Thlifim tleh heuh heuh tur a awm lo a, chhun lama ni sa in a em nilen thak, concrete bang lum vut vut ke a tlawh tluan chho zuar chung chuan thiante nen kan mu fer fur hlawm a. Inchunga fan pakhat, kum tam fe herh vir tawh loh ni awm taka bal tak chu a vir lup lup a, a ri chik tiah tiah bawk a. Ngaihthlak chian chuan “Bawng sachek, bawng sachek” ti ni awm tak hian a ri reuh a. A ni, hetiang zan hian alawm, khaw lum hnuaia engmah tih tuiawm loh khawpa thlan a chhuah buah buah hian kan titi thin ni.
Light eng te chuan khua a tilum zual hian a hriat a, awngphah te lah chu ur hmin ang mai hian a lum vut vut a, chutah light off na bul hnaia awm ber in light a han off chhak a, “Hmanah khan…” tiin titi bul chu kan tan a ni nghal der thin.
(L-R - Zama, Tka, Aklesh, Arun, Rsa, Opa, Me)
“Opa kha a tenawm ve khawp mai. School kan kal laia vawikhat class a mutthluk der kha in la hria em? Miss Siami khan a chhan a zawt a, a nawmsamloh thu a hrilh. A mutchhuah vang a ni tih kan hre khiau tho si a, subject boring lutuk mai neih laia a lo muthlu bik kha a thikawm khawp mai. Chutah a lo muthlu tui deuh nge, a rawn vawih ri trawt a, a zak lutuk kha, nilengin a’n muthlu der kuit thak a..” tiin RS-a’n bul a han tan a. Kan han nui ri dar dar a…
Hetianga titi hian alawm bul hnaia awm lo thiante chanchin vawrha zankhaw tairek thlenga kan men thin ni.
Kan la nui zo lo tihin, Maia’n a rawn chhunzawm a, “Khaa…hmanah (hmingthup) nen an nih laia school bana kan haw ho kha. Bus ah kan hmaah an thudun ve ngei a. Opa kha a hritlang khuhpuak nasa si a, a tawng hlek dawn chuan a puak dawn si a. A ngawi reng a. A hnua ama sawi leh dan phei chuan, thawk pawh a thaw tha ngam tawh lo a ni awm e, ka hrawk ah a ri hruap hruap tawh a tia. Haha….Chuan (hmingthup-i) khan “I van tawng duhlo em em….” a ti zo chiah a, Opa’n chhan a tum, a ka a ang hman tawk tihin an puak pawp mai kha chu...” Hahaha
“Lalawmpuia kha chu a che uih thei hrim hrim…vawikhat upper khatla atanga lower khatla chhukna step an siam lai kha in la hria em? Ek line chiahin a kal theih a, kan inzui thla dam dam a. A ex te kha an lo chho ve chiah a…”E khu khu, “englo-i” te an lo chho ania, kan tih a a mangan zia kha. Chhoh leh a tum a, kan phal tawh bawk si lo..A der mai rawh kan tih kha. A zawn an lo thlenin a ding vung vung a, a hawi vual vual ringawt…a va inhmeh tak” tiin ka lo chhunzawm ve leh a.
“Kha kha…vawikhat, a star deuh te, amah phei chuan an ni tawh emaw a tih kha, in la hria em? Sunday apianga kan thianho a kan zuk rim pui thin kha, a sur a sa hnuaiah pawh. Kha nu birthday zan khan alawm, zungbun leh present ilo a keng ve nual a. A zuk thlen chuan chu nu chu a bialpa nen an lo awm si, rilru na tawkin a haw a. A hnuah aman a sawi dan chuan, “Ka rilru a na lutuk a, ka haw kha. Zanah pawh ka muhil thei lova, chutah zing dar 3 velah ka pa in min rawn kaitho a, kan vawk talh tur thu min rawn hrilh a. Thawh loh theih si lo a, a hnuah mittui tla chungin vawk ka rawh..” a tih te kha…” Hahaha….
“Englo pawh kha, vawikhat school kal laiin, zingah kaikuang an hmeh a, a eisual kha. School a rawn thlenin a thak nuaih nuaih a, damdawi kan zuk dil pui a. Avil an lo pe a, a mum kha a en a, te a ti lutuk a, mum 3 a ei kha. Assembly neih laiin a thal tep a, kan zawn thlak te kha…” Hahaha
“Vawikhat school banah “Pokemon” thar an inah kan en a, kan en laia current a rawn awm loh kha in la hria em? A disc kha a la in thun laklawh si, kan nghak ngat ngat a, a awm thei bawk si lo a, kan hawsan kha. (Note: Hetih hunlai hian Windows 98 kha OS hman ber a la ni a, improper shutdown hnu a kan on leh hian a hma folder in hawng sa leh thil hawn sa zawng zawng hi a lo in hawng leh thin). A tukah school ah a rawn kal, “Nimin kha hit lo tiah tiah, chaw kan ei dawn a, chaw ei dawhkan kan kil thap tawh a. Inchungah ka nu in computer a lo on a, ka lo hre tawh si lo. Ring tawkin, “Lalawmpui, engatinge i computer ah hian hmeichhe sazu te a lan a?” a rawn ti chiah mai kha chu. Chaw ei a har ngei mai” a tih kha….”
“Chumi i sawi takah chuan Mission Vengthlanga BZ-a te ina kan len tum khan kalkawnga kan kal laiin, CD Library dawr nghaktunu khan ring leng lawngin “Biaka, i thianpa kha a blue film hawh kha a la rawn dah lo ania aw, a rei tawh lutuk” a rawn ti mai kha chu…”
“Chda nen Saron vengah an leng a, Chda’n Opa chu a ti zahthlak thei lutuk a rawn tih kha. An len na a an note khan superhero vel a lo sawipui chiah mai. A tuina zawng tak kha a ni bawk si…Spiderman lem te a chang vel…a rawn tih kha” tiin kan nui leh dar dar a.
A khat tawkin toilet ah kan inluh chhawk chhen a, titi a kal tui laklawh phei chuan zun rei lutuk te hi a uihawm tlat.
Tichuan ka han chhunzawm ve leh a “Ka la hriat reng bawk chu, Rsa kha an inah a riak a, OPa kha ka va text reng a. A chhan chu a tukah an inah chaw kan eikhawm dawn a. Tihdan tur vel ka va zawt a, balance ka nei tawh lo, naktukah kan sawi tha leh dawn nia, zingah ka lo topup anga, a tia. Ka ngei lutuk a, number dang atangin hming lem Emy tih hmangin ka va text ta a. Min chhang tha duh khawp mai a, Rsa kha chuan khami no. pawh kha a hre sa a, a lo hrilh duh miahlo a. Zan rei tawk tak thleng kan inbiak hnu in a tuk a kan thianho chaw ei khawm na turah te chuan min sawm ve nghal mawle…A tukah Emy chu va sawm ta che ka’n ti mai chu…”Emy, i va han chhe tak em! Ka balance a zawh phah vek” a ti teng chhuai..”
“Vawikhat motor a rawn la chhuak, chhas te kan phur chhuak ve ngei a. Sefa nen an nia, a hnungah Puia leh John-a’n bike in an zui a. College veng chho ah motor nen an intawk thut, a buai sa mah nak alaiin chhas te a phur ve bawk si. A hnunga lo tlan te a ngaihtuah tawh lo, a back hrut hrut a, a ri chhuai a. Dak chhuak zuk pahin amah vek chuan “A pawi lo, a pawi lo” a tia, a tlan zawm leh mai a. A hnuah Puia te chuan an rawn zui tawh si lo….workshop a bike nawr luh ngai hial in a lo sut sak chu niin..Haha.. A hnua ama sawi leh dan chuan ka motor number plate an su keh zawk emaw ka tia..te a ti vel” Haha..
“Mizofed petrol pump bul chhukah sawn chho zawngin a tlan chhoh theih John-a ten an tia, a tlan chho ve ringawt a, Traffic ho in an man chiang teh asin aww…”
“Opa kha exam paper an sem apiangin School ka bang tawh dawn, ka nu te paw’n an phal vek a ti ve ziah a. A tukah a rawn kal leh ziah tho mawle..”
“Vawikhat Maths paper ah Mark 4 a hmuh kha…Sir Simon-a’n “Where are the 96 marks? You must commit suicide” a tih kha….hahaha. A tang ve sauh a, next term ah Mark 3 a hmu leh chiah mai kha chu…”
“Entawn te kha a hnehsawh re re, chhuatah lehkhabu a dah a, pheikhawk nen pawh a duh na lai lai a keu thei…”
“Principal signature pawh duhtawkin a thiam a, zingah leave letter sign tur a ngah thei mai mai…pen tui hring te kha a nei hrang thlap…”
“Duhsaki birthday lawmnaa kan kal tum kha la hria em? Motor rawn ken ngei kha…haw lamah Chanmari West ah a chhe ta. Dar 12 a rik te pawhin petrol kan la in hip chhuah siak zak zak..A bul hnai In pakhata pitar khan min khawngaih lutuk a, torch light te min rawn pek kha. A that hnuah lungmuang tawkin Bazar Bungkawn tlumpi ho thutna thinah momo kan ei kha…A tuk school kal peihawm loh ngei mai..khami tum kha chu..”
“Kha kha..Matric result chhuah dawna, result en pui tura kan va sawm kha. A huphurh lutuk a, fail a inring si. Lungleng ah kan chhungin kan kal dawn, dawt ka sawi lo, hei kan chhuak a ni mai, a tih kha. A result kan hriat veleh an landline kan zu bia a, amah bawkin a rawn chhang a, “Kan landline hi Lungleng ah pawh a ken theih a..” te a ti vel…”
“E taka, school kal lai bawka Ngaizel lama kal an phal tawh loh kha, in la hria em? Spy Teacher ten Ngaizel a kal thin an man zingah khan a tel a, khang man ho khan Ngaizela kal thin tho midang hming 4 tal an report tur tih a nih kha…A bialnu hming a’n sawi hmasa ber ah…” hahaha
“Mahse OPa hi chu a fel e.. a inthlahrung thei bawk si. Thiante tih ang ang hian a awm ve peih a”
“Nia…a lerh ve thin deuh tih mai loh chu”
“Bike lampang a tui lai khan a nu in Bike lem a lei sak a, a hnuah boxing a tui leh a, glove an leisak leh a”
“A hla duh ber pawh M2M – Pretty Boy kha a nih ngei kha”
“Korean Serials a ngah theih zia kha, vawikhat world cup final en tumin an inah kan riak khawm a, The Classic kan en zankhua thak kha”..
“Nia….”
“……..”
Sawi tur a vang tial tial a, leilung pawh a lang leh tan ta. Boruak pawh a dai tawh e….Mu ve siai siai tawh ang aw. Zan dangah kan titi leh dawn nia.
