Friday, September 26, 2014

Bag Dum Pahnih

Buai deuha zin bik reng hi ka chanpual emaw ka ti ta hial!

Shillong lamah thil engemaw buaipui zuai tur ka neih avangin Friday zingah sumo a chhuk tumin ka in ruahman a, amaherawhchu ka thianpa John-a’n keipawh i kal dawn chuan office dawr tur ka nei alawm, min lo nghak rawh a ti a. Tichuan, Friday (September 19, 2014) zinga kal ta lo chuan zan lamah kan chhuak ta zawk a. Monday zana haw leh mai tum kan nih avangin bag dum pakhat lian vaklo ve ve kan keng a, kan zangkhai hle.

Zin kawng chaw @ Bualpui

Zan dar 7 a kan chhuak kha kan tlan tluang hle a, zunram thiar leh chaw ei a chawlh bak din kan nei lo a. Tichuan, tluang takin Shillong khawpui pawh Inrinni zing dar 9 leh a chanve velah ruah sur bur bur hnuaiah kan zu thleng ta a ni.


Zing thingpui @ Ladrymbai
Keimah a ka kal chuan Hotel a thlen tum kha ka ni a, mahse ka thianpa hian a Pa puia (uncle) te an awm a, an inah thleng ang a tih avangin chumi lam chu kan pan ta a.

Kan thlen na
Kan thlen na In a kan innghah fel hnu chuan kan inbual fai vel a. Ka tihtur zawk buaipui zuai tur vel chuan kan chhuak nghal a. Shillong khawpui pawh ruah a sur chuan a nuam lem lo hle a ni. Ka thianpa cousin in a motor in min hman tir a, kan fang kual hneh hle a, a chungah kan lawm hle bawk.

KFC
Neigrihms Hospital

Aquarium
A tuk Sunday ah chuan tihtur kan neih em em loh avangin ruah sur karah kan leng kual vel ta mai mai bawk a.







Ka tihtur ka zo fel tawh bawk a, ka thianpa zawk office dawr turin Monday ah chuan boruak vawt tak hnuaiah kan inphur chhuak leh ta a. Fel mai tura kan rin kha rin ai takin a lo bawrchuar a, nilengin thil pawh ei hman mang lovin kan phe kual zak zak a, Guwahati a chhuk tlang ngai hial in kan awm ta a. Kan buaipui ta rau rau, a hnai bawk a, chhuk tlang leh law law ila  ani mai alawm tiin Tuesday zinga chhuk tum chuan kan inruahman leh ta a ni.

Shillong leh a chhehvelah hian ruah a sur nasa hle a, Guwahati lama kan thiante kan biak pawhin a flood nasa hle tih thu min rawn hrilh bawk a. Sonapur lamah leimin a awm a, Sumo rawn chhuk tur pawh an tang tih te leh Meghalaya ah strike (Economic blockade) a awm avangin an zin motor te pawh an delay nasa hle tih kan hriat te phei chuan min ti phur tawh lo dun khawp mai.

Plan kan han siam leh ta zung zung a, zing karah a hma thei ang berin Guwahati ah chhuk ila, Guwahati ah chuan buaipui rei a ngai lo anga. Tlaiah Shillong ah let chho leh ila, Tuesday zan vekah hian Mizoram lam panin kan haw dawn nia tiin kan mu leh ta phawt a.

Tuesday zing ah chuan dar 6 ah thawh kan tum a, mut kan khamloh em avangin minute 15 mu leh ang kan tia, tichuan dar 6:15 ah kan tho ta a. Thingpui te in in, Guwahati pan turin Civil Hospital lam kan pan ta a. Civil Hospital kawt atang hian engtik lai pawhin Guwahati kal tur Sumo a chan theih a ni.

Dar 7 ah Shillong atang chuan sumo in kan chhuak ta a, kan sumo driver pawh kan be thla nawk nawk a. A car tape a a playlist a dangdai em avangin kan nui thla tiah tiah a. Dar 9:30 velah chuan Nongpoh ah breakfast kan ei thla a. Shillong atanga Guwahati hi darkar 4 tlan vel a ni a, kawng chanve vel kan kal tawh tihna a nih chu.

Nongpoh

Nongpoh atang hian kan chhuak leh a, minute 40 vel kan tlan tih chuan motor rawn let leh ho hian kut an rawn thing chho nawk nawk in min rawn signal hlawm zel a. Motor 4 kan tawh na ah chuan eng nge a chhan tih kan zawt a, road block a awm an ti ringawt a.

Kan tlan thla leh deuh chu lei a lo min nasa mai a, kal tlang chi ziazang a ni lo.



Motor atang kan chhuk a, leimin en tur chuan kan chhuak vek a. Midang pawh an lo tang nasa tawh a, hei hi hemi tuk maia min a ni awm e.

Reilote hnuah kawng siam tlang turin hnathawk motor ho an rawn thleng thla nghal sup sup a, theihtawpin an bei nghal a. An thawk chak bawka tiin darkar reilote ah kan tlang mai ang chu tiin kan nghak thrup hlawm a ni.

Kan sumo pawh chuan kan nghak ve a, mahse ngaihthatlohna engemaw kan neih avangin kan sumo chu a thla la ve hrim hrim teh ang kan ti a. A hnung leh a hma a number plate lang chiang thei ang berin thla te chu kan la  ta a.



Darkar 2 vel zen zawn kan nghak tawh ang tih chuan kan chuanpui vainu pakhat hi a rawn kal a, “Sumo ah khan bag in dah em? A tlan daih ania,” a rawn ti a. Rang lutukin kan din na lam  pan chuan kan kal chho nghal a, kan hmu zo ta lo. Motor intlar tawp na thlengin kan kal chho a, lane lehlam lehlama inthenin kan zawng dun ta char char a, kan hmu zo ta lo.

Kan chuanpui vaiho kha chu leng mai mai tur ang an nih hlawm avangin bungrua an nei ve lem lo a, keini pahnih bungraw neihchhun kan bag dum pahnih chu a tlanpui daih mai a nih chu.

Hemi kan buai lai hi chhun dar 12 vel chiah chiah a ni.

Uluk takin a let zawngin kan zawng thla leh a, kan hmu chuanglo. A hmuna leimin vel rawn enfiah a rawn kal, police officer pakhat chu va hrilh tawp ila a tha ang tiin kan va be tawp a. Ani kan va biak ber kher kha helai district a an DSP (Traffic) a lo ni hlauh a, tichuan ani chuan Nongpoh Police Control Room min biak sak nghal a, kan motor number te chu sawiin chumi ang motor lo tlan a awm chuan lo detain turin thupek a han pe nghal a. Kan awmna lai hi signal kan hmuh thatloh avangin kan phone atang te chuan kan han biak tir nawk nawk a, tichuan ani chuan Motor chho tur zawng ula Nongpoh PS ah han in report nghal rawh u min ti a.

Motor chho tur lah chu a vang em em khawp mai a. Thui fe ke kan kal chhoh hnu in Taxi pakhat a lo tlan hlauh a. Kan chuang ta a, anni lah passenger duhthawh bawk. A khat kher loh chuan tlan chhoh an duh si lo, passenger min zawnpui leh. A rei dawn ta lutuk a, “Tlan chho mai la, passenger i hmuh loh chuan passenger dang chuan na man ang chu kan pe mai ang che,” kan ti a, tichuan kan chho a. Chho zawnga kan tlan meuh chuan passenger khat thrap in a hmu leh ta mai bawk a.

Tichuan Nongpoh PS chu kan han thleng chho a, PCR chu kan pan ding nghal a. PCR duty te lunch an lo ei avangin kan nghak a, kan nghah chhungin FIR te thehlut ve hrim hrim ang tiin FIR te chu kan han ziak chawp nawk nawk a. Kan bag dum pahnih chu kan bungrua a nih thu te chu chiang takin kan ziak lang a.



FIR kan va thehluh na room ah chuan an SI duty hmeichhia chu kan va bia a, ani chuan khawi atanga lokal nge kan nih te min zawt a. Mizoram kan tih chuan pai deuhin Mizo tawngin min be ta a, ngaih a ngam deuh sawt. Mizo chu a ni lo a, Mizoram a la kal lo bawk a, Mizo tawng erawh a thiam hle a ni.

Ani chuan min pui ta nghal sawk sawk a, PCR lamah te chuan min chhoh pui leh a. Min han buaipui sak ta vek a, PCR lama duty te pawh an lo fel em em a. Information kha Police Station hrang hrang ah kan awm lai ngei chuan an pe chho ta zel a, bungraw phurh bo chu bag dum pahnih a nih thu chu Shillong PS thlengin an pe chho ta a ni.

An SI (Madam Shyam) chuan, “Hlauhthawng reng reng suh u, an man ngei ngei ang,” tiin min thlamuan a. PCR duty te pawhin chuti chuan min ti bawk a, an man veleh report min rawn pe anga kan rawn hrilh mai ang che u an ti a. Keini pawh chuan nghah mai loh chu tih tur kan nei lo hle a, kan ril te a tam tawh bawk sia tiin lunch kan ei anga kan lo let leh dawn nia kan ti a.

Kan buai viau ai ei nghek ang tiin Chinese restaurant deuh kher kan zawng a, a vang phian lehnghal. A hnu ah kan hmu hlauh a, hahchawlh pahin tiin muang changin kan chawl a. Kan ei kham hnu chuan PS lamah chuan kan let leh ta a.

PCR kan han thleng leh chiah chu, “In motor sawi kha Umiang Police Station ah an man e. Han kal ula, Nongpoh atang kan rawn chho a ti ula an lo buaipui ang che u,” min ti a. Kan lawm ngei mai.

Umiang chu Ri-Bhoi District chhunga Shillong lam pana Police Station hnuhnung ber a ni a. Kan hriat theih dan tur chuan Barapani bul a ni. Lawmthu te kan inhrilh zawh hnu chuan Umiang lam pan chuan sumo bawkin kan chho leh ta a.

Nongpoh atanga Umiang hi darkar 2 vel zen zawn kan tlan a, kan delay deuh nachhan pawh kalkawngah lung tla thei mai a awm avangin an lo bomb a, hei hi kan nghak deuh reng a ni.

Kawng chhak bomb kan nghak lai
Umiang PS kan thlen chhoh leh meuh hi chuan dar 4 a hnaih thuak tawh a. Umiang PS ah hian an police duty te an lo fel em em a, sumo driver leh sumo pawh chuan lo kawl ran a. Tichuan, sumo ah te chuan min hruai a, kan bungrua, kan bag dum pahnih te chu kan la fel ta a ni.

Umiang PS ah kan sumo chuan na an lo man
“Engtia tih nge in duh?” tiin min zawt a, keini chuan, “Kan sumo chuan man leh helaia kan veikualna senso hi min pe rawh se,” kan ti a. Ani chuan pawisa a nei bawk si lo, kan han inhnial deuh bap bap a.

A tawpah chuan ama sumo kan chuan man bakah Nongpoh kan chhuk thlak leh na tur motor min ngaihtuah sak turin kan inbe fel ta a ni.

Nongpoh pan chuan Marshall motor ngei mai ang chi khan bungraw phurha min phur chungin kan insawh thla leh bawp bawp a. Nongpoh kan thlen thlak leh meuh chuan ruah a sur leh nasa tawh hle a ni.

Kawng kha chu a lo tlang tawh a, amaherawhchu, a min na hmasa bakah khan hmun dang pahnih ah a min belh leh tih te chu police duty ten min lo hrilh a. Guwahati chu kal ngaihna a awm tak loh avangin Shillong lam pan chho leh mai ang tiin Sumo bawkin kan chho leh ta a, Shillong kan thlen chhoh leh chuan zan dar 8 vel a ri tawh a ni.

Shillong ah chuan Hotel ah thleng tawh mai ang tiin Police Bazar a kan hmuh hmasak ber Stay In Guest House ah chuan kan thleng ta a. Inbual fai velin nilengin kan hun hman dan buai tak kan sawi velin hun kan hmang ta mai mai a ni. :D



A tuk Wednesday ah chuan Guwahati kal tawh lovin, Mizoram lam pan tawh zawk phawt mai ang tiin kan rel ta a. Meghalaya Strike awm avang khan buaina a sosang hle a, motor hal leh buaina neuh neuh a awm bakah Sonapur leimin avangin motor a tang nasa tih te pawh chu kan hai der tawp a, haw chu kan tum ta tho a ni.

Sumo a chuan chu kan hne tawh e mai tiin MST Bus in chho ang kan ti a, a tukah chuan MST bus kan va ngaihven a, mahse MST kal ni a lo ni lo a. Sumo bawk chu kan han ngaihven leh a, seat awl kan hmuh chhun chu a tlar hnung ber no. 8 & 9 a ni chauh bawk si a, a dang a awm miau loh chuan tiin kan la fel ta a.

Tlai dar 6/7 vela chhuak tura kan inngaih laiin dar 3 a chhuah tur an ti ta thut si a. Ka thianpa cousin bike in kan lo leng kual vel a, kan buai ngei mai. Dar 2:30 ah in report ngei ngei tur a ni a, Dar 3 a thlen hman loh chuan in kalsan a ni mai an rawn ti si a, kan haw kawng hriat ve ber lah NO ENTRY a lo ni bawk si. Kawng zawng chawpin kan tlan haw a, dar 3 rik hma chiah chiahin Sumo counter chu kan thleng ta hram a.

Dar 3 chiah chiah ah chuan kan chhuak ta a, kan thutna tlar ah chuan Mami, Zarkawt a lo chuang ve a, chuan midang pakhat nen kan khat thra threp thrawp hle mai. Nungchang a tha duh khawp mai, kan che sawn thei meuh lo a ni.

Dar 3 a kan chhuak kha Sumo kan intlar ve nual a, Ladrymbai velah Strike vanga an buaina lai hmun ber chu kan pal tlang ta hram bawk a. Kan hnunga Sumo rawn tlan 3 chu an lo dang a, lung te in an lo vawm a, passenger te pawh an vawm fuh tih te kan hre leh ta zel a. Pakhat rawn tlan tlang lah Sonapur lei a lo min belh leh a, chutah chuan a tang an ti leh bawk sia. Chung lam atangin vengtu chu a awm chiang a ni tiin tluang takin Aizawl chu zing dar 5:30 velah kan lut a. Zing exer la chhelo deuh deuh en pahin Thawh Thut Restaurant ah thingpui te kan in te te a. Kan haw ve thei ta hram a ni.

Ka zin bo chhung hian ka thian sual tak tak ten min lo chhuah chhe khawp mai a. Lal Jo-a te chu police in an man a, an tang tih te in min lo sawi a, pawisa an nei tawh silo a, pawsa puk chawpin an in bail chhuak te an lo ti thul. Lo awih tawk thian dangte zawhna ka dawng hnem malh malh hle. Heng thian sual te hi kawm tawh lo ila a tha ang.




Tin, ka awmloh chhung bawk hian ka motor neih ve chhun ding lai an lo hmu a. VIP light te min lo vuah sak thul.....




Thian sual kawm ka sim tawh dawn. 

4 comments:

Abraham said...

Kapu, dam reng rawh.. hehehehehe

evie_lrs said...

Hahahaa.. Ngaihnawm hle maai. Keichu min la kawm rawh aw.. A sawitu ni lovin a lo awihtu mai chauh ka niaa.. :)

stephen auhmun said...

A ngaihnawm ei

rebecca zochhuanmawii said...

Hahahaahaha