Ka motor lem kha!!

Hmanlai chuan (kkk) motor lem mawlh mai kha a ni, hlimna chu. Khawlaiah, sikul chawlh apiangin, zing chaw ei kham atangin kan han khalh a. Mi in rel hnuai vel lei vunga khalh vel kha a nuam lehzual a, lei si det detin biang kha kan han nawr a, thle hu chung khan kan motor lem kha kan han khalh vel thin kha a nia. Hnap tawlh pur chung khan, tawng fiah mang hlei lovin "A va tha tak e awww" kan ti vawng vawng a, hmui ti pawrh turh leh chil per chuai chuai khawp khan kan han vuuu ta tak tak mai thin a.

Motor kawngpui ni awm ang tak tak te khan kan han sial ve a, kan han vaw bel ve thlap a. Swaraj lem nei te kha chuan, lei vung kha kan han phurh tir hnem thei laileng khawp a, kalkawngah kawng bi boh ve deuh a awm te khan, kan han tan tir ngei a. Thiante motor thra deuh nei khan min han kaichhuak a. Police motor lem nei kha chu police an ni nghal mai a, tikhan taxi lem nei chu taxi an ni nghal bawk a. A awlsam phian, hmeichhe naupang inkhualtelem ang lo deuhin, mipa ho kha chu kan bal thei hle.

Chhunah thingpui in hunah, chhungten awrawl tawp tawpin min han ko a, kan han hrelo der vel phawt a. Ka vaw dawn che, an han tih zet chuan, kuta hnap hrut pah zauhin, kekawr leh kawr hnung velah kan han tai nawk nawk a, kan tlan nghal char char zel. Nu ten, in va tal bal ve tih hlauh avangin, theih ang tawk tawkin, kan thawmhnaw a leivut kai te kha kan han ti fai ve bawk a. Thingpui kha a sat chuan kan han thlau dai a, rang zetin kan han in pawp pawp a. A hmeh a awm chuan, a hmeh kha chu tlan chhuah pahin kan han ei mial mial a, thiante hnen thlen hma in ei zawh hman ngei ngei a ngai thin. :D

Tichuan, a ngai te bawkin kan han in nawr leh a. Keini a nei ch k vak lo kha chu kan nawr traih traih zel a, kan motor lem te kha. Mi fate kha chu, battery hmang ngei khan an han control vel ta thin a. Kan bulah an han control vel a, control ve an han phal lo ngei a. Kan awh tur tawk lekin, an haw leh daih zel a. Ngeiawm ve duh tak a ni.

A chang leh keini aia u deuh ten kan motor lem chu min han khalh sak a. Tihchhiat chang a lo awm lo thei si lo a, nu te hian ngatinge i khalh tir? khalh tir tawh suh ang che hi an han tia, aia u te nge nge kan hlau leh thin sia. Kan han khalh tir leh thin anih kha. U te zah kha chu pe na ve thei ngawt mai, bakah, khalhsak phal lo kha chu an han hau a, haw rawh, i uikawm si, emaw an han tia. An tap haw leh nge nge zel. Khatiang hlauh vang te pawh khan kan han tlawn deuh thin bawk a.

Motor lem neih tam deuh kha chuan, kan motor khalh tur te kha kan thlak kan thlak ve thin. Thiante lo keng lo an awm kha chuan, a chhe ber emaw kan khalh peihloh ber emaw kha kan han khalhtir a, tuilo zet, tuilo ngam si lo khan an nawr nileng ve thak zel. A chang leh, motor lem te kha kan han in sut tir a, a chhe palh a awm chuan, a chhe zawk zawk kha an han thinrim a. Insual leh trak trak te kha a ngai thin a, a hnu lawkah kan vuuu ho leh vu vu zel tho.

Motor lem kha chi hrang hrang a awm a, heti hian lo then hrang ila.

Nawr chawp ngai : Heng ho hi chu engmah feature awm lo. A hminga motor lem ni tawp mai, nawr chawp an ngai a. Amahin a tlan thei lo. Hetiang hi a man tlawm a, neih tam pawh a awl ber. Tha ve deuh deuh lah a tam a, nalh pawh a nalh thei. Bakah, dim lo deuhin a khalh theih a, a uihawm vak loh.

Break-fast : Engvanga break-fast ti tlat kha nge kan nih pawh ka hre tawh lo, hemi tukthuan a kan ei thin breakfast nen hi chuan inang lo tak a ni. A hnung zawng kan han nawr ri trok trok a, a sipiring kha a in kual zel a, tichuan kan han thlah chiah khan amahin hma lamah a tlan ta vung vung thin a ni. Khatiang ngei kha kan break-fast chu a ni. Battery a hmang lo a, a chhiat hma zawng chu ti khan a nawr ve trek trek theih reng a, a chhe hma angreng hle. Back - start zawk a ni tak e.

Control theih : Motor lem control theih tih hi chuan, tunlai naupang ho chuan, remote control a control theih, duh duh zawnga cut theih ang kha an ngaihtuah ang. Keini kha chuan, hrui nei a hma zawng leh hnung zawnga hmeh kal theih kha a ni. A hma zawnga kalna kha button sen a ni tlangpui a, a hnung lam kha, button dum emaw a ni thin. Hetiang control theih ah hi chuan JCB lem kha a lar thin hle. A remote ah hian battery pahnih a hmang thin a, a motor lemah khan pahnih a hmang thin bawk. Battery a zo chak duh hle.

A chung eng thei : Motor lem chung eng thei. Aw le, hetiang hi chu a chungah hei, police motor emaw ambulance vela a chunga eng ang hian a chungah eng thei a awm thin a. Chung ho chu a ni, tin a chung eng thei lo pawh, a tlan theih dan inang ho chu hemi category ah hian khung leh phawt ila. Hemi category ho hi chu, battery an hmang a, pahnih emaw pali emaw an hmang thin. Control theih an ni lo a, kan thun a, kan on top a, tichuan, a chung a lo eng a, amahin a tlan mai a ni. A insut chuan, tlem a vei zawngin a kawi a, a tlan leh nghal thin, heng pawh hi battery a zo chak hle.

Ri control theih : Heng ho hi kut ben ri emaw thil tih rik pawp ri chuan a control theih vek. A chungah hian antenna deuh reuh hi a awm thin a, battery pali a hmang tlangpui. A control na chu plug ang deuh hi a nia, hmeh zawng hian a ri tlak tlak a, kha khan hma zawng leh hnung zawngin a tlan tir thei a ni. A then chu a headlight te pawh a eng thei tawh. Remote control a ni ve deuh reuh a, kut ben pawhin a control theih a, a ruala thil ri hrang hrang a awm chuan, a buai ve thei hle.

Cut theih : Heng ho zet hi chu kan neih phak bak a ni ta. Sikul ban apiangin Solomons cave ah khan ka thlir ngawih ngawih zel. :D. A remote ah hian battery pali vel a hmang a, tin, a motor ah pali vel bawk. Heng hi chu duh duh zawng pawhin a cut theih a, khalh pawh a nuam bik hle. Amaherawhchu, kawng biboh vel a ngam lo hle a, mam thra tak lo ah chuan a tang duh ltk a, bakah tih balh vel a uihawm a, a man kha a to thei bawk sia.

Awle, i lo duhtawk phawt mai teh ang. Ka motor lem lawm hi a la reh thei tak tak lo a, tun thleng hian ka khum hnuai thingrem ah khian motor lem a la awm nual ania. Silai lem te, GI Joe thlengin... tsk tsk.. A lo nuam em a ni, khang hun lai kha chu. Pan lai ni te.......