Kan buai teh asin!

Ania lawm, mi fate'n technology hmanga khawvel thuam that dan mai bakah hringnun, hahdam leh awlsam zawka a kal theihna tura beng sika an ngaihtuahna an sen mup mup lai hian mahni tuanna mual ah, phak tawk te te in kan lo buai ve teh asin!

Kan buaina te erawh khawvel mithmuha pholan tham a ni lo a, ram hnuk khawih thil a ni em tih pawh inzawhfiah fe hnu in a chhanna mumal hriatchhuah theih a ni bawk hek lo. Khai mah aw...

Buaina phone call

Nikhat chu phone call ka dawng hlauh mai a, kan thian pakhat driver chuan a mi phurh hnamdang (vai) ho nena an inbiak that theihloh thu leh, an kalna tur hmun a hriat fuh theih loh thu min rawn hrilh pahin, a thiam zawk ni awm takin, "Nangman han be chhin teh, i hrethiam zawk ang, an hmanhmawh rapthlak lehnghal a, meeting kan nei dawn a, chumi hmunah chuan an tia, a veng hming an sawi hi ka hre thei lo" a rawn ti a.

Thil mak Dandahar 

Kei lah chuan, "Khawi phone kha pe nghal rawh, ka'n zawt ange?" ka lo ti vat a, intifuh takin, "Hello Sir?" te ka'n ti puam tawlh tawlh chho ta vel a. Anni lah hmanhmawh tawh, rang leh vin tawkin, "Dandahar ah kan kal duh, meeting pawimawh dar 10 ah kan nei dawn a, hei tunah dar 10 minute sawmpanga laiin a pel tawh a. He driver hi mawl leh lutuk, Aizawla mi a ni lo em ni? A mawl avanga kan thil chan tur hi i hria em?" a rawn ti ta bawrh bawrh mai a. Kei lah chuan, "Dandahar tih chu i chiang maw?" ka han ti leh hram a. "Dandahar chu Aizawl veng laili takah a awm a, tupawhin an hre vek ang tiin kan thiante'n min hrilh a, nangni'n in hre lo a maw?" a rawn ti bak leh hlak a. "Ka pu, khawngaihin i thiante chu i zawt chiang leh thei angem? Dandahar chu ka hre ngai miah lo mai. A spelling talin min han hrilh teh?" ka ti leh a, a thinrim deuh nge, a dah ta hmak a. 

A dah rual chuan Dandahar chu eng tak ni ang maw, meeting nei tur ten an insawi deuh nuaih sia, company thar te hi an lo lut leh tawh reng em ni? tiin a hre tur awm ang deuh chu ka'n zawt kual zar zar a. Dandahar chu enge a nih a, company nge department hming nge enge a nih tumahin an hre bik tlat lo. Chutia ka lo buai kual vel lai chuan, driver lah khan min rawn phone chhen a, "Kan tlan kual rei tawh khawp mai, Aizawl kan helchhuak lo chauh a ni tawh, Tuikhuahtlangah kan awm tunah chuan, tihdan lo ngaihtuah teh," a rawn ti leh thin.

Chhanna duhawm

Theihtawp chhuahin, google lamah te a lo awm mial lo maw tiin ka han zawng zuai zuai a, chhanna mumal engmah ka hmu lem lo. Tichuan, ka beidawng chuan ka han phone leh ta a, "Sir, eng meeting nge ni a? Dandahar chu company hming nge department hming te a ni em? Company lampang mi leh sa em ni in nih?" te ka han ti thuak thuak a, chutah chuan alawm min ti lawm em em tu chhanna ka dawn chu. "Dandahar chu company emaw department hming a ni lo, Aizawl veng hming a ni. Tin, company mi leh sa kan ni lo a, Health Department mi leh sa kan ni a, Health Directorate ah meeting kan nei dawn a....." a ti hman tawk a, nuih huk pahin "Sir, please please...phone kha driver i pe lawk thei ang em?".......tichuan, Dinthar lamah chuan an liam thla ta vang vang a. Thaw a veng hawk mai!

Mangchhiat hlawh chhuah missed call

Urlawk zan khan (ti leh ta daih ila) thiante ho chu Krismas duhsakna thu tawi te te ka thawn kual ve e ka tia. A dawng tur awm ang ni a ka hriat ho zawng chu hun ren miah lovin ka thawn kual pap pap a, a thenin an rawn reply a, reply lem lo an awm nual bawk. Tichuan, a thui lutuk loh nan - kan tlaivar a, kan haw darh a, kei pawh zing lamah chuan ka mu ve ta a. Ka phone pawh chu silent mode ah ka dah hmak a, (tlaivar bawk a, a tuk eng mah pawimawh a awm lemloh hi chuan ka silent hmak zel thin a) tichuan le, dar 9 velah ka tho leh a, ka thiannu pakhat Zovi, Delhi number atang chuan missed call 56 a lo awm ta thawt mai le! 

Ka rilru a buai leh ta

Karei! Chhiat an tawk em ni ta ang? Nge a rawn uang ve mai mai? Nge thil pawimawh tak sawi tur a nei? Ka tho chhuak zawk a, rilru a hlauthawng dep dep chung chuan ka call let ta a. A ring kuit ta thak mai, ka han ti nawn leh a, chhanna reng reng ka hre lo. Ka ngaih a ti thalo tial tial mai, amah zawk hian harsatna engemaw a tawk a ni ang a? ti chungin vawi 10 emaw lai chu ka dial nawn ta tlut tlut a. A ngai te bawkin a ring kuit thak thak zel si.

Tichuan, a chanchin hre deuh tura ka ngaih Delhi thiante ho pawh chu ka han call kual ta a, a tu a mah reng reng chuan phone chu an la thei lo. Ka hrethiam tho mai, Delhi lamah hi chuan tlai/chawhnu lamah Inkhawm hi a awm thin avangin an la mu anih ka ring ber a, mahse ngamtlak tak tak an nih hlawm avangin ka ti nawn kual leh deuh vek a. A ngai te bawkin a ring leh tlak tlak hlawm a, engpawhnise, thil 'emergency' tak emaw anih chuan min rawn hrilh ve em ang chu maw tia mahni inhnem chungin ka thochhuak ta a.

Mutthluk hlawh chhuah missed call

Rilru nuam lo reng rengin chaw ka ei a, inkhawm tur chuan kan chhuak ve leh rawih phawt a. Tichuan, ka phone pawh chu silent mode ah bawk chuan ka dah leh ta thlap a, ka ngaih erawh a ti tha chiah lo deuh. A hma zana tlaivar nen ka muthlu nasa ngei mai. Inkhawm ban chuan a rang a rangin ka phone chu kan phawrhchhuak vat a, ka hlauhthawn ang ngei ngeiin Zovi miss call 26 lai chu a lo awm leh ta tuar mai le!

Zovi hi a hrang ta em ni? A lo thi reng te hi a ni lo maw? A thla hian min rawn hrilh hmasak ber a duh aniang a? Hetianga thil pawimawh min hrilh tur a nei anih te chuan message tal te pawh lo thawn ve mai awm? One missed call movie te ngaihtuah rauh rauh pah chuan ka call let leh ta tluk tluk a. Vawi 20 chuang chu ka dial ve leh ngei chuan ka hria, thingpui in tura min lo koh pawh ka lo hre lo a, ka hriat rual rual chuan ka kal ta a. Ka rilru chu a nuam chiah lo, ngaihtuah ding tak ka nei tih an hrethiam hlawmin ka ring.

Phone call tihbaiawm!

Tichuan le, ka thingpui no sa ver vawr tak dawm lai ngei chuan ka phone chu a rawn ri ta alawm! Rang lutukin ka en nghal a..  "Dr. Zovi calling..." tih chu a lo phe zauh zauh a. Ka thin a phu dut dut a, lak tur nge lak loh tur? tiin ka rilru chu a insual leh thung a. A nihna takah chuan ka rinloh lutuk a a rawn call ta thut chu ka tih hle mai. Thih leh thih tiin ka la ta a..."Hellooo...." ka han ti thum talh a, ka nghak a, a reh leh ta vung vung si a.

Dil loh zawk malsawmna

"Hello Zovi, Lal zo...." ...... "Helloooooo"..... a reh tlawk tlawk mai. Signal ka nei thalo em ni aw tiin ka phone ka en a, a lo tha hle si a, minute khat dawn lai a call ka lo pick up ta der tih ka zu hmu bawk a. Ka la chho leh vat a.. a tawp nan, beiseina nei vak tawh lo chung chuan ka han "Helloo" leh ta a. Chhanna ka dawng ta, lehlamah aw ri ka hriat chu Zovi a ni lo tih ka chiang, Zovi a ni lo mai nilovin mipa, vaipa a ni nghe nghe. "Tunge ka biak?" a rawn ti a, "Tunge i nih sawi hmasa rawh? Zovi number a ni nange?" ka han ti let ve leh a, "Zovi chu tunge? Hei hi ka number ania, Zovi ka hre lo? Zovi khawia mi nge?", "Zovi chu Mizoram ami a ni a, ka thiannu ania, a phone i hmansak em ni?", "Bhaiaa, Zovi i sawi chu ka hre lo reng reng, i sawi awmzia ka hrethiam lo bawk. Nizanah he number atang hian message ka dawng a, i thawn sual anih ka ring a!" a rawn ti ta a. Ka thin a va han rim mai mai tak! "I va han mawl lulai tak em! Eksek pa, I pianna hmunah ka nawr lut leh mai dawn che em ni?" ti a hauh vak ka tum laiin ka vai tawng thiamin a daih lo tih ka hria a, na tawka Call End button hmet chung chuan ka haw ta a. Ka va han buai leh tak em - Val hi!

(Zovi lah chu facebook ah ka va hau hrep a. Ani lah chuan, "Ka rilru hi ka thlak zing ber a, a dawtah ka hairstyle leh ka phone number," a la rawn ti heu zui a... lol )