Chi hrang hrang

Update khat rem rem bawk a, a tui ek dal ah ti ve leh mai mai a ni e.

Vaitawng hi a va han lo thiamloh theih em em ve le aw? ka ti reng mai. Class 2 ka nih a Hindi subject kan neih tantirh atang khan ka la thiamlo char char a, tun thlengin ka la thiamlo zel chu a nia.

Hindi thiamloh avanga buaina/chetchhiat/chanchin dangdai hrim hrim hi lawrkhawm vel mai mai teh ang. Mahni chanchin chauh ni lo, thiante/midang chanchin hrim hrim hi dah ve mai mai ta bawk ila, mahni ai chuan hralh an tla zawk deuh hrim hrim bawk ang.

• Vawikhat chu ka thianpa pakhat nen chawhhmeh lei in kan bazar ve a. Vai ho hmarcha ro ang kha lei kan duh ve si. Han sawi vak ngaihna leh han duh zat kha kan sawi thiam ta mai si lo, kan thiam ang tawk in "One KG" kan han ti a. An han buk ta mai chu rambo polythene tiat deuh lawih a khai a ngai hnaks mai. Han sawi kual vel dan kan thiam lo a, kum chuang fee kan rin hnu ah, a ni tawh em em lo tiin kan paih ve ta a.

• Kan thiannu pakhat pawh vairam a awm tantirh in a tia lawm, coconut tui hi ka in chak lutuk a ti. Vawikhat chu kan chhuah naah kawngsira dawr nawr thin ah hian an lo zuar a, coconut tui chauh kha chu zuar se ka kawk mai anga, a dik mai tur a tia. Mahse thil dang te nen a zuar a, bakah a tui in tur kha siam chawp te a lo ngai bawk sia. Sawi dan tur a vang khawp mai a, ka kawk thin, a coconut tak min pek a tum, ka duh si lo. Ka ngaihtuah a, Kasauti ah khan Anurag leh Prerna te khan an in thin te kha ka hrechhuak a, "Bhaiiaa, Anurag aur Prerna se,...aaaahhh... Kasautii ...ah.. pine taw....." tih velin ka ti vel nawk nawk a. Kan inhrethiam thei ngang lo a, ka in loh phah a ti.

• Kan thianpa pakhat hian Christmas dawna a haw dawnin, christmas tree chei na tur light eng phe zek zek thei ang hi lei a duh a. A zawrhna dawrah chuan a va kal ta vang vang a, sawi dan tur a ngaihtuah vang vang hnu ah...kut zungtang ti kak zuap zuap pahin... "Bhaiaa, light he...nai he....he...nai hee...he...nai heee..." a ti a, a lei ve zan tho.

• Pakhat leh pawh auto kha a la a, a kal tumna a thlen chuan a chhuk a. Pawisa tlang hi auto driver chu pek a han tum a, auto pu chuan pawisa nawi ka nei lo, a nawi min pe rawh, a tia. Ani lah khan auto driver kawr hma ipte a pawisa nawi kha a zu hmu reng si a, a thinrim deuh bawk si khan, vin deuh thak hian a ipte zuk keu pah in.. "Kaunn hee??" a zuk ti a.

• Nula in luah 2 an ni a, an vengah khan zawng kha an rawn ngampa angreng thin khawp mai a, an ni pahnih lah khan an hlau thei bawk si. Vawikhat chu an hlauh ang ngei in zawng pakhat hi an inah chuan a rawn lut ta..An mangang lutuk, an thenawmte va pun an tum, zawng kha vai tawngin enge a nih an hre si lo... "Bachaooo..... HANUMAN aayaaa"... an va ti hmiah.

• Tlangval 4 an ni a, auto an la dawn a, auto driver chuan "Kitna admi?" a lo ti a, an ni chuan chiang fahran a kutzungtang nena ti langin, "Char samarii" tiin samari mitha 4 an nih thu an hrilh a.

• Delhi tlangval pakhat hi South India lamah a zuk zin a, tui a zuk cheng ve ngei a. Tui chu a lo cheng thiam vak si lo a, a in ham buai ta mai a. Chutah chhanchhuaktu pakhat chuan, cheng 50 min pe la ka chhanchhuak ang che, a ti a. Ani lah chuan inhambuai chungin.."Chalis...chalis" tiin a la dawn lauh lauh.

• Tlangval pakhat pawh auto a la dawn a, auto pu chuan a lo ti to viau mai a. Rs. 90 man tur alawm tih kha a duh sia, a thianpa a va phone te te a, a thianpa chuan "Nape" ti rawh a lo tia. A ni chuan confi fe in.. "Bhaia..sabe rupya karlo...sabe..." a ti lauh lauh.

• Tlangval pakhat eirawngbawlna tel lei a tum a. "Uncle.. tel he?" a tia, "Kaunsa tel?" tiin dawr nghaktu chuan a lo chhang a. Ani chuan, "Haa...Kaunsa tel..kaunsa tel" a ti ta a.

Thil danga chet dangdai na pawh ti tel zel ang...

• Kan Mizo hmeichhia zaithiam lar tak 2 hi North Delhi ah an bo a, an thiante chu tanpui turin an va call a. An thiante chuan an awmna lai hmun awmdan te sawi turin an rawn ti a, an ni chuan, "Kan bulah hian Airtel top-up na dawr a awm a, a bulah In lian deuh a awm" an rawn ti a. :-)

• Tlangval pakhat bawlhhlawh paih peih lo thin hian, a bawlhhlawh te chu polythene ah a khung a, a in bul lawka bawng lo kal ki ah hian a thiat tawp zel.

• Tlangval pakhat pawh hmun a phiat a, a exam routine a phiat chhuak hlauh mai a. "E he, hei chu ka exam routine a nih hi le, vawiinah pakhat phei chu ka nei lehnghal!" a ti heu mai.

• Freshers Sports neih tumin tlangval thianho khat hian zana in tur beer hi an lei lawk ve teuh mai a. An tum ang ngei chuan an chau bawk a, zanah chuan an han in ta a. An in tam deuh tawh pawh khan eng tin mah an awm chuan kha an hre si lo, a bur chu an han enchiang a, "Thundervolt 10000, Extra Strong Fruit Beer, 0% Alcohol Content" tih hi a lo inchhu kulh a, an thinrim in an la in loh zawng chu an vaw keh vek!

• Nula thianho holiday hmanga zin te pawh kawng an bo nasa deuh aniang, kar khat hnuah pawh an la thleng thei lo, an kal tumna kha ni 1 thil thu a thlen theih mai a ni si a. An kal kawngah a zinga mi te holiday a lo zo tawh a, an tum ber pawh thleng lovin an let leh dial.

• Tlangval pakhat a bialnu love letter thawn tur chu a thian ten an lo en ru a, a tir lamah chuan, "When i first saw you, my heart was not OK.." tih velin a in tan a ni awm e, an chhiar zawm zel hma in a rawn pawhthlak sak hmaks.

• Delhi tlangval pakhat kawng bo pawh a car atanga a han chhuah meuh chuan Jaipur a lo thleng der tawh.

• Tlangval pakhat leh pawh rel in a haw a, a bialnu hnenah chuan chupa thiante chuan, "A hnunga X tih inziak saw i hmu em? Sawtiang X inziak saw chu lo kir leh tawh lo tur tihna a nih saw" an ti a, a bialnu insum thei lo chu a mittui a tla hial.

Ti zawng hi duh tawk rih teh ang. Heng a chunga chanchin te khi mi tak tak tawn leh thil tak tak vek an ni a, senior te nena titi ho na atanga ka ngaihtuah chhuah theih chin ho ka rawn ziak chhuak a ni ber e. A dang pawh a tam a, ka hrechhuak zo tawh hlawm lo.