Monday, September 10, 2012

Shine on you crazy diamond



            Thlasik a ni tawh a, tlai ni tla tur te chuan lunglenna an chawk tho veng veng zel mai thin. Zan boruak thiang kuk kara arsi de zauh zauh te chuan hun kal tawh te min thlir tir a, tlaikhaw vara zai mai loh chu min hnem tu dang a awm lo. Heng hunah hian a ni mizo hla hlui sa a mittui hnam sawk sawk a kan kiu vawng vawng thin ni. 

            Chung kan lunglenna te chuan ngaihtuahna thar min pe a. Krismas hma ngei a kan hranghlui zaithiam te inlar theihna hun siamsak bakah kan lunglenna te min tawmpui tura sawm tha in kan hre ta a. Tichuan, kan hranghlui zaithiam kan tih zual ho, chu hun min hmanpui tura sawm tur thlang chhuakin hun kan hmang chhunzawm a. Kan ngaihtuahnaa lo lut hmasa ber te zinga mi chu “C.F.L. Hmingthanga” a ni.

            Ani hi khawiah nge a awm?”, “A la dam em?”, “A la zai thei angem?” tih zawhna te chu a rawn lut nghal zut zut a. Engpawhnise, zawnchhuah tha in kan hre ta a. Theihtawpa a hranghlui pui te kan biak kual hnu leh a awmna chin hriat theihna tur hrang hrang kan dap kual hnu ah Phunchawng veng-ah a awm tih chu kan hriat theih awmchhun a ni a.

            November 12, 2011 chuan kan “Oldies party” hmanna hmun tur Valley View en thlithlai pahin, CFL-a zawng tur chuan Phunchawng veng lam chu kan pan thla ta a. Chawhnu her hret a kal kan nih avangin kan tlan chak hle a, Phunchawng kan tlan pelh fe hnu ah ‘a ni tawh em em lo deuh’ tiin mi kan zawt a. “Let leh char char rawh u,” an tih avangin kan tlan let leh a, Phunchawng veng kan thlen chhoh leh chuan dawr kan hmuh hmasak ber atang kan zawt chho tan ta a.

            “Chhung saroast-i dawr han zawng rawh u,” ti chuan min hrilh zel a, chu dawr kan zawn hmuh leh hma chuan dawr 5 vel laiah kan zawt nawn leh hman. A hnu ah a awm na In ni ngeia an sawi chu kan thleng ta rawih mai a.

            Inchhunga lut tlang nghalin, “Pu CFL Hmingthanga hi a awm em?kan ti a. Anni chuan hmun danga a len thu te min hrilh a, lo nghak turin min ti zui bawk a. Rei deuh fe kan thut chhungin a awmna nu hnen atang chuan a chanchin kan hre nual a. Tawngkam mawilo nilo sela, zu a in nasat avangin damdawiina dah luh tawp tawp thin a nih thu te, camp a luh tir thin a nih thu te, ruihhlo ngai te home lama dah a nih tawh thin thu te chu min hrilh bawrh bawrh a.

            Tichuan, nakin deuhah chuan mi pakhat mit khur thuk dak mai, a hmel en reng reng pawha natna chi hrang hrangin a sual beh mek a ni tih hriat khawpa vun dum tak mai, zozial rawn pak khu talh talh chungin kawngkharah a rawn dak hau mai a. A thawmhnaw pawh suk loh in a ha rei tawh tih a hriat a, a kekawr zipper pawh zip lovin inchhungah chuan a rawn pai lut chhak chhak a. “Hei an nghak rei tawh lutuk che,” ti a a in neitunu in a sawi chiah chuan kan mi hmuh tum CFL-a a ni tih kan hre chiah. Mak kan ti lutuk chu kan hamhaih zo vek.

            Ani chuan bengvar takin, “In van fel em em ve, khawi atangin nge in lo kal a?” tiin min han bia a. Keini pawh chuan rang takin thutna atanga thovin kan chibai zui nghal a. Kan zaithiam ngaihsan leh mizo zingah chuan a aw lunglenthlak kan tih thu te chu kan fah liam liam a. Ani chuan inthlahrung takin muang ban cherh chawrhin min chhang ve zel a. Kan inbiak danah a rilru pawh a pangngai tawh lo hle tih a hriat a, rilru a na duh ngei mai.

            Tichuan, kan kal chhan te, zai ve tura kan duh thu te kan sawi a, a hmun tur te min zawt a, a chak ve zia te, hun a neih phawt chuan tel ve ngei a tum thu te chu min hrilh ta a. Kan titi thui zel a, a hla hlui te chu laptop ah chuan kan han play a, a ngaithla a, a sakpui a, a lung a leng a ni tih hriat takin a mittui a rawn parawl kuang a. A hla hlui a han sakpui te chuan a aw chu CFL-a ngei kha a la ni, mahse a hmel ah chuan a ni ang tih rin ngaihna tur reng reng a awm lo.

            Ka pu, keini thalai te hian kan la ui si che a, khawngaihin i thil tih thin zu hi chu in tawh lo hram la, i thi hma ang tih kan hlau khawp mai,” tiin inthlahrung takin kan hrilh a. Chuveleh a aw ki a rawn san a, thinrim meng bial pawpin, “Chutiangin min ti suh u,” tiin a kut chuan min kawk kual a. Sawi thui pui chi a ni lo tih hria in, a hla hlui lamah chuan kan kuai lut leh a. A lunglen ngai tho in a lung a leng leh a, Mizo Idol lama a hla “Intawng leh ngei ang” tih a lar thu te chu kan hrilh a, ani pawhin a lo ngaihthlak tawh thu leh, thiam a tih ve zia te a sawi a.

            A thian hluite, an hun laia a zaipui thin te ho chanchin te kan zawt a, a ngaih thu te, an hunlai na na na chuan Mizoram an al hneh ve zia thu te a sawi a. A bik takin U BM-a a ngaih thu a sawi chhuak ngun khawp mai.

            A hla chu kan play sak zel a, a chang leh kut zaizir nen meuh a sak pui a, a chhing vawng vawng a. A hla kan play apiang chu, “Awwww…hei pawh hi,” tiin a sakpui zel a. A hnu deuhah phei chuan a music video hlui te chu kan en tir a, ama zai chu a en ngawih ngawih a, a kuttum humruhin, a awma a beng dawp dawp pahin, “Keimah CFL Hmingthanga….Keimah CFL Hmingthanga” a ti a.

            Hun a kal chak duh ngei mai. Ani pawhin nuam a ti tih a hriat a, kan chhuah pahin min rawn thlah thlap a, phone in thla ka lakpui zuai a, kan kalsan ta a, min vai lauh lauh lai hmel pawh ka mitthla ah a la cham reng mai. A live a ka hmuh hmasak ber leh ka hmuh hnuhnun ber a ni ta. Zofate rimawi khawvel lunghlu pakhat in min kalsan hi a uihawm a, rimawi khawvel hian a ruak pui huai dawn a nih hi.

Remember when you were young, you shone like the sun.
Shine on you crazy diamond.
Now there's a look in your eyes, like black holes in the sky.
Shine on you crazy diamond.


R.I.P C.F.L HMINGTHANGA
Died 09.09.2012

9 comments:

VaiVa said...

Nizan atangin a hla ka ngaitha ka ngaithla mai. A lungrun thlak hle mai, thatlai in zu leh sa in kan mi vannei te vanduaiah a va chan hnem tir tawh ve le....
May his soul rest in peace..

gary pachuau said...

you reached for the secret too soon,

shine on mr.legend shine on

wish you were here. ▲

Lawmsanga Bodom said...

father, a ngaihnawm in rilru a kal thui duh hle mai.. in ti tha hle bawk.
//thlalak ah khian khawi zawk khi nge cfl-a chu?? LOL

Mizoram said...

▲ Treatened by shadows at night, and exposed in the light.
Shine on you crazy diamond ▲

Mimihrahsel said...

“Keimah CFL Hmingthanga…Keimah CFL Hmingthanga” tih lai vel hian ka rilru a khawih. Ka ui ngei mai, i blog title (hla) nen hian a inhmeh tawp bawk a.. "Shine on you crazy diamond!"

Lalzarzoa Zara Ralte said...

Hei ngei hi a lawm ka lo zawn thin chu! CFL-a a thi tih ka hriat phat atang in engtin nge nun a hman thin a,nupui fanau neiin a awm nge tih ang te leh a chanchin dang hriat chak na riau ka lo nei ve a. Kha ti khawp a zaithiam lar in chutiang nun a lo tawng chu a lainat awm in min va run teh reng em. A ma zai ngei mai in play sak lai vel a rilru tur te hi a va lunglen dawn em! Hringnun khawhar leh lunglenna ram a chhuahsan ta si a, a hringnun erawh a nuam lutuk lo tih hriat hian rilru a ti na hle mai. Thlamuang takin chawl tawh mawlh rawh se.

Joszef Ralte Kawlni said...

Joe, i thu post chuan rilru a khawihin a a ngaihnawm hle mai, i rilru ka trawmpui khawp mai che.

Joszef Ralte Kawlni said...

Joe, i thu post chuan rilru a khawihin a a ngaihnawm hle mai, i rilru ka trawmpui khawp mai che.

thegirlinthefadedbluejeans said...

Beautiful tribute joseph.a.ka lo hre ve chiah a i blog ka chhiar hihn.ka ui khop mai a..