Vawih

A hmasa berin vawih chu enge ni ta ang? Vawih chu mihring taksa atanga boruak chhia kan paihchhuah hi a ni mai awm asin. Mawng lama a chhuah chuan awlsam te in 'vawih' kan ti mai a, ka lama a chhuah chuan awlsam te in 'irh' kan ti leh mai bawk a (Ka va awih chiah lo e). Vawih hi kan taksa that theihna, Pathianin a thilthlawnpek tam tak zinga pakhat a ni e. Vawih thei lo ni ta la, engtin nge i awm ang? I buai ve nak nak viau mai thei a ni.

Nau piang hlim hian tah chiah hi an thiam emaw kan ti thin. Mihring kan pian chhuah hian vawih pawh hi tuma zirtir loh in kan thiam nghal thlap. Nausen piang hlim atanga tar te thlengin kan vawih put put hlawm a nih hi maw. Naute hi chu a tlang puiin an vawih hian a uih bik thin, an ek a hnai tawh tihna. An ek a chhuah hian an vawih hmasa ve tlangpui a, chu chu 'ka ek a chhuak' tih an la sawi thiam loh avanga an nu te an rawn hriattirna a ni.

Mipui zingah

Mizote hian vawih hi kan zak a, mi zingah phei chuan kan vawih ngam lo. A rik loh phei chuan a uih duh phian lehnghal a. Kan ngaihsan em em Sap ho te khu chuan vawih hi an han ngaisang khawp a, mipui vantlang zinga an vawih theih phei chuan 'Praise The Lord' hi an ti zui dap zel, an ti. Mizote chuan kan ten a, nia, a tenawm viau tho mai, tenchhe deuh tan phei chuan. Thil hi chu a hmun leh a hun a zirin a danglam thin kan tih fo kha. Nang leh kei hian tunah hian ek kan pai teuh. Tunah khan i pum chhunga i ek pai kha a ngai ngaiin, i bul dawhkanah emaw khan awm ta hnur mai sela, a tenawm viau ang. Chu chu a ni, vawih pawh hi a hun leh hmun hriat a tha.

Nula rimnaah

Hmangaihna hnar atang chuan 'deodorant spray' rimtui lutuk pawh a ni mahna le. Mahse, i nula rim bula i vawih kurh kurh reng chuan a la ten thuai ang che. Chuvangin, nula rim naah chuan zah zel tur hi pakhat hruai tel ngei ngei a tha. Vawih palh thut pawh a mawh puh mai tur. Hmeichhia hian vawih hi an inthlahrung thin a, i bulah 'ka va zung lawk' emaw a tih khan a vawih te pawh a chhuak ve a ni tih hriat sak bawk ang che. Zun in pana a zai phei rut rut a, a luh hnu deuh lawka a zai tawp chut chuan, a zung a ni tih hre bawk rawh. Hmeichhia hi zung chungin an zai thiam lo.

Biak In-ah

A tlar hnung berah i thu a, i vawih ta a. Tumahin an hre lo. Mahse, i vawih thu kha i tlangau pui chiam emaw, pulpit a i va tlan lawn a, i vawih thu i va sermon nghek chuan, mi ang lo emaw an ti ang che. Chuvangin, biak in a i vawih a, a uih viau pawhin, i awm pangngaiin awm la, chi ai chuang suh ang che. I bula thu kha han en deuh vung vung la, uih tih hmel deuh khan han melh vel la, midang pawhin i bula mi kha vawih emaw an ti vek mai ang.

Sikul-ah

Sikul kal lai emaw college kal lai emaw i nih a, class lak lai emaw a i vawih a chhuak tlat anih chuan bag chhunga vawih hi a tih chi viau. A uih a chhuah hma a, zip hnan hmak mai tur a ni. Class lak laia vawih hi chu a nuihzatthlak duh bik a nia. Bag a awm remchang lo a nih pawhin, i mawng kha a kak thei ang berin keu la han vawih teh, a thaw sut ringawt ang. Vawih rik hi a zahthlak a ni tih hre ve mai mai bawk la.

Kalkawng-ah

Kalkawnga i kal lai emaw in i vawih a rawn chhuak ta. Midang hmuh a mawng han keu kha chu i zak bawk si. Tihdan ka hrilh ang che, in sum hram hram rawh. Kawng chho deuh emaw i kal lai a nih phei chuan a tih chi lehzual. Motor lian (for eg. city bus emaw truck emaw) lo tlan hun nghak la, i zawn a rawn thlen a, a thawm a rin lai tak khan vawih la, tumahin i vawih ri an hre lovang.

Tui chen laiin

Tui chen laia vawih hi a tihchi loh khawp mai. A rawn ri chhuak burh burh mai ang. Chuvangin, tui chhungah chuan vawih rik leh rik lohin awmzia a nei lova, vawih loh kha a him ber. Ek phei chu a tihchi loh reng reng, a chhuah rual rualin hnung zang hi a rawn nek nghal ne ne zel a.

Mahni a awm laiin

Mahni a awm lai chuan vawih a inthlahrun awm loh. Mahse vawih zawh chiah hian midang hi an rawn lang leh nawlh zel. Nangmahin i awm a ni tih hrechiang hmasa la, khum hnuai thlengin tumah an awm lo a ni tih finfiah bawk ang che. Chutah han nghak vang vang la, i vawih a rawn chhuah veleh khan han sang pah teh le. I kutin lo hup la, kan keu vel la, a ri tial ruai ruai mai ang. Hei hi chu midang zingah a zawngchhang chi loh.

Aw le, vawih hi sap ho hian chi hrang hrangin an lo then thlap a. Chung chu i lo thlir leh zuai zuai teh ang.

1. Ri lova vawih - Sound of Silence

2. Vawih zawm char char - Unchained Melody

3. Mombati vawih khum - Candle in the Wind

4. Vawih rik pawp pawp - Thundering Typhoons

5. Ring tawka vawih thlawrh - Beautiful Disaster

6. Vawih paha ek phuh chhuak thet thet - It's raining men

7. San tang tang hnu a vawih - I shall be released

8. In rin loh laia vawih thut - Amazing grace

9. A khat tawka vawih zeuh zeuh - Time after time

10. Zun zawh dawna vawih - One last breathe