Hla phuah tumin...

Mi lungleng thei mi tak mai tih takah hla hi ka ngaina em em a, a phuahtute hlei hlei hi ka ngaisang thin. Hla nalh tak tak te hi an han phuah a, an awlsam phian lehnghal thin a. Chutah, mahni hla phuah ngei mai chu mahni zaithiam tih tak mai an han sak tir phei chuan a ngaihthlak a nuam ngawtin ka ring thin a. Chu chu ka ngaihtuah fo thin, khawnge hla phuah ka'n tum ve teh ang.

A hmasa berah chuan pen leh lehkhapuan nen chuan ka inchhawp ve rap zel. Pawl sawm kan zir lai khan hla phuah kha an intih hmuh nasa mai a, kan class ah khan. Vawikhat chu thianpa TK-a nen Rualbanlote tan hla kan phuah ngei a, laktlak em em a awm lem lo, mahse kan puitlin ve avangin kan lawm hle. A hnu lamah mahni a phuah ka tum ta a, ka han indawm kun ve ta thin a ni.

Tihtur hriat vak loh lai hi ka han chuh thin a, tichuan, uluk fahranin hla pakhat tal chu awlsam takin ka phuah chhuak ngei ngei ang tiin ka'n thu a. Chhungte phei chuan lehkha ka zir emaw min ti thin. A bul tan dawnah ka buai nghal phawt. Ka lunglen loh vang aniang tiin, lunglen deuh huna phuah atan lehkhapuan pawh chu ka khup leh thin.

Lunglen zan deuh a lo thleng a, chutiang bawk chuan ka han in 'kawnsentreit' leh ta a. Mahse a bul tanna tur tlar chu sawi loh, hawrawp pakhat pawh a buaithlak teh zawng a ni e. Ka beidawng ta zel a, TV ah emaw khawi khawiah emaw ka hla nalh tih zawng tak mai an rawn sak te hian, he hla hi chu ka phuah han ni ta sela aw, hi ka ti leh vawng vawng zel.

TV leh chanchinbu lamah te hla phuahtu tam tak an kawm tawh thin a, a then chuan Pathian hla chauh an phuah a, a then chuan Lengzem, a thenin an phuah pawlh a, hla lenglawng thlengin. chutiang te chu ka hre chho ve ta zel a. Pathian hla nge ka phuah anga, Lengzem ka phuah ang. Nge ni a, hla lenglawng hi ka phuah zawk dawn? A tira hla phuah tum ve rik-ngawt ai kha chuan a zia deuh, eng lam hawiin nge phuah ka tum pawh ka hre ngai der si lo a.

Lengzem han phuah chu ka tum chhin phawt a, ngaihtuahna hrang hrang a rawn lut nghal. Hla pawh chu lo phuah puitlin ta pawh ni re re ta ila, miin min nuihzat vel anga, naupang te te si, a lerh hma reuh ngawt mai, a la ngaihtuahawm ang min tih te ka hlau deuh bawk si. Tichuan, Gospel lamah ka rilru ka han pe leh a, ngawi teh, mahni maah hul ve mah nak alaiin, han tih thlum vel dan ka thiam der lo mai.

Hla lenglawng hi chu tum enah pawh ka en lo law law. Tunah chuan mizo tawngin ka phuah thiam ngang lovin ka hre ta a, a sap hla in phuah ta zawk ila, a awlsam phah zawk rinna te ka han nei a. Mahse a lo ni awzawng chuang lo mai, a harsa telh telh. Engatinge aw, kei inti lungleng ve thin tak mai hian hla pakhat te pawh ka phuahchhuah theih loh le? ka ti ka ti ta a.

Chutah, ka beidawng fe tawh tihah, 'idea' thar tha lutuk mai ka hrechhuak. Hla phuahtu tam tak hian a thluk an siam hmasa a, chu chuan phuah a ti awlsam a ni tih ka hrechhuak zawk. Rang lutuk maiin, ka tingtang chu ka va kuah ve ringawt. Mahni zai pawh inrem tha hleithei mang lo khan hla thluk zawnchhuah tumin ka han perh kual ve a, ka 'hmmmm.....hmmmmm' tial chho ruai ruai reng a.

Ale!! A tawpa tawpah chuan hla thluk chu ka nei ta, a changkhat leh thunawn tur ang chu ka 'hmmm...hmmm' chhuak thei ta hram. Tichuan, rang takin a thluk ka theihnghilh palh tak hlauhin tiin ka hmmmm hmmmm chu ka record ta a. Tichuan, ka lawm ve em em, a thu chu nakina phuahah tiin hlawhtling inti takin ka chawlhsan leh deuh vang vang.

Zan khat chu ka lehkhazir tha peih tawhlo chuan 'computer' hmaah chuan ka han thu te te a, ka hla thluk chu miin an lo hre ve hlauh ang tih hlau takin headphone ah chuan ka ngaithla a, a thu chu ziah chhuah ngei tumin tan ka han la ta tak tak a. Ka hla phuah chu a thluk nena inmil tura a thu rem zel ka duh avangin a ulh hlawm hle a. Mahse, ka pa in "hla hi chu a tawngkam hi a ulh thei ania, mahse hla a nih miau avangin a nalh vek tho" a tih thin kha ka hrechhuak a, ka inthiam ve leh hram hram thin.

A changkhat chu inti thei fahran hian ka phuahchhuak a, he hla hi gospel ngei a ni a. Tichuan, a thunawn pawh chu ziahchhuah leh nghal tumin, ka kut a kal lai tak nia ka hriat avangin phur takin ka han chhu leh deuh par par a. Ka rem kual ka rem kual a, a tawpah chuan a chhuak dik leh ta mai. Nuam ka va han ti tak em!! Mahse, a chang hnihna phuah tura ka han in buatsaih leh chu phuah belh tur hi ka hre ta lo re re mai a.

Tu emaw cowboy bu ziah tum an sawi ang deuh kha niin ka in hre ber tawh a, ani pawh khan a cowboy bu ziahah khan a phek hnihnaah chuan a changtupa chiah kha a dam tir tawh a, phuah belh ngaihna kha a hre tawh vak biklo ni tur a ni. Kei pawh chu chutiang deuh chuan ka inngai a, phuah belh tur ka hre tawh ngang lo.

Hun a lo kal zel a, ka phuah belh theih takin tiin ka 'try' leh thin a, ka thei ngang tawh lo. Sap hla ah ka let mai dawn emaw ni le ka ti thin, ka thiam leh chuang bawk si lo. Tichuan, ka hla phuah chu, ka sa chhin ta a, a saka sak hian a changhnihna tur awm ang chu a lo lang mai ang tiin ka sa nawn ka sa nawn a, a changhnihna a lo lang thei si lo, changkhatnaah bawk chuan ka kual ka kual leh ta mai a.

Ka beidawng takzet ta. Ka phuah belh tawh nguar ang tiin, hei kum 2 chuang chu a liam ve leh der tawh mai a, ka phuah belh ta lem hlei lo a. Mi lungleng nazawng hian hla hi an lo phuah thiam kher lo a nih hi tih te chu ka ngaihtuah vel ta mai mai a.