Bombati mawlh kha!

A lam dan tur diktaka lam nghal theih loh thu tam tak kan neih zingah "Bombati" hi a langsar ber pawl a ni awm e. Mombati han tih mai tur kha bombati tia lam kha a awlsam phian a, mom an tih hmun hmun ai kha chuan bomb han ti deuh te pawh kha a pa riau alawm! A zotrawng tak chuan 'sathau khawnvar' te pawh kan ti a, a saptawng tak chuan 'candle' an ti emaw ni. He thil te hi chu a tangkai ve reuh ngawt mai.

Kan naupan lai (ti khanglang ziah teh ang!) hian zanah 'current' hi kan han nei zing malh malh thei khawp mai a. A rawn awm leh zuk zuk thin a, hun dang zawng chu tukverha dah chhuah paha 'VIP ho chu an eng thrup mai' tih bak sawi theih kan nei ngai lo. A nei faten khawl hmanga current neih theihna 'inverter' an tih ang chi hi an nei a, an inchhung te chu a eng pup thin. Cartoon Network a kan thil enchak tak mai a chhuah lai a nih phei chuan, thenawm te inverter hmanga en tura tlan chhuah thut kha a chakawm thin ngawt mai. Mahse, nu ten an phal ngai miau si lo. "Lehkha zir rawh u" tih zawng kha an tawngkam kan dawn chhun a nia, zawm nghal mai loh phei chuan hmunphiah nena in fight zak zak kha a ngai thin.

Mombati tam thei ang ber kan han chhi a. Mombati pathum, vei lam leh ding lamah pakhat ve ve, hma lamah pakhat kan dah bawk chuan ngaih hi a thra ve em em ringawt zel. Lehkhazir peih vak loh zan chuan, mombati enga zir hi ka mit in a ngeih lo han ti ila. Han chhing vang vang ila, nu te pawh hian min kal pel ve mai zel. Nu te an kal hla ta maw tih ah, pencil leng lo lo khawpa kan hnawhna box ngei mai kha han phawrh chhuak ila. Uluk taka pakhat te te a en zawh vek hnu ah, kan ui loh ber kha phawrh chhuak ila, nunchan zir nan kan hmang leh dawn a ni.

Mombati alh ah chuan kan han rawh zeuh zeuh a, a chang leh ut trep trepin kan han rawh a. A chang leh kan va hliau zeuh zeuh a. Mombati tuia zu chiaha han hliau zeuh zeuh khan thil ziah te kha a dum tha duh bik riau. Chutah, pencil chu a bal ung ta fe tihah, pencil zumna han phawrh chhuak a, nu ber pawhin lehkha zir tha nge tha lo a rawn check leh tawh a. Serious tawkin pencil kha lo zum vel hmarh hmarh ila, ngawi rengin a kal bo leh nghal a ni mai.

Current a awmlo rei tawh a, rannung thlawk thei chi hrang hrang pawhin eng awmchhun mombati chu an rawn hnaih leh hrat hrat tawh a. A remchang chang leh thlawk muang deuh chu kan lo man chat chat a, an tan chuan meidil a tlak ai pawha hrehawm tur chuan lainatna nei miah lovin kan han rawh leh sawk sawk a. Rannung awm remchang apiang chu mombati tui sa ah chuan an duhthu pawh ni lovin an lut nghal zel a. A then chu an thih hma deuh hlekin han phawrh chhuak leh ila, pawnah han dahvawt ila, a sathau kha a khang a, an taksa sathau in a khuh loh lai kha an tal faih faih a, uluk fahranin, a khang lai zawng chu kan han rawh tui leh a. Tihpalh thil thu ah rannung pawh chu kan hal hlum leh nge nge thin.

Ngawiteh, box ah khan chemte ka nei alawm. Tunah chuan mistiri-side a rawn chhuak leh ta. Mombati kha uluk fahranin design kan han siamsak ta thin a. A chang leh kual thla pap papin kan han rek a, a chang leh a hnuai kan han zei mam a, ngil takin a ding thei thin. Hetia han tih han tih hi chuan mombati lah chu alh reng duh bik lo, a thi leh thut thin. Rang lutuka choka lama tlana va chhit that leh a ngai a. "I va ti thi zing ve" tih aw hriat paha, "Thli a thaw lutuk a" han tih zawm zat thin kha chu, a hretu tan chuan a awihawm loh ve thin ngawtin ka ring.

Lehkha zirna dawhkan pawh a hnawk tha tawh hle, mombati nawi leh pencil zumna nawiin a khat nuaih tawh. Ruh faia bawhhlawh bawma paih tih lam chu khawi lam, mombati nawi leh pencil zumna nawi chu kan han hmet khawm a. Mombati ah bawk chuan kan han rawh leh ta a. A chang leh a alh a, a chang leh ut thratin kan han rawh a. Kan tum ber pawh hriat lohin, ka tih hmasak dan chu a diklo ti ni awm takin, a tharin thil tih ngai bawk chu kan ti nawn kan ti nawn ta thin. A alh leh a dik lo, a ut leh a dik lo, a tawk chiaha a awm pawhin a dik chuang lo. Tih nawn sek a ngai thin.

Hetia mombati duhtawka kan han khalh hnu chuan, zun te pawh a lo chhuak tawh hle thin a, dar te pawh a lo tlai tawh hle thin. Zun in lam pana kal paha min lo entu hmuh ngei tura han 'ham' bai bai te kha thil pawimawh lutuk a ni. Rei fahran zun hnu ah, ngui ruaiin kan han chhuak a, zik mar pahin han ham leh bai bai ila. I mut a chhuak tawh a mi? tih zawhna dawn hma kha chuan ham deuh sek ila. "Nu, vawi sarih ka ham tawh" han ti ngui ruaih ila, "Mu la, zingah hma deuhin ka kai tho ang che" tih ri kha a ngaihnawm thin ngawt mai.

Lehkhazirna dawhkan chu a awm ang angin awm rawh se, zingah tih fai tur. Mu tura khum lam pan chhat chhat lai chuan, "Karei!!! Current a awm". Rang fahranin TV bulah tlan chhuak lehnghal, on sawk sawka en tum leh nghal. "I mut a chhuak a ni lawm ni, va mu rawh, anih loh chuan lehkha i zir leh ang" tiin vin tak maiin min rawn hrilh leh a, lehkha zir leh ai chuan mut chu thlang leh nge nge thin. Mu fel ta maw tihah, thosilen benglut tha nge thalo check pahin, "Mut dawn tawngtai kha i theihnghilh ange" rawn ti leh a, a ngai te bawkin mut chhuah fe hnuah kan tawngtai ta chauh zel a. Mutthilhin a zui nghal thin a, han 'amen' meuh chuan khua kha a lo var leh tawh thin.

Aw mombati,

I tel lova pan lai nite

Hman ka zuam nem maw

Lehkhazir tinuamtu

Mutchhuak tirehtu

I tel lo chuan

Hringnun reng a kim thei lo

November 16, 2007