Chhas

Nimin piah lawkah Valentines Day kan hmang a, khami ni khan mi thenkhatin ‘i va hawi hil awm ve’ an rawn ti nual a. Ni e, khami ni kha in hmangaih te Ni a ni tih mi sawi ka hria. Enge hawi hil tih pawh chu a awmzia ka hre ta chuang lo a, kei ‘innocent‘ lutuk mai hian. Pu adelfos te anga ‘Psychology of Love’ lehkhabu ziak tur hre ve lo mah ila, ka zawn tum dan tal chu kan thai rang ve leh teh ang. Zei Book kha chu ka chhiar ve ngei alawm, mahse a har talh tho mai. RTPA chuan a hmang tangkai phian a ni awm e, engmah chu ka hriatpui ve lem lo a. ;P Benji lah hi khami ni kher kher kha chuan missed call pawh a dawng hnem hle a ni awm e, chhungte lam atangin. Sam sei lam a be rei deuh aniang.

Kanidari te anga nuthlawi nghei hlei lo tal pawh biak that tur kan hriat ve loh avang leh, Pu Keimah te anga “hmangaihna” tih hi chu ka hmuhchhuah kan ti ve ngam loh avang te pawh a niang. A, a thui ltk dawn. Pu Zorun te, Pu H. Vangchhia te, Pu Burgerstud te phei chu sawi lo law law teh ang, an hmel en hian ‘Kei ka ni’ ti thrah an nia. A samsei ber ‘Pi‘ BMW lah hi, nui thler duai duai ringot a, ‘propose’ chi ni bawk si lo.

Awle, chhas chu kan zawng teh ang. Darrokima nupui zawn dan style deuh khan. Nakkum V-Day chu ‘A nuam em?’ tia zawhna ka dawn theih nan. Cindy saw ka va be tawp dawn emaw ni le, ani hi naupan lai atanga ka kawm thin ania. A ngo si, sam sei nalh si, fel reuh bawk si, sap hming a la nei zui. A zirna lam chu ka hriatpui vak lo, a thiam thei vak lo an ti tih chu ka hria. Mahse, va be dawn ringawt ila min hrechiang si. Tetlai pawha ‘Lulian‘ tia min chhaih ziah tu kha a ni sia, ka zak deuh reuh. “Nang pui hi, i lu a len nen nen, thluak te hi nei ve deuh la chuan aw,” min lo ti zek ang tih ka hlau. Ti rih lo mai teng.

Nih leh an kawmchhak deuh ami Babie saw. Enge a an ang? A u pawh a chhelo lutuk, amah pawh chuti tho. Be tawp mai dawn emaw ni le, Cindy leh Babie hi chu ka naupan at zual lai pawha “To be with you” hla ka sak khum thin kha an ni a, “C’mon Babie, C’mon Cindy, Let me be the one to show you..” ti khan an inkawtah te khan ka zai thin a. Khatia ka lo zai thin kha a va pawi tak em, tunah hian ka be ngam mang tawh hleinem. Nunhlui sawi chhuah changa, khami an sawi tel ziah kha chuan za lo deuha nuih nuih kha a ngai thin a. Ti leh lo phawt mai teh ang, a dang zawng leh ang.

Sawmi pawh saw a chhelo mawle. Mi zawng zawng star rawn ania, tin, chhas a nei lo. A fel si, zirtirtu a nia, Sunday ah lah a nalh thei na ngiang mai. Mahse, “Ka nau” tia min koh tlat thin avang leh, “U Sawm” tia ka koh thin atang ringot pawh hian a ‘Si‘ ve tawk tawh tih chu a hriat. Tin, chubakah, ka nau hian a * ve tho bawk si a, unau naua * in tawm chu tihchi vak loh, a hrang ve ve in kan leng chhuak a, len luhna a lo inang leh trut zel a. Lo thu rawh tih paha, kan unaua kan laitat hnu a awmdan mawi min hrilh melh melh mai thin hi chuan, a zialo lam deuh chu a ni. Ka beidawng tawh hrih, mahni a chhas zawn chu ka tlin mawlh lo.

Thiante ka’n pun mai teh ang. Khawnge thianpa Eric-a saw a zei alawm. Hmeichhia chu a duh duh a thing thei an tia, ka va be re re teh ang. Mahse ani pui hi, chho zawng pawha tawlhthlu thei, nitin damlohna chi hrang hrang nei thin a ni sia. Ka ngaihtuah deuh, a khawngaihthlak ka ti. Min tihpui lai te in a damlo thut anga, a tihchi loh. Anih loh pawhin, aieng tui hi bottle in min pai tir ang tih ka hlau si. A thatlohna chhuah hian aieng tui a tlak leh pap zel a, a zia ve phian zel. Midang ka be mai ang.

OPa a awm alawm, hai sikul atang tawha nitin haw pui tur nei thei kha ania. Tin, chhas a rim dawn apianga zahzela min hman ziah thin avangin tun tum chu min zawnpui a ba ve hrim hrim. Mahse ani hi ama tan chiah hian kua a hreuh thiam an ti. Midang a lenpui chuan, an tuina lam pawh ngaihtuah lovin ‘pikachu chu a in evolve chuan raichu ania’ tih vel te kha a sawi thin a. CHD-a pawhin a lenpui a, an lennaah spiderman lem a chang vel a ni awm e. Chuvangin a che chukchu ang tih ka hlau deuh sia, ti leh lo phawt ang.

Puithu deuh hlek leh serious deuh ka mamawh ani. Awle, thianpa Maia hi pun mai teh ang. Ani hi a puitling deuh a, bakah a hunah chuan a zei ve riau tih pawh ka hria. Mahse, pawi ber mai chu a hmel hi a ni. Hmeichhia hian hmuh thalo an hmuh hian an damloh phah thei thin sia. Min va lenpui pawh nise, “Tunge i thianpa hi, pressure cooker a ham puar pup duh hmel” te hi an lo ti anga, ka thianpa ani sia, ka lainat dawn bawk si. Midang kan zawng leh chhin.

E, thianpa Chd-a hi bia ang. Ani hi midang tana zawn thiam, mahni tana zawng thiamlo an ti tak e. Mahse, lennaah a tawng tuihnai lo thei lutuk hi buaithlak. “In inchunga khi sazu a tlan leh tawh, ah! khuta pawh khu” tih vel kha a ching thin a, hmeichhe tan chuan tawng ngamna chi hi a ni tawh thin lo. Ka thiante ho hi an va lo laktlak loh hlawm ve mawle.

Bei tih dawn nan RS-a be leh ang. Ani hi thingpui heh hlur ringawt mai. Regular taka a lenna thinah phei chuan naupang an nei sia, “Thingpuiheha a lo leng leh ta” a lo ti ziah a ni awm e. Zahna chang lah chu zu han hre der lo a. Lennaah hian Ngopa thingpui tui zia ringawt te kha a fak chiam anga, lenna ten thingpui min lum pawhin an thingpui tui zia ringawt emaw kha a sawi a ni anga. A point ah tak kan luh theih loh ka hlau. Ka va beidawng tak em! Thianpa John-a lah saw hmeichhe ina len tawh chuan ‘unconcious’ in a awm ta emaw tih mai tur, biak tawng theih tawh ngai lo re re, thuthleng sirah a lo thu khawng ngawi kar zel a. Saw saw chu be lo law law ang.

A, ka beidawng a ni e. Nakkum pawh, “I va hawihil ve” an tih pawhin ka nui liam leh mai mai ang.

* A chunga thu khi dawt muhlum leh thutak tlem chawhpawlh a ni e.

- 15^th Feb, 2008