Sunday, August 3, 2008

Kawng bo

Ka haihawt ve angreng hle a. :D hehe. Kawng hi ka hre thei miah lo a, ka kal than deuhna, nitina ka kalna thin bak hi hriat chhunzawm ka nei ngai meuh lo tih tluk a ni. Ka kal thanna deuh pawh hi a let zawngin kal ila, 'he lai hi khawi lai nge?' ka ti leh hu zel.

Hmanah thianpa Maia te hi Durtlang an awm tirhin vawi khat sikul atangin min hruai a, kan pahnihin kan han kal a. Ka chhinchhiah ve hle ania, a chhakah Biak In a awm tih te pawh ka chhinchhiah ve thlap a, kal leh dawnah pawh buai loh nan. Tin, Mel-5 veng ani tih te pawh min hrilh ve tak e.

Vawikhat chu kan thianpa RSa hi a computer a chhia a, Chanmari Sunflower ah khan kan siamtir a, Opa nen kei nen kan kal ho a. Nghah a ngai si, tlai dar 4 velah lam leh tur an ti a. Chumi inkar chu tihtur kan hriat loh em avangin Maia te inah han chho ang u, kan tia. An la hmu ve lo bawk a, tiin inti hre tak chuan ka hruai ta a.

Inring lo taka kal kan ni bawk a, khua a vawt deuh hlek nge, kawrlum te kan ha in ka hria. Bawngkawn atang ke in kal chho ve re re ang u kan tia, kan pathum chuan kan kal ta a. A rei duh angreng khawp mai, in fiam chho pahin kan kal a. Leitan kan thlen chhoh meuh chuan a lum tha tawh hle. Tichuan, kal ngil char char tur tiin kan han kal leh tak tak mai a.

Chhun pachang a ni bawk a, a chauhthlak bawk si. Kan kal zel, ka thiana te pahnih khan thui hi an ti tawh lutuk a, kei lah khan chhukna lai kha en reng pahin ka hruai zel a. Ka ngaih a tha tawh chiah bik lo a, Selesih thleng dawn tawh takngial hian kan inhria a. Tichuan, chhukna awm ang tak chu ka hmu ta a, tah chuan chhuk tur ka tia, kan chhuk ta a.

Mahse, ka bo leh zo vek. A hmaa ka kalna kha a ni ta si lo, let leh deuh a ngai tih ka hria a, kan let leh ta a. A ni thei mai si lo, kan let leh char char a. Kan kal thui ta lutuk hi kan chau tawh si, a rei tawh angreng bawk si. Dawr pakhat hi a lo awm hlauh a, chutah chuan kan zawt ta a. "Ka pi, hetilaiah hian rawn awm thar an awm em?" kan tia, "Tute? Eng mi nge an nih?" a tia, kan sawi zel a. A hre thei si lo, a hnuah chu nu chuan, "Khawi venga awm nge an nih?" a ti a, chuveleh kei chuan "Mel 5" ka lo ti a. Chu pitar chuan, "E, mel 5 chu sawtah sawn, helai chu Leitan alawm" a ti ta chheu mai.

Kan thleng tep tawh tihin kan lo peng a, leitan lamah kan lo let leh char char chu niin. Nuih a za duhlo kher mai.

Nikum khan vawikhat chu Maia thil tur hi a chhungten an rawn thawn a, kan va lam dawn a. Chumi veng chu Munirka a ni, kei nen, Rsa leh Chda nen kan pali-in kan kal a. June thla a nia, Delhi khaw lum lai a ni bawk a. Sai Baba mandir bul atang lo lut ula, first right in rawn la anga, chuan first left a ni mai, kha an ti mai a. Awlsam viau turin kan ngai a, Mandir bul chu kan thleng a, kan lut phei ta a. An sawi ang chuan kan kal zel a, an tih ang thlap chuan kan kal zel. Kan thleng thei tawh si lo, an house number te min rawn hrilh a. Chutia han zawn theih mai lah a ni si lo.

Kan kal kan kal a, kawmkar khawi khawi emaw, mi in kar chep tak takah te kan inhnawh zel a. Keimahni pawh chu kan bo a ni ber tawh a, a lum nasa mai si, ni a sa vawr vawr a. Kan in phone zel a, lo kal rawh u an tih na lai pawh kan hmu thei tawh lo. Khawi laiah nge in awm an tih lahin sawi ngaihna kan hre tawh bawk si lo. Kal leh phawt ang u kan tia, kan kal leh a. Darkar khat tehmeuh chu kan kal kual tawh. A tawp a tawpah chuan kawngpui hi kan pawhchhuak hlawl a, kan bo nasa tawh bawk si.

Kan thil lamna tur te chu Sai baba Mandir bulah min lo chang turin an lo kal tawp a. Tichuan, keini chu Mandir kal leh tur chuan auto kan la a, Rs. 30 lai kan chawi phei leh nghe nghe. Kan lo kal thui hman viau ni tur a ni. Kan va hmuh meuh chuan an first right tih kha chu kan la ngei a, first left kha kan lo hmuh hmaih chu niin, mihring leng lek tak tak hian kawng hi a lo peng a, chu chu kan lo kal pel a, kan bo vak phah ta a lo nia. Chauhthlak duh ngei mai, in kan thlen chuan tumah che chang peih kan awm lo.

Krismas dawn kha a ni a, Maia nen bawk kan bo leh a. Kal lam chuan kan kal dik thlap, Maia bike kawl lai a nia, bike in kan leng a. Chumi zan chuan Advance Christmas programme a awm dawn a, kal pawh kan tum ve ngei. Kan thiante inah chuan kan va leng a, an gift exchange tur hi min thawn a, gift 6 vel hi ka ak a, thleng hmasa tur deuha min dah avangin aniang. Kan pahnih chuan kan va haw ta a. Haw lam chuan kan bo ta alawm le.

Kan haw hma ang reng, dar 6 ah inkhawm tan tur a nia. Chumi nang hman tur chuan kan haw kha a ni a, haw a, insiam a, kal leh nghal tum kha kan ni. Mahse kan bo ta tlat mai. A hma pawhin kan kal dik thin sia, tun tum ber kher chu kan bo ta tlat mai. Hmanhmawh nen chuan in tu lo tak a ni. Hmun reh tawkah te kan tlan a, vai ho kan zawt thin. Vaiho lah hi hrelo nih duhlo, an duhna lam lam hi an kawk ve leh tawp zel a. Kan tlan zel a, kan bo tulh tulh mai chu a ni si.

Kan thiante lahin min rawn phone sek tawh, inkhawm an tan tawh si, keini kan la bo. Hmanhmawh mah nak alaiin Traffic police in min la tiding zui. Min check ta a, hmanhmawh nen, ninawm duh viau a ni. Minute 15 vel kan din hnuah kan kal leh a, engtin tin emaw chuan kan thleng phei ve ta a. Hmanhmawh tawkin kan insiam a, inkhawmna hmun chu kan pan a, kan thlen meuh chuan dar 8 a lo pel tawh. Gift exchange programme pawh kan nang hman hram! Kan thiante an lo mangang hman hlawm hle.

Bus stand hai vangin stand 2 inkar tehmeuh a tlanin kan tlan chhuak tawh bawk. Hemi tum hian ruah a sur nasa lutuk a, Rsa khan a ni tawh a tih avangin kan chhuk a. A lo ni awzawng lo mai, Chda khan a bag-ah hard disk leh eng ilo, a huh pawi thei chi a ak a, a bag lah kha tui a lut tlang thei bawk si. Kan han tlan ta tak tak mai a, Chauhthlak duh kher mai. Verandah velah te lo ding hul ta hle hle ila, a zia deuh ni tur, ngaihtuahna hi a kim lo deuh thin chu a ni.


Kan thianpa zin tur kan thlah hian kan haw lamah auto kan la a. Rs. 70 a ti a, kan kal ve mai a. Kan tlan tan dawn tih velah hian traffic police in a lo phar a, a ding duh lo a, mahse traffic police pa chu a rawn zuang lut a. A din tir ta tho tho a, a hau ta hrep a. Chutah kei chu polite deuhin mi rawn bia a, meter in in kal em? a tia, kal lo ka tia, engzat nge a charge che u, a ti leh a. Rs. 70 ka tia. Lehkha ah ka hming te min sign tir hnu chuan auto dang min phar sak a, Sir, hetah hian kal ru, a tam berah Rs. 50 bak a ni lo ang a tia. Tichuan kan kal leh mai a.

Mahse kan bo ta tak tak mai, kan chuanna auto khalhtu khan kan kalna tur kha a lo hre lo niin, kan tlan thui tawh khawp mai a. Meter box ah lah chuan Rs. 70 a chuang tawh bawk si, road sign velah chuan Agra tihte a inziah nuaih tawh avangin kan hla hle tawh tih kan hria a. Kan chhuk tawp a, pawisa pawh chu kan pe a. Auto dang kan la leh a, kan veng kal tur chuan. Kan bo avangin Rs. 120 velin kan in kan thleng thei hram. Zingkar a ni bawk si, ninawm duh tak a ni.

Heng bakah hian sawi dawna sawi tham tak tak ni si lo hian, ka bo ve deuh reng bawk. Average a lak chuan ni hnih danah vawi khat bo ang vel ka niang :-) Khawi lai mah hi ka chhuak ngai si lo a, ka chhuah chhun chuan bo bak chu hmabak ka nei vak ngai lo. Bo chu hriatna alawm an tia, ka hre thei chuang lo.

7 comments:

luliana said...

Bawngkawn atang a durtlang pidal..in va peih mai mai e aw..thil min ti hrechhuak..kawnveng durtlang biak in thlang lawkah khian pu patea a awm a, govt ah ka pa te nen an lut ho thin..khang hun lai khan motor la awm hek lo..ke ngat khan sikul an kal thin a..an haw lam hi chaltlang leh durtlang chhoah an bek vei lam ni tla tur in a hem thin sia, durtlang ho chu an bek veilam a ut thap zel a ti :D

Joseph said...

hahaha.... kan peih i ti maw? , kan phur a chhuah chuan, st pauls kan kal lai pawh khan ke hlirin kan haw thin. :-) kan titi duh thin a.

Vawikhat ke hlirin luangmual mawng tawpah te pawh kan zuk kal tawh. kan peih ltk. :D

aduhi said...

Lol kawngbo hi chu a buaithlak teh e. Kei chu ka bo dan ve chu dangdai top, ka mitthla hian ka kalna tur hi ka hisap thiam thei miahlo a, mahse a taka han kal chiah a engemaw landmark han hmuh hian ka hre leh uar uar zel.

Auto soi takah chuan hman deuhah toh hospital ah mi kan tlawh a, thil lei sak kha an ngai a, a leina kha a hla angreng a, auto in 25 in kan kal a. Chuan let leh dawn khan auto ho khan a man kha an fix tlat a, 30, 50 te an tia, inti hre deuh khan a dang meter a kal duh kha kan la a. Kan han kal a, kan thleng thei ta reng2 lo mai, kal lamah khan shortcut ah kan lo kal a lonia kan lo hre leh toh silo. Kan han thlen meuh chuan 40 dawn kan chawi, nuihzathlak loh duh ngei mai

Almost Unreal said...

kong hi ka hre thei lo ltk hi a buaithlak kei poh. tum khat ka thohna hmasa zokah khan Kalkaji pick up kan nei a..a hma chuan driver bengva deuh om chuan phone ah ka in biak tir a, an hre mai zel a.Tum khat chu kha driver lah kha nep ve bok, Kalkaji vengah kan han kual tak2 mai ah..office hi 2 hrs velin kan tlai. driver ho poh hian kong hre thei lo hi min ti thei teh nia.

kea kal hi chu ka peih khop mai, peih lamah chuan.

DayDreamBeliever said...

Ui ha, thianpa, keipoh kawng bo species tho kha ka nia, ka bo nasa thei lutuk. I thought it was a woman-thing, however. Mipa hi in lo bo ve thin tih ka lo hre vak lo a. Aizawl ah ringawt pawh hian keipoh ka bo chiam zel. Chuan maw, hmanah JNU ah hian class kan zuk attend a, classroom 2 a awma, a chhhuah na lam kha a inang lo a, thla 1 kan awm chhung khan ka chhuak fuh theilo quit thak. No sense of direction.

Calliopia said...

Haha a va ngaihnawm reuh, father my son. Mahse hlaphuahtute pon he lei bona ram hi te an tih ve thin kha maw ti mai roh :D

amuana said...

Hmun hma vel hi ka hre thei lo a, ka bo nasa thin hah hah khawp mai keipawh.

Kawngbo lam ni lovin, ke a kal i sawi takah ka rilru ah a rawn lang zawk. 1994 kum khan thianpa pakhat nen Chanmari - Bawngkawn hi Bus ah chuang lovin ke in kal ila Bus fare a insen aiah pawisa khawl ila tiin ka rawt dun a, kein kan kal ta a, ni a sa ropui si a,kan hah dun khawp mai a. Bawngkawn kan thlen chuan kan pawisa hlep kha kan ngaihtuah a, Rs 2/- a nia. Hlawklo hi ka ti lutuk a, Bus ah ka chuang ta zat zat :)