Zirlai ka nia....ka ti ve lo mai ang

Ruah a sur deuh reng avang chuan boruak pawh a nuam angreng hle a. Sikul kan chawlh avangin room lamah lehkhazir turin ka kal a, chair a thut pah chuan tukverh lamah chuan ka ke tlawn sei ve zuar, cher ve tak mai chu ka han thluang thlarh mai a. Ka kezungpui lah chu ka tuam var vu mai a. Ka sikul kal loh chhan pawh test tur kan nei bawk si, ka thiam lo lutukin ka lu ka ti na der a, sikul chawl ka ni. Chutah Betlak (Battle Axe) chu a bawm atangin ka han phawrh chhuak a, ka han tan a, ka han pak khu talh talh a. Tui ti taka ka han si hlarh hlarh mai chu ka kid Damdama’n min awt lutuk tur chu ka han ngaihtuah vel a. Chutah ka lehkhabu, a thar ang maia la awm, a phek pawh la keu ngai reng reng loh chu ka malchungah chuan ka han keu ve a. Lehkha chu chhiar ta lem lo chuan kan kawmthlang kawngpuia mi chi hrang hrang ruah sur kara an vak noh noh chu ka en reng a. A thenin nihliap an ken loh avangin an thil ken remchang chang lehkhabu leh puan te chu an lu-ah dahin huh hlau takin an tlan phe suau suau a. Chutih lai chuan tlangaupa chu mi zingah chuan a lo tlan phei zak zak a, rain coat dum tle zuar mai leh gum boot hring hi a bun a. Hmanhmawh deuhin kan kawmthlang lawka YMA Information Centre-ah chuan a tlan lut a.

Ka rilru te te chuan kan veng chhungah chhiat tawk an awm leh ta emaw ni chu aw, ka ti a. Chhiat tawk chu awm lo hram se ka ti hle mai a, a chhan chu thlan lai tura min phut leh tlat dawn vang a ni. Thlan ka lai loving, kei aia mi tlawmngai an tam e mai, keini te chu sikul kal lai kan ni a, kan zirlai bak kan ngaihtuah thei lo. Chutah ring em em mai hian Information Centre atang chuan mic chu a rawn kiu vawng vawng a, mi ti phu zawk nghe nghe. Mahni tawka ‘kei ka ni’ inti ve ngat pawh ka phut zawk avang chuan ka tlawmngai ru hle mai a. "Halooo….Halloooo….” tih hian a rawn zui nghal a, ka rilru chuan “Kekawrte I ha em? “ ka lo ti a. “Halo….” a rawn ti leh, tlangaupa chuan a rawn puan chhunzawm zel, “YMA Infawrmesawn Sentar atangin chhiat tawh chungchang..” Karei!! Ka hlauh ang ngei ngeiin… “Pi Rebecca Zathlurvungi, kum 85 chu vawiin chawhma dar 11:30 khan Aizawl Civil Hospital ah Cancer natna in a boral a, a ruang hi tlaivarpui a ni anga, naktuk chhun dar 12 ah kan veng thlanmual-ah phum a ni ang,” a rawn ti ta.

Ngatinge mawle, kan veng hian mitthi kan neih zin bik em em mai chu le, te ka ti mai mai a. Zanin chu nula rim-a veng danga len daih tur a ni, ka ti rilru a. A tu ber te inah nge ka len ang aw? Khatla ah kha chuan ka leng lovang, hman zan ka leng ka che thing lutuk tlat. Dar tam tak a rik hnu a dar tlemte atanga a intan leh lai vel hian, "Darling, dar engzat nge?" kan ti dek dek a, room lam atangin a pa in "Naktuk naktuk" a rawn ti vin tuarh a, ka zak bawk si, tingaihna hre hek lo, tawng pawh ka tawng ri ngam tawh lo. Ngawi rengin kan inthlah a, ka chhuak nal nal. Ka thinrim lutuk chu, ka ngaihtuahna in a pa chu ka lo back kick vel, a tlu thuai a, chutah na em emin a mawngah pet chawrh ka tum, ka ngaihtuahnaah ka cheng deuh nge, ka hmaa brick bung chu ka pet chawrh. A va na kher em!! A tlan hlirin ka tlan haw. Engatinge mawle, mi nu leh pa te hian min va ngai thei lo em em, ti te in ka ngaihtuah mai mai a. Ka kezungpui lah chu a la dam har em em mai lehnghal a. Chutah room kawngkhar chu a rawn inhawng thut, rang em em in ka sikret pawh chu tukverhah ka vawmchhuak nghal. Tu nge lo lut pawh en chuang lo chuan "Puak rawh, puak rawh" ka ti vak vak a. Chutah a rawn nui ta vak vak, a nui ri lah ka hriatchian em em, hai mi rual a ni nang! Damdama mawle, ka kid. "Te-a, ngatinge sikul i kal loh a?" a rawn ti fak. Kei chuan,"Min va ti phu chiang kher em. Ka pumchhum mai tur che a nia," ka ti a. "Mawh, ngatinge sikul chu i kal lova?" tih pah chuan ka dawhkan a Battle Axe ngei mai chu a han ban nghal dun dun a. Ka kuttum hang pui chuan a kutah ka man chat. "Ka lu a na a, meizial rim ka ngaithei lo ania. Sikul pawh ka kalloh phah anih hi" ka han ti a. "Nang pawh engatinge i kal loh?" ka han ti let nghal a. A kut lehlamin Betlak chu a la ban hram, sikret pakhat pawh chhuah pah chuan, "Kan thenawm pitar kha, tukkin khan a na zual thut a, ka chhungte zawng zawng damdawiin lamah an tlan phei ve nghal a. In nghah a ngaih bakah, ei rawng bawl tur an awm loh avangin ka chawl a nih hi. Zanin chu kan tlai var ang chu tiraw?" a han ti zawm zat a. Kei chuan "Teuh lo mai, lehkha zir a ngai. Nang pawh lehkha zir ta che. Zirlai kan nih hi kan theihnghilh tur a ni lo. Duty first." ka han ti a, Robin Hood nge nge, kap tha ka inti hle mai.

Damdama chu a phu zawk ni ber hian ka hria. Mak ti hmel takin min en a, chutah hmel pangngai a rawn pu leh. "Lehkha zir te chu i taksa in a ngeih lo a ni lawm ni? Ka taksa hian a ngeih vak lo va, i tih i tih thin kha. Zanin ber khera lehkha zir te i tih? Nge, lehkha zir chhuanlam hian len na tur i lo ngaihtuah leh tawh zawk" a ti a. "Ni pawh a ni mahna" ti ringawtin ka chhang a. "Hman zan lah khan i che chhe em em mai lehnghal a" a han ti chu(h), rang em emin "Engtin nge i hriat?" ka han ti a. Ani chuan "I kezungpui khan a zep thei hlei nem" a tih pah chuan a nui vak vak a. Ka kezungpui vang ringawtin engtin nge ka chetchhiat dan chu a hriat tih ka hre thei chuang lova, mahse Damdama hi mi dangdai tak mai a nih avangin engtin tin emaw a hre leh ni turah ka ngai mai a. Mahse ngawih mai chu ka tum chuang lo, "Kha pawh nangmah vang, leng ang i ti i ti a, ka duh lo chung chung min hruai chhuak a, min haw san leh daih lehnghal a. I ek chhuah vangin" ka'n ti kher a. A nui lo teh asin.

Ka lehkhazir dawhkana lehkhabu awm hnawk nuaih chu huih kiangin, a mawng a han nghat chho auh a. Chutah inti thupui fun tak mai hian a han inkuangkuah a. "Te-a, zirlai kan ni a, lehkhazir hi kan tih tur chu a ni ngei mai. Mahse ngaihtuah chiang teh, kan tlaivar loh chuan tunge tlaivar chuang ang. Tunlaiah khawhar in riak tur te, thlan lai tur te, tlaivar turte pawh an inhmuh zawh tawh mangloh hi. A zavaia kan ti thei lo anih pawhin tlaivar emaw, thlan laih emaw tal chu kan ti ngei ngei tur a ni. Kan zirlai pawh a tihbuai ka ring lem lo. Zirlai nih chhung chuan tlaivar, thlanlaih leh khawhar in riah, a pakhat emaw ber tal hi chu tih ve ngei ngei thin tur." Kei chuan, "Hmmh...pitar lehnghal, bakah anmahni hi ka hmelhriat lo hrim hrim," ka ti a. "Inngaihtuah chiang teh, Te-a. Kan hmelhriat kher chauh hi tlaivarpui thin ila chuan a khawhar chhungte tan a khawhar thlak lehzual dawn asin. Kei pawh, nang pawh, zan khat mitchhin tawk thei vek kan ni. Min hmelhriattute chauh hian min rawn buaipui ta se, kan lung a awi ang em? I pi ngei a thih tum pawh khan khawtlang mipui an that zia leh an tlawmngaih zia kan hmu a ni lawm ni," a ti a. Ka ngawi reng a, sana en pahin Damdama chuan, "Dar 4 a ri dawn der mai, ka va haw tawh ange, chaw ei te pawh kan duh tawh ang," a ti a. "A nih leh, chaw ei tui" tih pahin a biangah chuan kan hnek zauh a. Hei hi kan thiandun infiam dan a ni a, a tu mah mah kan inhnek na ngai lo.

Damdama chhuah hnu chuan a thusawi chu ka ngaihtuah zui mai mai a. Ka kid thusawi mah nise dik tihna riau ka nei ta a. Keini thalai te, kut ke kim nei, damsam lohna engmah nei bawk si lo tan chuan khawhar in kal te chu kan tih tur a lo ni. Mahse, kan zirlai tibuai khawp tur chuan thil engmah kan ti tur a ni lo, zirlai kan nih kan theihnghilh mai mai tur a ni lo. Tun a chinah chuan hnatlan-naah pawh ka tel ve zel tawh ang. Khawtlanga inhman te hi thian siamna a nih bakah, hmelhriat neih ngahna te a nih dawn hi tiin ka ngaihtuah chhunzawm zel a. Zanin chu leng lo phawt ila, Damdama kha tlaivar pui turin va sawm vat teh ang ti chungin ka lo muthlu leh hman a. Ka hming koh ri ka hriat avangin ka harh zawk a, harh mang hlei lovin ka'n eih vak a. Inhnuai lam atangin ka nu in chaw ei turin min lo ko hi a lo ni a. Sana ka en a, dar 4:45 a lo ri tawh. "Aw, ka rawn chhuk nghal" tih pahin ka khuh puak pup pup a.