Sunday, July 5, 2009

18 hrs at Malana

Nipui vanglai a ni a, Dilli tlang lamah chuan khaw lum avangin kan chiau kan chiau a. July ni 1 a lo her chuan Delhi Mizo Thalai Inkhawm ten an buatsaih Malana a Medical Camp nei turin kan inbuatsaih ta a.

July ni 1 tlai dar 6 ah Bus nghahna hmunah thlen kim nise tiin kan rel a, keini pawh chumi nang hman tur ngei chuan kan chhuak a. Kan va thlen chuan dar 6 chu a lo la ri lo deuh a, kan thlen hnuah pawh midang an rawn thleng nak nak a. Bus nghahna atanga chhuak nghal mai tura kan inrin laiin, bus chuanna tak tak tur chu hmun dang deuhah a ni a. Heng motor hian min thiar leh te te a, minute 10 vel tlan a ni.


Kan thlen kim hnu reilote ah bus pawh chu a rawn thleng ve nghal a, Delhi kan chhuahsan meuh chuan dar 8 a lo ri dawn hnai reng tawh a, chawl khawmuang lovin kan chhuak nghal a ni.


Kalkawngah hian zunram thiarin vawi hnih khat bak kan ding lo a, kalkawng thui viau mahse khawlum nin leh kan thlenna tur ram hmuh chakna a khat kan nih avangin kan hlim tlang hle. Zan dar 10 velah kalkawngah dinner eiin kan tlan lehnghal map map mai a ni.

Zing khua a lo var meuh chuan a vawt var tawh mai a, tukverh darthlalang pawh pawh thlak chi a ni tawh lo, kan inchhem khawng thei mai tawh dawn te in a hriat. Chung zing boruak thianghlim vawt var mai te chuan Zoram lam min ngaihtir hle mai. Khua a thiangin, thlasik boruak a pawl lek lek a, thingpui sa ver vawr han dawm te hlei hlei chu a hahdamthlak hle mai.

Zing thingpui in zawhah chawl khawmuang lovin kan tlan leh char char a, chawhma dar 11 velah Manali kan thleng chho a. Hetah hian Manali a fahrah enkawlna neitunu Pi Mawitei'n an sikul bus in min rawn lam tir a, tichuan an hmunpui lam panin an bus te chuan minute 15 vel kan tlan leh a. Hetah hian chhun chaw eina leh intihfaina hun te kan neih bakah, orientation hun te pawh kan hmang bawk a ni.

Chawhnu a rawn her chuan kan tum ram Malana lam pan turin Sumo 5 an lo ding thap tawh a. Dar 2:30 velah Malana lam panin sumo chuan kan inzui chho dam dam a, group 5 ah inthenin group tin te hi a huho zelin kan kal a ni.


Darkar 4 vel tehmeuh mai sumo chuan kan chuang leh a, kalkawng a chhe hle a. Motor chuan a chang leh min thlei a, a chang leh min thap hi a ni deuh ber mai. Tlang panga kan tlan te chuan a khu nasa mai si a, kalkawng a te bawk si a, tlak palh hlau a lo tawngtai ta mawlh mawlh te pawh kan awm nawk mai.


Motor in a kal theih chin bakah chuan darkar 1 leh a chanve vel tlang lawn tur a awm leh a, hei hi kan rin aiin a lo thui tawh lo a. A hmaa kal te chuan darkar 3 vel lai hun an hmang thin a, tun tumah erawh motor kawng a lo kal thui tawh avangin chutiang em em chu a ni lo. Mahse hahthlak tak a ni.


Kalkawngah kan chawl chho deuh reng a, thim thet thet dar 7 pelh hretah Malana khua chu kan lut ta a ni. Malana khaw chanchin hi sawi ve dawn ila, sawi tur ka hre hauh lo. Mahse, he khua hi serh leh sang an ngah em em a, anmahni hrim hrim hi sik emaw deh hlek pawh thiang lo an ni a, tin, thlalak phalloh leh hnim chi hrang hrang te khawih thian loh an ngah hle a. Khawih chuan pawisa chawi theihna vek an ni.


A hmun a sang bawk a, a vawt var mai. Kan hriatthiam theih dan tur chuan Mizorama kan tlang neih san ber Phawngpui aiin Km 1 velin helai hmun hi a sang a ni. Kan awmna tlangah tak chuan vur a tla lo a, kan piah tlang te erawh vur in a khuh mawi hle.


Kan thlen hian hotuten riahna tur tent leh eitur thlengin an lo buatsaih a. Kan inrem fel hnu chuan inkhawmna hun tawi te hmangin dar 9:30 velah dinner kan ei a. Ei kham hnuah mei te chhemin inkawmhona leh zaihona hun te hman a ni a. Dar 1 vel thleng zai ho a ni a, a tuk maia Medical Camp nei tur kan nih avangin mut zai kan rel ta a. Khua a vawt bawk a, mut tui a awl kher mai.


A tuk zing dar 7 ah kan tho leh var a, devotion hun te hmangin breakfast te kan ei a. Dar 9:30 ah Medical Camp chu kan tan ta a ni. Heta kal zawng zawng hi mi 40 kan ni a, doctor 4 leh nurse ten min tawiawm a, damlo inentir an thahnem hle a, an vaiin mi 180 vel an ni.


Doctor te leh nurse te pui turin kan kal ve a ni ber, a thenin hming an lo ziah sak a, a thenin doctor te chawh sa damdawi an lo pe a, kan buai nuai nuai a ni ber e. A then tihtur nei lo hovin tawngtaina hun an lo hmang bawk.

Damlo te en zawh chuan chawhnu dar 1 a pel tawh a, kan inremfel leh sawk sawk a, dar 2 velah lunch kan ei leh a, lawmthu sawina hun te hmangin dar 3 ah he hmun hi kan chhuahsan leh ta a ni.

Malana khua a mipui te hi an dangdai hle a, an hmel ah chuan middle east lampang ni awm tak tak ni in ka hmu a. An ngo a, an sen deuh suah hlawm mai. He khua hi Ganja hmunpui a ni a, an sum lakluhna hnar ber pawh a ni a, khawvelah an ganja hi a tha ber pawl a ni. Kawngsir leh khawi hmunah pawh hmuh tur a tam hle.


An hmeichhia ten hna an thawk nasa a, a tlang kan lawn chhoh lai pawhin an hmeichhia te thing phur kan tawk hnem khawp mai. A khawchhungah lah hmeichhia pitar te te te pawhin char char aia lian mah mah thing te an phur nawk nawk mai. An thlalak a rem loh avangin ka la ta lo.

An mipa te erawh biak tlak hmel pu an awm lo, ganja kha an meizial zuk hmiah hmiah a, an meng sen ram hlawm mai. Khawi khawi emaw ah an lo thukhawm leh laih zel. An khua hi a tawp angreng a, hei vang hian an hrisel loh phah hle bawk.

Pic - An Assembly House kan ti ve dawn nge, an rorelna In anih hi.

He khua ah hian missionary te pawh kum 10 chuang an lo awm tawh a, mahse christian pakhat pawh an la awm lo! An sakhaw biak hi Hindu niin sawi a ni a, mahse a inang lo deuh ten ka hmu ve mai mai. Anmahniin engkim an nei hrang a, tawng chenin, mahse hindi chu an hrethiam ve tlangpui.

Pic - An lung tam tak hi hetiang hian a tle vek mai.

Khawih thianglo pawh medical camp neih meuh chuan kan khawih ta nawk nawk hlawm mai a. Anmahni hlei hleiin min bawr nasa. Naupang te pawh sikul an kal ve a, sikul form te pawh an nei ve thlap a ni.


An In sak dan te hi a mak khawp mai, thli a na ngai lo ni tur a ni. A ban te hi lung ah an nghat tawp a, a bang te chu char tin an kham phei a, a chungah lung chhawng hnih vel an rem leh a, chumi chungah char tin an dah leh a, chutiang chuan an sa tlangpui.


Kan haw thla leh lampang chu kal lam ai chuan kan chhangchhe tawh lo deuhin ka hria. Kal dan kan thiam tawh hlawm emaw ni. Kal chhung pawh a reilo deuh. Tichuan, sumo bawkin kan let leh a, Manali ah kal tawh lovin bus in min lo nghak a, kan tlang lehnghal a. A tuk chawhma dar 10 vel ah kan thleng a, boruak a inang lo bawk a, a chauh thlak kher mai.


I chau em? tiin kan inzawt nak nak a, tumahin chau e ti duh bik hek suh. Mahse, zep theih a ni lo, hmel ah kan chau a ni tih a lang chiang hlawm hle. In lam pan nghalin ka mu nghal char char a, ka thawh leh meuh chuan a lo tlai tawh hle a, computer te on in he i thu chhiar lai hi ka ziak ta a.

Thlalak dang HETAH hian a awm nual bawk.

16 comments:

mnowluck said...

Interesting.. I'd love to visit such place.. away from the fast life

You really write well ..you should be a journalist:)

luliana said...

in va ti ropui ve...

Hetiang thingtlang kilkhawr a medical camp neih hi a nuam duh phian ania...nikum december tla khan keini pawh kan kal a, doctor la hmu ngai miah lo te kha an ni nawk a, rilru a khawih ve duh khawp mai...

Tin, i ziak ngaihnawm :)

Sekibuhchhuak said...

In ti tha hle mai. Taksa a chau anga, chhungril lamah erawh hlimna a pe ngei ang. Midang tana thil tha ti in nisi a.

Eng hnam nge maw an nih re re le? An insak vel danah chuan,Tibetan hote pawn an ang lek lek mai.

Kum 10 chuang missionary rawngbawl tawhnaa Kristian pakhat pawh la awm lo erawh chuan ngaihtuah ati thui deuh!

By the way, Sumo a chuang ho zingah khian ka nu ang deuh kan hmuh nawlh chu! :-)

Varte said...

In ti tha hle mai, a hahthlak viau na-a a hlimawm khawp ang.

Malana chu khawi hmuna awm nge ni reng reng,a chengker hmel e..!!!

Lal Jo-a said...

@mnowluck - like father, like son. my dad was a journalist.

@luliana - Nuam ve mai mai khawp mai. Kal leh tur pawh ti se ka peih khawp.. haha. I ti lawmawm thin e.

@Sekibuhchhuak - Nia, kan chau nangin kan hlim tlang khawp mai. Share tur kan ngah tlang bawk. Kum 10 chuang hetilaiah hian Delhi mizo thalai te hian Pathian rawng an lo bawl tawh a, a mak khawp mai, ringtu an la awm thei lo hi, in tawngtainaah in lo hriatpui ve reng thin dawn nia.

I nu ang deuh khi chu Puii aniang! :-)

@Varte - Kalkawngah kan nui kan nui mai alawm. Nang pawh i tlang lawn lai hmel hmuh a chakawm ve khawp mai. hehe

Malana hi Himachal Pradesh state chhunga awm a ni a, Hetah hian a khaw chanchin pawh a inziak ve http://en.wikipedia.org/wiki/Malana,_Himachal_Pradesh

Unknown said...

In thawktha hle mai. In kalna ang khi ka kal lohna a reita hle aniang, an in sakdan te khian lung a tileng tlat. Himachal hi hmun nuam tak ani e, mahse an thingtlângte khi an la thingtlâng ve khawp mai. A hmun erawhchu a mawi ani.

awitei said...

A lem ka en phawt a, comment ka chhiar a, i ziah ngaih nawm an to hlawm pauh a, ka chhiar ta reng a, an daw lo ve...
Ziak thiam khups mai..

Lal Jo-a said...

@chhangte - Ni e, an ram hi a lo mawi khawp mai. Hmun dang pawh kal zel a chakawm khawp mai. A ram boruak te leh a tlang ram te chuan zoram lam min ngaihtir khawp asin.

@ts - thank you ka pi. :-) I ziak tawi thin bawk a, thui deuh chu i chhiar peih ka lo ring lo a, i chhiar avangin lawmthu kan sawi nawn leh ange.

Mimihrahsel said...

nawm hmel khop mai a.. in ti tha hle mai.. Pathianin a malsawm ngei ang che u

TIN, kan zinni a in ang! :-) Come see my post, mahse i ziah ang chuan ka ziak thiam ve hauh lo mai. Nang nge nge, tluk loh rim i nam thin e. hehe

Lal Jo-a said...

@Mimi - Nuam khawp mai, kal leh a chakawm. Kan zin ni a lo in ang reng a ni maw? nangni erawh kawng chhia vangin in let leh a nih hmel :-) ... Keini pawh ruah sur in min dang trep trep. Vur te a rawn tla hman, kan haw tum ni phei chuan.. kalkawng a ngaihtuahawm raps. Kan hmeichheho phei chu an tre tuar tuar reng mai mawle.

Puii said...

Ziak ngaihnawm leh pek khawp mai!! malana hang over la reh thei lo hi a buaithlak khawp mai hei!! kan la sawi bang thei meuh lo a ni e hei keini ho pawh hian.. mi nu te ka lo ang a maw lolzz.z..upat tawh hmel char2 ve aw...

Lal Jo-a said...

@ puii - thank you thank you.. at last, i lo comment ve a. Silent reader hi ka ngaisang vak lo ka tih kha.. lolz.. Mi nu ang deuh zawk chu en chiang lovin ka lo sawi ringawt a, khi pic ah rau rau khi chuan Manuni khian a ang fee zawk. Manuni khi a nih ka ring leh zawk si.. haha

Varte said...

Ka tlang lawn lai thlalak chu ka rawn thawn dawn che amawni le, darkar 1 chuang teh meuh Mt Longonot Kenya-a kan han lawn chu ka chau ve hnup hnup asin...

Kan Corps SAY ho pawh hman deuh khan Arunachal-ah an kal a, Bus-in. Kan thleng hla tulh tulh a, kan nula ho chuan an nu-te an ang tawlh tawlh an ti maia sin.. :)

Mizohican said...

Nice nice very nice. Delhi Mizo ho in ti ropui e! Very good pictures too. Tiang te hi chu dam chhunga treasure tur. An ni pawn an theihnghilh mai mai lovang che u. God bless you all.

benjamin rualthanzauva said...

Nice. DMZP programme alo ni maw? Trekking te pawh i thin ula :)

Lal Jo-a said...

@ Varte - hahaha, i la rawn post ngei chu a ngaih dawn chu. Zin hi tih na mai mai a ni lo. Vawikhat kan zoram lam pana kan haw pawh e, kan thang rei deuh aniang, kan thiante ho hmuihmul leh khabe hmul a buk haw chhaps hlawm alawm. :-)

@ Kima - Thanks bro. Min lo theihnghilh leh sia nga! (hlauhawm ve tho)

@ Benji - not DMZP, DMTI zawk. Trekking chu ka chak nasa mai, blore lampang ho kha in uar bawk a, ka lo chak ve thei khawp mai. Helam hi an ti vak lo hlawm a..