Thursday, July 10, 2008

Min awmpui reng ang che

Pa,

Mihring hi kumhlun tur chu ni ila chuan vawiin tlai te hian kan inbiak leh ngei ka ring. Tlai tin min rawn phone thin kha ka chang ziah a, mahse min rawn phone tu i awm ta si lo. Tunah chuan ka nu aw chauh a ni tawh, "A pa ka lo bia" tih tur i awm ta si lo. I phone number atanga phone ka dawn pawhin i aw hriat beisei takin ka la thin a, mahse ka nu aw hlir ka hre thin. He thil hi ka la ring thei lo a, a la hun lo a, ka thin a rim takzet a ni.

Ka chhuang thin che asin le, ka titi na reng rengah i chanchin pakhat tal sawi tel lova ka titi hi a vang khawp a nia. Tetlai phei chuan, "Ka Pa Chhuanga" ti hiala thiante min auh nawmnah pawh ka tawk hial thin. Mahse, ka tan chuan ka SUPERHERO i ni a, ka chhuang tawp lovang che. Mi pa te angin ropui lo mah la, pa dang kan ngai bik lo a, kan awt hek lo, kan tan chuan pa ropui ber i ni.

Kan tetlai a thil kan hriat ve theih nan ti a, hmun hrang hranga i kalna ah min hruai kual thin. Thil hmuhnawm deuh en tur awm se, kan en ve loh hlau a, i office kal vel na atanga kaltlang mai lova min rawn hruai thin te kha a van nuam thin tak. Tlai i lo haw a, i thil lo hawn mawlh te kha kan nghakhlel thin. Thil ropui rawn hawn lo mahla, bubble gum mai mai i rawn hawn pawha, hlim taka min siam thiam zia ka hrereng a, "Tu ham puar lian thei thei" tia kan chhungkua a kan in hamsiak thin te kha, kan va hlim thin tak em!

I fate kha min duat thei si! Kut thlak chu sawi loh, kan hming pawhin min ko phal ngai lo kha i ni a. Ka nu thahnemngai deuhin kan hminga min lo koh palh pawhin, "Chhungkaw inkoh dan kan nei, hmingin in koh loh tur" kha i ti thin a. Thil kan awh te pawhin kan hlimna tur anih chuan i neih zawng zawng i seng phal a, thiante zingah pawh rual awt lovin min siam thin. Min duat viau e ti lovin mipa chu pa taka awm tur i tih thin kha, nang chuan a takin i lantir thin a, kei chuan ka tlin meuh thin lo a ni.

Zirna tha kan nei lo ang tih hlaua, nei leh nei lovin sikul tha ah te min luhtir thin anih kha. 'Fail loh tur' i tih tawp thin avang khan fail kan hlau thin a, kan fail palh pawhin min hau mai lova, a lehpekah tha deuhin tih i tum dawn nia tia zaidam taka min hrilh thintu i ni. Ka mihring hriat tawh zinga zaidam ber te zinga mi i ni, i thinrim ka hre ngai lo a, i ngaihdan a nih loh deuh chinah tawh chuan mi pawhin i thu an hnial ngai lo. Choka ah mipa in chawhmeh an sawisel ngai lo i tih thin te hi, ka vawng thei thin lo a, pawi ka ti takzet thin.

Thiante zingah pawh tuarchhel leh tlawmngai ber tura min hrilh ziah tu kha i ni a, tum pawh ka tum thin reng a ni. I thu awih lo nih ka duh lo a, nang pawhin ka thusawi i ngai pawimawh thin. Kan bulah i na i sawi ka hre ngai lo a, natna hrang hrang i paltlang hnem tawh. Hetiang em em chuan tuar chhel lo la chuan, hman hmanah khan min kalsan tawh maithei. I kal na a chhuah thin laia, a na chhuak rawn chhuak, i vial ngawih ngawih pawhin, 'a na hleinem, a reh leh mai ang' i ti mai thin anih kha, kan tan chuan thlamuanthlak thin tak a ni.

Ka thiante damlo hlek sela, phatsan miah lo tura min rawn fuih thin te hi ka thiante hian hria se chuan an lawm ve thin ngei ang. Ka nu ten min ngaih thu leh an lunglen thu min hrilh pawhin, nang chuan inti pachang thin turin mi fuih ziah a, "I nu te lunglen vang khan i lung te i lo ti leng ve ange, mipa i nih kha, hre reng rawh," i tih hian min ti pachang thin. Khaw lum tawrh hrehawm khawpa a awm te, khaw vawt lutuk avanga mi an thih lai te pawhin, tuar thei lo bik nih loh tur i tih thin avangin ka pa sawtin ka inhre thin.

Computer khawih mi zirtir thin lai te kha ka ngaihtuah let leh a, kan pahniha zawhte lem kan inziahsiak zat zat lai te. I print chhuak a, ka nu leh ka naute kan hmuh a, min ngaihsan zia te kha aw! Zan mut dawna kan in wrestling hmasak phawt thin te kha, in wrestling pui tura min cho reng thin te, ka rawn haw veleh kan in wrestling dawn nia, exer lo la char char rawh, ka ti a. Mahse wrestling pui tur i lo awm ta si lo.

Zankhaw tairek thlenga i naupanlai chanchin nuihzatthlak tak tak i sawi thin te mutthilh chhuak miah lova kan ngaihthlak kar zel te kha aw, kan khamlo thin asin! Sikul chawlh chang pawhin saptawng lehkhabu min lehlin sak mawlh kha kan nghakhlel thin. I ho a thil tih re re kha chu a nuamin, mahni pawh kan inrintawk phah ve thin anih kha.

Thil chi hrang hrang kan sawiho thin a, kan suangtuah thin. Duhthusam te kan sawi tliar tliar thin a, nang chuan pa nih tling takin kan duhthusam ti puitling turin min fuih thin a. Lehkha zirna lama kal leh tura kan inthlah pawhin ka nu ten min tih tawrhzuau mai i hlauh avangin nangman fel takin mi thlah thin a ni. Inhmu tawh lo tur pawh kan ni lova, inhmu leh tur tho hi inthlah vak vak a ngai lo kan tih dun thin avang te pawh kha a ni ange, mi thlah hi ka duh vak lo.

Mahse, inhmu tawh lo tura inthlah kan lo ni renga. January 9, 2008 a min thlah kha kan inhmuh hnuhnun ber a ni ta. Khami ni ka lunglen zia kha aw, enge a chhan pawh ka hre lo. Ka thlenthlak hnu te khan ka lung a leng zual em em a ni. Nitin inbiak thulh lovin hun leh ni te kan hmang chho zel a. Khua pawh a lum chho leh tawh hle a, i tha lo deuh tih ka nu in a rukin mi rawn hrilh thin. A hnuah mi hrilh leh dan chuan, "I pa khan a damloh thu te, a nat thu te hi hrilh a phal ngai lo che a, a rilru i ti mangang ang" min ti thin a ti a, ka rilru mangan te kha i van hlau thin tak em!

Khami ni June 2, 2008 Thawhtanni khan ka thianpa computer lei pui turin ka kal a. Bazar a kan awm laiin, ka thianpa khawl an rem sak chhungin tihtur a awmlo em a, ka tihdan thin pangngaiin ka rawn miss call leh a. Nang chuan a rang a rangin i rawn call let leh a, "Boihte, enge ni ta?", "Eng ni love, i buai em?", "Buai lo e" "I dam tha maw?", "Aw dam tha e", "Naunaua a awm hnai em?", "Aw awm e, i be duh ami?", "A buai em?", "Aih buai lo e,"... Ka nau chu ka biak chhunzawm ta a. Khami kan inbiak kha khawvela kan inbiak hnuhnun ber a lo ni ta. Awih har ka van ti em!! Khatiang tih tur hria a, chhum lo chat lovin kan inbe tur a nia!

Computer kan lei zo, in lamah kan haw a, kan vak chau deuh bawk si. Kan inremfel hnu ah, chaw ei khamah, inbual fai velin movie kan lo en a, dar 12 a pel hret tih chuan ka phone a rawn ri a. Ka en vang vang phawt a, ka thianpa hnenah, "Min van rawn call tlai em em ve mawle..." tih pahin ka la a. Ka thil hriat chu a duhawm loh kher mai, ka nu tap hawm hawm ri a ni tlat. "Nu....Nu... enge enge??".... "Nu... enge a? Enge thil awmzia?" Ka nu kha a tawng mai thei si lo, "Mama... i pa hi kan be tawng thei tawh lo". Chu thu chuan min van khawih teh reng em!! Ka rilru a buai nghal vek, min 'shock' na lutuk kha awmdan ka thiam lo a ni ber.

Ka awih thei mai bawk si lo, ka zawt nawn ka zawt nawn a. "Nu... engpawhnise, nakinah ka rawn be leh ang che" tiin ka phone ka dah a. Ka biak dan velah ka thianpa ngaih thalo khan, eng thil nge kha a lo ti reng bawk a. "Ka pa a thi" tiin ka hrilh ringawt a. Tihdan a hriat loh hmel ve hle a. Ka nu chu vawi 2 ka han be nawn leh a, a ngai hlir ka zawt a. "A thi chiang maw? A pa chu a thi tihna ami?" tiin ka han zawt reng a. Ani lah chuan awih loh rual lovin a aw bawk si. Ka va han buai tak em!

Ka pa ruang nan hman ngei tumin thianten min han buaipui a. Tum dan chuan a vui hun chu nang hman tur ka ni. Mahse, mihring hian kan thil tih theih a lo tlem em a, thu kan neih loh zia te pawh ka hre kuar kuar mai. Khua a chhiat avangin kan thlawhna chu 'cancel' a ni a, kan thlawk let leh. Ka rilru hian engmah mumalin ka ngaihtuah thei tawh lo. Thianten min ngaihtuah em em a, engtiklai pawhin min rawn be reng a. Khami zan te kha ka muhil tha thei lo. Zingah ka tho a, ke in kan thlenna bul vel chu ka fang a, ka mittui lah chu dan rual lohin a sur zung zung reng bawk a.

Ka leng ka haw tlai pawha min lo nghak tang tang thin tu, kawngkhar min lo hawn nalh zel tu kha a awm ta dawn si lo a. Zin haw apianga ka bag min lo hlan sak nalh zel tu leh min chibai hmasa tu kha a awm tawh dawn lo a ni. 2007 krismas te kha aw, a hma zana ka tlaivar avangin ka tho har a, ka chhungte dang inkhawm vek hnuah ka pa in ka thawh hun min lo nghak tang tang a, kan pahnihin Krismas tuk chuan chaw kan ei dun a, kan krismas hman dun hnuhnun ber a ni ang tih reng rin ngaihna ka nei lo.

Engtiklai pawha mipa taka awm reng ka tum chung pawh hian ka thei thin lo, ka tluk lo hle mai che. Ka thian kawmngeih ber, inkap na thei tak kan nih thin te kha aw, ka khua a har takzet a ni. Ka mi rin ber leh ka innghahna ber i ni asin le! Mahse, nang chuan min kalsan ta daih si a, kan bei a dawng a, kan hrilh a hai takzet a ni.

Mihring te hi innghahna tlak kan nih loh zia min hrilhtu i ni leh si! Min va han hmangaih tak em, innghahna tlak Pathian kan nei tih min hrilh duh vang ani ang a, hetia min awmloh san hi. Pa, hmuh hlan nghakhlel em em a, ka rawn haw pawhin, i hmel ka hmu reng reng lo. Inchhung zawng zawng ka kal chhuak nghal vek, mahse hmuh tur i awm si lo. Ka nu te, ka naute min lo hmuaktu zingah i tel ve tlat lo kha 'fair lo' ka ti khawp mai.

Thuziak ka tui tih hriaa, ka article ziah ve thin te i lo chhiar a, ka tawng hmandikloh pentui sena i lo thai chhuah pap pap thin te. A hman dan tur dik mi hrilh mi hrilh thin te kha ngaihthlak leh a va chakawm tak em! Ka blog pawh i lo chhiar ve ngei thin tih ka hria, i sms rawn thawn hnuhnun ber pawh "Father Sphinx chu hla phuah zirtir i ngai ni maw?" i rawn tih te kha, ka lung a van tileng tak em! He thu ka ziah lai te hian ka mittui hi dan rual lohin a tla asin, mipa nih a har ka ti thin ngei mai.

Mi te chuan Pa tia koh tur te an la nei a, kei pawhin ka la nei tho che! Pa nei lo nih ka duh lo a, min awmpui reng ang che.

Mangtha

30 comments:

Almostunreal said...

I am so sorry

ka tha i ti chhuak, ka mittui i ti thla hial. Mihring kan nih chhung hi chuan hetiang hi kan tawn hi a ngai thin si a..a fair lo thin a sin.

Ka Pa'n min boral san khan accept har hi ka ti lutuk a.. a tir lam phei chuan khawhar leh lunglen ngaihna ka hre lo. Mahse a thih hnu thla 4 hnu velah keimahin inah ka awm lai hian ka rilru ah "Ka Pa a thi, pa ka nei toh lo" tih hi a ron lang hlol a..ka bei hi a dong ru a sin aw.

Ni khat poh ka Pa pumrua tiat vel, ka pa nen an kum poh a in ang vel ang..kan inah hian a ron lut ka hmu a..ka Pa emaw tiin ka ko hman trep..mahse a lo ni si lo..ka bei hi a dong ru thei a sin aw.

Nang ai chuan ka vannei in ka hria..kei chu ka Pa in min boral san khan a bulah ka om a..soi harh tumin a kut ka vuan a, ka nuai nok2 a..mahse a sot lo.

I Pa chu MIPA dik tak a ni e..tiang khopa fapa in a ngaihsan theih hi an tam vak lo mai thei a ni.

May God be with you

DayDreamBeliever said...

Thianpa, mittui nen tun tum chu i post ka chhiar. Pathian zarah i tawn ang hi ka la tawng ve lo, mahse i tawrhna hi ka tawrhpui takzet che a ni e. I pa chu pa fel tak a nih a lanna chu nangmah ah hian a ni; he would be so proud of you right now.

Sorry I never told you
All I wanted to say
And now it's too late to hold you
'Cause you've flown away
So far away

Never had I imagined
Living without your smile
Feeling and knowing you hear me
It keeps me alive
Alive

And I know you're shining down on me from heaven
Like so many friends we've lost along the way
And I know eventually we'll be together
One sweet day

Darling I never showed you
Assumed you'd always be there
I took your presence for granted
But I always cared
And I miss the love we shared

Although the sun will never shine the same again
I'll always look to a brighter day
Lord I know when I lay me down to sleep
You will always listen as I pray

samuelapa said...

Joseph,
I pa kha journalist a nihna leh thian a nihna angin ka hria. Pa zaidam, rualpawl thiam leh ngainatawm tak a ni.

Mahse, ka la hmel hriat loh lam - Chhungkaw PA a nihna, a tehtu tur dik tak, a fapain, a rilru chhungril ber atanga a rawn phawrh chhuah hi a ropui ka ti takzet.

Ka fate lakah i PA ang PA nih ve hi ka tum ang.

Henry said...

** You can still talk to your dad whenever you want. He is listening. His answers will just come in different ways now.

**He will always be with you. The love and strong bond you had togeher will never end.

My prayers are always with you.

Yours in prayers
Sercop

Mizohican said...

My utmost sympathies to you again, brother. The dead shall always be honored and remembered, and we are always there to walk along with you to give you support and affection.

In Christ.

Michael Fanai said...

a zia lo khawp mai Pa te hi chu an van lo hlu em...heihi ka ziah ve ania ka lo share ve mai mai ange

Hun leh ni te ral tam tawh mahse ka rilruah a thi thei mawlh si lo. Hlim tlang taka kan awmho lai te ka ngaihtuah let chang phei chuan, mipa ka nihna theihngilhin ka mittui a lo far leh thin. Naupang kum 10 mi vel chauh ka la nih laiin, ani chu sualin a bual a fe tawh chu lo niin, chu sualna, zu bawih chuan hneh takin a lo manbet reng tawh a. Kei chuan zu ngawl a vei tih kha ka hrethiam pha lo. Zu chuan a taksa chu ei chhe zelin, damdawi in hial pan pui ngaiin a siam ta. Chuta tang chuan that lam reng reng a pan thei ta lo. Doctor-te pawh chuan theih tawp an chhuah a, an en hnu chuan a pumpui ah thisen pui zam a chat tih an hrechhuak ta.

Damdawi tha an tih te chu a rang thei ang berin Kolkatta ami kan chah a. Chah ruala rawn thleng nghal thei ni ta lo chu, ni hnih kan nghah a ngai a, A VA REI KHER EM!!! Damdawi chu an pe ta ngei a, mahse a lo thlen har avang chuan a taksa lo chaklo zual tawh chuan, a lak zawh hmain chu damdawi tha tak an tih pawh chuan a chhan hman ta lo a ni. Kei la harh rual lek ta chu khami tlai pawh khan infiam turin hmundangah ka kal a. In lam pana hlim taka ka haw, Ka pa u te inah ka lut kawi a. Ka pa u nupui chuan tap hawm hawm chung hian, ‘I PA A THI” a lo ti a. Kei chuan, “ENGMAW? I PA A THI MAW?” tiin ka zawt let thung a.Ka ngaihtuahna mawlmang takah chuan, Ka pa hian min boral san ang tih reng ka ngaihtuah pha ngai lo.

Chutia min hrilh hnu chuan rang lutuk in kan in lam pan chuan ka tlan nghal a, kan in an lo singsa fel mek a, ka la awih thei chuang lo, “ENGA TINGE?” tiin ka zawt leh hram a. A hnuah haider theih rual loh in ka pi in, “MATE, I PA A BORAL” an tia min hrilh mai chu A VA HAN NA VE! Damdawi lam pan chuan ka tlan chho nghal a. Ka pa khum bul ka thlen chuan dan zawh rual loh in ka mittui a rawn sur a. Ka pa engmah hre tawh lo an sawngbawl vel kha en harsa ka tiin, KA VA HAN KHAWNGAIH TAK EM! A ruang chu tlaivar pui turin, kan in lamah an rawn zawn thla a.

Ka PA, khawvela HUAI ber, CHAK ber, midang aia THA bik tura ka ngaih thin kha tunah chuan MITTHI mai a lo a ni ta. Hmangaih tak ten, hmuh leh tawh ngai loh tura min kalsan hi alo va na em em ve. Khuanu pawh ka dem a, engngati nge KA PA kher min laksak bik tih ten ka ngaihtuah a. Midangte pawn PA an nei bik si a, engvanga ka PA kher a thih bik? tih ten ka vui thin. Mahse kan thatna tur lo chuan PATHIAN hian a ruat si lo, pawm thiam erawh a har anih hi.

Kum tam vei tawh mahse ka tan chuan nimina thleng ang maiin ala thar a, ka mitthlaah la cham bang a, a nat ngai rengin a la na si. Thenrualte chu an PA te nen hlim tlang takin an leng a mahse kei erawh chuan he khawvelah hian KA PA tih tur reng ka nei ve tawh si lo.

Tawia Pachuau said...

Ka tuarpui takzet che.

Keipawh 2002 khan ka pa in min boral san a, ka tuar khawp mai, tun thleng hian nimin mai kha ni in ka la hre thin. Ka lawm leh lungngaih ni te hian ka la hre thin,

I last line "Mi te chuan Pa tia koh tur te an la nei a, kei pawhin ka la nei tho che! Pa nei lo nih ka duh lo a, min awmpui reng ang che." hi tha ka ti lutuk, min hnemtu atan ka lo hmang ve thin ange.
Pathianin in chhungkua in awmpui in thlamuan che u rawh se.

amuana said...

I thuziak ka chhiar, min khawih. Comment belh turin i thuziak ka chhiarin ka ngaihtuahna a ti mumal lo zo. I thuziakin min vel, min hrethiam mai teh!!!

VaiVa said...

Mihring te hi chuan tih theih kan nei tlem a sin. Mah se, min pe thintu leh min lak kian sak thintu chuan veng zel che rawh se.

Lal Jo-a said...

@ almost_unreal : accept a har zia an sawi an sawi thin chu kei pawhin a takin ka rawn hre ve chiah a, alo ni thei ta khawp mai. Chutiang mahni pa te ang deuh hmuh chuan koh thut a awl duh khawp ang! Kei pawhin engtin tin emaw min la rawn phone tur hian ka la ngai deuh tlat zel a ni! Pathianin a mite a kalsan ngai lo, nang pawh awmpui zel ang che.

@ daydreambeliever : in rilru ka lo ti hrehawm nih chuan ngaihdam ka dil e. Mahse a runthlak em bawk a ni. I hla thu rawn dah te hi, ka lung a ti leng. Hmanah kha chuan a satute hmui chhah leh an zai dan zir khan kan nuihpui mai mai thin a, tunah zawng, a lo hlu ngei mai.

@ samuelapa : ka pa te nen in lo hre reng a, mak ka ti khawp mai. Engpawhnise, i tawngtaipuinaah min lo hre reng thin a, a lawmawm ka ti takzet. I thil min present kha a hlu ka ti a, a hunlai chuan tawng ngaihna ka hre lo a, tun thleng hian ka la dahtha reng ania!

@ sercop : i believe thats true!

Lal Jo-a said...

@ illusionaire : thanks bro, i know u all are always with me. i am blessed

@ michael : I thuziak chuan ka thinlung a khawih zar mai. I pa thih dan leh ka pa thih dan a inang teuh hle mai, ka pa erawh a rang deuh a ni. Thi a a luak leh a thih inkar hi darkar khat pawh a tling dawn emaw ni ka ti, kei zawng hmun dangah ka awm si. Ka pa ka hmangaih em em, ka tana engkim tih huamtu, tanpui a ngaih lai bera a bula ka awm lo hi ka thin a rim takzet! Ka naute'n an bawihsawm dan min hrilhin an beidawn zia, an hmelah te ka hre thei a, hrehawm ka ti hle mai. Ka nu te leh ka naute hmel ka hmuh chiah hi ka hnuk ti ulh tu ber an ni. Engpawhnise, PA chu kan la nei a, leiah a takin kan hmu tawh dawn lo mai a ni!

@ tawia pachuau : A rei tawh leh rei tawh lam chu ka hre lo a, mahse, kan ngaih em em te kan then hi chu hun rei tak pawh lo ral se, kan ngai reng tho in ka ring! God bless

@ amuana : a thu hi chhiar pawh ka la chhiar leh miah lo, ka ziah lai khan ka ziak deuh char char a, ngaihtuah mumal lovin. engpawhnise, i lo chhiar ve a, ti lawmawm khawp mai. Min lo tawngtai pui reng tih ka hre bawk a, ka lawm takzet zet a ni.

@ vaiva : mihring te hi chu innghahna tlak hi kan lo nilo taket. ral leh mai tur kan lo ni! Mahse hriatthiam zawng a har a ni, a la hunlo deuh chu a ni.

Calliopia said...

Hei zet chu i thinlung leh rilru zz a i ziak tih a chiang a kpoh ka hnuk a ti ulh nasa. I pa mizia leh in inkar boruak i ron phawk chhuak tha bawk si.

Kpoh kum 11 chauh ka nih laiin ka pa'n min boral san a, kum 19 ka nu'n min dampui hnuah 2004 khan min boral san leh a ka sawi duh fo thin ka lo chah ang che. I pa chu a boral a sun rawh by all means. Mahse kal tawh te kan sun lutuk na lamah a nungdam a te hi kan lo hlamchhiah a, an hlutna te hi kan hmuh hmaih fo thin. I nu a la dam a, duat hle rawh aw tih hi i hnena ka duhsakna thuchah ni ve rawh se.

Naupang^Fel said...

@Fathera:

I thil tawn nat dan tur hi ka hriatthiam pui khawp mai che. May thla khan ka fapa thla 3 mi lek in min boralsan a. Kan in awm rei hmanlo hle na in ka tuarah chuan na ve tak a ni. Thla thum mi lek then mah a nat chuan kum tam tak chhung a ilo chenpui tawh then chu a nat lehzual dan tur chiang tak in ka hmu. Pathianin awmpui che rawh se.

Puia said...

Hnuk a ulh duh hle mai Sepa.

Pa te hlut zia leh kan rinchhan zia hi an han awmloh chiah hian a lo chiang thin khawp mai. I pa thihsan che chungchangah chhel tak leh huai taka i awm zel ka duhsak a che. Pa ber i ni tih inhria la. KHawvel hi huaisen taka i hmachhawn zel ka beisei.

Shahnaz Kimi said...

I am so sorry to hear about your loss. May your memories comfort you and do know that you are held in my prayers. May God's peace surround you in this difficult time.

Malina said...

i'm so sorry about ur loss....

mihring te hi vanduai hle amo kan in tih lai hian keini aia vanduai zok hi an lo om ve leh zel thin.

keichu ka pa in min thihsan khan kum 7 vel chiah ka la nia,a thih ni poh khan tahna chang poh ka hrelo,engtia feel tur nge tihpoh ka hrethiam lo.ka nu in "mami,i pa a thi sin!" tih a tap hom2 chunga a soi te kha ka mitthla ah ala cham reng,mahse engtin mah react nachang poh ka lo hrelo,naupang mol tak chu ka va ni em!
mahse teenager ka ron nih chhoh a thil ka ngaihtuah chet2 thin khan ka tap nasa thin, P-thian remruat dan hi chu hriatthiam a har ani e! tun thleng hian "ka pa kha la dam ta se eng ang takin nge ka chhuah ang le?" ka ti thin.kan pass te hiam min lompui thiam ropui sia...keimah tak hian ka ngai ani tih hi inhrechianglo mah ila,dik tak chuan ka ngai...

ka soi ta duah a...i thu ron ziah zong2 hi mo...tiang hun thleng i pa nena i hmang thei hi dik tak cuan ka thik che ti mai ang...he leiah kam hmuh theih PA nei tohlo mah ila engtik laia poh a PA,P-THIAN,lei leh van siamtu kan nei alom....

LALPA P-THIAN chu hmeithai te leh fahrahte engdong ngailo tu leh veng rengtu ani si a.

benjamin rualthanzauva said...

In one corner, there exists another kind. Those who grew up more or less without father.

But I consider it a blessing in disguise. It makes us tougher, more independent!

When the comes a need for advise, emotional and moral support, it's just ourselves we can turn to.

But for you, he was there those many years.

Let us count our blessings. When God does something, he has a reason.

Jinx said...

I tawrh ang hi 'ka hriatthiampui che' ti thei dinhmunah kala ding velo nachungin, suangtuahna ringawt pawh a ka nu/pa min kalsan tur anga ka ngaihtuah ringawt chang pawh hian ka mittui hi a tla lo thei lo. I tan a na vawng2 dawn hle in ka hria.

I pa ang hi pa tamtak hi ni thei se kava ti em! Midang zingah chuan zia kan thup thei. Mahse chhungkua ah erawh chuan kanin hrechiang si a, heti khawpa fate thinlunga tla na chu, pa fing leh fel tak ani ngei ang tih a chiang ani.

Nangmah leh i chhungte ah Pathian thlamuanna in awmpui che u rawh se tih hi ka tawngtaina ani e.

Lal Jo-a said...

@ calliopia : Ni e, i sawi hi dik khawp mai. Mitthi tawh chu thi tawh an nia, a damlai te hi inngaihthah palh a hlauhawm khawp mai. Ni e, ka nu chu ka theihtawpin ka duat ange.

@ naupangfel : E, a rei leh rei loh lampang hi a nih ka ring chiah lo. Duhtak te an kal hi chuan, thlakhat lek pawh ni mahse, kan tuar tho tho ang! Nang pawh i tawrhna chu ka hrethiam khawp mai.

@ puia : Ni e, pachang taka awm hrma hram a ngai a ni.

@ shanaz kimi : thanks so much for your prayers, it makes me stonger. God bless.

@ malina : i pa i va sun hma tak ve! A hun te te ah Pathian hian ro a rel a, keini kan tetlai khan min lo peihloh san ni ta sela, vawiinah hian tihian kan inbe hlawm lo maithei a ni. Ni e, Pa kan la nei alawm.

@ benjamin : its going to be a long way. and am thinking how I will make it. As you said, now its me and myself to whom I can turn to in times of difficulties. Yes, God do has a reason when he does something!

Lal Jo-a said...

@ jinx - Kei pawhin ka ngaihtuah chhin nasa thei ltk. Mahse a tak tak a lo thlen meuh chuan ka ngaihtuah chhin dan nen chuan a lo inanglo hle a ni tih ka hrechhuak. Min tawngtaipui avangin ka lawm e.

luliana said...

E khai, thianpa, i thil ziah hian ngaihtuahna a ti kal thui hle mai. I tawrh ang hi ka la tawrh ve miau loh avangin han hnem dan tur che pawh ka thiam hlawl lo..Mahse he thu tawi te hi kan hnutchhiah ve ange - 'Kan tan a tha tur zelin Pathianin ro a rel thin', tih hi...Tunah rih chuan tluangtlam tak a thil ngaihtuah pawh a har viau ang, mahse keini ringtu te chuan pa zawng zawng a PA ropui ber kan nei a, 'Amah chu ring la, aman a ti vek ang' tih anih kha..

THANGHMING said...

Joseph,

God has a purpose anti, mahse hriat thiam chu a har thin ngawtmai.

Lungngaih changte awmthin mahse thlaphang suh, van atang a thlir che a, a awmpui reng che alawm.

Jerusha said...

Huiss ka nau, ka va han lainat tak che em! Ka mittui a tla nasa lutuk, hei chu ka tisual a in a chhiar tur ania, hre lo in kan chhiar ve ngawt a hei office ah, min melh hrek hrek mai ka bul a mi te ho hian :)

Pa nei lo te Pa kan Pathian I nei tih kha hre reng la, a hnem em em kher lo ang che tih pawh ka hre tho na in. Pathian in A awmpui reng che.

Malsawmi Jacob said...

He blog chhiar hian ka trap zawih zawih ringawt, ka insum thei thlawt lo. Ka tuarpui takzet che. Pa tha tak, mi tam zawkin an neih loh, i nei erawh chu ka lawmpui bawk si che.

Lal Jo-a said...

@ luliana - Ni e, amah hi rin phawt a, aman a tih vek atana khek tawp hi a tha ber mai. mahse mihring mihrinna chuan a har thin khawp a ni.

@ thanghming - Thlaphan loh hram hram chu kan tum ang chu. A har khawp mai... har pawh.

@ jerusha - inah chuan lo chhiar zok la tha tur nih chu. sorry for that. :-)

@ mesjay - pa tha tak kan neih kha kan chhuang thin ania aw.

DaGGyLo said...

Inthen a awm lawng,kan in then tawh lawng,Vanram nuam ah khian inthen a awm tawh lawng!

ThugAngel a.k.a Hipholik said...

Pathian chuan avengin a awmpui mawlh ang che.... hetiang dinhmuna ding ve lo tan hi chuan rin dan leh han tuar dan tur hriat thiam a har a nia..

thingdelh loh lung delh loh chu Pathian venna zarah hun tha leh duhawm tak i hmalamah i neih ngei ka ringin duhsakna sang ber ka hlan bawk ache..i thil tihna kawng tin rengah Pathian hre chungin ti la, i thiam i finna te Pathian leh ram tan ila hmang tangkai ngei dawn nia..


Lui piah ral khawpui mawiah kan la in tawk khawm leh beisei ang..keipawn tawh tur ka nei ve teuh a nia...

God Bless the dead...

kumtluang said...

tlai khawhnuah kalo chhiar vea, mittui nen, pa i nei ropuiin a chhuantlak takzet. Lalpan i nu leh in unauza awmpuiin thlamuan zel cheu rawh se

Anonymous said...

What matchless topic

Anonymous said...

Good brief and this mail helped me alot in my college assignement. Say thank you you as your information.