Vawiin chu online hman in ka awm lo, khawvel ka fang chhuak e ka tia.
Khua a vawt bawk a, kan ram nge an ram vawt ang tiin "Pepe Jeans LONDON", Dawrpui chu ka pan phei chawt a, boruak a lo in an em avangin khawchhak lamah khua a lum deuh mai thei a, nula pawh an chhelo ang tiin "Sanghai Bazar" lamah ka in khawh chho leh ta fua fua a. Lo chhelo hlawm viau tura ka ngaih laiin kan thenawm nu ni awm tak tak hlir an lo awm a, hun pawh hmang rei lovin ka haw leh a, haw pahin kan unau te hi enge an an tiin "Punjab National Bank", Millenium Centre ah thingpui te kan in te te leh a. Chutihlai tak chuan US lam te pawh tlawh a khat tawh tak e tiin "US Dollar Store", Chanmari lamah vai vawih aia rangin ka lo thleng leh der tawh mai a, a hnai bawk a US kal tak rau rau ah tiin "Maryland Book Store", Bara Bazar lamah ka peng leh zuai a. Kan ngaihsan leh hriat lar em em Cambridge leh Oxford lam te pawh tlawh pah a rem a lawm mawle tiin "Oxford HSS", Electric Veng leh "Cambridge English School", Tuikual lamah te chuan mi ropui tak tak ka va kawm leh hnuhnawh a. Ram changkang tih takah a mi chengte pawhin khawvel mai nilo, planet hrang hranga zin kual te an lo intih hmuh khawp mai a. Hun ka neilo viau nachungin ka la kal ngai loh lam anih avangin "Mars Photo Lab", Dawrpui leh "Neptune Hardware", Dawrpui ah lunch ei turin ka'n inkapchhuak ve leh rawih a. Khawvel pawn atang chuan en lenna in khawvel lam ka rawn thlir a, mihring te chu te tak te te in ka rawn hmu thei. Chutah tak chuan ka rilru ah a rawn lang thut a, Gulliver-a pawhin nuam a tih em kha maw tiin, "Lilliput", Millenium Centre lam pan in ka rawn thlawk leh te ta nghal a. Rin ai takin an lo fel hlawm phian a, in fel viau chuan a awmna ka la hrilh ve ang che u. Chawhnu lam te a lo ni ta bawk a, hun a tam tawh loh avangin Milan lamah chakkhai eng ilo lam turin "Milan Collection", Millenium Centre chu ka pan leh ta nghal a. Tlai ni eng mawi tak ka hmuh chuan rilru ah Peniel tlang te a lo lang a, kal tak rau rau ah tiin "Peniel Business Centre", Chaltlang lamah chuan fb a post atan tiin thla te ka la leh zuai zuai a. Tlang chhip a ka awm lai takin kan Israel unau te ka hrechhuak uar uar a, tlawh ve ngei tha a ka hriat hnu ah Israel ka tlawh tawha man tlawm ber ni turin Bus fare Rs. 5 chawiin "Israel Point" ah chuan ka chhuk ta chhak chhak a. Hun rei tak ka awm hman loh bakah ril te pawh a lo tam ta riai riai a, tichuan haw zai ka rel ta a...
(Facebook status @ 27, January, 2012 1:28 AM)
10 comments:
Hahaha.. Ka nui nasa khawp mai! Thluak tha nge nge chu, chhiar a nuam pek khawp mai. Kan lo hriat liam ve mai mai te paragraph khatah i rawn dah diam mai a! :D
Ti tak deuhva chhiar ka tum a, ka'n nuih huk chu le. Min tihlim e.
@TS - Hong Kong Bazar, dawrpui a ka secondhand shake thu phei chu zep tel leh ila, paragraph khat ah ka khung len ka ring tawh lo. :-)
@lr-a - Ti tak deuhva chhiar tho tur alawm le. I ho rauh.
Arakan lamah Pu Zoramthanga inhlui i zuk tlawh chhuak tello nia mawle :P
Thu tak tak i ziak dawn emaw tih laiin min bum chiang hle mai, hehe.
@Eich Vee : Hun remchang danga tlawh atan ka khek ta mai.
@Sangpuiipa : Inbumna hi a thleng zeuh zeuh ang.
Haha! A va tha reuh ve le! Kan dawrpui khi 'Millenium Center' nge. 'Millennium Centre' aw? :D
iva reh ve ka nau cu. ziak thiam khop mai...ka nui nasa hle mai.a ngaihnawm khop mai
burgerstud2005
Hahaha I va zin kual nasa tak ve, khawvel pawn thleng thleng in
@ Pu Zaia - A khaih a, ka facebook status ka rawn copy paste tawp a. Ka chhut lai lah khan, Millenium Center tih type nawn reng ka peih loh avangin vawi khat ka type a (ka lo la type sual zui anih hi) ka lo copy paste leh ta zel bawk a. :-) Hetiangah hian alawm ka lawm thin em em chu, keini ang thatchhe taka blog that ve na, duh chuan a edit theih. lol
@burgerstud - E khai ka u, i dam a maw? Kan va reh tlang ve tiro tunlai chu. Ka dam e. I dam zawk a? Kumthar chibai.
@Jerusha - Ka kal leh hunah ka hruai ve ang che. I chak ve hmel.
Post a Comment