Thil ho ve mai mai

This summary is not available. Please click here to view the post.

Sava thlawk thiam lo, a thlawk bo

Kan thenawm velah hian parva an tam khawp mai a, tam han tih ah, tam lutuk chu an ni lo a, an nghal em avang hian an lang tam a ni ber. Kan room chhung hi an arena ve deuh emaw ni tih tur ania, an lo in fight nasa thin khawp mai. Muttui laia an rawn in fight phei chuan ninawm ve duh tak a ni, dawhkana thil dah zawng zawng hi an ti thla rum rum a. "sssshhhhhh" kan tia, an thlawk sawn ve mai a. Rei erawh a daih ngai lem lo.

Zanah tukverh bul lawk lawkah an riak a, an han hram kan ti dawn nge, an ngur chhur chhur zel mai a, hmeichhe tan phei chuan hlauhawm tham a ni ngei ang! Mahni a riah zan phei chuan an hram ri hi ngaihthlak a nuam lutuk ngai lo (Dawih hmel khawp mai a.. :D). Zankhat, tukverh karah pakhat a lo tang kher phei kha chu, a na tuar thawm nen, zing dar 2 velah thianpa in a va siam rem sak a, a va han hram rapthlak tehreng em! :D

Thawmhnaw zarah an lo e reng bawk a, muttui laiin an rawn thlawk lutchhuak zawr zawr reng bawk a. Roomate te hian an ning thin a, tukkhat phei chu zing dar 5 velah thianpa Maia hian a exercise lakna dumbbell rod in vuak a tum a, a rod kan thlawn theihloh avangin a vaw leh ta lo. A nu pakhat phei chuan verandah a CPU bawm ruak kan dahah bu a lo chhep a, (kan almirah chunga bu an chhep kha chu sawi tel lo mai ang, kan tihchhiat sak daih sia) tui pahnih a nei a.

A tui chu nitin ka va en sak ziah a, a lo awp run zel. Mi hi a lo chuk ang hlawih hlawih lehnghal a, zuk khawih tum ila. Rei ve deuh hnuah chuan a tui pakhat zawk chu a lo keu ve ta a, parva note ka hmu ngai lo a, ka hmuh vawikhatna a ni nghe nghe.

A tui pakhat zawk erawh keu tih reng a nei thei lo. A pui hian a awp reng a, chaw te a pe thin. Ruah hi a rawn sur zeuh zeuh a, a rawn sur chhun hian an bu hi a rawn ti huh vek zel a, a khawngaihthlak thin khawp mai. Inchhunga han dah luh ngawt lah a ni chiah bawk si lo. Verandah a tui tling kan ti fai vat vat zel zawk mai a ni.

Tichuan, chu sava note chu a lo thang lian chho zel a. A pa ni awm tak hi a lo awm ve ziah bawk a. An rawn thlawk ri phur phur zel a. Va chhuah hi chuan, a pa hi a thlawk sawn vat a, hla lo te atang min lo en khiau a. A nu hian a bu ah chuk inring ranin min lo melh a. Thlawhsawn pawh a tum ngai chuang lem lo. A fate chu a veng uluk ve hle mai.

Chutia duat taka an enkawl ta chu a lian chak angreng khawp mai a. A tira eng vek kha a hmul te a lo dum tan a, a tei kual ve thei tep tep tawh a. A unaupa/nu tur erawh chu 'artui' a la ni reng a, a bulah a awm ve reng tho.

An bu ah hian pawnchhia remchang chang kan thehlut ve thin a, a lum theih nan. Anni pawhin an hmang tangkai thiam khawpin ka hria. :D

Ka ngaihtuah mai mai a, ran note te, sava note te hi an thang chak bik hle mai. Tiang hian mihring hi thang chak ve ta ila te ka tia, a awhawm angreng viau. Mahse anni erawh an dam hun chhung a rei lo a, mihring te erawh a rei thung.

Ni hnih khat chhung lekin an lo thang duak duak mai thin. Chutia an than chak em avang chuan, an nu te enkawl pawh ngai lem lovin an mahni in an in enkawl thei thuai thuai thin. Kan sava note pawh chu a lo lian chak hle mai, a pui nen an intiat thuak tawh a ni. A pui nen an lo awmdun chang phei chuan a khawi zawk nge a note tih pawh en thuak chuan a hriat theih tawh lo. Mahse han en chian tak tak chuan a pui zawk nge nge chu a rawn thlawk chhuak phurh zel.

Ni e, thil an inzirtir thin ani, nungchate hian. He sava note pawh hi thlawh an inzirtir loh chuan a thlawk thiamlo mai ang. A hnuaia thlalak ah hi chuan a la te deuh a, hei aia a len hnu pawh hian a thlawk thiamlo. Inzirtir turin a puiin a note hi lakchhuah ngaihna a hrelo anih ka ring. An awmna hi a bang a sang em a, thlawk thiam sa lo tan chuan thlawh chhuah theihna mai a ni lo. A note pawh chu va kal hnaih deuh hian a hlau thei ltk a, thlawh chhuah tum niawm tak hian a awm ve thin a, a thlawk thei lem hlei lo a.

Chu sava thlawk thiamlo chu, kan nuih a tiza ta em em mai a. Vawikhat chu kan inchhungah kan lalut chhin a, a thlawk thiam nge thiamlo en nan. A thlawk thiamlo chiang mai, a thla chu a zap vei phar phar mahse, khum hnuaiah a tlan lut rang ltk. Kan man leh a, a bawmah bawk chuan kan khung leh ta a.



Mahse a Siamtu siam dan a ni tlat lo a. Thlawk thiamlo reng tur pawh a ni hek lo. Tichuan, vawiin lamah te ka va en leh chuan a lo awm ta reng reng lo mai, hmun hla takah a thlawk chhuak ta anih ka ring!! A aiah tui thar a lo awm leh. :D