Urlawk zan khawvawt

Veng pakhat a awm a. Chumi venga chengte chuan Krismas a lo thlen hi chuan mahni tawkah indaihlo an ti vek zel a, midang tana va inhman kha tumahin an ngaihtuah ngai lo. Chumi vengah chuan nu pakhat hi a fate 3 nen an cheng ve a. A fate chu kum 14, kum 10 leh kum 7 te an ni a. An upa ber leh naupang ber hi hmeichhia niin, an milai hi mipa a ni ve thung. An pa hi nikum khan vanduaithlak takin a boral tawh a.

An nu ber tan chuan eizawnna dap a har tawh. Hmeichhia a ni a, a fate an la te si, awh neuh neuh an ngah ve si a, eitur an mamawh bawk, silh leh fen nen, inluah man leh chawi neuh neuh a la tam mai. Sorkarin hna an pek, hmunphiat hna chu tuktin damlo chung chung pawhin a thawk hram hram zel. A fate rual awt deuha an awm thin chu hmuh harsa a ti a, a rilru a hahin, a chaw ei te pawh chu a tui ngai lo. Inluah man an ba hnem tawh mai, a neitute lahin an rawn thing sek. A hlawh lah ei tur a kal ral nghal zel, tih tham a ni lo.

Naktuk mai hi Krismas a lo ni leh tawh a. A fate chuan awh an ngahin Krismas thawmhnaw te pawh an awt ve. A leina pawisa an nei si lo. A fanu te ber chuan, "A nu, krismas kawrmawi ka duh ve e mai," a ti reng a. A nu chuan, "Bawihte, kan lei em em ang. Nalh deuh kan lei dawn nia," a ti ve mai zel a. Urlawk ni chuan pawisa dap dan a awm mial lo maw tiin chhuah a tum a. A insiam mawlh mawlh lai chuan an in neitunu a rawn lang hlawl. A hmel lah chu a la hlim lo em em mai lehnghal. A rin ang ngei ngeiin inluah man a rawn thing. "Kan nghak rei tawh lutuk che u, inluah man tur pawh in thawhchhuah theih loh chuan in luah tlak pawh in nih loh hi, naktukah in chhuak ang," a rawn ti hmuk hmuk mai a. A tuk mai Krismas a ni tawh si, a fate lah chuan krismas kawr lei an lo dil reng bawk si. A nu tan chuan a va luhai thlak tak em.

Chumi nileng chuan a fate tan tiin hna thawkin a chhuak a. Tlaiah a rawn haw a, a fate krismas kawr tur, man tlawm te te man chu a rawn hawn a. An lawm em em a, tumah an ngai bik lo. An nu erawh a chau lutuk tlat. A fate hlim hmel a hmuh chuan, lehlam hawiin a mittui a far fap fap a.

Zan a lo ni leh dawn tawh. A fate pawhin an krismas kawr turte chu an ha chhin vel a. An hlim hle mai. Chumi zan chu a vawt bawk a, an tawng khur hlat hlat thin. An tukverh darthlalang te chu a awm mang tawh lo. Puanchhia leh buara velin an ping mai mai a ni. Thli a rawn thaw her her reng a, mite angin heater emaw sikri emaw pawh leina an nei si lo. Eitur an nghei lo chauh a ni si a. An hlim viau laia vawt pawh theihnghilh ti tih hiala an awm lai chuan an nu khua a sik ta tlat mai. A khawsik san em avang chuan a lu a na a, vawt tiin khumah chuan a mu khur beuh beuh a. Puanthuah tha leh lum an nei ve si lo, an neih chhun chhun chuan an intuamlum ve a. Damdawi leina tur lah chu an lo nei tawh si lo. A fanu upa ber chu mi khawngaih dil turin a kal ta ringawt. Mite lah chuan, "A va zialo ve," tih bakin an tanpui lo a ni ber. Cheng sawm te cheng nga te an lo pe a, damdawi leina tham a tling si lo. Thil man a sang tawh si. A pawisa daih zat zat nachhawkna chu a lei ve a. A tlan haw leh vang vang. A naute pahnih lah chuan an nu chu an biak tawng zawh loh avangin an lo tap dun faih faih a. A nu chu a khawsik a san em avangin leh vawt a tih em avang chuan tawng thei dinhmunah a ding lo. A fate tap hmel leh lungngai hmel a hmuh chuan hlim hmel a pu hram hram a, a theih tawkin a fate chu a va nuih sen sen zel a.

A fanu damdawi rawn lei chu a han ei a. An zavai chuan khum khatah in kuah dialin an mu ta a. Vawt an tih hlawm avang leh puan thuah lum sin tur an neih that loh avangin an muhil thei meuh lo. A pa kha chu la dam se, tiang em em hi chu an ni lovang. An piah deuha nula leh tlangval zai khawm ri riai riai chu an hriat thei tawk a ni mai a. An lung a lengin, an pa kha an ngai a. An zavai chuan tap lo an awm lo. An inhnit feih feih reng a, an nu ber chuan intih pachan a tum a, mahse a thei lo. A taksa a chau bawk si, a khawsik a sang bawk si. Damdawi lah chuan a chhawk thei lo lehnghal.

A fate chuan a khat tawkin, "A nu, i dam tawh em?" an ti reng a. Ani chuan aw tih nan a lu a bu nghat zel a. A fate ngaih tihthat nan tiin dam awm deuhin a awm vel mai mai. A lu na lutuk chu a chhing leh sawk sawk zel. Nakinah chuan a rawn phu zawk a. A fate pawh an harh vek a. An mangang chuan an nu chu an han ko a. "A nu, a nu," an han ti a. Ani chuan, "Mamte, ka dam vek tawh alawm. Tui deuhin mu rawh u. Mangtha u," a ti khur hlak hlak a. Mahse, a tawng bah nuaih avang leh a mitmeng a dik vak loh avang chuan rei a daih a rinawm tawh lo.

Zing lampang a ni tawh. A vawt tulh tulh mai. Dar 3 a rik meuh chuan a fate chuan "A NU" ti a koh tur an nei ta lo. A fate mangang chu an tap ta vak vak ringawt a. Thenawm khawveng an lo tlan khawm a. A tul tul an buaipui ta nghal a. Engtin tak hemite unauza hian Krismas hmang ve ang maw? Hlim taka i hman lai khan in vengah ringawt pawh hlim lo taka hmang an awm tam asin. Tanpuina emaw i pek theih chuan I PA vana mi khi a lawm dawn asin. Malsawmna pawh i dawng ngei ang tih a rinawm tlat.