Friday, April 10, 2009

Khaw nuam ah

Nia, ka reh. Thil engmah phei chu a ni lem law, ek na ngaiah ka let. Thla hmasa chhung zawng kha chu Mizoram lamah mawng ka han sil a, sulhnu ropui leh chhinchhintlak engmah nei lem lo mah ila, ka'n thai kawi ve leh mai mai ange.

Inti engthawl fahranin ka thianpa pakhat nen kan haw a, mahni chhungkhat pawh ni lem lo te nena dar insi riala chhun leh zana rel han chuan ho chu khawvela thil nuam ber a ni lem lo. Hei hi ka thil nin ber te zinga mi a ni a, a ni reng bawkin ka ring. Patling leh patling ni leng lenga in melh sen rum reng mai zawng, a kristian lo riau te hian ka hre thin. Chutia mahni hma zawn a mite hmuihmawl to zat kan hre vek tawh ang chu tih hnu a rei ah Kolkata khawpui chu kan lut ve leh ta. A lo uap leh ngei bawk.

Mizoram house lo chu

Khaw dang pan lovin Mizoram House bawk kan pan leh a, tun tum chu Salt Lake lam ni lovin Ballgunge lamah kan kal thung. Salt lake kha kan ning a ni ber e, Ballygunge lam pawh eng teh ual a lo ni chuang lo. Haw kawngah hi chuan eco taka chet a ngaih thin avangin dorm lamah thleng mai ang kan ti a, mikhual an tam lem lo bawk a, a zia phianin kan ring. Kan han thleng chu inbual fai te kan duh si a, mahse sahbawn kan lo ken theihnghilh hlauh mai pek a. Lei tura pawn va chhuah leh kan peih tawh si lo, kan inti chau der khanglang a.

Rel chhunga paper soap ka lei kha ka hrechhuak a, kan pahnihin chumi hmang chuan kan inbual ta tehreng mai a. A va hahthlak tehreng em, fai pawh kan fai hian ka ring nek love. Kut ah kan nuai phuan a, chu chu kan intat kual ta vel mai mai a ni ber. Chumi hnu ah mut hahdam time kan hmang leh a, kan harh fel ta maw tihah kan thianpa pakhat hian engtin nge kan thleng a ni tih pawh kan hriat loh hian, 'lokal teh u, vat vat' a rawn ti ringawt a. Amah kan hmuh pawh mak tih tawh mah nak alaiin, thu pe aw tak maia min rawn ko chu, han vawm thal tawp mai hi ka chak a.

A pu damlo a lo kalpui chu niin, a pu chu zawn chhoh a ngai a, house chung berah an la thleng zui, A rit! Kan dorm ah khan sap pakhat, saptawng thiamlo a thleng ve bawk. Mizo hi chuan vun ngo hi chu sap kan ti vek mai a, sap saptawng thiamlo a ni mai. A tuk maia thlawk haw ve tawh tur kan nih avangin a hma thei ang berin kan mu a, thosi a tam si, a lum si, inkhuh hlunin lum ti chung chungin kan mu a. Mut tui chu har ve khawp mai, lut chhuak a pui lah an tam.

A tukah chuan dorm vel a awm reng ai chuan tiin airport lamah a hma thei ang berin kan chhuak a. Hmelhriat loh awm tamna rau rau ah airport a hmelhriat lem loh chhas chhelo tak tak lo thlir ve chu a nuam daih zawk.

In sut na!

In ka thlen pawhin tun tum chu len vak loh ka tum sa reng a, len pawh tum ila lenna tur ka hre chuang lo. Chawlhni tlai khat chu thianpa pakhatin leng dun ang tiin min rawn sawm. Kei pawh ka chhuak khat bawka tiin ka lo aw ve mai a, hmun hrang hrangah thian te kan tlawh kual hnu in dar 5 velah In lam panin kan haw a. Tui taka titi paha kan tlan zel laiin kawng kawiah a ri ta bur mai. Ka tho nghal vut a, ka han enchian chuan scooter in min lo su chu ni rengin. Ka thianpa lah chu a helmet nen a let bum mai a, a thi emaw ka ti hman in thin phu dut dutin ka kaitho. Ke hnih nei chetsual na reng reng ah a hnunga chuang an na duh an ti si a, kei lah chu ka na mang si lo. Chung lamin min hum zia ka hrechhuak.

Chutia kawngsira ka kaih phei hnu chuan mi pawh an rawn pungkhawm hnem tawh mai. Scooter khalhtupa lah kha kawr ah a mu bem mai a, a scooter chu a steering hawina leh a ke hawina a inmil lo hle mai tih te ka va hmu bawk. Kan va buai ta nuaih nuaih em! Engkimah thiam kan chang zawk na chungin a scooter khalhtu chhungten ngaihdam an dil nasat em bawk avangin engtin tin emaw kan inchhuah thei ta anih kha.

A hmingin damdawiin lamah te kan inphur phei ve ang lawp lawp a, scooter khalhtupa kha chu a tuka in x-ray leh turin an chah ta in ka hria. Scooter khalhtupa thiamlohna te, helmet a khum lo, zu a rui, license a keng lo. Min rawn sut hma chiah khan, kawng kawi hmaah si khan mi a au a, kalkawng a enlo bawk nen a kawi lai takah khan min lo su ta bur mai kha a ni a. Vawikhat lenchhuahnaah pawh hetiang anih avang hian lenchhuah chu ka tum duh ta lem lo a, In ka thlen hnu chuan accident buai lai vela ka paparazzi rilru avanga ka thla lo lak hman te chu ka en mai mai a.


Reiek tlang ah

Reiek tlang hi vawi engzat nge kal kan tum tawh ang aw. A vawikhatna atan engtin tin emaw ni kan han thlengchho ve leh ta a. Ka rin ang em em chuan a nuam lem lo. :D A bulah chuan thla bial lawmin concert eng eng emaw an lo huaihawt thin chu niin, zan thum vel an lo nei tawh a. Mizo thalai an va tam tehlul em, ke hnih ten ke li ten an inphur ang dur dur a. Ka mi tawh apiang mai chu a hmei a pa in eng rim emaw ni an lo nam huam zel mai a, grape wine an lo zuar chu niin. Tin, an zaktheilo hlawm bon top!

Reiek chu a tlang tak han thleng tur chuan ka ring aiin ke in kal thui a lo ngai zek mai a. Hah hnep hnawpin a tlang hmawr tak tak phei chu thleng peih lovin kan tawp san ta mai. Haw lamah chuan Ailawng ah ruai an lo theh a, kan chhungte chhung leh chhawng te inneihna a lo ni a, kan theh haw ve nghal daih. :-)

Ka ngaihtuah mai mai a, han len khawthawn na tur hi a van awm lo tak em ka ti thin.

"Leng ila" "Khawiah?" "Reiek-ah"

Hit lo lutuk. Reiek ah anih loh chuan, Tlawng ah insu ila. Anih loh pawhin Tuirial ah mi bike race en ang u. Aaa... han hit em em a awm lem lo e. Mahse concert leh eng ilo thlan vel a tam em a, thalai te an buai zo niin ka hria.


Sex video

Ka zaithiam tih deuh mai, a ruka ka lo star ve thin Malsawmtluangi, a sex video a leak out thawm ka hre thut. Mak pawh ka ti lem lo phawt a, mizo te hi chu inbum kan awlsam si a. Engtin emaw internet vel atangin a hmel ang deuh an hmu anga, chu chu a ni an ti a ni ang tiin ka hmuh hma loh chuan ka awih duh lo a.

Ka hmuh ve meuh chuan ang ka ti hle mai, tichuan chanchinthar te kan hre zel a, amah ngei a ni tih chu phat rual loh in a chiang ta si. A hnu deuhah Daduhi an ti ve leh. Ani hi chu a phat nasat em avangin ka hmuh ve hma atang pawhin a nih ka ring lo nghal a.

Ka hmuh pawhin a ni lo a ni tih ka chiang nghal. Eng eng emaw ti ti na velah hian mi thenkhat hian, "Tunlai chu thiamna a sang tawh a, an hmel an vuah sak a, anmahni tak tak angin a chhuak mai zel alawm" an tih hi ka hre fo a. Chuta ka sawi ve thin chu, thlalak pangngai (still) ah hi chuan hmel chu a thlak theih lutuk, mahse video a hmel vuah sak tur em em chuan kan thiamna in a tlin lo ka ti thin. An hawiher ang apianga siam rem ve zel tur phei chuan a ngaihna a awm lo.

Chapchar kut

Chapchar kut kal lohna te pawh a rei tawh alawm tiin Kut hmang turin lammual lamah ka kal ve a. Ka luh dawn chuan mi an lo tam nasa tawh mai a, ka lut chiah phei chu mizo hi vai zat zet kan awm emaw ni ka ti hman.

Ni a sa si a, a khu nasa bawk si. Hmar lampang goal ban bul vel chu ka pan phei ve ta chhut chhut a, vaipa mix zuar te pawhin chapchar kut chu nuam an tih hmel hle. Awm na tur mumal ka hriat loh avangin ka tei ka tei a, costume parade a tel tur ka hmelhriat te ka hmuh a, ka biak bak chu ka tawng pawh ka hre lo e a. Tichuan, mi pakhat costume parade a tel tur chu a thla ka la a, ka chapchar kut chu ka duhtawk a, Vanapa Hall lamah Art Fest lamah ka kal san leh ta zawk a ni.


Games khel ang

Mipa naupang tan chuan an pawisa hman tamna ber chu games khelh a ni ta. Sikul ban pahin game parlour hrang hrangah kalin an inkhel deuh ziah. Sikul chawlh ni te phei chuan heng dawr te hi a lun thei hem hem hle, darkar khat khelh man Rs. 20-40 te a ni tlangpui.

Kei pawh khelh ve leh te ka chak deuh rum rum a, mahse chutia game parlour vela khel tura mahni a kal chu ka hreh a, ka kal ngai lem lo, cafe ah te ka kal zawk thin. Mizoram computer chu virus buaiin a buai a ni deuh ber, virus in a ti buai a tih a ni deuh zel.

Naupang te hian games khel turin veng hla deuh atang pawhin an pan vang vang peih, heng aia tha deuh te hian siam se te ka duh sak thei lutuk. Hmun pakhatah chuan sound awm lovn rs. 20 a ni a, sound awmin Rs. 25 a ni thung. Sound awm tih pawhin speaker pakhat kha computer hrang hrangin an inhman tawm a, a ri nuaih nuaih mai a ni. :D

Hun awl hmanna tha tak a ni a, tournament ropui tak tak buatsaih sak zel se ka ti khawp mai.

A, eng teh vak mah ziak chuang lovin a lo thui leh ta hle mai. Duhtawk phawt mai teh ang, tun atang chuan tlemin kan ziak zing ve leh deuh tawh ang chu. Chawlh hmang nge nge a hlawk thlak e. Lirthei neiin RV, nei lo in Bawngkawn an tih fiamthu te pawh a tak a ni tih te ka hriat phah a. Celebrity an tamin, tuai an tam bawk. Scooty a ri ter ter deuh reng a, current a awm zing hle.

17 comments:

luliana said...

Kei inah ka la awm...reiek tlang ka la kal lova, chapchar kut pawh TV ah ka en..hun ka hman dan hi ho tak a ni...tu emaw video hi leak leh tawh se :P

Geminiboyz said...

Keipawh Reiek tlangah chuan ka kal ve tawh. A nuam ka ti ve reuh khawp mai. Kal leh pawh ka chak viau nain ka kal leh ta chuang lo. A kawng a nuam vaklo nain a tlang thlen hnu chuan kan sawi paih tawh lo

Sekibuhchhuak said...

Kei Kolkatta ah chuan Mizoram House -ah hian ka thleng ngai lo. Mother Teresa house bula Mizoram Synod hmunah sawn ka thleng ber. A nuam khawp mai. An chhangchhe lo !

I lo hawng daih vang anih hi i reh kan lo tih :-) Ni e han hawn chang pawh hian han len khaw thawnna tur hi a awm lo khawp mai!

I sawi bakah khian next destination chu, KV Paradise :-)

burgerstud2005 said...

E khai..i va reh ve...pawisa convert na kha ka en duh ka tia..i lo update tih ka hre chiah.I ziak ngaihnawm thin khop mai.Thu ziak mi tak i nih reuh hi maw le.

Nia..in bawr lem loh chuan AJC Bose Road ah khan Synod House a awm.Ka la kal ve lo na in,a nuam an ti.

burgerstud2005 said...

Taka father..ka blog saw ka log in thei lo a,new post poh saw a nung lo a..i hre mial em a chhan.

Joseph L said...

@ luliana - NI EEEEE

@ Geminiboyz - E, a kawng kha hrehawm tak a ni. Mi rawn chhuk lam kan tawh apiang te khan, "In thleng trep" an ti zo vek mai a.... :D

@ Sekibuhchhuak - House hi nuam ber tho alawm le. lolzz... KV Paradise pawh ni e, a awm tak e. Mahse, a kawng a chhe deuh an ti, hei pawh hi ka la kal lo.

@ burgerstud2005 - nia, ka lo haw daih alawm le. thuziak mi pawh an awm bik hian ka hre lo, ziak peihin ziah a, ziak peih loh in ziah loh hi a ni deuh maiin ka hria. I blog chu a chhan ka va hre lo, i log in theihloh chuan i pass i theihnghilh te a ni lem lo mo?

illusionaire said...

Bo rei bawka, rawn update tha e... Nia MS-i leak lai kha i bo lai a ni bawk sia, nangmah emaw te kan lo ti vela a mipa kha, kan lo tawngtai vak vak hman a sin...

Joseph L said...

keipawh keimah a nih loh nan ka tawngtai vak vak alawm. a dul a kiar lutuk a, ka duh aiin.

Varte said...

I hun han hman dan tak chu a, chhiar a nuam hle mai.

Lammuala parade tur thla i lak ber kher erawh hi chu...h :)

Joseph L said...

@ varte - ty ty, thlalak khi sexy i ti lo ami? haha

Zaia said...

CHhiar a nuam hle mai..thlalak pawh a tha e! Mizoram-ah hian, han len khawthawnna tur a vang thei khawp asin.. chhungte kan vel a nih loh chuan...

Joseph L said...

@ Zaia - ka lawm e, ni e, chhungte velh mai loh chu len khawthawn na tur a awmlo takzet a ni. :D

Puia said...

Sawi famkim nalh khawp mai Sepa. Bike chetsual chu keima chanpual chauh emaw ka tia, i lo tawng ve tho a ni maw.. keipawh thla khat lek ka cham chhung khan vawi 3 ka chesual a, vawikhat phei chu ka zawng lawk thei lo va, a hreawm teh a sin.. Mahni hi fimkhur hle mah ila, midang fimkhur loh avangin a chetsual theih tho mai.

Reiek pawh ka kal ve a.. beisei ang erawh a ni hauh lo. Mikhual an awm meuh lo a nih rih saw mawle..

Joseph L said...

@ Zorun - hotupa, bike chetsual chu i chanpual alawm. Mi dangin an laksak theilo che.

wonderboy said...

New bagha lamte i kal em?!? Zanreiah hian pulau ei chak em2 vang pawh ni chuang lo in nuihzatthlak deuh a awm thin avang zawk in kal kal thin a, nuam ve thei thin khawp mai.
Zawlkhawpuia han len vahna tur awmlo luttuk hi a hreawm khawp mai.

Joseph L said...

@ wonderboy - New bagha?? chu chu khawi laiah nge?? i va dai zau bik ve a.. engmah ka hre ve hleinem le.. hahaha....

Anonymous said...

...please where can I buy a unicorn?