Hmangaihna vanduai

A hmel en reng reng atang pawhin sik leh sa a tuar tlang hnem ve tawh tih a hriat mai a. A jeans kekawr paw dang da deuh tawh mai leh a tshirt dum, a hmaa "I am a washerman" tih inziak atang ringawt pawhin Chhuma chuan hlauh a nei lo tih a hriat ngawih ngawih a. A ban te chu Khawte kawng ang maia rualrem lo khawpin a sek a, chu a ban sek tak chuan artui cheng sawm man polythene var in a khai lah lah bawk a.

A chhai-lai-di Kungi rim tura a kal chu, mahni inrintawkna, a saptawng taka 'irrigation' an tih chu a ngah hle tih a hriat. Kungi chuan artui pum chhum kan leh a ei chak avanga Chhuma hi chah a ni a. Chhuma chuan pawisa a neih zawng zawng a en a, Rs. 5 chiah a neih avangin artui chu an kawmchhak nuthlawi dawr ah a la ba a ni.

A hairstyle chu a nalh thei ang bera a siam a ni a, chhe thiang a ni lo. Sahbawn sena uluk taka a zut zum a ni a, ruah a sur hlauh chuan a bam vek a ni mai. A pheikhawk bun chu a uk tih dawna a dum deuh bawk si, a thar a ni lo tih chiang tak mai hi a ni a, a hnungah a pink in 'playboy' tih a inziak kalh bawk a.

Dawrpui veng a thlen phei lai chuan tlai lampang a ni tawh a, ni erawh a la tlang sang viau. Hlim takin, "Lenlaia rual loh hi a sawi rem theih...." tiin a faifuk phei rut rut a. Chhak leh thlang lampang chu a melh tawn zek zek bawk a, nula chhelo deuh a hmuh chuan 'chhas' a ti zauh hman reng bawk.

Chutia khawvela mi hlim ber ang maia a kal lah lah lai chuan kalkawnga tui pipe phum kim loh chu a chhuih ta hlauh mai a. A artui khai lai chu a polythene chawpin engtin nge a tih pawh hriat loh chuan a hma lamah a leng phei vawng vawng a. Kalkawnga bawk thlawp pah chuan a rawn dak chhuak a, midangin "A na em?" an rawn tih pawh chu ngaihtuah lovin, "Ooo...my lovely spectacle" tih pahin a artui chu mi motor hnungah a in vawm keh phaks lai chu a hmu a, a tap ta zawih zawih a.

"Engatinge he leiah hian vanduai tur hrim hrima ka lo pian le.." ti pahin a tap hluam hluam a, a artui kehna lam chu a pan phei ta. Motor neitute chu an lo fel hlauh, hau lovin pawnchhia leh tui an pe a, an tihfai tir ta zawk a. Mittui tla zawih zawihin hmangaihna lamtluang zawh hahthlak zia te chu a ngaihtuah nauh nauh a, hla phuahchhuah ngei pawh a rilruk nghal a ni.

A tihfai zawh chuan, kal zel dan tur ngaihtuah pah chungin a kezungpui chu a hnim a hnim a. A tawpah chuan, mipa ka ni alawm le tih pahin a inrulpuiludin tho a, a chhas te in lam pan chuan a kalchhuak leh ta. Kungi te in a va thlen chuan, a vawikhat kalna a ni lo tih hriat fahranin, kawngkhar atang pawha lut duh lovin tukverh atang a lut thut a. An au ri chel chul bawk a.

Kungi nu eirawngbawl lai a lo ni, buhthlei-a tin chungin "What is your name" a lo ti a. "They are my umbrella" tih pahin Kungi nu chawhmeh siam lai chu a tem zuk zuk a. Sitting room lamah Kungi chu a va pan phei nghal.

Kungi chuan, "Eee.. i lo thleng tawh maw" tih pahin a khuh puak pup pup a. "Aw, thleng tawh e," tih pahin Kungi bulah chuan a zu thu nghal. "I lo keng ta em?" tiin Kungi chuan a zawt leh, "Aw keng ta e.." tih pahin a kuttum hang ve tak mai chu a hum phei.

Kungi chuan, "Eee.. hetiang leka te in i hum thei lovang, ka awih lo," a tia, a la duh ta lo tlat lo. Chhuma chuan magic a thiam thu a sawi a, artui cheng sawm man pawh tereuhte ah thil tui deuhah a siam thiam thu te a sawi hnu chuan a hmin ve thei ta hram. Chutah le, "Enge hei hi?" tiin Kungi chuan a zawt a, "Sweety Supari a nih kha, artui te pawh sweety supari ah ka siam thiam alawm, i mamawh, ei rawh," a ti nghal zut zut a. Kungi pawh chuan lungawi zan lo chungin a ei ri ve bawp bawp a.

Chutia engmah tilova awm mai mai chu a thiam lo a, Chhuma chu a lo hnar burh burh hman. Kungi chuan, "Awii... U Chhum" tih pahin a hnarkua chu a hmeh pin sak. A rang a rangin Chhuma chu a rawn harh lehnghal a, "Lets go" tih pahin Kungi chu a leng turin a kaichhuak ta a.

Pan lam ber tur pawh hre lovin an teichhuak kha a ni a, a tawp a tawpah chuan Chhuma magic thiamna avangin hmun reh dai nuam em em mai hi an thleng hlawl mai. Chu hmun chu phul hring dup mai hi a ni a, thing kung a awm thleh thluah a, sava an hram ri chiah chiah bawk a, a sirah chuan lui te hi a luang ri kerh kerh a. An awmna hmun chu awih si lo, zawl si lo hi a ni a, romantic an tih em avangin an pahnih chuan an in en a, "This is my spinach" tih pahin vai film an chang dun ta vel a.

Darkar 2 vel zet an in kungfu leh hnu chuan, thingkung buk pakhat hnuaiah chuan an thu dun a. Chhuma chuan Kungi chu pawm chungin, thu vawih uih te te a hrilh nuap nuap a, a luphut te chu a hiah sak pah bawk a. Chutih lai tak chuan van atangin sava a rawn e, Chhuma kut ah tak mai chuan a rawn tla pherh hlawih. Chhuma chuan engmah sawi lovin Kungi samah chuan a tat fai nawk nawk a.

An thu rei ta bawk a, an ril te a lo tam ta. Kungi chuan thingpui dawrah kal ang a ti a, Chhuma pawh chuan a pawisa dinhmun hre reng chungin a Yes ve bawk a. Tichuan, veng tlabirh ve deuha thingpui dawrah hian a luhpui a, aw thawp deuh sut hian, "Alu leh papawr in nei em?" tiin a zawt a, an lo nei si lo. A tawpah Kungi hnenah chuan, "Thingpui nge i duh chhang?" tiin a zawt a, Kungi chuan chhang a lo ti vat. Tichuan, Chhuma'n thingpui no khat a in a, Kungi chuan pakora pakhat a ei thung.

A dang ei lehna turin Rs. 5 chiah a nei si, Kungi sakhmel ah chuan a ril a la tam tih a hriat. A bahsam sei hniang karah chuan mittui a rawn luang chhuak a, a hnap tui a rawn luang chhuak nguai nguai bawk a. Chhuma chuan, "Darling, ei leh rawh, a ba pawhin ei mai rawh," a ti a. Ani lah chuan a duh tawh bawk si lo, "I am a puar girl" tih pahin a puar zia chu a lo sawi ve chhen bawk.

"Anih leh i puar tawh chiang em tih hriat nan han vawih teh" Kunga chuan a ti a. Ani pawh chuan hnial lem lovin a rawn vawih ri tret tret a, a vawih ri chuan.. "puarrrr eee" a rawn ti. Kunga chuan vawih bawkin a lo chhang let, "kall tawh mai ang..." a ti a. Tichuan, a tawp nan chham ang an vawih dun leh hnu chuan an chhuak ta. Thingpui dawr chhunga mi te chuan uih an ti em em mai a, an uih ti lutuk chu an kar full pawp pawp mai a ni.

A pakora ei kha a ngeih lo a ni chek ang chu, Kungi chu zanah chuan namen lovin a litre in a e ta a. A damchhuak zo ngang dawn lova a hriat avangin Chhuma chu an va ko ve a. Chhuma a rawn thlen chuan "Chhuma.... ka hmangaih......" a ti chuai raih a. "Kungiiii.... min kalsan suh. Ka love at first sight i ni" a ti a, a tap tuau bawk a. Chutah vawikhat Kungi chu a rawn meng kawk a, "I see a dog" tih pahin a mit chu a chhing zui ta a, a tawp nan uih tak maiin a rawn vawih leh a.. a vawih ri chuan.. mangthaaa a rawn ti.

Chhuma chu a tap hluam hluam a, chutia khawvela a dam chhan, a hmangaih ber in mual a liam san ta chu a tuar zo lo hle tih a hriat. Veng mite leh chhung khat lai na te an rawn kal khawm laih laih pawhin Chhuma bawk chu an tah khum leh chiam thin. Chhuma chuan Kungi ruang en pah chuan, "You are my stabilizer...you are my battery........" a ti a, "Hei ngei hi a lo nih hi, an sawi Hmangaihna Vanduai chu.." tiin a kezungpui chu a hnim a hnim leh a.

Khaw nuam ah

Nia, ka reh. Thil engmah phei chu a ni lem law, ek na ngaiah ka let. Thla hmasa chhung zawng kha chu Mizoram lamah mawng ka han sil a, sulhnu ropui leh chhinchhintlak engmah nei lem lo mah ila, ka'n thai kawi ve leh mai mai ange.

Inti engthawl fahranin ka thianpa pakhat nen kan haw a, mahni chhungkhat pawh ni lem lo te nena dar insi riala chhun leh zana rel han chuan ho chu khawvela thil nuam ber a ni lem lo. Hei hi ka thil nin ber te zinga mi a ni a, a ni reng bawkin ka ring. Patling leh patling ni leng lenga in melh sen rum reng mai zawng, a kristian lo riau te hian ka hre thin. Chutia mahni hma zawn a mite hmuihmawl to zat kan hre vek tawh ang chu tih hnu a rei ah Kolkata khawpui chu kan lut ve leh ta. A lo uap leh ngei bawk.

Mizoram house lo chu

Khaw dang pan lovin Mizoram House bawk kan pan leh a, tun tum chu Salt Lake lam ni lovin Ballgunge lamah kan kal thung. Salt lake kha kan ning a ni ber e, Ballygunge lam pawh eng teh ual a lo ni chuang lo. Haw kawngah hi chuan eco taka chet a ngaih thin avangin dorm lamah thleng mai ang kan ti a, mikhual an tam lem lo bawk a, a zia phianin kan ring. Kan han thleng chu inbual fai te kan duh si a, mahse sahbawn kan lo ken theihnghilh hlauh mai pek a. Lei tura pawn va chhuah leh kan peih tawh si lo, kan inti chau der khanglang a.

Rel chhunga paper soap ka lei kha ka hrechhuak a, kan pahnihin chumi hmang chuan kan inbual ta tehreng mai a. A va hahthlak tehreng em, fai pawh kan fai hian ka ring nek love. Kut ah kan nuai phuan a, chu chu kan intat kual ta vel mai mai a ni ber. Chumi hnu ah mut hahdam time kan hmang leh a, kan harh fel ta maw tihah kan thianpa pakhat hian engtin nge kan thleng a ni tih pawh kan hriat loh hian, 'lokal teh u, vat vat' a rawn ti ringawt a. Amah kan hmuh pawh mak tih tawh mah nak alaiin, thu pe aw tak maia min rawn ko chu, han vawm thal tawp mai hi ka chak a.

A pu damlo a lo kalpui chu niin, a pu chu zawn chhoh a ngai a, house chung berah an la thleng zui, A rit! Kan dorm ah khan sap pakhat, saptawng thiamlo a thleng ve bawk. Mizo hi chuan vun ngo hi chu sap kan ti vek mai a, sap saptawng thiamlo a ni mai. A tuk maia thlawk haw ve tawh tur kan nih avangin a hma thei ang berin kan mu a, thosi a tam si, a lum si, inkhuh hlunin lum ti chung chungin kan mu a. Mut tui chu har ve khawp mai, lut chhuak a pui lah an tam.

A tukah chuan dorm vel a awm reng ai chuan tiin airport lamah a hma thei ang berin kan chhuak a. Hmelhriat loh awm tamna rau rau ah airport a hmelhriat lem loh chhas chhelo tak tak lo thlir ve chu a nuam daih zawk.

In sut na!

In ka thlen pawhin tun tum chu len vak loh ka tum sa reng a, len pawh tum ila lenna tur ka hre chuang lo. Chawlhni tlai khat chu thianpa pakhatin leng dun ang tiin min rawn sawm. Kei pawh ka chhuak khat bawka tiin ka lo aw ve mai a, hmun hrang hrangah thian te kan tlawh kual hnu in dar 5 velah In lam panin kan haw a. Tui taka titi paha kan tlan zel laiin kawng kawiah a ri ta bur mai. Ka tho nghal vut a, ka han enchian chuan scooter in min lo su chu ni rengin. Ka thianpa lah chu a helmet nen a let bum mai a, a thi emaw ka ti hman in thin phu dut dutin ka kaitho. Ke hnih nei chetsual na reng reng ah a hnunga chuang an na duh an ti si a, kei lah chu ka na mang si lo. Chung lamin min hum zia ka hrechhuak.

Chutia kawngsira ka kaih phei hnu chuan mi pawh an rawn pungkhawm hnem tawh mai. Scooter khalhtupa lah kha kawr ah a mu bem mai a, a scooter chu a steering hawina leh a ke hawina a inmil lo hle mai tih te ka va hmu bawk. Kan va buai ta nuaih nuaih em! Engkimah thiam kan chang zawk na chungin a scooter khalhtu chhungten ngaihdam an dil nasat em bawk avangin engtin tin emaw kan inchhuah thei ta anih kha.

A hmingin damdawiin lamah te kan inphur phei ve ang lawp lawp a, scooter khalhtupa kha chu a tuka in x-ray leh turin an chah ta in ka hria. Scooter khalhtupa thiamlohna te, helmet a khum lo, zu a rui, license a keng lo. Min rawn sut hma chiah khan, kawng kawi hmaah si khan mi a au a, kalkawng a enlo bawk nen a kawi lai takah khan min lo su ta bur mai kha a ni a. Vawikhat lenchhuahnaah pawh hetiang anih avang hian lenchhuah chu ka tum duh ta lem lo a, In ka thlen hnu chuan accident buai lai vela ka paparazzi rilru avanga ka thla lo lak hman te chu ka en mai mai a.


Reiek tlang ah

Reiek tlang hi vawi engzat nge kal kan tum tawh ang aw. A vawikhatna atan engtin tin emaw ni kan han thlengchho ve leh ta a. Ka rin ang em em chuan a nuam lem lo. :D A bulah chuan thla bial lawmin concert eng eng emaw an lo huaihawt thin chu niin, zan thum vel an lo nei tawh a. Mizo thalai an va tam tehlul em, ke hnih ten ke li ten an inphur ang dur dur a. Ka mi tawh apiang mai chu a hmei a pa in eng rim emaw ni an lo nam huam zel mai a, grape wine an lo zuar chu niin. Tin, an zaktheilo hlawm bon top!

Reiek chu a tlang tak han thleng tur chuan ka ring aiin ke in kal thui a lo ngai zek mai a. Hah hnep hnawpin a tlang hmawr tak tak phei chu thleng peih lovin kan tawp san ta mai. Haw lamah chuan Ailawng ah ruai an lo theh a, kan chhungte chhung leh chhawng te inneihna a lo ni a, kan theh haw ve nghal daih. :-)

Ka ngaihtuah mai mai a, han len khawthawn na tur hi a van awm lo tak em ka ti thin.

"Leng ila" "Khawiah?" "Reiek-ah"

Hit lo lutuk. Reiek ah anih loh chuan, Tlawng ah insu ila. Anih loh pawhin Tuirial ah mi bike race en ang u. Aaa... han hit em em a awm lem lo e. Mahse concert leh eng ilo thlan vel a tam em a, thalai te an buai zo niin ka hria.


Sex video

Ka zaithiam tih deuh mai, a ruka ka lo star ve thin Malsawmtluangi, a sex video a leak out thawm ka hre thut. Mak pawh ka ti lem lo phawt a, mizo te hi chu inbum kan awlsam si a. Engtin emaw internet vel atangin a hmel ang deuh an hmu anga, chu chu a ni an ti a ni ang tiin ka hmuh hma loh chuan ka awih duh lo a.

Ka hmuh ve meuh chuan ang ka ti hle mai, tichuan chanchinthar te kan hre zel a, amah ngei a ni tih chu phat rual loh in a chiang ta si. A hnu deuhah Daduhi an ti ve leh. Ani hi chu a phat nasat em avangin ka hmuh ve hma atang pawhin a nih ka ring lo nghal a.

Ka hmuh pawhin a ni lo a ni tih ka chiang nghal. Eng eng emaw ti ti na velah hian mi thenkhat hian, "Tunlai chu thiamna a sang tawh a, an hmel an vuah sak a, anmahni tak tak angin a chhuak mai zel alawm" an tih hi ka hre fo a. Chuta ka sawi ve thin chu, thlalak pangngai (still) ah hi chuan hmel chu a thlak theih lutuk, mahse video a hmel vuah sak tur em em chuan kan thiamna in a tlin lo ka ti thin. An hawiher ang apianga siam rem ve zel tur phei chuan a ngaihna a awm lo.

Chapchar kut

Chapchar kut kal lohna te pawh a rei tawh alawm tiin Kut hmang turin lammual lamah ka kal ve a. Ka luh dawn chuan mi an lo tam nasa tawh mai a, ka lut chiah phei chu mizo hi vai zat zet kan awm emaw ni ka ti hman.

Ni a sa si a, a khu nasa bawk si. Hmar lampang goal ban bul vel chu ka pan phei ve ta chhut chhut a, vaipa mix zuar te pawhin chapchar kut chu nuam an tih hmel hle. Awm na tur mumal ka hriat loh avangin ka tei ka tei a, costume parade a tel tur ka hmelhriat te ka hmuh a, ka biak bak chu ka tawng pawh ka hre lo e a. Tichuan, mi pakhat costume parade a tel tur chu a thla ka la a, ka chapchar kut chu ka duhtawk a, Vanapa Hall lamah Art Fest lamah ka kal san leh ta zawk a ni.


Games khel ang

Mipa naupang tan chuan an pawisa hman tamna ber chu games khelh a ni ta. Sikul ban pahin game parlour hrang hrangah kalin an inkhel deuh ziah. Sikul chawlh ni te phei chuan heng dawr te hi a lun thei hem hem hle, darkar khat khelh man Rs. 20-40 te a ni tlangpui.

Kei pawh khelh ve leh te ka chak deuh rum rum a, mahse chutia game parlour vela khel tura mahni a kal chu ka hreh a, ka kal ngai lem lo, cafe ah te ka kal zawk thin. Mizoram computer chu virus buaiin a buai a ni deuh ber, virus in a ti buai a tih a ni deuh zel.

Naupang te hian games khel turin veng hla deuh atang pawhin an pan vang vang peih, heng aia tha deuh te hian siam se te ka duh sak thei lutuk. Hmun pakhatah chuan sound awm lovn rs. 20 a ni a, sound awmin Rs. 25 a ni thung. Sound awm tih pawhin speaker pakhat kha computer hrang hrangin an inhman tawm a, a ri nuaih nuaih mai a ni. :D

Hun awl hmanna tha tak a ni a, tournament ropui tak tak buatsaih sak zel se ka ti khawp mai.

A, eng teh vak mah ziak chuang lovin a lo thui leh ta hle mai. Duhtawk phawt mai teh ang, tun atang chuan tlemin kan ziak zing ve leh deuh tawh ang chu. Chawlh hmang nge nge a hlawk thlak e. Lirthei neiin RV, nei lo in Bawngkawn an tih fiamthu te pawh a tak a ni tih te ka hriat phah a. Celebrity an tamin, tuai an tam bawk. Scooty a ri ter ter deuh reng a, current a awm zing hle.