Hmasawn tumin....

Kan ti nek nek a, thing delh loh lung delh loh na na na chu ti hian kan lo thanglian chho ve a. Sikul uniform hak hun lai kan han kal pelh meuh chuan engtin tin emaw Delhi tlang chu kan chuang chhuak ve ta reng mai. Delhi tlang hi kan ti ve tehchhen a, tlang pakhatmah ka la hmu lo reng reng, speed breaker te hi ka tlang hmuh san pawl te chu an ni mai a. A lo lum nasa mai a, haw leh mai teh pawh a chakawm thin rum rum mai. Sum leh pai neih zawng zawngin hmasawn tuma rawn chhuk ve kha kan ni miau a, han haw leh rik-ngawt lah chu a 'man' lo ang reng bawk si. Kan 'Switzerland of the East' ah khi chuan awm ta ila, thianpa Maia te pawh Durtlang bawngek rap pherh ve mai mai tur kha an ni a, hma chu kan sawn ta phawt. Durtlang bawngek ai chuan Delhi

bawngek chu a ch.k deuh alawm le!!

Delhi a lehkha zir tura chhuk thar emaw, eng eng emaw ti tura awm thar hrim hrim chu heta awm sa ten duat tak maiin a saptawng takin 'fresher' tiin min han vuah sak a. Keini ang mi mawl leh krismas la hmang tlem tan chuan 'fresher' hming han put ringawt pawh kha Aizawl lama thiante intihtheih khumna atana tha fahran mai a lo ni. A then chu nu leh pa ten an rawn kal pui a, a then chu an u te, an cousin te leh thiante etc, a then chu mahni in kan rawn chhuk tawl a, heti lama thian tha te, in hming ka sawi lang kher lovang, min puihna zawng zawngah lawmthu kan sawi tak meuh meuh a ni.

Mi tihloh dan pawh a ni lo tiin in chu kan han luah ve rawih a. Vai tawng thiam bawk si lo, sap tawng lah rem khawm chawp tak meuh meuha phuh chhuak thin tan chuan beidawn rum rum chang a tam duh khawp mai. Zikpuii pa 'CC Coy. No. 27' thawnthu hi vawi engzah nge ka chhiar tawh ka hre lo a, Ralkapzauva dinhmun nena in tehkhin chuan keini chu nep te hi a lo ni thin. Zirlai tan chuan engkim hi thil thar vek a ni a, lehkha zir mai bakah sawi tham si loh thil zir tur hi a lo tam khawp mai. In-a han awm chuan, class kal bak tih tur dang vak awm hek lo, a lum thin bawk si. Han leng chhuak dawn ila, pawisa a lo ngai zel bawk si. Mi tih dan ang bawkin, zan te chu kan han meng rei ve vak a, zing lamah hma taka thawh a, insawizawi aiin, tlai tawkah, zawi sa in kan han tho chhap chhap a. Ei rawng te pawh phuai deuh neih nuaih chuan kan han bawl ve bawk a. A ei lam erawh kan ei hnem thei narawh e.

Lunglen mawlh mai hi. In lung a leng ve theuh thin awm e, mahse Aizawl lam aiin helamah hi chuan lung len a har zawkin ka hria!! Khaw lum hian lunglen te hi a hnawt triau vek a, bakah, 'man' leh 'man' in melh sen rum reng hi chuan lunglen te pawh hi a lo har thin a ni. Verandah ah han thu chhuak ila, Reiek tlang thlir tur awm lo, vai hlir vai hlir kan hmu a, thli fim te chu khawi lam, khawi khawi lai atangin thli uih a rawn thaw leh huk thin. Tihtur a awm loh na na na chuan thil sual tih mai pawh a lo awl dawn khawp mai, chuvangin, tih tur kan hriat loh laia kan tih loh tur kan hriat a tha hle. Tunlai chhanah chuan mi fel nih hlawh hi a har tawh lo khawp mai a, ruihtheih thil ti lo hi chu 'mi fel' tiin kan sawi mai tawh a nih hi. Chuvangin, 'mi fel' nih kan duh chuan insumtheihna kan mamawh hle a lo ni.

Khawvela vai tamna ber ram, kawtthler pakhat vai lo awm zawng zawng hian kan hmingin min lo ko zel sela, kan eih hlum thak thei ang tih tur khawpa tamna ah chuan a khat tawkin, kan hmel an pui deuh kan han hmu leh nulh zel a, thla te pawh a muang ve sawt zel. Khami kha mizo a ni emaw ni lo emaw, kan hmel anpui anihna hrim hrim kha a thlamuan thlak ve a. Maipawl tlak hmeha dul ti kiar ve mai mai tur khan car nalh tak tak leh bike nalh tak tak kan han hmuh meuh chuan, miin min ngaisang lo mahse, kan in dah sang vah tawh. Kan veng lamah kan haw leh mah ila, 'phaia awm' kha kan ni miau tawh a, induh vah tawh tur. A hrim hrimin, roti han ei te pawh a changkang deuh alawm le, thil changkang ngaina tih takah. Maipawl han tih ngawt ai chuan Roti han ti puam talh talh pawh, kan tribal hmui hian a phun rem thiam ve nuap nuap khawp mai.

Thil engkim, kan vawikhat tihna zel a nih avangin chet chhiat chang lah a tam. Kawng bo hi chu ngai ah kan neih thei mai tawh a, kan bial inkhawmnaa inkhawm hruaitu tur thutna a kan thut ut te kha chu sawi lang lo law law ila, tawng thiamin a daih loh avanga hmarcha polythene khata kan khai haw hnawk tum te kha sawi lo mai ang. Engpawhnise, thil zir tura, hmasawn tuma kal thla vek kan nih kha.

Chanchin nalh lo tak tak nei te pawh hman atangin an lo awm tawh thin, mahse hei chu mi tlemte chauh an ni. Mi tupawh hi mahni a chhia leh tha thliar hrang thei vek kan ni, in zilh leh in sawihmuh that kan ngai hranpa tawh lo, kan hre vek. I duhloh miau chuan thil sual i ti miah lo ang. I bulah awm rem rumin, let rem rum mahse, chaw in ar a pan ngailo tih i hriat kha. Tu emaw tih dan takah, zing i harh veleh, thawh phan pawh sawi lovin, ring tha leng lawng khan, 'Praise The Lord' han ti ve thuai la, enga a hnathawh dan chu nangman i hre mai ang. Mahni tawka tu emaw tak nih tum theuhin in zir tang tang ila, beidawng mai lovin. Tumruh leh chhel taka i inzir tang tang chuan, i future chu a bright mai pawh ni lovin, a tletin a lo tle vet vet tawh mai dawn a ni. Lehkha zir, inkhawm leh inbual hi chu inchhir a har teh mai ania.

30.7.2007