Wednesday, May 28, 2008

Hla phuah tumin...

Mi lungleng thei mi tak mai tih takah hla hi ka ngaina em em a, a phuahtute hlei hlei hi ka ngaisang thin. Hla nalh tak tak te hi an han phuah a, an awlsam phian lehnghal thin a. Chutah, mahni hla phuah ngei mai chu mahni zaithiam tih tak mai an han sak tir phei chuan a ngaihthlak a nuam ngawtin ka ring thin a. Chu chu ka ngaihtuah fo thin, khawnge hla phuah ka'n tum ve teh ang.

A hmasa berah chuan pen leh lehkhapuan nen chuan ka inchhawp ve rap zel. Pawl sawm kan zir lai khan hla phuah kha an intih hmuh nasa mai a, kan class ah khan. Vawikhat chu thianpa TK-a nen Rualbanlote tan hla kan phuah ngei a, laktlak em em a awm lem lo, mahse kan puitlin ve avangin kan lawm hle. A hnu lamah mahni a phuah ka tum ta a, ka han indawm kun ve ta thin a ni.

Tihtur hriat vak loh lai hi ka han chuh thin a, tichuan, uluk fahranin hla pakhat tal chu awlsam takin ka phuah chhuak ngei ngei ang tiin ka'n thu a. Chhungte phei chuan lehkha ka zir emaw min ti thin. A bul tan dawnah ka buai nghal phawt. Ka lunglen loh vang aniang tiin, lunglen deuh huna phuah atan lehkhapuan pawh chu ka khup leh thin.

Lunglen zan deuh a lo thleng a, chutiang bawk chuan ka han in 'kawnsentreit' leh ta a. Mahse a bul tanna tur tlar chu sawi loh, hawrawp pakhat pawh a buaithlak teh zawng a ni e. Ka beidawng ta zel a, TV ah emaw khawi khawiah emaw ka hla nalh tih zawng tak mai an rawn sak te hian, he hla hi chu ka phuah han ni ta sela aw, hi ka ti leh vawng vawng zel.

TV leh chanchinbu lamah te hla phuahtu tam tak an kawm tawh thin a, a then chuan Pathian hla chauh an phuah a, a then chuan Lengzem, a thenin an phuah pawlh a, hla lenglawng thlengin. chutiang te chu ka hre chho ve ta zel a. Pathian hla nge ka phuah anga, Lengzem ka phuah ang. Nge ni a, hla lenglawng hi ka phuah zawk dawn? A tira hla phuah tum ve rik-ngawt ai kha chuan a zia deuh, eng lam hawiin nge phuah ka tum pawh ka hre ngai der si lo a.

Lengzem han phuah chu ka tum chhin phawt a, ngaihtuahna hrang hrang a rawn lut nghal. Hla pawh chu lo phuah puitlin ta pawh ni re re ta ila, miin min nuihzat vel anga, naupang te te si, a lerh hma reuh ngawt mai, a la ngaihtuahawm ang min tih te ka hlau deuh bawk si. Tichuan, Gospel lamah ka rilru ka han pe leh a, ngawi teh, mahni maah hul ve mah nak alaiin, han tih thlum vel dan ka thiam der lo mai.

Hla lenglawng hi chu tum enah pawh ka en lo law law. Tunah chuan mizo tawngin ka phuah thiam ngang lovin ka hre ta a, a sap hla in phuah ta zawk ila, a awlsam phah zawk rinna te ka han nei a. Mahse a lo ni awzawng chuang lo mai, a harsa telh telh. Engatinge aw, kei inti lungleng ve thin tak mai hian hla pakhat te pawh ka phuahchhuah theih loh le? ka ti ka ti ta a.

Chutah, ka beidawng fe tawh tihah, 'idea' thar tha lutuk mai ka hrechhuak. Hla phuahtu tam tak hian a thluk an siam hmasa a, chu chuan phuah a ti awlsam a ni tih ka hrechhuak zawk. Rang lutuk maiin, ka tingtang chu ka va kuah ve ringawt. Mahni zai pawh inrem tha hleithei mang lo khan hla thluk zawnchhuah tumin ka han perh kual ve a, ka 'hmmmm.....hmmmmm' tial chho ruai ruai reng a.

Ale!! A tawpa tawpah chuan hla thluk chu ka nei ta, a changkhat leh thunawn tur ang chu ka 'hmmm...hmmm' chhuak thei ta hram. Tichuan, rang takin a thluk ka theihnghilh palh tak hlauhin tiin ka hmmmm hmmmm chu ka record ta a. Tichuan, ka lawm ve em em, a thu chu nakina phuahah tiin hlawhtling inti takin ka chawlhsan leh deuh vang vang.

Zan khat chu ka lehkhazir tha peih tawhlo chuan 'computer' hmaah chuan ka han thu te te a, ka hla thluk chu miin an lo hre ve hlauh ang tih hlau takin headphone ah chuan ka ngaithla a, a thu chu ziah chhuah ngei tumin tan ka han la ta tak tak a. Ka hla phuah chu a thluk nena inmil tura a thu rem zel ka duh avangin a ulh hlawm hle a. Mahse, ka pa in "hla hi chu a tawngkam hi a ulh thei ania, mahse hla a nih miau avangin a nalh vek tho" a tih thin kha ka hrechhuak a, ka inthiam ve leh hram hram thin.

A changkhat chu inti thei fahran hian ka phuahchhuak a, he hla hi gospel ngei a ni a. Tichuan, a thunawn pawh chu ziahchhuah leh nghal tumin, ka kut a kal lai tak nia ka hriat avangin phur takin ka han chhu leh deuh par par a. Ka rem kual ka rem kual a, a tawpah chuan a chhuak dik leh ta mai. Nuam ka va han ti tak em!! Mahse, a chang hnihna phuah tura ka han in buatsaih leh chu phuah belh tur hi ka hre ta lo re re mai a.

Tu emaw cowboy bu ziah tum an sawi ang deuh kha niin ka in hre ber tawh a, ani pawh khan a cowboy bu ziahah khan a phek hnihnaah chuan a changtupa chiah kha a dam tir tawh a, phuah belh ngaihna kha a hre tawh vak biklo ni tur a ni. Kei pawh chu chutiang deuh chuan ka inngai a, phuah belh tur ka hre tawh ngang lo.

Hun a lo kal zel a, ka phuah belh theih takin tiin ka 'try' leh thin a, ka thei ngang tawh lo. Sap hla ah ka let mai dawn emaw ni le ka ti thin, ka thiam leh chuang bawk si lo. Tichuan, ka hla phuah chu, ka sa chhin ta a, a saka sak hian a changhnihna tur awm ang chu a lo lang mai ang tiin ka sa nawn ka sa nawn a, a changhnihna a lo lang thei si lo, changkhatnaah bawk chuan ka kual ka kual leh ta mai a.

Ka beidawng takzet ta. Ka phuah belh tawh nguar ang tiin, hei kum 2 chuang chu a liam ve leh der tawh mai a, ka phuah belh ta lem hlei lo a. Mi lungleng nazawng hian hla hi an lo phuah thiam kher lo a nih hi tih te chu ka ngaihtuah vel ta mai mai a.

23 comments:

Puia said...

ekhai, hotute beidawng mai lovin han bei fan fan teh khai. Guitar i thiam si a, tlemin han bei ngawrh deuh la, nalh tak i phuah chhuak em em ang.

Phai kan awm ve lai khan a hmasa ber atan 'He Hringnun Hi' tih hla Pathian fakna hla ka phuah ve a. Kum 20 chiah ka niin ka hria. Chu cuh Mizo fellowship ah ka sa nghe nghe a, thiam leh thiam lovin, Michael M. Sailo hian bass mi perh sak a, aw nalhlo lutuk a lo khuh bo a, tihzia khawp mai..

Hla phuah hi a awllo va, a thua cheng a ngaih bakah a mood ah hian awm tel a ngai tlat mai a. Solfa thiam leh music thiam lam chu thuhran ni se.. Kan hotu miril amuana leh avena te bawk hian an hnehsawh leh pek ang..:)

Joseph said...

@ puia, nia, beidawn loh chu tum chu a thra. mahse hla phuah kher kher chu ka chem kalna a ni ta lovin ka hre ber a ni e. :D

Nang chu chu, hla phuah lamah pawh sulhnu i lo nei leh tawh alawm mawle. Ngaihthlak ve chakawm hle mai. Solfa thiam chu sawi loh guitar pawh kan perh "trung...dut..trung dut" a, phuah chhuah chu har ve duh tak a ni. :D Ni e, amuana leh avena te an hnehsawh leh phian ang chu.

amuana said...

E Khai hei chu chhiar a va nuam ve. Ka sawi leh pek thin teh ang, nang hi i thuziak te hi a tha phian reuh zel mai, i tawngkam hman, i thuziak in laklawn chhoh dan, te i thuziak i tih zangkhai thiam dante hi a tha ka ti.

Hla phuah tur hian eng ang mi nge nih ngai tih hi ka buaipui chiam tawh thin a (ti ve khanglang ila) in sawi takah chuan hla phuah hi ka tum urhsun ve thei thin khawp mai, a thluk nei chi erawh chuan ka hlawhchham lailet der mai a, chauh thu barawh atan, freddie mercury, babyface, meatloaf etc te hian ka hla phuah hual min lo phuah khalh vek hman zel a, piang hmasa zawk ila chuan ka phuah khalh zawk ngei ang maw le te ka ti fiam ta vel mai mai thin.

Ni e, i sawi ang, thinlung chhungah hian eng eng emawni ri ret ret hi a rawn awm, chu chuan min rawn tham a, lairil a rawn fan chho a, a chang phei chuan awmngaihna hrelo khawpin min siam thin. Mahse, pen leh lehkhapuan han la chiah ila, bo leh duak thin zel. Tum khat lai kha poetry ah ka in ti tui leh a, khawi khawi ah emaw te chuan chhuah hlawh tawk te pawh a awm ve ta nual. Mahse keimah a zairimawi a kha a chuai ta daih a, a la rawn in lar leh ta lo.

Mi hla phuahsa te, mi thuziahsa te hahdam taka lo chhiar hi ka talent ni ta ber hian ka hre thin.

Hotupa sawi ang deuh hian a mood a awm tel hi a ngai khawp mai a, mahse ti mi lo eltiang keini ang tan chuan a, hlaphuahturin a mamawh engkim awm vek tawh ni a in hriat pekin thai chhuah leh mai hi a harsa in ka hria. Hla hi phuah luih, ulh tung emaw, tang ru tung mai hi chu ka ngaina lo a, nem zawi thlap mai hi ka ngaina fo thin.

a sei ta deuh nakinah ka ziah zawm ang, i phal chuan :)

Jerusha said...

father beidawng mai lo e, trong kam te hi naupang te si thiam ka lo ti teh che asin! Keipoh hla phuahthiam te, poetry thlengin, rilru chhungril kan feel ang thin kan sawi thiam loh rere, nalh tak mai a an rawn ti chhuak thin hi chu a titute hi ka ngaisang ngawih2 tawp. Poetry ziah hi ka tum thin a mahse ka til thenna nih thlot loh vangin mi ziahsa appreciate lamah tran ka la ta mai. Ziak zel rawh, kan rawn ngaisang hlur ang che keini ho hioan :)

Joseph said...

@ amuana - e khai!! i lo tum chhin ve nual tawh tih a hriat mai. Ni e, i sawi ang khan , a hma hi chuan ngaihtuahnaah thu tam tawk a rawn lut a, pen leh lehkhapuan han chuh a, ziah chhuah nghal char char hi a chakawm thin tehreng nen, han hum chiah hian a bo duak thin. Tingtang perh dawna, hla sak tur bo duak ang deuh hi ni ta berin ka hria.

A mood a chen chu a ngai dawn khawp mai, thu ziakah pawh a ni tho. Poetry phei chu ka la tum chhin lo a ni ber e.

Rawn chhunzawm leh teh, comment ngaihnawm tham tak i rawn ziak a, chhiar nuam dap dap hle mai. Mi i 'bawl' thiam ltk an ti lehnghal che a nia... :D


@ maimawm - chuti mai tur em ni? ngaihsan na chhan vak tur kan awm hleinem. "til thenna" rawn ti ve suh, "chem kalna" ti mai teh. :-). Mahse hla phuah lam chu tih vak ka tum tawh hleinem, thuziah lampang hi nuam ka ti ta zawk a, thu ho te te mah nise, ka ziak ve nual toh ania. Nang pawh poetry nalh tak tak te chu phuah chhunzawm i tum ve leh ngei ang chu le. :-)

luliana said...

Mi lungleng thei deuh hla phuah thiam bawk si hi chu an awhawm a ni. Keini ang hla lam a zero lutuk hi chu lunglen ve chang pawh hian a ho tlat . "Aw...." han tih ve vang vang pawh hian chhunzawm ngaihna awm lovin a tawp leh tlat thin. Chuvangin lunglen ve loh hi a tha maiin ka hria..hehe..

Han thar thawh leh la, i zo thei mai lo'ng maw...te ka ti mai mai a...

Azaia said...

e father beidawng reng reng suh...... hlaphuah i thil tih awlsam tak anih loh zia keipawh ka hre khawp mai

Puia hi chu thu leh hla, nula lam thleng hian tih theih loh hi a neilo niber in ka hria

High school kal lai khan keipawh ka hla hmasa ber "Ka Rawlthar Di" tih ka phuah ve a kum 15 vel ka niiin ka hria, mahse i sawi ang deuh khian chang 1 leh thunawn chauh kan in phuah chhuak thei anih kha.. Tun thleng hian lunglen zual ni te hian ka la sa ve hluam hluam thin. ka roh ve lutuk..

Nangpawh nakin hnuah ila roh ve ngei ka ring..

amuana said...

Khai khai hlaphuah lama beidawng ho association din ila, hlaphuahthiamlo te hmakhua hai ven sak tu turin a tha dawn riauin ka hre ta.

@father : Tunge chutiang te a min lo ti mai mai. Mi bawl chu sawiloh keimah zawk hi bawl ka nuam a ka phuan leh burh burh thin :)

Mizo hlaphuahthiam thenkhatte chanchin hi 1996&97 chho vel khan ka thiam dan danin ka chhui zau ve deuh chhin tawh a, heta mak ka tih em em mai chu, a tlangpuithuin kan mizo hlaphuahthiamte hian hlaphuah hi an lo awlsam phian emaw tih mai turin, chawplehchilh a an phuah a tam hle mai.

GF Handel te ang deuh a pawlna dawn lai phuahte pawh an awm anga, Pu Hrawva hla "Khawilam mi nge hmanah" tih te pawh kha Pathianthu pawlna atanga lo chhuak an ni ta a. Mahse, zu hmun emaw lenkhawmna a, nang hla han phuah teh an tih atanga awlsam taka phuah hi a tam khawp mai. Awithangpa hi a a langsar zual a ni mai thei a ni. Tin, ka hla ngainat em em Zikpuii Pa "Sikni Eng" te hi a zingkar thingpui in paha a phuah a ni a, belhchet a dawlin a nalh em em mai tho bawk si a. Chuvangin, hla phuah hi ka rin dan chuan phuah kal laklawh a awm a ni mai thei a ni ka ti deuh.

Amaherawhchu, ka hla duh em em pakhat tho PS Chawngthu hla "Nghilhlohna Par" erawh thung hi chu a phuahtupa hian kum 18 chhung teh meuh zuk han phuah thung a. Chuvangin in hlaphuah ho pawh kha phuah zawm nan a la tlai loh hmel e. :)

Sei leh duah thin, min hrethiam leh mai teh

Sekibuhchhuak said...

I hla phuah puitlin tak hrih loh thu ngaihnawm deuhva i ziah theih dan atang hian,beidawng lo in han bei leh la,hla tha tak i la phuah chhuah theih ka ring tlat!

Joseph said...

@ luliana - "Aw.." tiha sak tur bo hmak chuan, lunglen va hnem awm lo ve o. A, lunglen tak tak chuan an tia lawm, tingtang hrui pakhat chauh awm pawh hi han perh ila... "punggggg" a tia, mittui a tla ve zawih zawih zel tho an tih kha. :D

@ azaia - "Ka rawlthar Di" tih ngei mai maw i phuah a? Kum 15 i nih lai chuan. Hehe.. i fast ve deuh re re a nih chu. A, chang khat leh thunawn chauh hla awm pawh hi a lo tam khawp a, an sa nawn an sa nawn mai alawm. :D Ni e, kan la roh ngei ang chu, hmanlai thil te hi chu. (han ti ve khanglang ila)

Joseph said...

@ amuana - Nang nge nge, kan bengvar leh sawt thin alawm. Ni e, i sawi ang deuh khan kan mizo hlaphuah thiam te hian awlsam deuh tak hian hla hi an phuah zung zung zel mai a, hei hian phurna, kan ti dawn nge, keimahni hi hla pphuah ve thei mai tura inngaihna min neih tir a, chu chu kan han ti ve thin a, a lo awlsam leh ngai si lo.

I sawi Awithangpa hi chu a ropui ngang a ni ange. Awithangpa hi a lar em mai!! Zikpuii pa hla phuah ka lo ngaithla ve ngai lem lo a, mahse a lehkhabu ziah chu ka duh thei lutuk, "CC Coy. No. 27" vang khan tun hnuah hian ka nick ah Ramfangzauva ka inti ve ta zeuh zeuh, kha thawnthu te kha ka chhiar nawn tlut tlut zel.

PS Chawngthu hla phuah chu a va han bei rei tak ve mawle. :D Ni e, phuah zawm nan pawh khua a la tlai lo a ang. Pu Ngurthangvela hi kan nuih deuh thin nang a, ani hi hla a phuah awlsam thin phian kha, a video han en khan, Lo a a feh laia a phuah te, lungleng taka thlama a thut laia a phuah mai te. A then chu, zan mut laiin mu thei lo a harh zawk a, hla thu ziak thla nghal par par mai te. Mihring hi kan inanglo zawng a ni e.

Sap ho hlei hlei hian an lo awlsam leh phian mai ka ti a, an ziak chhuak zung zung mai zel a. John Lennon leh Freddie mercury hi hla phuah thiam ka tihte zinga mi an ni a, an phuah awlsam hmel thin khawp mai lehnghal a. A thu lah chu a thlum thei nangiang lehnghal.

Talent dawn loh lam a ni ange. A hla phuahtute theihtawpa lo 'support' hi kan tihtheih awmchhun a ni ta berin ka hria. :D

Joseph said...

@ sekibuhchhuak - nang pawh hla nalh deuh deuh han phuah ve teh!! kei ringawt min ti bik zel a, ka phuah theih hlawl loh hi, han try ve teh. I beidawn chuan kan pawlah i lo tel thra leh dawn nia :-)

Jinx said...

Chang khat leh a thunon kha poilo re re. Tunlai sap hla ah ngat phei chuan a tawi theih em hi...sak nawn chi ni mai don alom :)

I phuah chhun2 te chu han post la, chhiar a chakawm alom mole. Theih phei chuan a thluk nen. Bloggers hovin kanlo hmmm...hmmmm pui ang che :)

Thinchhia said...

hrim hrim in han release ve thruai mai la mole..hmmm hmmm poh nise.
'Single' hit ber te poh a nimai thei sin

DayDreamBeliever said...

Father, han ti leh trang trang teh khai, amuana sawi ang deuh khan mi pawh hian a kuma kum fe hi nia an lo beih ve fo ni. Keipoh, han ti ve ngial i la, a thluk siam tur chi hian zu han phuan thiam reng reng lo ia! A chham chi pawh thiam chuang lo, mahse a tih ve nawk nawk theih mai a, sak tur ang a han nih hian (a thluk kha ka siam tur pawh ni lo se) ka bo nghal huih mai nia, talent dawnna lama in ang lo a niang e. Ka tum buai peih toh lo.

Almost Unreal said...

hla phuah lam hi chu ka bo vah2 khop mai

hei chang khat hla, chang khat leh a thunon tih ang reng vel te poh a tam hi..chu tiang category ah chuan dah mai roh..hehe

samuelapa said...

Father my son-a chu in chhiat tawh thu kan lo hria a, a pawi kan ti hle mai. I blog poh a khawharthlak ruih mai. Lalpan thlamuanin awmpui che u rawh se.

sawmpuia said...

In chanchin kalo hria.. zialo ngawt mai..

Puia said...

Sepa, i pan hunlo taka a boral san che tih ka lo hria a, pawi ka ti hle mai. Thinlung takin ka tawrhpui a che, pa thihsan ve tawh tho ka ni a, kei phei chu kum 6 emaw lek ka la ni a, pa tello va hringhun zawh hi awllo tak a ni. Mahse, nang zawng i tlangval a ni tawh a, chhel tak leh huaisen takin hringnun i hmachhawn ka duhsak a che. Pathianin a awmpui zel bawk ang che.

mesjay said...

Hla ai mahin phuah hlawhchham thu hi a ngaihnawm zawk hi mawle!

ThugAngel said...

Thianpa in chanchin duhawm lo zet ka lo hre ve a...a zia lo khawp mai, ka tuarpui tak zet tih min lo hriatsak dawn nia...

i thiam i finna te Pathian leh aram tana hmang zel thei turin ka duhsakna sang ber ka hlan nghal ache...

Pathian in vengin awmpui che u rawh se...

amuana said...

Ka nau enge i chanchin zel ni ta? A hma thei ang berin thawm rawn nei la, rilru a nuam thei deuh ang. Ka tawngtai pui reng che a nia

samuelapa said...

Ka tawngtai pui reng che a nia...
Tawngtaipui tak tak loh chuan hetiang hi sawi mai2 loh tur a nia...
:)