Min han hrereng ang che aw

Hla taka ui bauh ri leh bauh bauh thin bak chu thawm a awm meuh lo a. A khat tawkin an in thlang lawka kawngpuiah chuan motor a rawn tlan ri leh fua thin. Thla a sik tawh avangin khua chu a vawt em em a, thli lah chuan thawt a tum der lo, khawvel chu a rehin a reh tlawk tlawk mai a ni. Hetihlaia a apartment hlui tawh tak maiah chuan Jim-a chu muhil thei lovin vawt ti takin a mu khur beuh beuh a. Mutthilh tuma a mit a chhin pawhin awmzia a nei thei lo, a bengah chu dar ri ang mai hian a kiu vawng vawng reng a. A ngaihtuahna a kalthui thawkhat hle tih hriat turin a mut dan ngai chuan harh reng chung siin a mu char char thin.

A mit atang chuan dan rual loha nasa a mittui a rawn chhuah avangin a lukham, bal ung tak mai chu a huh dup a. Banga sana tarah chuan zanlai dar 1 a pel tawh a, mutthilh tum nasa teh mahse a thei tlat lo. Heti taka a mutthilh theihloh chhan hi, he tlangval hian engmaw tak ngaihtuah a nei a ni ngei ang le. A khat tawkin bawm tereuhte chhunga zungbun chu a en a, a mittui a far leh fap thin. Chutia, lungngai taka a awm reng lai chuan a lukham bul maiah chuan a cell phone lian tha tak chu a dah ran a. Engemaw thutah pawh ban mai a harsat loh nan ti niawm takin, a lubul chet-ah chuan a dah phei a. Thla lah chu a eng tha ngang mai, a tukverh karah chuan thla eng chu a rawn in khawh thla zar mai a. Khua a thiang tha in, zandang chu nise, tui takin a muhil bawrh bawrh tawh ang chu.

Dar 1:20 a ri ta. Chutihlai chuan Jim-a pawh rilru hahna a nei tih hriat loh takin, a chhing ta sar sar a. A chhuak tawngkhawng tawh a ni ngei ang. A lu bul maia a dah a cell-phone chu a rawn ri ta tlat mai. Mutchhuak leh phak tak chuan a han ban hram hram a, tunge a rawn betu chu tiin a en a, a hriat mi a ni lo nge, a thlek deuh vung vung hnu ah a chhang ta a. A rinloh tak maiin a thianpa a kawmngeih em em mai a lo ni hlauh a, "E Jim, i va mutui tawh awm ve," a rawn ti a. Ani chuan zawi tak hian, "Ka lo mu dawn chiah a," , "E, lehkha zirna te i tluang em? Krismas te chu kan hmang ho ang chu tiraw? I rawn haw thei dawn em?", "Aw haw thei ang,", "E Jim, thil hrilh chakawm loh deuh mai ka nei a..,", "Eng thu nge ni ta a? Enge ni ta, Puia.. tawng ta che.." tiin Jim-a chu a phawk khawp mai a.

"Jim, ka thianpa, a pawi khawp mai, kan chhan thei ngang lo a ni," a rawn ti chuai raih a. A thusawi chu a aw atang chuan a inthlahrung hle a ni tih a hriat a. Jim-a chuan, "Enge i sawi chu a awmzia, Amy a thi maw?", "Doctor ten an theihtawp an chhuah a, an hlawhchham a ni e. Jim, a pawi hle mai." tiin a chhang a. Jim-a chuan a phone kenlai chu a hum reng a, a thianpa tawng chu chhan a tum tawh lo. A thianpa chuan, "Jim... Jim.... Hellooo" a rawn la ti trang trang a, mahse lungtum biak ang chauh a ni. Chhang tur a awm tawh lo. Chu tlangval khawngaihthlak tak mai chu, a bialnu, a hmangaih em em Amy chuan thisen cancer vangin a thih san ta anih chu. A va han lainatawm tak em!

A rei tawh, High School an kal lai atang tawha inngaizawng an ni a. Tha taka an pass chhuah hnu ah zirna tha zawk beiseiin phai lamah college kal te pawh an tum ve ve a. Mahse, High School an chhuah hlim atang khan Amy hian insawiselna a nei tan a. Mahse, engemaw harsatna tling tham leh zirna ti buai tham a nih loh avangin College pawh chu phai lamah chuan an zir dun ta ve ve a. Tluang takin an zir chho zel dawn emaw an tih laiin Amy chu a damlo zing ta riau mai a. A hriselna a tlak chak em avangin 2nd year an zirlai chuan Aizawl lamah a hawchho ta nge nge a. Hemi tuma an inthlah hi a hmutu tamtak mittui kochhuahtu a ni hial.

Aizawl lam a ngeih a ni chek ang chu! Amy pawh a hrisel chho tan hle mai a, college te pawh kal chhunzawm ve lehin, hlim takin a hun a hmang a. Jim-a nen pawh an inbe pawh reng thin a. Nikhat an inbiak loh pawhin an khua a har dun hman thin hle. Kum khat a vei meuh chuan an nunphung pawh a pangngai reng thei ta lo. Amy chu a damlohna a rawn chhuak leh a, a khua te a sik a, chaw a ei thei bawk si lo. A taksa chu a dang bei a, a ni telin a tla duak duak mai a. Damdawiin lamah te an lut chamchi a, an chhuak leh thin, mahse rei a daih ngai lo. A thatlai chuan a tha viau a, mahse a natna a chhuah erawh chuan thenrual thate an inpunkhawm trak trak hman thin.

Hemi kum pawh hian kum dang ang bawkin krismas hunah chuan an inhmukhawm anga, hlim takin hun an hmang chu tia an suangtuah nauh nauh thin kha a ni a. Favang khawnuam a rawn inher chhuak a, chungte chuan Jim-a tan chuan mawina reng a nei thei lo. Amy a ngaihtuahna lamah hian zan tam chu a mu thei ngai meuh lo. Thlasik a rawn inherchhuak a, Amy pawh a tha leh hret hret a. Jim nen an inbiak chang chuan an hlim thei hle a, Jim-a chuan a hriat lohin christmas present ah thil engemaw tha tak leisak a tum ru ran a. A pawisa neih hmasak berin zungbun nalh tak mai a leisak nghe nghe a, a lehkhazirna dawhkanah hian a dahchhuak thin a, in a chhuahsan dawn erawh chuan a suitcase ah chuan kalh hnan thlap thin.

Nitinin chu zungbun chu a en a, a buntu kut nen a inhmeh dawna a hriat em avangin a hlim thin hle. Hun a kal zel a, Jim-a pawh exam te zo in, Krismas hunah Aizawl lama haw tumin a inpuahchah mek a ni a. A lehkhazir dawhkana a thutchhuah apiangin chu zungbun chu a en thin a, a mutnaah a mutpui thin bawk a, a ngaih hi a tha hliah hliah thin a ni. Chu zungbung chu a bula a awm chuan a suangtuahna khawvel chu Amy hlirin a luah khat thin a, Amy chu a bula awm angin a hre thin.

Zan khat chu chutia hlim taka a mutpui lai chuan, a phone ah chuan message a dawng a. A han chhiar a, "tnah khn amy a zual tht a, damdoiin ah kn hruai nghal a, ngaihtuahom ltk cu a ni lo," tih zawng hi a ni a. Chu thu chuan a ngaih a ti tha ta hauh lo mai le, a rawn thawntu a thiannu chu a han phone nghal a, mahse a tlang thei tlat lo. A tih nawn ngat ngat hnu pawhin a tlang thei si lo a, sms chu a han thawn let ve a "engtn nge a awm a? a van zialo ve. a tan ka tt chr2 ania, cc rawn silh chr2 rh." A rawn thawntu bawk chuan, "tnah hian unconscious in a om a, oxygen an pe mek, a tha leh mai ang, lo naituah dh suh" tih zawng a hmu leh a. A ngaihtuahna a bing ta mup mup mai. A hmangaih ber Amy chu tunah damdawiin ah chuan doctor thiam tak tak leh nurse fel tak tak te chuan an din hual thup awm si a. Thenrual thra te leh chhungkhat hnaite chu damdawiin bul velah chuan vawt ti takin an awm thrap bawk anga, ngaiteh, Amy hmangaih ber mai Jim chu a awm ve dawn tlat lo.

Amy chu a dam leh ngei ngei nan, Jim chuan rilru tawngtaina in a hlan char char a. A mittui chu a far fap fap reng a, a muhil thei lo. Mut tum sa teh mahse, khua lah chu a vawt vin tuk a. A zungbun chu a'n en thin a, a hlim thei tlat lo. A damchhuak angem? A rilru a a ngaihtuah ber leh a hmangaih ber, a aw mawi tak mai te kha a ngaihtuah a. Hemi tuk pawh hian an inbiak reng kha mawle. Khami tum khan Amy khan Jim, i rawn haw hun chuan thil a danglam tawh ang, a ti a. Kha kha Jim-a chuan engemaw tak Amy chuan thil a tihsak dawn a ni ang a ti rilru a. Mahse, a thih tur hi a hre lawk a ni chek ang chu. A haw leh hun chuan thil chu a danglam tawh ngei ang le.

Chu tlangval lainatawm tak chu, a thianpa in Amy thih thu a rawn hrilh zo chiah kha, a phone chu khumah a paihthla a, pawnah chuan a va dakchhuak dawn a. Kawngkhar bulah chuan a ding a, a mittui chu dan rual loh in a sur zung zung a, chutah pawnah chuan zawi muangin a va chhuak ta a. Van lam chu a han dak a, van chu a thiang kuk mai a, thla lah chu a eng tha em em mai a, a bial lo chauh a ni a. A eng chuan a vela thing leh in hrang hrang te chu a chhun paw chuk hlawm a. Zan danga a lung ti leng thintu kha a tah tichhuaktu an chang zo ta. Dan rual lohvin, tap chhuak ngam si lovin, a in sut fap fap a.

Chutah bang nghengin a thru rap a, a kuta a ken zungbun bawm tetakte chu a hawng a. A kut ah chuan a han rawlh thla zal zal a, a mittui chu zungbun ah chuan a rawn far fap fap thin a. A chung zawna thla pawh chuan a tuarpui ni awm tak hian a duk deuh khuih a, chumi en pah chuan zawi sap hian "Amy... ka hmangaih.... min han hrereng thin ang che aw....." a ti sap a...

Last night I had a crazy dream

A wish was granted just for me,

It could be for anything

I didn't ask for money

Or a mansion in Malibu

I simply wished, for one more day with you

One more day

One more time

One more sunset, baby I'd be satisfied

But then again

I know what it would do

Leave me wishing still, for one more day with you

First thing

I'd do, is pray for time to crawl

Then I'd unplug the telephone

And keep the tv off

I'd hold you every second

Say a million I Love You's

That's what I'd do. With one more day with you

November 23, 2007, 3:32 AM