Darthlalang

Ruah chu a sur buan buan a. 

A fanu kum 4 mi leh a pa chu an nu 'birthday present' tur an leina dawr kawtah chuan an ding reng a, an hma lawka tuihawk khauh tak luang hum hum chu an thlir mek a ni. 

A pa chuan, "Bawihte, min kai la. Tuihawk saw kan kân anga, kan haw dawn nia, a hlauhawm hleinem," tiin hlauthawng taka a fanu ding lai chu nui sang chungin a hrilh a. 

A fanu chuan kaih mai a tum lo, kaih a hnekin a pa chu a kuah bet a. Chu naupang hmel chu zamna hlirin a khat a ni tih hai rual a ni. 

Chutah a pa bawk chuan, "Bawihte, khawi keiman nghet deuhin ka vuan che anga, kan kal dawn nia," a tih veleh chuan a fanu chuan ngaih ngam takin a ban chu a rawn phar nghal a.

"An kaih hun che nghak lovin, i hmangaih te chu nghet takin vuan hmasa zawk ang che"

............................................................................

Emergency room ah chuan pa pakhat hi thinrim deuhin a lo âng bawrh bawrh a. 

"Khawiah nge doctor chu? A va rawn kal har ve. Hetiang reng renga duty ngai pawimawh lo te chu a hna atanga bân mai tur alawm," tiin. 

A bulah chuan a fapa chu accident avangin hmanhmawh taka zai ngaiin a mu reng a, zai a nih nghal loh chuan a nunna in a tuar thei dawn a ni. 

A awm hle hle thei lo, a âng buan buan reng a. Midang pawhin an khawngaih rual in mak tih hmel takin an en thup a ni. 

Chutia a ân reng lai chuan doctor chu a rawn thleng a, thinrim eng phiar in doctor chu a lo hau nghal bawrh bawrh a. Doctor chuan engtinmah a chhang lo chuan damlo chu inzaina pindan lamah a luh pui nghal a. 

Reivak lo hnuah chuan doctor chu a rawn chhuak leh a, "Ka pu, i fapa chu kan zai hlawhtling e. A dam ang. Engemaw hriat duh leh zawh duh i neih chuan nurse ho kha i lo zawt mai dawn nia," tih pahin hmanhmawh takin a chhuak leh ta nghal a. 

Chupa bawk chuan, a doctor ber biak duh laia nurse be tura doctor in thurawn a pe chu a lawm lo hle mai a. Nurse bulah chuan a lungawiloh thu a sawi zui lehnghal a. 

Nurse chuan, "Niminah a fapa accident rapthlak tak avangin a boral a, an vui mek laiin i fapa chhanchhuah sak tur che in a rawn kal vang vang a nih kha," a ti a. 

Mi dinhmun hriat sak hmasa lo a, mahni ringawt inngaihtuah hi a fuh ber lo fo.