Friday, April 17, 2009

Hmangaihna vanduai


A hmel en reng reng atang pawhin sik leh sa a tuar tlang hnem ve tawh tih a hriat mai a. A jeans kekawr paw dang da deuh tawh mai leh a tshirt dum, a hmaa "I am a washerman" tih inziak atang ringawt pawhin Chhuma chuan hlauh a nei lo tih a hriat ngawih ngawih a. A ban te chu Khawte kawng ang maia rualrem lo khawpin a sek a, chu a ban sek tak chuan artui cheng sawm man polythene var in a khai lah lah bawk a.

A chhai-lai-di Kungi rim tura a kal chu, mahni inrintawkna, a saptawng taka 'irrigation' an tih chu a ngah hle tih a hriat. Kungi chuan artui pum chhum kan leh a ei chak avanga Chhuma hi chah a ni a. Chhuma chuan pawisa a neih zawng zawng a en a, Rs. 5 chiah a neih avangin artui chu an kawmchhak nuthlawi dawr ah a la ba a ni.

A hairstyle chu a nalh thei ang bera a siam a ni a, chhe thiang a ni lo. Sahbawn sena uluk taka a zut zum a ni a, ruah a sur hlauh chuan a bam vek a ni mai. A pheikhawk bun chu a uk tih dawna a dum deuh bawk si, a thar a ni lo tih chiang tak mai hi a ni a, a hnungah a pink in 'playboy' tih a inziak kalh bawk a.

Dawrpui veng a thlen phei lai chuan tlai lampang a ni tawh a, ni erawh a la tlang sang viau. Hlim takin, "Lenlaia rual loh hi a sawi rem theih...." tiin a faifuk phei rut rut a. Chhak leh thlang lampang chu a melh tawn zek zek bawk a, nula chhelo deuh a hmuh chuan 'chhas' a ti zauh hman reng bawk.

Chutia khawvela mi hlim ber ang maia a kal lah lah lai chuan kalkawnga tui pipe phum kim loh chu a chhuih ta hlauh mai a. A artui khai lai chu a polythene chawpin engtin nge a tih pawh hriat loh chuan a hma lamah a leng phei vawng vawng a. Kalkawnga bawk thlawp pah chuan a rawn dak chhuak a, midangin "A na em?" an rawn tih pawh chu ngaihtuah lovin, "Ooo...my lovely spectacle" tih pahin a artui chu mi motor hnungah a in vawm keh phaks lai chu a hmu a, a tap ta zawih zawih a.

"Engatinge he leiah hian vanduai tur hrim hrima ka lo pian le.." ti pahin a tap hluam hluam a, a artui kehna lam chu a pan phei ta. Motor neitute chu an lo fel hlauh, hau lovin pawnchhia leh tui an pe a, an tihfai tir ta zawk a. Mittui tla zawih zawihin hmangaihna lamtluang zawh hahthlak zia te chu a ngaihtuah nauh nauh a, hla phuahchhuah ngei pawh a rilruk nghal a ni.

A tihfai zawh chuan, kal zel dan tur ngaihtuah pah chungin a kezungpui chu a hnim a hnim a. A tawpah chuan, mipa ka ni alawm le tih pahin a inrulpuiludin tho a, a chhas te in lam pan chuan a kalchhuak leh ta. Kungi te in a va thlen chuan, a vawikhat kalna a ni lo tih hriat fahranin, kawngkhar atang pawha lut duh lovin tukverh atang a lut thut a. An au ri chel chul bawk a.

Kungi nu eirawngbawl lai a lo ni, buhthlei-a tin chungin "What is your name" a lo ti a. "They are my umbrella" tih pahin Kungi nu chawhmeh siam lai chu a tem zuk zuk a. Sitting room lamah Kungi chu a va pan phei nghal.

Kungi chuan, "Eee.. i lo thleng tawh maw" tih pahin a khuh puak pup pup a. "Aw, thleng tawh e," tih pahin Kungi bulah chuan a zu thu nghal. "I lo keng ta em?" tiin Kungi chuan a zawt leh, "Aw keng ta e.." tih pahin a kuttum hang ve tak mai chu a hum phei.

Kungi chuan, "Eee.. hetiang leka te in i hum thei lovang, ka awih lo," a tia, a la duh ta lo tlat lo. Chhuma chuan magic a thiam thu a sawi a, artui cheng sawm man pawh tereuhte ah thil tui deuhah a siam thiam thu te a sawi hnu chuan a hmin ve thei ta hram. Chutah le, "Enge hei hi?" tiin Kungi chuan a zawt a, "Sweety Supari a nih kha, artui te pawh sweety supari ah ka siam thiam alawm, i mamawh, ei rawh," a ti nghal zut zut a. Kungi pawh chuan lungawi zan lo chungin a ei ri ve bawp bawp a.

Chutia engmah tilova awm mai mai chu a thiam lo a, Chhuma chu a lo hnar burh burh hman. Kungi chuan, "Awii... U Chhum" tih pahin a hnarkua chu a hmeh pin sak. A rang a rangin Chhuma chu a rawn harh lehnghal a, "Lets go" tih pahin Kungi chu a leng turin a kaichhuak ta a.

Pan lam ber tur pawh hre lovin an teichhuak kha a ni a, a tawp a tawpah chuan Chhuma magic thiamna avangin hmun reh dai nuam em em mai hi an thleng hlawl mai. Chu hmun chu phul hring dup mai hi a ni a, thing kung a awm thleh thluah a, sava an hram ri chiah chiah bawk a, a sirah chuan lui te hi a luang ri kerh kerh a. An awmna hmun chu awih si lo, zawl si lo hi a ni a, romantic an tih em avangin an pahnih chuan an in en a, "This is my spinach" tih pahin vai film an chang dun ta vel a.

Darkar 2 vel zet an in kungfu leh hnu chuan, thingkung buk pakhat hnuaiah chuan an thu dun a. Chhuma chuan Kungi chu pawm chungin, thu vawih uih te te a hrilh nuap nuap a, a luphut te chu a hiah sak pah bawk a. Chutih lai tak chuan van atangin sava a rawn e, Chhuma kut ah tak mai chuan a rawn tla pherh hlawih. Chhuma chuan engmah sawi lovin Kungi samah chuan a tat fai nawk nawk a.

An thu rei ta bawk a, an ril te a lo tam ta. Kungi chuan thingpui dawrah kal ang a ti a, Chhuma pawh chuan a pawisa dinhmun hre reng chungin a Yes ve bawk a. Tichuan, veng tlabirh ve deuha thingpui dawrah hian a luhpui a, aw thawp deuh sut hian, "Alu leh papawr in nei em?" tiin a zawt a, an lo nei si lo. A tawpah Kungi hnenah chuan, "Thingpui nge i duh chhang?" tiin a zawt a, Kungi chuan chhang a lo ti vat. Tichuan, Chhuma'n thingpui no khat a in a, Kungi chuan pakora pakhat a ei thung.

A dang ei lehna turin Rs. 5 chiah a nei si, Kungi sakhmel ah chuan a ril a la tam tih a hriat. A bahsam sei hniang karah chuan mittui a rawn luang chhuak a, a hnap tui a rawn luang chhuak nguai nguai bawk a. Chhuma chuan, "Darling, ei leh rawh, a ba pawhin ei mai rawh," a ti a. Ani lah chuan a duh tawh bawk si lo, "I am a puar girl" tih pahin a puar zia chu a lo sawi ve chhen bawk.

"Anih leh i puar tawh chiang em tih hriat nan han vawih teh" Kunga chuan a ti a. Ani pawh chuan hnial lem lovin a rawn vawih ri tret tret a, a vawih ri chuan.. "puarrrr eee" a rawn ti. Kunga chuan vawih bawkin a lo chhang let, "kall tawh mai ang..." a ti a. Tichuan, a tawp nan chham ang an vawih dun leh hnu chuan an chhuak ta. Thingpui dawr chhunga mi te chuan uih an ti em em mai a, an uih ti lutuk chu an kar full pawp pawp mai a ni.

A pakora ei kha a ngeih lo a ni chek ang chu, Kungi chu zanah chuan namen lovin a litre in a e ta a. A damchhuak zo ngang dawn lova a hriat avangin Chhuma chu an va ko ve a. Chhuma a rawn thlen chuan "Chhuma.... ka hmangaih......" a ti chuai raih a. "Kungiiii.... min kalsan suh. Ka love at first sight i ni" a ti a, a tap tuau bawk a. Chutah vawikhat Kungi chu a rawn meng kawk a, "I see a dog" tih pahin a mit chu a chhing zui ta a, a tawp nan uih tak maiin a rawn vawih leh a.. a vawih ri chuan.. mangthaaa a rawn ti.

Chhuma chu a tap hluam hluam a, chutia khawvela a dam chhan, a hmangaih ber in mual a liam san ta chu a tuar zo lo hle tih a hriat. Veng mite leh chhung khat lai na te an rawn kal khawm laih laih pawhin Chhuma bawk chu an tah khum leh chiam thin. Chhuma chuan Kungi ruang en pah chuan, "You are my stabilizer...you are my battery........" a ti a, "Hei ngei hi a lo nih hi, an sawi Hmangaihna Vanduai chu.." tiin a kezungpui chu a hnim a hnim leh a.

15 comments:

burgerstud2005 said...

tu phuh nge a..va ngaihnawm hluam hluam ve...i phuah em ni..i phuah uih zek leh nghal a..mahse a chang leh saptawng an thiam mah mah ka ti...hihi

Joseph L said...

@burgerstud2005 - ka thianpa pakhat te nilum ai pui thin chanchin (true story) anih hi. Saptawng te chu an zir sil ve nual alawm.

Sekibuhchhuak said...

Thuziak hi i thiam tawlh tawlh mai !Ngaihnawm khawp mai.

Playboy tih chuang hi helamah pawh hian nule leh tlangval pawn an ha fo mai :-) a awmzia an hre lova.

A saptawng han hmang vel chuan, chinese saptawng intithiam, an hollywood movie en atanga copy a, F words te pawh a awmzia hre lemlova, an thusawi tawp a an sawi tel chhen te pawh minti hrechhuak e !:-)

Varte said...

ngaihnawm fuuuu niii.. phuah belh zel chi. A bu-in siam law law la, a changtunu hi la thi lo se, a nih loh pawn a changtupa hian chhas thar nei ta mai se...

Joseph L said...

@ sekibuhchhuak - a khaih a, thiam tak tak emaw kan inti thin alawm le. Saptawng khi an thiam dun tawps a.. hehe

@ Varte - ngaihnawm aa? hahaha... a ho hle mai tih zawk tur. A bu in kan siam lo ang tih pawh a la sawi theih loh, a changtunu khi tawngtai damthei in a rawn tawngtai dam leh maithei bawk. :D

luliana said...

haha...a ngaihnawm dan a uih tops...

Kungi hi bawng ek hnim tir la kai tho leh mai teh..a nih loh vek pawhin Chhuma hian vawih khum tret ta sela...a chhunzawmna chhiar a chakawm alom le.. :D

Jinx said...

hahhaa...i ziak ril leh lutuk a, keini ang tan chuan hnapkhir kheuh mual mual paha hriatthiam tum rana chhiar a ngai alom mole :P

toy soldier said...

Thupui teh raih chu..:)
Net nei lo a, cafe trangin nia..hman rem chanah lo chhiar ang..

Joseph L said...

@ luliana - bawng ek a awm lo, an khua hi a changkang lutuk a. ar ek hnim tir a ni mai.

@ jinx - hahaha.. hnapkhir kheuh!! va bei nice lo reuh ee..

@ toy_soldier - i chhiar hlauh anih chuan a thupui leh a thu chu i rin ang a ni hauh lo ang le.

.: HOT AND COLD :. said...

heheh bro nice

Keichala said...

Photoshop vela hmai tih mam chauh lo poh i lo thiam hle mai! haha

Zaia said...

A ho viau, a tha viau bawk.

Geminiboyz said...

Engvangin nge a ke zungpui hi a hnim kher zel le???

Joseph L said...

@ Hot and cold - thanks bro.

@ Keichala - Hahaha, tunge i nih? i va che spy trek trek ve a.

@ Zaia - Thu vawih uih tak tak anih hi, a ho bon top.

@ Gemini Boyz - A kezungpui a hnim khi a tetlai atanga a tih than a ni a. Hei hi a chakna thuruk ve deuh te pawh a niin an sawi. A hnim khian amah pawh a 'fresh' sawt zel.

enga018 said...

chhiar a nuam phian mai...ka hriatthiam loh...tlai lam a ni tawh a..ni erawh a la tlangsang viau....chawhnu her ti ta mai la....sawi ve mai mai...