Khua chu a vawt sur tawh a, rilru ah eng dang a lang thei lo. Aizawl haw huna awm dan tur ringawt, chhungten min hmuh hunah engtin nge min tih ang le? I van thau ve, i van cher ve emaw te min lo ti nak nak anga. Thenawm te phei chuan min lo hai vel anga tih vel ringawt kha ngaihtuahnaah a awm tawh a. Thiante nena inhmuhkhawm mawlh kha rilru ah a lian ber a ni bawk a, khalai boruak kha chu nuam tak a ni.
Rel in i haw ang u kan tih angin kan thian pali kei, maia, rsa leh eric-a te chuan Dec 11, 2007 chuan Aizawl lam pan turin rel station lam chu kan pan ta a. Rel-a zin vawikhatna tur te kan nih hlawm avangin engtin nge a chuan nawm dan emaw nawm loh dan pawh kan hre hek lo, tichuan kan in nawr lut ve ta poh mai le. Maia bike hawn chhoh kan ngaih bawk avangin kan bawr hle mai.
Thlasik e tilo chuan, kan thlan phung mai alawm. Maia kha zing atang rel station ah a lo va kal tawh a, bike buaipui turin. Tichuan, a bungrua chu keini 3 chuan kan ken kep ta a, kan va han bawr tehreng em! Kan phur tawh bawk si, rit sawi thei kan ni lo, kan kal sawk sawk mai a ni.
Rel sei tak maiah chuan kan han lut ta a, hei hi ani maw tet laia India rama rel tlan chak ber an sawi thin Rajdhani ngei mai chu tiin ka ngaihtuah neuh neuh a. Ka hmuh tum ang chuan a chhung te chu ka hmu changkang lem lo a. Tichuan chawhnu her dar 1 velah chuan Delhi khawpui chu kan chhuahsan ta ruau ruau a, thian thenkhat ten thlahna sms an rawn thawn pawh kan en liam vel mai mai tawh.
Chuan tirh ah chuan kan tawng duh barh barh hlawm hle a, a rei ta deuh tih chuan sawi tur kha a kuit ti tih tawh a, fone ah chuan 'nupui neih ngenna hla' Thanga Jongte sak kha kan play nawn ta tlut tlut mai a, a reh deuh lai phei chuan vai ho khan nalh an ti ve emaw ni chu aw kan ti, an rawn hawi hrek hrek zel. :D
A tuk zan dar 7/8 vela Gauhati thleng tur chuan thuthmun chu kan rem tha sauh sauh zel a. Tihtur kha an awmlo tiah tiah khawp a, pawisa thir (coin) te kha kan pen vel mai mai a. Zunram thiar vel lah chu an tuiawm loh thin khawp mai, vaiho an che tawp angreng si a. Hei chu sawi vek chi pawh a nilo, tenchhe deuh te kan awm phei chuan.
Kan coach chu kan thawl khawp mai a, kan awmna laiah phei chuan keimahni chiah kan awm a. Inti thawveng leh thlamuang takin zan pawh chu kan muhil ve a. Zanlaiah rel station pakhatah vai ho an rawn lut ta. Kan awmna laiah chuan vai chhungkaw chhangchhe zet mai hi an rawn awm ve dawn hi a lo nia, light chu mut tui lai chuan an rawn on ta pap mai, a va han eng kher em! An naute pahnih lah chu an trap deuh chiah chiah lehnghal a, kan harh ta vek. Kan mutnaah te chuan an rawn thu vel a. Kan ngei angreng hle.
Mahse an chuang reilo a, a zia phian. A tuk chhun dar 11 velah chuan an chhuk leh daih tawh. Tichuan, keini chu nilengin kan chuang chho leh ta a. A chang chuan kan va hawi thawveng vel thin a, rel kawngkhar ah te kan va dakchhuak a. Thli thaw te chu a nuam hle mai. Gauhati kan lut hnaih tawh tih chuan tlang te kan hmu ta, Mizoram kan va hnaih ta em!! Rilru a dam deuh sawng sawng mai alawm le.
Tichuan, zan dar 7 velah chuan Gauhati chu kan thleng ta ngei a. Maia leh Rsa khan bike kha an va buaipui leh nghal a. Kei leh Eric-a'n bungrua kan lo invenchhawk a. PCO ah fone kan va in hmanchhawk thin a, ani kha chuan a be tlang zel a, kei ka chhungte tumah ka be tlang thei re re lo mai a, ka thin kha a rim deuh hlur tawh a.
Darkar 1 chuang fe, bike buaipuia an kal hnu in an lo let leh a. Gauhati Mizoram House lam pan chuan kan kal ta a. Ngai teh, kan tum dan chuan a zan a zana sumo a Aizawl pan kha kan tum dan a ni a, mahse krismas dawn a ni a, zin veivak leh sumdawng hrim hrim an tam lai a ni a, ticket kan chang lo chiang kher mai. Anih leh a kal leh hmasa ber tur tiin, a tuk zan dar 7 chhuak chu ticket kan la thei ta tawk a.
Mizoram House lamah kan kal lut ta a, room zawng zawng leh dorm takngial pawh a lo full vek si. RSa pa in House ALO a lo biak tawh kha maw, han hmu ang u kan ti a. ALO te inah chuan kan han kal a, phone a lo biak laklawh avangin kan nghak a. An naute kum 1 mi vel lek khan, mi nuih ta triah triah mai. "Saw pa saw..." min tia, min kawk a, min nuih reng mai a. Ka zak ve deuh hlek a, a nu te khan an khap thin a, a tawp duh der si lo, a hnuah an la sawn tawp a, min la kawk tralh tralh tho nia. :D
Mahse, thlenna tur a awm ta chuang lo a. Tichuan, a bul lawka guest house, mizo siam tho ah hian kan thleng ta a. Nuam em em lo mahse, zin chauh leh buai nen, kan va thleng a. vawksa rep kan hmeh te te hnuah, kan han inbual fai te te a, nuam ti tak leh hahdam tak chuan kan in card den ta a, kan va han nui nasa tehreng em!! Hemi zan hian lungleng fal deuh te kan awmin ka hria.
Tichuan, a tuk zing atang chuan i va vakchhuak mai mai teh ang u kan tia. Kan thianpa pakhat gauhati a lehkha zir kha kan phone tlang thei miahlo lehnghal a, hmuh kan han duh tehreng nen. Cafe ah te kan kal a, tihtur a awmlo chiang kher. Thil han lei dawn lahin, bungraw ken belh peihawm tawh bawk si lo.
Zan dar 7 a lo rik chuan sumo bulah chuan kan thu far tawh a. Kan chuanpui tur te pawh chu mumbai atanga lo haw chho, lehkha zirlai mipa 4 leh nu pakhat sumdawng a ni a, driver leh second driver nen Aizawl lam pan chuan kan kal leh ta a ni. Kalkawngah chuan kan titi nasa hlawm barh barh hle a, Delhi nula leh mumbai nula hmeltha zawk ang? tih vel mai mai te. A tawpah phei chuan 'zoram ngaih hla' kha kan sa chhuak chho ta. Kan sa nawn ta tluk tluk mai a, kan theme song a ni ber e.
Zing dar 3 velah Shillong kan lut a, a va han vawt tehreng em! Khasi pitar in chemte a mi vih a la tum zui. Haha. A dawr bulah ka lo zung a, min lo hmu chu niin, a khasi chemte nen mi rawn hawlh nawk nawk mai mawle. Kan nui triah triah ringawt a. A thim si, vawt bawk si.
Tlai dar 3 vela Aizawl lut tura inbeisei si kha, kan tlan muang nge ka hrelo, zan dar 6 velah kan lut thei ta chauh mai a. Nghahhlelh tawh nen chuan in tu lo thei hle mai. Thlen zan kha Youth Icon an final zan Dec 14, 2007 a ni a, mi pawh an tam ngei mai. Thenawm te pawh inah Youth Icon an lo en khawm a, in ka lut chiah chu, mak min tih hmel hlawm sap sap ngei mai.
Duhtawk teh ang, kan buai zualpui vel hi chu ti lo ang. Train station atanga bike hawn phei dan te, bike thawn chhohna tur sumo a awm mai tawh loh avanga Gauhati a bike kan dah ringawt te, kumthar hnu January thlaa a lo thlen chhoh choh dan te, Kan zin rei bawk aniang, Eric-a khawsik vel te. A, nuihna tur a va han tam tak em!!
Clip 1 - http://www.youtube.com/watch?v=urG7DhMPGro
Clip 2 - http://www.youtube.com/watch?v=3xRqnLHvR6k
Clip 3 - http://www.youtube.com/watch?v=GB8P1HmbrwE
22 comments:
Ziak ngaihnawm thiam reuh lutuk. Rel a zin hi ninom ka tih ber chu kan chuang rei lutuk hi. Chhuk hnu feeee poh hian kan la su dulh dulh hi a rei duh emmm ani! Nangmah ni ang rual vel kan nih laiin college excursion in India ram hmun hrang hrang kan tlawh kual a, rel hlirin kan kal a, 40 rual vel kan nia a nuam duh zek. June nipui vanglai tak mai khan a'n ni ngei a Taj te chu pheikhok phelh ngai si chhuat a sa ltk a kan zuang tawr tawr mai mole lolzz
Wow, va lunglen thlak ve. Kum 1996 vel te kha chuan tun ang hian thlawhtheihna hi a la awmlo hrim hrima Mizoramah. Tin, Guwahati atang pawhin a thlawk thei chu mi hausa tak nih a ngai a. Keini ang tan kha chuan tlin chi a ni lo hrim2 a. Guwahati atangin Rel nen Pune kan han pan thin te kha a va rei thei tak. Ni 3 vel chawl miah lova, rel chuan chu Thal lai phei chuan a va hreawm thei. Cal leh Mumbai inkar ram ngawi pui pui te khan khua an tihar thin. Hmanlai an chang zo ta. Mahse hawn lamah erawh a huhoin kan han chuang ho ngei a, lamtluang a tawi duh thin khawp mai.
2006 khan ka hawng a, kum 6 hnua ka vawikhat hawnna a ni a, thian te leh chhungkhai laina te hmuh erawh a manhla duh khawp mai. Mahse nula rimna chance erawh a tlem duh fu a..:)
kei chu hman deuh khan rajdhani ah delhi ka kal a, ka nin ber chu min eitir zing lutuk leh mut reng ngai kha. Got so claustrophobic. Voi khat leh chu students hruaiin Shillong ah bus hire meuhin kan zina, silchar thlen hma khuan kan tang a, darkar 11 teh meuh mai phai phei ah khan kan han awm chuh, ninom dangdai khop mai. "BY road" ngeia zin hi chu hahthlak viau naa, report tur hi tam duh deuh a. Ngaihnawm hle mai..khais pitar molh mai kha!
father a chu ka lung I va han tileng tak. Kan tleirawl lai min ti hrechhuak nasa lutuk. Dadar express ah khan kan chuang nasa thin a, rei thei si, lum si, bal si, 2nd class ah khan a ni ngei a, tunah hi chuan ni se hreawm hi ka ti ngawt ang, mahse thianza ho in kan zin a, a nawm theih zia kha awww!
@ A Pi J : A ngaihnawm maw? ka va oih lo e. ka thil ziak hi ka ziak chhuak zuai a, ka ennawn ngai lo re re.
Keimahni ang rual vel in nih chuan, a la thring awm!! hahaha. Taj pawh hi tiro ni e, a lo romantic tak tak lo e. A taka han hmuh ve meuh chuan, a chhunga ka luh te khan mawza uih rim hlir a nam a, pheikhawk phelh tur a ni si. A hrehawm ltk a, kan chhuak leh rang tehreng asin!! A sa bawk si.
@ puia : Guwahati atanga Pune.. lol. a rei ve thawkhat dawn chu a, keini pawh ni 1 leh a chanve vel kan chuang a, rei kan ti ve em em a, keini aiin mumbai leh hyd vel atanga haw te an la chuang rei fe zawk a. :D Nula rim te chu dah pawimawh ber tur lawm le!! chutia thil dangah i pen bo san daih zel ten! lol A huhova zin re re chu a ninawm dan hi a zia thin khawp mai.
@ cherrie : Ei leh mut tawp kha i ning ber a ni maw? Hahaha, dangdai thin e. Eitur sem zin kha chu a zia a, tihtur awm lo mawlh mai hi a ninawm ka ti kei chu. :D Chu, nang pawh ziak dawn la chuan, ngaihnawm deuh a tlin dawn chu shillong zin chanchin vel chu. Zin tluan loh bon deuh chu ka nei ve nual mai. Ka ziak thiam vak lo a. Ni e, "By Road" ngei mai hi chu sawi tur hi a tam bik ltk a, a thlawha thlawh hi chu a zo hma ltk a. :D
@ maimawm : ani pawh chu a rawn in ti "senior" ve leh ta. lol. Tak taka, tianga zin chanchin nuih zatthlak deuh deuh sawi tur i ngah ngawt ang ka ring!! nangni experience ngah deuh.
hahah, kan hunlai phei chuan mi sawmthum vel te hi kan hawng rual thin a, ticket nei loa kal hi mi 5 vel an awm bawk a.. Vai ho hi chuan min hmu inang deuh vek a ni bawk a, an free thei zel mai.. tihdan kawng kawng pawh hi a lo awm ve zel nen, ka ngaihtuah let hian a lo thalo ngawt mai khang thil kha.
Thal lai hian a hreawm ka ti lehzual a, Kol. kan han thleng a, Vai hmel a lo danglam deuh tawh a, an phakar em em mai lehnghal nen, bungrua bo hlau reng rengin kan in veng a, Maharastra chu Vai ramah chuan a lo la himin a lo la zalen nuam khawpin ka hre thin. Mitthi ruang phurin Mumbai kan kal zauh zauh a, a chang leh leng vel mai mai te pawhin.. a huho bawk a ni zel a, a hunlai kha chuan a nuam ve mai mai thin ngawt mai. Pune leh Mumbai inkar kawng kha zau tawk hian an siam thar tirh kha a ni bawk a, kan hlim pui thin viau kha le.. hmanlai an chang zo ta..:)
Nangte hi, thil ho mai mai ang a lang, a chhiartute tan a chhiar nuam deuh tur a ziah dan i thiam tlat mai bakah i thuziak chhiarlaiin mahni awm ve anga inngaihbel tur chi reuhin i ziak thiam reuh a nih hi. tum loh deuh hian nui thu chung hian i thuziak hi ka chhiar zo leh vek thin :)
@ puia - chutichu i lung a ti leng hle dawn anih chu, in vanglaia in chet tlat velna thin chuan. hehe, a huhoa zin chu a nuam viau ang. keini hi a huho tih lemah kan thianho te hian kan zin thin a, chuti em ema tam chuan kan la zin ngai lo re re. Chanchin ngah tak tak pawh an tam thin ngawt lo maw, che chhe fal deuh bik te. Tiang hi an awm ve deuh ziah ania, a huhova kal ho hi chu.
@ amuana - i ti lawmawm ngut ngut thin teh e. Lo chhiar ve zel a. :D
Lo sawi lawk ni la Ghy-ah te chuan ka lo mikhual tur che ania(h)...haha..kan ALO Pu Zualtea fate i lo tawng ve ngei a ni maw...an kum phu lovin an chimawm ania..A upa ber kha nikum sande sikul-ah ka pawlah a awm alom. A buaithlak teh mai a nia, a hma in min lo nel lakloh tawh bok sia..Sande sikul a ni tih hre lek lo hian min chhaih leh chiam thin..haha
Btw, in thian ho pic in lakna khi durtlang a ni mial m?kan in bul kawng a va ang ve aw..
a va lunglen thlak ve leh..train a zin hi nuam ka ti ropui kei chu, thian zaho phei chuan a hlim om...mahse Ght leh Azl inkar hi chu ngaihdam a har deuh a ni..in lam pan kan ni zok hlauh a
@ luliana.. ni e, kan lo contact lo che ni tirO?? haha, chu in ALO fate chu an chimom viau a ni maw? Ka ring vel reng a ni, min nuih triah triah danah khan.
kan thianho pic khi maw, tlawng kawng anih khi. durtlang lo deuh hlek. durtlang chu kan kal zing ve tho. :-)
@ almost_unreal : train a zin pawh chu nuam in ti hlawm phian a, in zin thra peih tawh hlawm awm tawp si lo a. Hehehe. Ni e, Ghy leh aiz inkar khi a bon trek trek ltk a, kei pawh ka ning khawp mai, khitilai te tak khi chu.
Ngaihnawm hle mai. 19somethin' kuma Mysore ah excursion a kan zin min ti hrechhuak...thianho hi chuan nuam ve ngot mai.
Keichu rail chuan hi nuam ka ti..mu berh2 zel mai mole :P
@ jinx, i mu berh berh anga, i su tlek tlek bawk anga, i harh hunah pawh i la su tlek tlek mai ang. Ni em? :D 19something vel chu... a rei tawh awm.. hahaa...
In van bawr tak ve awwww :-D
India rel a zin ka ninna pakhat chu Mipe lo kal thin hiiiii..ti thei tlawts lo.Rajdhani ah hian an lo kal ve thin emka hre law..Kan zin ve thin lai khan Rajdhani ah kan chuang ve pha thi silova.
Khasi pitar pawh chu i ngam nange ? :-P
kan bawr tak tak ania aw... sawi mai hian a hril seng lo. :-)
nia, khasi pitar pawh ngam a har khawp mai. :D
Rel in sawi takah chuan 'Cha....iiiii' ti a vaiho iak bengchheng thei lutuk thin kha min ti ngai reuh.ziak tha hle mai
father: kan zin tha peih lo poh a ni lo...HUN/TIME hi a lawm le..hehe..June hian Bangalore kal ngei ka duh a, kal chuan hun neih loh vang bokin thloh a ngai mai thei a ni...Azl ah h ian train lut se..chak thei ber mai..train hlirin ka kal ang, lolzzz
Thu thar a nuih leh vur vur tawh a va chakawm ve tlangval :P
@ thinchhia - "chaiiiiii" chu i zuar ve thin zawk hial lo maw?? hehe
@ almost_unreal - LOLz. Ni e, hun chu a heh deuh zawk bawk a ni. Hmanhmawh deuh hi chuan thlawhtheihna hi lo awlsam zawk ee.
@ amuana - kha ka lo ziak leh tawh, a nuihzatthlak kher loh a nia. :D
Post a Comment