September 3, 2002

September 3, 2002 a ni a, hemi tuk hian ka tho hma hle mai a. Ka nu te thawh rualin zing dar 4 velah ka tho a, thil engvak mah tihtur a awm chuang lem hlei lo. Lehkha zir dawnin, a vawt ve angreng si, ka zir peih lo a. Chanchinbu sem an lo kal a, Venghlui-ah misualin mi a thah thu an rawn sawi a. Kan lo zawt chiang a, rawlthar pakhat anih bak sawi thui tur an hre vak lo a ni.

Hetihlai hian St. Paul's ah Class VIII kan zir ve tawh a, chumi ni pawh chuan ni dang ang bawkin sikul kal tuk a ni a, sikul kal turin dar 7 ah chuan ka insiam ta a. Mahse mi titi a tam em avangin misualin a thah tlangval chu kan sikula mi a ni tih engtin tin emaw kan hre chho ta a, thiante kan rawn kual a, lehkhabu pawh keng lovin puan dum nen sikul chu kan pan ta hnak hnak a.

Sikul kan thlen pawhin titi dang a awm thei lo, misual hmai tuamin Class XII ami Vass-a a thah thu chu a ri deuh reng a. Chanchin engmah hre chiang lo mah ila, kan thin chu a rim ve hlur bawk a. Auditorium lamah sikul naupang zawng zawng kan inhmu khawm a, chutah chuan chanchin duhawmlo tak mai chu chutih laia kan principal Bro. PK James a chuan a puang ta a, a mak kan ti hlawm hle.

A thian kawm thinte'n amah thlah nana "See you in Heaven" an han sa te kha aw, lung a ti chhe ngawih ngawih. A vuinaa tel turin sikul atangin kan kal ta a. Venghlui kan thlen chuan mi an tam tawh khawp mai. Kawngpuiah te chuan an khat thla hmur mai a, keini sikul naupang te chu a ruang min en tir a. A pa in tap chungin min lo chibai, en a har ngei mai.

A vuina hun te in lama an hman zawh hnuin, thlanmual lamah an rawn zawn thla a. Keini ho chu thlanmual thlengin puandum sinin kan intlar thla bawk a, khami ni kha a lungchhiatthlak tak zet zet a ni.

Ngaihtuahna a kal thui duh a, naupangte mah ni ila, rilru ah a awm reng a. Mumangah kan lo hmu thul, ka mumangah te khan hmaituama nen khan kan in fight nasa thin asin! Khati laia Aizawl zan lam ralmuan loh zia te, mi thenkhat phei chu thin thiin an mu ngam meuh lo anih kha. Engtin tin nge hei a reh chho ta chu a ni mai ta mai si a. Engkim hi a tha turah ngai phawt mai ang.

Vass-a documentary film an siam kha, en lo chuan en ve ngei turin ka duhsak che u. A hmuhnawmna piah lamah a lungchhiatthlak hle mai, keini pawh mittui a tla thei mai zel alawm le.

Nizan chu St. Pauls Golden Jubilee Souvenir (2004) ka phawrhchhuak a, ka en leh a, a hnuaia article ka rawn dah hi Vass-a nau ziah a ni a, a ngai ngaiin ka rawn dah chhuak e.

__________________________________________________

Ka nunkawng leh St. Paul's Higher Secondary School

- C. Lallianpuii, IX E

Mihringte hian kan nunah hian thil chi hrang hrang kan tawng thin a, a then chu hlimawm leh lawmawm tak takte an nih laiin, thenkhat erawh chu lungngaihna leh vanduaina, kan nun leh kan hun la hman zel tur tidanglam khawp thei thil te an ni ve thin. Kei pawh hi tleirawlte ni mah ila, ka nunah hian hun mak tak takte pawh ka lo tawng ve tawh a.

Chung ka hun tawn zingah chuan ka nun zawng zawng min lehlinsak vektu leh ka ngaihtuahna luah hnem bertu chu kan chhungkuain vanduaina kan tawh kha a ni. Nikum hmasa, 3rd September, 2002-a Venghluia 'Misual Hmaituam'-in a vihhlum tak C. Vanlalhruaia (Vass-a) kha ka u a ni a, khatih lai khan St. Paul's Higher Secondary School-ah hian Class XII a zir mek lai a ni.

Khang hunlai kha chuan kei chu Class VII chauh ka la ni a, Holy Heart School-a ka luh lai a ni. Hunte a kal zel a, MESLC Board Exam chu Pathian zarah ka pass ve a. Chumi hnuah vanneihthlak takin St. Paul's Higher Secondary School-ah hian entrance test-ah ka tling ve hlauh mai a, kum hnih dawn lai chu tluang takin ka lo lut ve ta a ni.

Tichuan St. Paul's School-a ka luh hnu hian mi chi hrang tam tak leh hmelhriat ngai lohte ka han hmelhriat ve a, keimah min ngaihsaktu leh ka tana tangkai leh ka mize milpuite ka tawng ve zel a. Heng ka thiante nen hian kan innel em em a, kan hlimin awmkhawmte hi a nuam kan ti em em thin a ni. Ka thiante leh midangte rilru chhungril tak tak chu ka hre ve lo va, mahse kei erawh chu hetianga kan nuih bawk bawk laite pawh hian, ka rilru chhungril rawn luah thuttu leh ka thinlung rawn verh zak thilte hi a rawn thleng leh thut thut thin a.

Chutiang huna ka awmdan chu a nihna ang chiahin ka sawifiah thiam lo va, amaherawhchu a nuam emaw, a hlimawm lam zawng chu a ni lo. Hetiang hun a lo thlen hian eng anga ri bengchheng karah pawh rilru hi a ngawiin a reh vang vang mai a ni. A tlangpui thuin, ka u thiante emaw, a awmna thin leh a lenna thin han hmuh te, a hla ngaihthlak thin han ngaihthlak te hian hetiang hriatthiam loh leh sawifiah thiam loh ang hian ka awm thin a ni. Hetiang hun a lo thlen hian awm dan tur hriat a harin, ka tawngte hi a bahlah rem rum thin.

Han ngaihtuah let hian Class VII ka nih lai ai kha chuan tun hnuah hian hetiang hun hi ka tawng hnem zawk a, mahse hun a lo rei a, min tipuitlingtu leh tumruhna min petu a lo ni zawk a. A bulte atanga chhut phei chuan vanduaina kha malsawmnaah a lo chang ti tein ka ngaihtuah ve fo thin. Han ngaihtuah zel chuan hetiang hun ka tawh chang hian keimah chauh a paltlang hi harsa ka ti em em thin a, amaherawhchu min lainattu leh thurawn a hun taka min petu tur hi Pathian hian a rawn ruat ve zel thin a.

A hmasa berah chuan ka nu leh pa te an ni lo thei lova; anmahni atang hian thil tam tak ka zir a, an tawngkam khat mai pawh hian min hnem em em thin a ni. Keini aia thil hre hnem zawk leh kawng engkima experience lo ngah tawh zawk an nih avang hian a ni deuh ber ang chu. Midang pawh min hnemtu an tam em em a, ka sawi vek seng lo va, vannei ka intiin ka lawm hle a ni.

A tawp berah chuan ka sawi duh chu St. Paul's School a ka lut thei hi ka vanneihna ber niin ka hria a, ka chhuang bawk a ni. A chhan chu ka u duhtak leh ka ngaih em em, ka tana a nun hial pawh hlan ngam khawpa min hmangaihtu C. Vanlalhruaia (Vass-a) lo luhna thin anih vang leh a hun hnuhnung ber a hmanna hmun a nih vang a ni.

__________________________________________________