi min rawn pe ringawt a, tichuan, kan ti tan dawn ta. Guitar pahnih kha herh mil na hun awm tawh si lo, ti tawp mai ang kan tia. Kan han perh chiah chu, a ri in mix chiah kha a ri deuh ruang ruang hian ka hria. Mahse ring tawkin ka perh a, ka thianpa ri kha lang vak lo turin. :D Ani kha chu a pluck chiah a nih avang khan ring vak lo khan a tih theih a. Mahse mi beng hi a lo fing khawp, an lo la hre thei vek tho a.

Kan zai hma atang tawha kan thiannu kha heti hian a chorus zawhah khan ka thlak kual anga, G key a ka luh veleh hian 2nd stanza chu i sa tan leh mai dawn nia ka tih kha, ka sawi hma chuan a la dik zat zat zel. Khatia ka sawi chiah khan a lo buai deuh chu niin, a la thei ta lo. Ka ti kual nawn tiah tiah, Rsa nen kan inmelh, kan zak deuh tawh. Kan thiani kha a mangang deuh a niang a rawn hawi phei a, lu bu deuh nghatin ka lo signal a, a zai chhunzawm ve leh thei. E khai, khami tuma ka zah a ka zah zia kha. Thiamlo chung chung hian thil hi tih ve vak chi a ni lo tih hi ka hre chiang ta hle. Hmelhriat hmuh apiangin engatinge guitar kha? tih kha min zawhna tam ber a ni ta. Ti nawn tawh lo chiang kher.

## Hmanni inkhawmnaah ka thiante ka hmu a, an bulah ka va thu phei dawn a. An bulah chuan thutna 2 kha mi thutna a lo nia, chuan pakhatah chuan fel takin ka thu than a. A hnu lawkah mi pahnih hi rawn thut tumin an rawn kal a, ka thiante'n min hrilh ang chuan, "Hei chu mi thutna a nia" ka ti a. An ding reng a, a ngaihna an hriat loh hmel lutuk a. Ka thusawi an hrechiang lo aniang ka tia, "Midang an thu tawh a." ka ti nawn leh a. A hnuah ka thianpa in min rawn hmu a, anmahni kha alawm heta thu chu a tia. Mur cham cham!

## Vawikhat kei leh Chda kan bazar a. Nikum tun ang hun vel kha a ni ang. Vaitawng kan thiam chhun chu, "Bari bara vai mawng khak" tih vel kha a nia. :D Thil chi hrang hrang kha chu engtin tin emaw kan lei ve thei zel a. A tawpah vai hmarcha ro sen ang chi kha kan lei dawn a, kan sawi thiam tha ta tlat lo. A tawp a tawpah chuan vai hmarcha ro chu Kg 1 kan lei ta. Polythene lian tawkah a khaiin kan khai haw hnawk mai mawle. Ei chu a tlo duh trek trek, a hnu deuhah phei chuan kan paih ta ringawt.

## Lungphun dawn avangin vawikhat chu zokhaw lamah Krismas kan hmang a. Ka cousin unaupa nen khan kawm tur kha kan nei ngai si lo. Thian kawm chu sawi loh, hla deuh atang min en ha ha hlawm zel ringawt a. Kan khua kha har thei lutuk a, kan tei kual vel mai mai thin a. 24th zan te phei chuan dar 9 velah kan mu daih tawh. A hit loh em avangin 31st chu eng pawh ni rawh sek sek, hmanpui tur zawng ang kan tia. Dar 8 velah kan tei chhuak a, kalna tur bik pawh nei lovin kan kal zel a. A hnu deuhah hian hmeichhia 6 hi kan hnungah a intlar hian an rawn kal a, min rawn chhaih ta. "A kal dan hi ka duh e," ... min rawn tih laih kha an tum lutuk. Ka hawi let thut, "Enge in duh a?" ka ti. "Kan fiamthu a nih kha" an ti a, min hlau lutuk.

Tichuan kan inbe ta zel a ti mai ang. Anni pawh chu lungphun hmang tur tho a kal kha an ni a. A hnu fe ah kan insawi leh zel phei kha chuan chhungkhat vek kha kan ni ta in ka hria. :D Mahse a hla deuh tawh ang. "Enge in tih dawn a?" kan tia, "Ar lei tur kan zawng a" an tia. Chu veleh tu hrilh leh chuan ngai lovin, "Keini pawhin kan zawng tho alawm, zo ho ila" kan ti ta keuh. Kan kual kan kual a, hmun hrang hrang, zawn ngaihna pawh kan hriat em em loh avangin kan hmulo chiang kher.

A tawpah chuan hmeichhe pakhat chuan kan ar (an thlenin te ar) talh mai ang u a ti a. Tichuan an in lamah chuan kan kal ta a, a mipa awm ta chu ar ru tur chuan kan spy phei ta a. An ar in chu kan hawng a, an ri ta nuaih nuaih mai, zan dar 11 vel a ni tawh a. A uihawm vak loh tur kha kan la chhuak a, kan talh a, kan kang a, kan ei ta daih a. :D Shortcut ang, tichuan zing lamah chuan kan inthendarh ta a. A tuk zana leng leh tura intiam chungin kan haw hnak hnak.

A tuk zanah chuan hmawmsawm te leiin leng tur chuan kan chhuak leh ta ngei. Ngaiteh, kawngkhar pawh kan lut hman lo, an in kawtah chuan an pi ber hi a lo awm a. Vawkchaw emaw ni hi a lo chhuang a. "An awm em?" kan ti dek dek a, min tim ta hrep. "Nangni hi ani maw? Nizan ami te kha, pa lo lutuk mai. Mipa te chuan ar an tum thin alawm, in van zak theilo ve, kan ar te in lo talh mai mai," a tia, a sawi zo hmanlo, hla tawkah kan lo kal sawn hman tawh. Zahthlak duh mai mai.

## Class 12 kan exam hnaih tawh, internal exam kan neih lai a ni a. Mi tihbuai kha nuam kan ti thei khawp mai a, miss call tlut tlu kha ani mai a. Zankhat chu Chda te inah ka riak thla a, kan thianpa pakhat lo riak bawk a, kan pathum chuan mi kan han miss call rawn tak tak mai a, kan nui tiah tiah zel a. Number pakhat kha chu a nu in a lehkhazir chhung a lo ken sak a lo ni, a rawn call let ta ngei a. Kan ti zing lutuk kha. Chda phone ah khan a tia, ani lah chuan a rang arangin mi rawn pe. Kei chuan ka aw te ti danglamin ka be ta vel. "A thianpa ka nia" ka tia, midang hming daih te kha ka inphuah vel a. Ka aw ka tidanglam thiam tawh lo, ka ti tawp ta ringawt. A number kha Danger tiin kan save ta a, a lo call let apiangin reject hmak hmak ni mai.

Miss call sawi takah chuan miss call uar lai kha a awm tak tak a. Sim dang neih chuan midangin kan number an hriat hmain kan miss call tiah tiah zel a. A rawn call let a, tunge i nih? an tia.. "Zathuama, Lianhluna, Zotawna" tih angreng hming chi hrang hrang kha kan inphuah thin a. A then chuan a hnu feah an lo hrechhuak, an titau vel. A va han mawl thlak thin tak em!!

## Vawikhat chu inah hian ka pa leh keimah chiah hi kan awm a. Ka pa khan thian inleng a nei a, "Mama, nang thingpui han lum ta che," a ti a. Mi ina ka lena thingpui min pek tih loh hi chu thingpui hi ka in khat khawp mai a, mahni inah phei chuan a in pawh peihloh mah nak alaiin a lum hi chu ka ti ngai meuh lo. Tichuan, thingpui chu ka lum ta a. Thingpuife telh tur kha, thingpuife bur ni awm tak chu ka hawng a. A thingpuife chu a va lian tha hlawm ve te ka tia, ka thlek ka thlek a. Chhungte hian Zo thingpuife ang chi kha an lei anih dawn hi tiin ka thlak ta teuh a. A sen har angreng sia, ka thlak belh deuh zeuh zeuh a. Nakinah chuan a sen deuh rem rem a. Tichuan, ka siam ta a. Ka pe ve mai bawk a. Tlai lamah ka nu te lo haw chu ka lo zawt a, "thingpuife saw a va lian em em ve, khawia mi nge?" ka tia. Khawi thingpuife maw? a tia, "Hei hi" ti chungin ka thingpuife telh chu ka hmuh a. Ngaiteh, anthur rep a lo ni!! A van zialo zozai thin tak!

Naupan lehzual laia chet chhiatna next ah.. :D

10 comments:

Awzzman said...

in inkhawm te chu..munirka bial in nih duh hmel!!! lolz.

Almost Unreal said...

hahahhahaa

a nxt chapter ka lo chang e

amuana said...

chhiar hahdam hle mai, vitamin min khilai teuh a lawm le. Ka blog ah ka link tawp che, ka ngaisang lutuk che a

Joseph said...

@ awzzman - munirka chu ni lo deuh.!! lolz... haha. nang hi i munirka hmel riau. hehe.. bial thra ber kan nia kan bial chu.

@almost unreal - lo chang reng roh. in ina chaw eiah pawh min sawm ve lo a ni maw?? zialo hle mai a....

@amuana - ka pu Dul.. i lo leng ve a, ti lawmawm hle mai a.

Puia said...

ekhai, hotupa chu ziak ngaihnawm thei viau zel mai.. thu leh hla thiammi tih takah, tui takin hlim tak siin kan chhiar a ni ber e.. well done..:)

Joseph said...

@ puia - hotupa, hahaha.. ti lawmawm thin khawp mai. nang ai chuan ka la che thra thin dehin k ahria... i chetchhiatna kha bon thei khawp mai

amuana said...

chhechhawnga - II a nghahhlelh awm tawh ve

Joseph said...

lo post leh trep toh.. rei tawh lo ang!

faka said...

Hehehe... e khai hei chu thu kam keu a ni e:)) Valentine's Day-a in Bial Inkhawm-a rose par inpek vel te kha... ziah chi loh mi? :))

Joseph said...

@ faka, eh khai! chutiang tiang te engtin nge i lo hriat theih a? Mi thil chik mi tak i ni. hehe. Ni e, rose par te kha kan inpe ngei a, mipa khan an pe zel a, kei chu hmeichhia in min pe tlat mai a. haha..sawi thui vak lo mai ang!