A thupui chu dangdai hle mai pawh i lo ti mai thei. Nia, a dangdai teh tawp khawp mai. A ngai dam duh tan chuan a ngaih dam theih fu bawk anga! Mahse, mahni saptawng thiam zawng zawng sawmkhawma phuah chu a ni ve miau bawk si a. Mi tih dan deuhin a thupui hi saptawnga dah hian a inhmeh dawn riauin ka'n han hre deuh a. Dah ve leh thuai mai a ni. Hemi chungchang sawi takah chuan, mi thenkhat a thupui saptawng anih avanga a chhungthu saptawng ni leh vek tur anga ngai thin an lo awm bawk a, a thenin a thupui saptawnga dah anih avang hian an han chhiar peih lo ve tawp a. Mahse, hetianga ziah anih avang hian chhiar a nawm loh phahin a hriat lova, mi tamtakin an lo hmang fo tawh bawk a, mi thiam tak tak te pawh an ni hlawm. Kei chu ka ni ve lo.
Mizote hian kan thiam
Mizoramah hian computer kan hmelhriatna a la rei lo hle a, han ti ila. A rei ve tawh fu bawk si a. Computer chu enge a nih a, a thur nge a al tih pawh kan hriat hma daih mai pawh nilo, kan pian hma daih atang tawhin mi fate chuan an lo siamchhuak tawh a. Kan inkhan lo lutuk hi chu a pawi a ni. Chuti nilo se, kan pianna hmun te hian han zir deuh se, Computer hi zofate hian kan siamchhuah a nilo ang tih tunge sawi thei? A chhan chu, Mizote hi thil reng reng thiam chak mi kan ni a, kan thiam zung zung a, kan theihnghilh leh zung zung bawk a. Kan thiam lawr duat a, kan thiam fumfe lem bawk lo a. Mi inzir mi tak kan ni a, computer kan hmelhriat tantirh ngaihtuah chuan hma kan sawn hle mai. Tunah chuan in tina TV kan hung fer fur ang deuhin, in tin deuh thaw ah computer hmuh tur a awm ta a. IT lamah hian Mizote hi kan tui hle a ni tih a hriat theih. Saphovin computer an hmelhriat rei ang vel hi chu hmelhriat ila chuan, kan 'bon' tawh viauin a rinawm, Mizote hian kan thiam tlat.
Computer ka hmu ve
Hmanah, kan tet deuh laiin (ti ve leh khanglang zel ila), computer hi ka hmu ve a, mak ka ti hle mai a. A thra reuh hle mai lehnghal. Mi hian an lo khel melh melh a, ka chak ve khawp mai a. Min khelh tir ve a, chu chu black & white vek a ni a. A wallpaper a an hman 'Roses are Red' tih pawh black & white a ni. Ka’n han thiamlo em em khawp a, ka khawih rei lo, mahse nuam ka ti hle a ni. Chuta tang chuan computer chu ka hmu ve tawh a, ka khawih ve tawh a, ka khel ve chhin tawh a, thiante zingah pawh ka intithei tawh hle. Hetih hun lai hian pawl 4 kan zir lai vel a ni.
Me and my mouse
Keimaha computer ka khawih hmasak ber tum chuan a buaithlak khawp mai a. A hma a ka khelh ka chu mi-in min khelhtir a ni a, tunah chuan keimah ngeiin ka tih ve a ngai ta a ni. Ka pa hian a tihdan min hrilh thin a, engtin tin emaw hian ka’n khel ve zel mai a. Chutih hunlai chuan a 'mouse' hmanna pawh kan la hrelo. A chhan chu, thil min tihtir reng rengah khan a hmanna a awm lo a, tuna kan hman ang hian click tur te a awm ve vak lova. Chhut chawp vek a ngai a, command an ti emawni, khatiang kha chhut zel a ngai thin. Hun a lo kal zel a, han ti teh duah ila. Chumi hnu lawkah chuan mouse hmanna tur chu a lo awm ta. Computer pawhin hma a lo sawn leh deuh a, mouse a click ngai chi ang hian a awm ta a (tuna kan hman ang chi hian). Computer-ah chuan thil chi li ka hmu a, pakhat chu a TV (monitor) a ni a, pakhat dang leh chu a chhutna (keyboard) a ni a, pakhat chu a bawm (CPU) a ni a, tin, pakhat leh chu a mouse hi a ni.
Chu mouse te chu
Mouse chu kan han khawih ve ringawt, tum aia thui thui a tawlh ta thut thut mai a, tum loh deuh deuhah kan hmet churh churh mai a. A buaithlak duh khawp mai. Uluk deuhin zawi te tein kut khinghnih tangkawp meuhin ka’n han khawih ta a, ka la buai tulh tulh. A tawlh duh khawp mai. Tlem tlemin kan khawih thiam ta tulh tulh a, khawih vel pawh a nuam tan hle. A TV-a han kal kual tir zet zet te chu a nuam hle mai a, kan ti kual kan ti kual ta a ni. Kan duh duhna-ah kan hmet a, kan duh duhnaah kan dah kual vel a. Tunah chuan a tel lovin a awm theih tawh loh. Engtik lai pawhin kan hum tut reng mai a ni. Pa lian pui pui pawh hi computer hmaa an thut tawh chuan, thil tereuhte an hum tut zel a, chu chu he a 'mouse' ngei mai hi a ni. A tel lo chuan computer a kim thei lo. Hna a ti chak a, thil han tihkual vel zung zung a ti awlsam bawk a, a tangkai em em a ni. Mouse lah hi a chi hrang hrang a lo awm a, a hnuaia thil mum awm chi te, a awm lo chi, a eng thei chi te a awm a, mahse mouse chu a ni ve vek tho bawk sia!
A tangkai asin!!
Computer hi a tangkai hle a, a tangkai zia chu a hrechiangtute kan ni. Thil engkim hi computer hmanga tih deuh vek a tih theih hial awm e. Thian kawm tur hre lo tan thian tha tak a ni thei a. Kan tan a rinawm a, kan thu thu-in a awm mai zel bawk thin. Tunah phei chuan zai chi hrang hrang leh a milem lang chi te a ngaihthlak theihin a en theih bawk a. Kan thlalak chi hrang hrang te a dahthat theih a, thlalak chhia tih vel a awm ve tawh lova, a tangkai takzet zet a ni. Kan chanchinbu zawng zawng te, kan office thil pawimawh zawng zawng te, kan thil chhinchhiah zawng zawng te hi computer hmanga tih deuh vek a ni. Typewriter aiin a tha daih zawk, chhut nat vak vak a ngai ve lova, tin, chhut sual palh pawhin a nawhreh leh zel theih bawk sia. A fel faiin, hawrawp chi hrang hrang thlan tur a tam bawk si a. Dik taka sawi chuan, mi tam tak hi chu computer a zai kan ngaihthlak tam avanga hla hre tam te kan ni hlawm a, computer a thil chi hrang hrang kan hmuha kan en theih avanga inti bengvara inti changkang te pawh kan ni awm e. Maipawl put ai pawhin beng a var duh zawk!! Games te kan khel a, a nuam em asin. Middle sikul-a kan kal laiin kan thianpa pakhat hian games hi an atchilh em em khawp a, chu games chu ‘Mortal Kombat’ kha a nia. Sikul-ah te hian kan in ‘fight’ der thin a, chet a lak dawn apiang hian “Back Back Low-Punch” te hi an han tia, a che pawp pawp zel. Mortal Kombat khel thin chuan a awmzia kan hre mai ang. Chutiang khawp chuan mi rilru a hneh thei a ni. A tha zawng leh a tangkai zawnga hman thiam a pawimawh hle. Thil pakhat leh chu he ka thianpa bawk hian games ka pe ang che, min ti a. Kei lah pek chuan kan aw ve leh mai a. Floppy ah hian ka rawn khung teuh mai, a ti a. Kei chuan ka hawn ve mai a. Floppy pakhatah chuan games chi 20 vel hi a hming chuan a thun ve e. Mahse, a executable file chiah kha a lo thun nghek mai chu niin, a buaithlak thin teh e. Kei lahin hrethiam hek lo, a khelh theih si loh a, a floppy chu a chhia aniang tiin kan mawhpuh ta ringawt a. Mak thei ngei!
Computer hmangin hmun hla tak tak a awmte pawh a inbiak theih a, kan click zeuh zeuh a, lehkha te kan inthawn kual zeuh zeuh a, engkim mai hi mouse a kan han click khik khek tawh hi chuan a fel nghal kuar kuar maiin, a zo duak duak mai thin a ni. Chuvangin ka ‘mouse’ te hi a lo tangkai hle a ni tih ka hrechhuak ta a. Saptawng tlem hmangin ‘My Mouse Is My Best Friend’ ka ti lo thei lo a ni.
15.2.2006
No comments:
Post a Comment