Eiru Piangthar

"Tin, Zakaia chu a ding a, Lalpa hnenah chuan, "Ngai teh, Lalpa, ka sum zatve pachhiate hnenah ka pe ang a; tin, tu lakah pawh thil engpawh lo hlepru ila, a leh liin ka rul leh ang," a ti a." (Luka 19:8)

Saw pa saw chu a va han vannei tak e aw! A piangthar tha ropui sia, a hma kha chuan a eiru nasa ve thei lutuk. A in leh lo te leh a thil neih zawng zawng te pawh turu tak an ni. Tunah a piangthar ta daih a, a vannei tak tak a ni. Piangthar lo sela chuan a chan tur a va rapthlak dawn em!! tiin nu pakhat hian a thiannu a lo hrilh mawlh mawlh a. A thiannu lah chuan a lo tuihnih vat a.

An eiru te te a, an inchhek khawl te te a, anmahni hma sial takin thil an ti a, mi dang ei ai laksaka mahni intodelh vek hnuah an han piangthar a. Tha ve deuh asin! Tunah chuan Pathian mi a ni tawh a, a fel tawh. Mitin fak hlawh a ni a, biak inah lah a inkhawm taima, thawhlawm lah a thawh hnem thei narawh. Mahni neih zawng zawng thawh duhna rilru erawh a la pu lo, put chu a har khawp ang. Bible-ah Isuan tehkhinna thu a sawi kan hre theuh ang.

Pu Elisian-a sawi dan takah Bible ah eiru piangthar kan hmu a. Chu mi chu Zakaia a ni. Chhiahkhawn hotu a ni a, amah pawh a hausa hle. Mahse a piangthar a, a chunga kan hmuh ang khian, a neih sum zatve pachhiate hnenah a pe a, tu lakah pawh thil engpawh lo hlepru ta sela, a let li a rulh a intiam tlat. Hei hi eiru pianthar dan tur niin a ngaih theih awm e.

Eiru piangthar te hi an piangthar love kan tihna a ni chuang lo. Mahse, an lo eiruk tawhna te kha enletin Zakaia tih ang hian ti ve sela. An chan phah a va rinawm loh em. Inti piangthar em emin sawma pakhat mai pawh duhtawk lovin sawma pathum pali panga te pawh a pe a ni mai thei. Sawma pakhat chauh a ni, kan Pathian hian a duh ni. Sawma pali panga pe te sawiselna ni lo sela, sawma pakhat phal taka kan pek hian A lawm dan tur a ngai reng thoin a rinawm.

Tute chu nge eiru? E le, ka hre bik nang. Tumahin ka eiru, an ti ngai lo. Pu KL Liana sawi dan takin, hmeichhia leh mipa an innei a, hun rei lote hnuah fa an lo nei a. An thil tih chu kan hre mai a ni. Chutiang bawkin mi eiru lai chu kan va hmulo a ni mai thei, an thil neih te, babel in sang ang maia khir un mai leh car chhuak thar ber ber an khalh chhuah zut zut hian kan hre mai thin awm e. Eiruk hi chu tih loh tawp tur a ni mai. Eiruk ai chuan chan pawh hlauh loh tur.